Ha ho Letho le ka ‘re Arohanyang le Lerato Leo Molimo a re Bontšitseng Lona’

1. Batho ba bangata, ho akarelletsa le Bakreste ba bang ba ’nete, ba tepelletsoa ke boikutlo bofe bo nyahamisang?

NA JEHOVA Molimo oa u rata u le motho ka bomong? Ba bang ba lumela hore Molimo o rata batho ka kakaretso, joalokaha Johanne 3:16 e bolela. Empa ha e le hantle ba na le boikutlo ba hore ‘Molimo a ke ke a nthata ke le motho ka bomong.’ Le Bakreste ba ’nete ba ka ’na ba e-ba le lipelaelo tse itseng ka taba ena ka linako tse ling. Motho e mong a nyahame o ile a re: “Ke fumana ho le thata ho lumela hore Molimo o tsotella letho ka ’na.” Na ka linako tse ling le uena u ba le lipelaelo tse kang eo?

2, 3. Ke mang ea batlang hore re lumele hore ha re na thuso ea letho kapa hore ha re ratehe mahlong a Jehova, hona re ka loantša boikutlo boo joang?

² Satane o batla ho etsa hore re lumele hore Jehova Molimo ha a re rate ebile ha a re nke re le ba bohlokoa. Hopola hore Satane o batla ho etsa hore batho ba nahane lintho tse fosahetseng. (2 Bakorinthe 11:3) Hangata etsa joalo ka ho etsa hore ba nahana hore ba phahametse batho ba bang. Empa o boetse o thabela ho etsa hore batho ba ikutloe ba se na thuso. (Johanne 7:47-49; 8:13, 44) Sena o se etsa ka ho khetheha ‘mehleng ena ea bofelo’ e thata. Batho ba bangata kajeno ba holela malapeng a “se nang lerato.” Ba bang ba qeta nako e ngata ba e-na le batho ba bohale, ba baithati le ba hlooho li thata. (2 Timothea 3:1-5) Nako eo ba e qetileng ba tšoeroe hampe, ba khetholloa ka lebaka la morabe, kapa ba hloiloe e ka ’na eaba e entse hore batho bao ba lumele hore ha ba na thuso ea letho kapa hore ha ba ratehe.

³ Haeba u e-na le maikutlo ao a tepeletsang, u se ke oa nyahama. Nako le nako ba bangata ba rona re ikahlola haboima ho sa hlokahale. Empa hopola hore Lentsoe la Molimo le reretsoe ho “lokisa lintho” le ‘ho fothola lintho tse metseng ka matla.’ (2 Timothea 3:16; 2 Bakorinthe 10:4) Bibele e re: “Re tla ikholisa hore Molimo oa re rata. Leha lipelo tsa rona li ka re qosa ka ntho efe kapa efe, re lule re hopola hore Molimo o moholo ho lipelo tsa rona ebile o tseba lintho tsohle.” (1 Johanne 3:19, 20) A re hlahlobeng litsela tse ’nè tseo ka tsona Mangolo a re thusang ho “ikholisa” ka lerato la Jehova.

Jehova o u Nka u le oa Bohlokoa

4, 5. Papiso ea Jesu ea lirobele e bontša joang hore re ba bohlokoa mahlong a Jehova?

⁴ Tsela ea pele ke hore Bibele e ruta ka ho toba hore Molimo o nka mohlanka e mong le e mong oa hae e le oa bohlokoa. Ka mohlala, Jesu o ile a re: “Le hoja lirobele tse peli li rekisoa ka chelete ea tšepe, ha ho le se le seng sa tsona se tla oela fatše Ntate oa lona a sa tsebe. Ha e le lona, o tseba palo ea moriri o lihloohong tsa lona. Ka hona, le se ke la tšoha, le bohlokoa ho feta lirobele tse ngata.” (Matheu 10:29-31) Nahana ka seo mantsoe ao a neng a se bolela ho bamameli ba Jesu lekholong la pele la lilemo.

