Ho Bolela Eng ho Rata Molimo?

HOO e ka bang lilemo tse likete tse tšeletseng tse fetileng, lesea la pele le ile la tsoaloa. Ka mor’a tsoalo ea lona, ’mè oa lona Eva, o ile a re: “Ke itsoaletse monna ka thuso ea Jehova.” (Genese 4:1) Polelo ea hae e senola hore le hoja ba ne ba se ba ahloletsoe lefu ka lebaka la bofetoheli ba bona, Eva le monna oa hae Adama ba ne ba ntse ba hlokomela Bomolimo ba Jehova. Hamorao ba ile ba tsoala mora oa bobeli. Bashemane bao ba ile ba rehoa Kaine le Abele.

Ha bara bana ba ntse ba hōla, ntle ho pelaelo, ka ho hlahloba pōpo ea hae feela ba ile ba ithuta ho hongata ka lerato la Jehova. Ba ne ba thabela mebala e metle ea tlhaho le liphoofolo tse sa tšoaneng le limela. Molimo o ne a sa ba neha bophelo feela empa o ne a ba nehile le matla a ho fumana thabo bophelong.

Ba ile ba tseba hore batsoali ba bona ba ne ba bōpiloe ba phethahetse le hore morero oa Jehova oa pele e ne e le hore batho ba phele ka ho sa feleng. Ho ka etsahala hore ebe Adama le Eva ba ile ba ba hlalosetsa ka serapa se setle sa Edene, ’me ka tsela e itseng ba tlameha ho hlalosa hore na ke hobane’ng ha ba ile ba lelekoa lehaeng le joalo la paradeise. Hape e ka ’na eaba Kaine le Abele ba ne ba lemohile boprofeta ba bomolimo bo tlalehiloeng ho Genese 3:15. Ka boprofeta boo, Jehova o ile a hlalosa morero oa hae oa ho lokisa litaba ka nako e loketseng molemong oa ba mo ratang le ba ipakang ba tšepahala ho eena.

Ho tseba ka Jehova le ka litšoaneleho tsa hae e tlameha ebe ho ile ha hōlisa ka ho Kaine le Abele takatso ea ho amoheloa ke Molimo. Kahoo, ba ile ba atamela Jehova ka ho mo hlahisetsa linyehelo. Tlaleho ea Bibele e re: “Ha isa-isa, Kaine a tlisetsa Jehova kabelo ea tse melisoang ke lefatše; Abele le eena a mo tlisetsa matsibolo a mang a mohlape oa hae, le mafura a ’ona.”—Genese 4:3, 4.

Takatso ea bona ea ho amoheloa ke Molimo e ile ea rala motheo bakeng sa botsoalle le eena. Kaine o ile a qetella a fetohetse Molimo, athe Abele o ile a tsoela pele a susumetsoa ke lerato la sebele la Molimo. Abele a ka be a sa hlaolela botsoalle bo joalo le Molimo hoja a se ke a qala ka ho fumana tsebo ka botho ba Jehova le merero ea hae.

Le uena u ka tseba Jehova. Ka mohlala, ka Bibeleng u ka ithuta hore Molimo ke motho oa sebele, e seng feela matla a se nang bophelo a tsamaeang a bōpa lintho a sa ikemisetsa. (Bapisa le Johanne 7:28; Baheberu 9:24; Tšenolo 4:11.) Bibele e boetse e ruta hore Jehova ke “Molimo o mohau, o lereko, o liehang ho halefa, o tletseng mohau le ’nete.”—Exoda 34:6.

“Kutlo e Fetisa Sehlabelo”

Joalokaha ho bontšoa ke tlaleho ea Kaine le Abele, ho ba le tsebo ka Molimo le takatso ea ho ba le botsoalle bo haufi-ufi le eena ha hoa lekana. Ke ’nete hore bara ba babeli ba motho ba ile ba atamela Molimo ka linyehelo. Leha ho le joalo, “Jehova a talima Abele le kabelo ea hae; empa ha a ka a talima Kaine leha e le kabelo ea hae. Kaine a halefa haholo, ’me sefahleho sa hae sa sosobana.”—Genese 4:3-5.