⁵ Re ka ’na ra ipotsa hore na ke hobane’ng ha motho a ne a ka reka serobele. Mehleng ea Jesu serobele e ne e le nonyana e theko e tlase ka ho fetisisa e neng e rekisoa e le lijo. Hlokomela hore motho o ne a fumana lirobele tse peli ka chelete e le ’ngoe ea tšepe ea boleng bo tlase. Empa hamorao Jesu o ile a re haeba motho a ikemiselitse ho ntša lichelete tse peli tsa tšepe, o ne a fumana lirobele tse hlano, eseng tse ’nè. Ho ne ho fanoa ka nonyana eo ea pasela joalokaha eka e ne e se ea bohlokoa ho hang. Mohlomong linonyana tseo e ne e se tsa bohlokoa ho batho, empa ’Mopi eena o ne a li talima joang? Jesu o ile a re: “Ha ho le se le seng sa tsona [esita le sa pasela] seo Molimo a se lebalang.” (Luka 12:6, 7) Mohlomong joale re khona ho bona ntlha eo Jesu a neng a e hatisa. Haeba Jehova o nka serobele se le seng e le sa bohlokoa joalo, e tlameha ebe o nka motho e le oa bohlokoa ho feta! Joalokaha Jesu a hlalositse, Jehova o tseba sohle ka rona. Le moriri o lihloohong tsa rona o baliloe!

6. Ke hobane’ng ha re kholisehile hore Jesu o ne a bua taba ea sebele ha a re moriri oa lihlooho tsa rona o baliloe?

⁶ Moriri oa rona o baliloe? Ba bang ba ka ’na ba nka hore Jesu o ne a feteletsa taba mona. Leha ho le joalo, ak’u nahane ka tšepo ea tsoho. E tlameha ebe Jehova o re tseba hantle hakaakang e le hore a ka re bopa bocha! O re nka re le ba bohlokoa hoo a hopolang ntho e ’ngoe le e ’ngoe ka rona, ho akarelletsa liphatsa tsa rona tsa lefutso le mehopolo le liphihlelo tseo re bileng le tsona bophelong bohle ba rona.a Ho bala moriri oa rona oo ka karolelano e ka bang liqoba tse 100 000 hloohong e ne e tla ba linyane feela ha ho bapisoa.

Jehova o Ananela Eng ka Rona?

7, 8. (a) Litšobotsi tse ling tseo Jehova a thabelang ho li fumana ha a ntse a hlahloba lipelo tsa batho ke life? (b) Ke mesebetsi efe e meng eo re e etsang eo Jehova a e nkang e le ea bohlokoa?

⁷ Tsela ea bobeli ke hore Bibele e re ruta seo Jehova a se nkang e le sa bohlokoa ho bahlanka ba hae. Ka mantsoe a mang, o thabisoa ke litšobotsi tsa rona tse ntle le ke boiteko boo re bo etsang. Morena Davida o ile a bolella mora oa hae Solomone ho re: “Jehova o hlahloba lipelo tsohle ’me o khona ho bona lintho tsohle tseo motho a li nahanang.” (1 Likronike 28:9) Ha Molimo a ntse a hlahloba lipelo tsa batho ba limilione tse likete lefatšeng lena le mabifi, le tletseng lehloeo, e tlameha ebe o thaba hakaakang ha a fumana pelo e ratang khotso, ’nete le ho loka! Ho etsahala’ng ha Molimo a fumana pelo e mo ratang ka lerato le khaphatsehang, e batlang ho ithuta ka eena le ho abela ba bang tsebo eo? Jehova o re bolella hore o ela hloko ba bolellang ba bang ka eena. Ebile o na le ‘buka’ bakeng sa bohle “ba mo hlomphang le ba nahanisisang ka lebitso la hae.” (Malakia 3:16) Litšobotsi tseo ke tsa bohlokoa ho eena.

⁸ Ke mesebetsi efe e meng e molemo eo Jehova a e nkang e le ea bohlokoa? Ka sebele ke boiteko ba rona ba ho etsisa Mora oa hae, Jesu Kreste. (1 Petrose 2:21) Mosebetsi o mong o hlokahalang haholo oo Molimo a o nkang e le oa bohlokoa ke oa ho phatlalatsa litaba tse monate tsa ’Muso oa hae. Ho Baroma 10:15, rea bala: “A matle hakaakang maoto a ba bolelang litaba tse monate!” Ha se hangata re ka nahanang ka maoto a rona a sa reng letho e le a matle. Empa mona a emela boiteko boo bahlanka ba Jehova ba bo etsang boboleling ba litaba tse monate. Boiteko boo bohle bo botle ebile ke ba bohlokoa mahlong a hae.—Matheu 24:14; 28:19, 20.

9, 10. (a) Ke hobane’ng ha re ka kholiseha hore Jehova o nka ho mamella ha rona mathata a sa tšoaneng e le habohlokoa? (b) Le ka mohla Jehova ha a talime bahlanka ba hae ba tšepahalang ka litsela life tse fosahetseng?

⁹ Jehova o boetse o nka ho mamella ha rona e le habohlokoa. (Matheu 24:13) Hopola hore Satane o batla hore u furalle Jehova. Letsatsi ka leng leo ka lona u lulang u tšepahala ho Jehova u thusa ho fana ka karabo thohakong ea Satane. (Liproverbia 27:11) Ka linako tse ling ho thata ho mamella. Ho kula, mathata a lichelete, khatello ea maikutlo le litšitiso tse ling li ka etsa hore letsatsi ka leng le fetang e be teko. Ho lebella ntho e liehang ho phethahala le hona ho ka nyahamisa. (Liproverbia 13:12) Ho mamella liphephetso tse joalo ke habohlokoa le ho feta ho Jehova. Ke kahoo Morena Davida a ileng a kopa Jehova hore a bokelle meokho ea hae ka “lekukeng,” a phaella ka kholiseho a re: “U ngotse matšoenyeho a ka bukeng ea hao.” (Pesaleme ea 56:8) E, Jehova o bokella meokho le matšoenyeho ’ohle ao re a mamellang ha re tsoela pele re tšepahala ho eena ebile oa a hopola. Le ’ona ke a bohlokoa mahlong a hae.

¹⁰ Leha ho le joalo, pelo e ikahlolang e ka ’na ea qhelela ka thoko bopaki bo joalo ba hore re ba bohlokoa mahlong a Molimo. E ka ’na ea lulela ho hoeshetsa ea re: ‘Empa ho na le ba bang ba bangata ba behang mohlala ho mpheta. E tlameha ebe Jehova o soaba hakaakang ha a mpapisa le bona!’ Jehova ha a bapise ebile oa tenyetseha hape ha a nahane ka tsela e hlokang kutloelo-bohloko. (Bagalata 6:4) O hlahloba lipelo tsa rona ka hlokolosi, ’me o nka se molemo e le sa bohlokoa le haeba se le senyenyane.

Jehova o Sefa se Molemo ho se Sebe

11. Re ka ithuta eng ka Jehova tseleng eo a ileng a sebetsa taba ea Abija ka eona?

¹¹ Tsela ea boraro ke hore ha Jehova a re hlahloba, ka hloka o batla litšobotsi tse rona tse ntle. Ka mohlala, ha Jehova a laela hore lelapa lohle la bokoenehi la Morena Jeroboame le timetsoe, o ile a laela hore e mong oa bara ba morena eo, e leng Abija, a patoe ka tsela e hlomphehang. Hobane’ng? “Ke eena feela oa lelapa la Jeroboame eo Jehova Molimo oa Iseraele a fumaneng ntho e ntle ho eena.” (1 Marena 14:1, 10-13) Ha e le hantle, Jehova o ile a sefa pelo ea mohlankana eo ’me a fumana “ntho e ntle” ho eona. Ho sa tsotellehe hore na ntho eo e ntle e ne e le nyenyane kapa e fokola hakae, Jehova o ile a fumana e le ea bohlokoa hore e ka ngoloa Lentsoeng la hae. O ile a ba a e putsa, a bontša mohau o loketseng ho setho seo sa lelapa la bakoenehi.