Ke hobane’ng ha Jehova a ile a hana sehlabelo sa Kaine? Na ho ne ho e-na le ho phoso ka boleng ba nyehelo ea hae? Na Jehova o ile a khopisoa ke hore Kaine o ne a mo etselitse nyehelo ea “tse melisoang ke lefatše” ho e-na le sehlabelo sa phoofolo? Ha ho joalo. Hamorao, ka thabo Molimo o ile a amohela linyehelo tsa lijo-thollo le tsa litholoana tse ling tse melisoang ke lefatše tse neng li etsoa ke barapeli ba hae ba bangata. (Levitike 2:1-16) Ka hona, ka ho hlakileng ho ne ho e-na le ho phoso ka pelo ea Kaine. Jehova o ne a khona ho bona pelo ea Kaine ’me a mo lemosa: “U bohale ke’ng? ’me sefahleho sa hao se sosobanetse’ng? Ekare ha u etsa hantle, na sefahleho sa hao se ke ke sa ela na? ’Me ha u sa etse hantle, sebe se laletse monyako, ’me litakatso tsa sona li lebile ho uena.”—Genese 4:6, 7.

Lerato la sebele ho Molimo le bolela ho fetang feela ho mo etsetsa mahlabelo. Ke ka hona Jehova a ileng a khothalletsa Kaine hore a ‘etse hantle.’ Molimo o ne a batla kutlo. Kutlo e joalo ho Molimo e ka be e thusitse Kaine hore a rale motheo o motle oa botsoalle bo lerato le ’Mōpi. Bibele e hatella bohlokoa ba kutlo ka mantsoe ana: “Hleka Jehova o khahloa ke licheso le ke mahlabelo, joalo ka ha a khahloa ha ho utluoa lentsoe la Jehova na? Bona kutlo e fetisa sehlabelo, ’me mamelo e fetisa mafura a lipheleu.”—1 Samuele 15:22.

Hamorao khopolo ena e ile ea tiisoa hantle ke mantsoe a 1 Johanne 5:3: “Se boleloang ke lerato la Molimo ke sena, hore re boloke litaelo tsa hae; ’me leha ho le joalo litaelo tsa hae ha li boima.” Ha ho na tsela e molemo ea ho bontša lerato la rōna ho Jehova ho feta ho ipeha tlas’a matla a hae a ho laela. Hona ho bolela ho ba le kutlo molaong oa Bibele oa boitšoaro. (1 Bakorinthe 6:9, 10) Ho bolela ho rata se molemo le ho hloea se sebe.—Pesaleme ea 97:10; 101:3; Liproverbia 8:13.

Ponahatso e ’ngoe ea bohlokoa ea lerato la rōna ho Molimo ke lerato la rōna ho moahisani. Bibele ea re bolella: “Haeba leha e le mang a re: ‘Ke rata Molimo,’ ’me leha ho le joalo a hloile mor’abo, ke ea leshano. Etsoe ea sa rateng mor’abo, eo a mo boneng, e ke ke ea e-ba ea ratang Molimo, eo a e-s’o mo bone.”—1 Johanne 4:20.

Botsoalle bo Haufi-ufi le Molimo Boa Khoneha

Ba bang ba ka ’na ba re, ‘Ke rapela Jehova. Ke utloa melao ea hae. Ke sebelisana le batho ba bang hantle. Ke etsa tseo kaofela. Ho ntse ho le joalo, ha ke hlile ha ke ikutloe ke le haufi le Molimo. Ha ke ikutloe ke e-na le lerato le matla ho eena, ’me seo se etsa hore ke ikutloe ke le molato.’ Ba bang ba ka ’na ba nahana hore ha ba tšoanelehe bakeng sa ho fumana botsoalle bo haufi-ufi joalo le Jehova.

Ka mor’a lilemo tse ka bang 37 tsa tšebeletso e nehetsoeng ho Jehova, Mokreste e mong o ile a ngola: “Ka makhetlo a mangata bophelong ba ka ke ’nile ka ikutloa hore ka tsela e itseng ke etsa mabalankoe tšebeletsong ea ka ho Jehova, hore mohlomong pelo ea ka ha ebile ha e ho eona. Empa ke ne ke tseba hore ho sebeletsa Jehova e ne e le ntho e lokileng, ’me ke ne nke ke ka itumella ho emisa. Leha ho le joalo, neng le neng ha ke ne ke bala ka motho e mong ea reng ‘pelo ea hae e ne e tletse ka lerato ho Jehova,’ ke ne ke ipotsa, ‘Ho etsahala’ng ka ’na, kaha ha ho mohla nkileng ka ikutloa ka tsela eo?’” Ke joang re ka fumanang botsoalle bo haufi-ufi le Molimo?