12, 13. (a) Taba ea Morena Josafate e bontša joang hore Jehova o batla se setle ho rona esita leha re etsa sebe? (b) Jehova e ba Motsoali ea lerato joang ha ho tluoa tabeng ea mesebetsi ea rona e metle le litšobotsi tsa rona tse ntle?

¹² Mohlala o ikhethang le ho feta o ka bonoa ho Morena Josafate ea molemo. Ha morena eo a etsa ketso e booatla, moprofeta oa Jehova o ile a re ho eena: “Jehova o u halefetse ka lebaka la sena.” E ne e le taba e tebileng hakaakang! Empa molaetsa oa Jehova ha oa ka oa fella moo. O ile oa tsoela pele ho re: “Leha ho le joalo, ho na le lintho tse ntle tseo Molimo a li fumaneng ho uena.” (2 Likronike 19:1-3) Kahoo khalefo ea Jehova e lokileng ha ea ka ea mo sitisa ho bona se setle ho Josafate. O ne a fapane hakaakang le batho ba sa phethahalang! Ha ba bang ba re khopisitse, re ka ’na ra ba le tšekamelo ea ho tlolisa mahlo makhabane a bona. Hape ha re entse sebe, masoabi, ho hlajoa ke lihlong le boikutlo ba ho ba molato li ka ’na tsa re sitisa ho bona se setle ho rona. Leha ho le joalo, hopola hore haeba re bakela libe tsa rona ’me re leka ka matla ho se hlole re li etsa, Jehova oa re tšoarela.

¹³ Ha Jehova a ntse a batla makhabane a hao, o lahla libe tseo, feela joalokaha motho ea hloekisang lirafshoa ea batlang khauta a lahla lehlohlojane le se nang thuso. Jehova o nka litšobotsi tsa hao tse ntle le mesebetsi ea hao e metle joaloka matlotlo ao a bohlokoa. Na u kile oa hlokomela kamoo batsoali ba lerato ba sa batleng letho kateng ka litšoantšo kapa lintho tseo bana ba bona ba li entseng sekolong, ka nako e ’ngoe ho se ho bile ho fetile nako e telele le bana ba se ba bile ba li lebetse? Jehova ke Motsoali ea lerato ka ho fetisisa. Hafeela re lula re tšepahala ho eena, a ke ke a lebala mesebetsi ea rona e metle le litšobotsi tsa rona tse ntle. Ha e le hantle, o nka ho e lebala e le ho sa lokang, ’me ha ho mohla a sa lokang. (Baheberu 6:10) O boetse o re sefa ka tsela e ’ngoe hape.

14, 15. (a) Ke hobane’ng ha ho se phethahale ha rona ho sa sitise Jehova ho bona se setle ho rona? Fana mohlala. (b) Jehova o tla etsa eng ka litšobotsi tse ntle tseo a li fumanang ho rona, hona o talima batho ba hae ba tšepahalang joang?

¹⁴ Jehova o talima ka nģ’ane ho ho se phethahale ha rona ’me o bona seo re ka se finyellang. Nahana ka sena: Batho ba ratang litšoantšo tse toroiloeng ba etsa matsapa ’ohle ho tsosolosa litšoantšo tse senyehileng hampe. Ka mohlala, ha motho e mong a senya setšoantšo sa Leonardo da Vinci sa boleng ba liranta tse limilione tse ka bang 540, se National Gallery e London, Engelane, ha ho motho ea ileng a etsa tlhahiso ea hore kaha setšoantšo seo se se se senyehile, se lokela ho lahloa. Empa hang-hang mosebetsi oa ho tsosolosa setšoantšo seo se entsoeng ka bokhabane se ka bang lilemo li 500 o ile oa qala. Hobane’ng? Hobane e ne e le sa bohlokoa ho barati ba litšoantšo. Na ha u oa bohlokoa ho feta setšoantšo se entsoeng ka choko le mosili? Ka sebele u oa bohlokoa mahlong a Molimo ho sa tsotellehe hore na e ka ’na eaba u sentsoe hakae ke ho se phethahale hoo u ho futsitseng. (Pesaleme ea 72:12-14) Jehova Molimo, ’Mopi ea hloahloa oa batho, o tla etsa se hlokahalang ho etsa hore bohle ba amohelang tlhokomelo ea hae e lerato ba boele phethehong.—Liketso 3:21; Baroma 8:20-22.

¹⁵ E, Jehova o bona se setle ho rona seo rona re ka ’nang ra sitoa ho se bona. ’Me ha re ntse re mo sebeletsa, o tla holisa ntho e ntle eo ho fihlela qetellong re e-ba ba phethahetseng. Ho sa tsotellehe hore na lefatše la Satane le re tšoere joang, Jehova o nka bahlanka ba hae ba tšepahalang e le matlotlo.—Hagai 2:7.

Jehova o Bonahatsa Lerato la Hae ka Liketso

16. Bopaki bo boholo ka ho fetisisa ba lerato la Jehova ho rona ke bofe, hona re tseba joang hore mpho ee e fuoa rona re le batho ka bomong?

¹⁶ Tsela ea bone ke hore Jehova o etsa ho hongata ho paka lerato la hae ho rona. Ka sebele, sehlabelo sa Kreste sa tefo ea topollo ke karabo e matla ka ho fetisisa leshanong la Satane la hore ha re ba bohlokoa kapa hore ha re ratehe. Le ka mohla ha rea lokela ho lebala hore lefu le bohloko leo Jesu a fetileng ho lona palong, le bohloko bo boholo le ho feta boo Jehova a ileng a bo utloa nakong ea ha a shebeletse Mora oa hae ea ratoang a shoa, ke bopaki ba lerato leo ba re ratang ka lona. Ka masoabi, batho ba bangata ba thatafalloa ho lumela hore mpho ena e ne e fuoa bona e le batho ka bomong. Ba ikutloa ba sa tšoanelehe. Leha ho le joalo, hopola hore moapostola Pauluse e ne e kile ea e-ba mohlorisi oa balateli ba Kreste. Empa o ile a ngola: ‘Mora oa Molimo o ile a nthata a ba a fana ka bophelo ba hae molemong oa ka.’—Bagalata 1:13; 2:20.

17. Jehova o re hulela ho eena le ho Mora oa hae ka litsela life?

¹⁷ Jehova o paka lerato la hae ho rona ka ho re thusa re le batho ka bomong ho rua molemo sehlabelong sa Kreste. Jesu o ile a re: “Ha ho motho ea ka tlang ho ’na ntle le ha a huloa ke Ntate ea nthomileng.” (Johanne 6:44) E, Jehova o re hulela ho Mora oa hae le tšepong ea bophelo bo sa feleng. Joang? Ka mosebetsi oa boboleli o re finyellang re le batho ka bomong le ka moea oa hae o halalelang, oo a o sebelisang ho re thusa ho utloisisa le ho sebelisa linnete tsa moea ho sa tsotellehe mefokolo ea rona le ho se phethahale ha rona. Ka hona, Jehova a ka bua ka rona kamoo a ileng a bua kateng ka Iseraele: “Ke u ratile ka lerato le sa feleng. Ke ka lebaka la lerato lena ke ileng ka u tšepahalla le ho u hulela ho ’na.”—Jeremia 31:3.

18, 19. (a) Jehova o re bontša lerato la hae ka tsela efe e tobileng ka ho fetisisa, hona ke’ng e bontšang hore o etsa see ka boeena? (b) Lentsoe la Molimo le re tiisetsa joang hore Jehova ke momameli ea nang le kutloelo-bohloko?

¹⁸ Mohlomong tsela e tobileng ka ho fetisisa eo ka eona re ka utloang lerato la Jehova ho rona ke ea ho sebelisa tokelo ea thapelo. Bibele e mema e mong le e mong oa rona hore a ‘lule a rapela [Molimo].’ (1 Bathesalonika 5:17) Oa mamela. Ebile o bitsoa “Ea Utloang thapelo.” (Pesaleme ea 65:2) Ha aa abela motho leha e le ofe e mong boemo bona, esita le Mora oa hae. Ak’u nahane feela, ’Mopi oa lintho tsohle o re phehella hore re mo atamele ka thapelo, ka bolokolohi ba puo. Ke momameli ea joang? Na ke ea se nang boikutlo, ea se nang qenehelo le ea sa tsotelleng? Le hanyenyane.