Ha u hlile u rata motho ea itseng, hangata u nahana ka motho eo. U ba le takatso e matla ea ho ba haufi le eena kaha ua mo tsotella. Ha u ntse u mo bona, u bua le eena le ho nahana ka eena haholoanyane, lerato leo u mo ratang ka lona le hōla le ho feta. Molao-motheo ona o boetse oa sebetsa le ho hlaoleleng ha hao lerato bakeng sa Molimo.

Ho Pesaleme ea 77:13 (BPN), mongoli ea bululetsoeng o re: “Ke nahana mesebetsi eohle ea hae, ke imamella liketso tsa hae tse kholo.” Ho thuisa ke habohlokoa ha u hlaolela lerato bakeng sa Molimo. Sena ke ’nete, haholo-holo ha re nahana taba ea hore ha a bonahale. Empa ha u ntse u nahana ka eena haholoanyane, e tla ba oa sebele haholoanyane ho uena. Ke ka tsela eo feela u ka hlaolelang botsoalle bo tebileng le bo nang le boikutlo bo mofuthu ka eena—kaha ke oa sebele ho uena. 

Takatso ea hao ea ho thuisa khafetsa ka litsela le mesebetsi ea Jehova e tla itšetleha ka hore na u mo mamela hangata hakae. U mamela ka ho bala le ho ithuta Lentsoe la hae, Bibele, kamehla. Mopesaleme o bua ka motho ea thabileng e le ea ‘ithabelang molaong oa Jehova, molao oa oona a o nahana motšehare le bosiu.’—Pesaleme ea 1:1, 2.

Karolo e ’ngoe ea bohlokoa ke thapelo. Ke kahoo hangata Bibele e re khothalletsang ho rapela—“ka nako e ’ngoe le e ’ngoe,” ‘ho nehelana ka nako thapelong,’ ‘ho phehella thapelong’ le ‘ho rapela re sa phetse.’ (Baefese 6:18; 1 Bakorinthe 7:5; Baroma 12:12; 1 Bathesalonika 5:17) Ho rapela ha rōna Jehova re sa phetse ho tla re etsa ba ratehang ho eena, ’me kholiseho ea hore oa mamela e tla re hulela haufi le eena. Sena se ile sa tiisoa ke mopesaleme ha a phatlalatsa: “Ke rata Jehova, hobane o utloile lentsoe la ka, le merapelo ea ka; hobane o ntšekehetse tsebe; ke tla mo rapela ke hona ka matsatsi ’ohle a ho phela ha ka.”—Pesaleme ea 116:1, 2.

Ho Etsisa Molimo ea Lerato

Jehova o molemo ho rōna. E le ’Mōpi oa bokahohle, ka sebele o na le lintho tse ngata tseo a lokelang ho li nahanela le ho li hlokomela. Leha ho le joalo, Bibele e re bolella hore leha a phahamile hakaalo, o ntse a hlokomela batho bao a ba bōpileng. Oa re rata. (1 Petrose 5:6, 7) Mopesaleme o tiisa sena ka mantsoe a hae: “Jehova, Morena oa rōna, lebitso la hao le bokhabane hakakang lefatšeng lohle, uena ea beileng khanya ea hao maholimong! Ha ke boha leholimo la hao, mosebetsi oa menoana ea hao, khoeli le linaleli tseo u li bōpileng, ke re: Na motho ke’ng, ha u tla mo hopola? le mor’a motho ke’ng, ha u tla mo hlokomela?”—Pesaleme ea 8:1, 3, 4.

Ke joang Jehova a hopotseng motho? Bibele ea arabela: “Ka sena lerato la Molimo le ile la bonahatsoa tabeng ea rōna, hobane Molimo o ile a romela Mora oa hae ea tsoetsoeng a ’notši lefatšeng e le hore re ka fumana bophelo ka eena. Lerato le ka tsela ena, eseng hore re ratile Molimo, empa hore o ile a re rata ’me a romela Mora oa hae e le sehlabelo sa poelano bakeng sa libe tsa rōna.”—1 Johanne 4:9, 10.

Ke joang sehlabelo see sa poelano e leng bopaki bo boholo ba lerato la Molimo? A re nahaneng ka se ileng sa etsahala serapeng sa Edene. Adama le Eva ba ne ba talimane le qeto ea hore na ba ipeha tlas’a molao oa Jehova ka tebello ea bophelo bo phethahetseng ka ho sa feleng kapa ho fetohela Jehova ka phello ea lefu. Ba ile ba khetha ho ba bafetoheli. (Genese 3:1-6) Ka ho etsa joalo, ba ile ba boela ba ahlolela batho bohle lefung. (Baroma 5:12) Ka boikhohomoso ba ile ba re amoha monyetla oa hore re iketsetse qeto. Ha ho le ea mong oa rōna ea bileng le lentsoe tabeng ena.

Leha ho le joalo, ka lerato Jehova o lutse a hopotse motho, a hlokomela maqakabetsi a hae. Ka lefu la sehlabelo la Mora oa Hae, Jesu Kreste, Jehova o fane ka motheo bakeng sa e mong le e mong oa rōna hore a ikhethele ka boeena bophelo kapa lefu, kutlo kapa bofetoheli. (Johanne 3:16) Ho joalokaha eka Jehova o re fa monyetla oa ho ikarabella ka lekhotleng—monyetla oa ho khutlela Edene, ha re tšoantšetsa, le ho iketsetsa qeto. Ena ke pontšo e khōlō ka ho fetisisa ea lerato e kileng ea etsoa.

Nahana hore na Jehova o ile a mamella bohloko bo bokae ha a bona letsibolo la hae le rohakoa, le hlokofatsoa le ho khokhotheloa thupeng joaloka motlōli oa molao. ’Me Molimo o ile a mamella seo molemong oa rōna. Ka ho tšoanang, ho hlokomela ha rōna bohato ba pele boo Jehova a bo nkileng ba ho re rata pele bo lokela ho re hlohlelletsa ho mo rata le ho re susumelletsa ho mo batla. (Jakobo 1:17; 1 Johanne 4:19) Bibele e re khothalletsa ho ‘batla Jehova le matla a hae, le batle sefahleho sa hae ka mehla! Hopolang mehlolo ea hae, ee a e entseng, le meeka ea hae, le likahlolo tse tsoileng molomong oa hae.’—Pesaleme ea 105:4, 5.

Ho ba le kamano ea botho le botsoalle bo lerato le Molimo, ho ba motsoalle oa hae, ho ka etsahala. Ke ntho e ka finyelloang. Ka sebele, re ke ke ra petelletsa ho lekanya lerato la rōna ho Molimo le botsoalle ba batho. Lerato leo re nang le lona ho balekane ba rōna, batsoali, banab’abo rōna, bana ba rōna, kapa metsoalle le fapane le lerato leo re nang le lona ho Molimo. (Matheu 10:37; 19:29) Ho rata Jehova ho kopanyelletsa boitelo, borapeli, tšebeletso le boinehelo bo sa lekanyetsoang tsa rōna ho eena. (Deuteronoma 4:24) Ha ho na botsoalle bo bong bo nang le kamano e haufi joalo. Ho ntse ho le joalo, re ka hlaolela maikutlo a matla le a tebileng bakeng sa Molimo ka tsela e hlomphang, ka tšabo.—Pesaleme ea 89:7.

Le hoja u sa phethahala, joaloka Kaine le Abele u na le monyetla oa ho rata ’Mōpi oa hao. Kaine o ile a iketsetsa qeto ea hae, a tlatsa Satane ’me a fetoha ’molai oa pele oa motho. (1 Johanne 3:12) Ho fapana le hoo, Abele o tla hopoloa ke Jehova e le monna oa tumelo le ho loka ’me o tla putsoa ka bophelo Paradeiseng e tlang.—Baheberu 11:4.

Le uena u na le khetho. Ka thuso ea moea oa Molimo le Lentsoe la hae, ka sebele u ka rata Molimo “ka pelo ea hao eohle, [le ka soule ea hao eohle, NW], le ka matla a hao ’ohle.” (Deuteronoma 6:5) Jehova le eena o tla tsoela pele a u rata, kaha ke “moputsi oa ba mo batlang ka tieo.”—Baheberu 11:6.

[Setšoantšo se leqepheng la 7]

Sehlabelo sa Abele se ne se amoheleha ho Molimo