¹⁹ Jehova o na le kutloelo-bohloko. Kutloelo-bohloko ke eng? Mokreste e mong ea tšepahalang ea seng a holile o ile a re: “Kutloelo-bohloko ke ha ke utloa bohloko boo u bo utloang ka pelong ea ka.” Na Jehova o hlile o angoa ke bohloko boo re bo utloang? Mabapi le mahlomola a sechaba sa hae sa Iseraele re bala sena: “Nakong ea mahlomola ’ohle a bona le eena o ile a hlomoha.” (Esaia 63:9) Ha se feela hore Jehova o ne a bona mahlomola a sona empa o ne a utloela sechaba bohloko. Hore na o ne a se utloela bohloko ka ho teba hakae ho bontšoa ke mantsoe a Jehova ho bahlanka ba hae, ha a re: “Ea le thetsang o thetsa thaka ea leihlo la ka.”b (Zakaria 2:8) Hoo e ne e tla ba ntho e bohloko hakaakang! E, Jehova o re utloela bohloko. Ha re utloa bohloko, le eena o utloa bohloko.

20. Re lokela ho qoba monahano ofe o sa leka-lekanang haeba re batla ho mamela keletso e ho Baroma 12:3?

²⁰ Ha ho Mokreste ea hlaphohetsoeng hantle kelellong ea ka sebelisang bopaki bona ba hore Molimo o rata bahlanka ba hae le hore o ba nka e le ba bohlokoa e le lebaka la ho ikhohomosa kapa ho iphahamisa. Moapostola Pauluse o ile a re: “Ka lebaka la mosa oo Molimo a mpontšitseng oona, ke eletsa e mong le e mong oa lona hore a se ke a inka a le bohlokoa haholo. Empa e mong le e mong a inahane hantle ho ea ka tumelo eo Molimo a mo abetseng eona.” (Baroma 12:3) Phetolelo e ’ngoe e re mona: “Ke lakatsa ho bolella e mong le e mong oa lona hore a se ke a inka a feta seo a hlileng a leng sona, empa a itekanye ka kelello e hlaphohileng.” (A Translation in the Language of the People, ea Charles B. Williams) Kahoo ha re ntse re utloa mofuthu oa lerato la Ntate oa rona ea leholimong, a re hlaphoheloeng likelellong ’me re hopoleng hore Molimo ha a re bontše lerato hobane re le sebelelitse kapa hobane le re tšoanela.—Luka 17:10.

21. Re lokela ho lula re hanyetsa mashano afe a Satane, hona ke ’nete efe ea Bibele eo re lokelang ho tsoela pele re kholisa lipelo tsa rona ka eona?

²¹ E mong le e mong oa rona o lokela ho etsa sohle se matleng a hae ho hana mashano ’ohle a Satane, ho akarelletsa leshano la hore ha re ba bohlokoa kapa hore ha re ratehe. Haeba lintho tseo u fetileng ho tsona bophelong li entse hore u inke u le tšitiso e kholo hoo le lerato la Molimo le tebileng le ke keng la e koahela, kapa u nke hore mesebetsi ea hao e metle ha e na thuso hoo le mahlo a hae a bonang tsohle a ke keng a e hlokomela, kapa hore libe tsa hao li ngata hoo le lefu la Mora oa hae ea ratoang le ke keng la li koahela, u rutiloe leshano. Hana mashano ao ka pelo eohle ea hao! A re tsoeleng pele ho kholisa lipelo tsa rona ka ’nete e mantsoeng a Pauluse a tsoang ho Molimo, a reng: “Ke kholisehile hore lefu, bophelo, mangeloi, mebuso, lintho tse teng hona joale, lintho tse tlang, matla, bophahamo, botebo kapa lintho tse ling tsohle tse bopiloeng li ke ke tsa re arohanya le lerato leo Molimo a re bontšitseng lona ka Kreste Jesu Morena oa rona.”—Baroma 8:38, 39.