Kamoo Bophelo ba Hao bo ka Bang le Morero Haholoanyane Kateng

MAELE a boholo-holo a re: “U se ke ua ikhathatsa ho bokella leruo; tlohela khopolo ea teng. U le talimela’ng, ha e le moo le tla feta kapele? Le tla mela mapheo ruri, le rurele holimo joalo ka ntsu.” (Liproverbia 23:4, 5) Ka mantsoe a mang, ke bothoto hore re ikhathatse ka ho leka ho bokella leruo, hobane letlotlo le ka fofa joalokaha eka ke ka mapheo a ntsu.

Joalokaha Bibele e bontša, matlotlo a bonahalang a ka nyamela ka potlako. A ka ikela ka bosiu feela ka lebaka la tlokotsi ea tlhaho, ho oa ha moruo, kapa liketsahalo tse ling tse sa lebelloang. Ho feta moo, le bona ba atlehang ho rua ba atisa ho nyahama. Nahana taba ea John, eo mosebetsi oa hae o neng o akarelletsa ho thabisa bo-ralipolotiki, batho ba hlahelletseng lipapaling le marena.

John o re: “Ke ne ke itetse mosebetsing oa ka. Ke ne ke atleha licheleteng, ke lula lihoteleng tse majabajaba ’me ka linako tse ling ke ne ke bile ke e-ea mosebetsing ka sefofane sa jete seo ke se hirileng. Qalong ke ne ke ho thabela, empa ka teneha butle-butle. Batho bao ke neng ke loanela ho ba thabisa ba ne ba nkuka habobebe feela tjee. Bophelo ba ka bo ne bo se na morero.”

Joalokaha John a ile a sibolla, bophelo bo se nang melemo ea lintho tsa moea ha bo khotsofatse. Thutong ea hae ea Thabeng e tsebisahalang, Jesu Kreste o bontšitse kamoo ho ka fumanoang thabo e sa feleng. O itse: “Ho thaba ba elang hloko tlhoko ea bona ea moea, kaha ’muso oa maholimo ke oa bona.” (Matheu 5:3) Kahoo, ho hlakile hore ke bohlale ho etelletsa pele litaba tsa moea bophelong. Leha ho le joalo, ho na le maemo a mang hape a ka thusang hore bophelo bo be le morero haholoanyane.

Lelapa la Hao le Metsoalle ke Lintho Tsa Bohlokoa ka Sebele

Na u ne u ka thabela bophelo haeba ho ne ho se moo u kopanang teng le lelapa la hao ’me u se na metsoalle e haufi? Le hanyenyane. ’Mōpi oa rōna o re bōpelletse le lenyora la ho rata le ho ratoa. Ke lebaka le leng la hore ebe Jesu o re hlakiselitse bohlokoa ba ‘ho rata baahelani ba rōna joalokaha re ithata.’ (Matheu 22:39) Lelapa ke mpho e tsoang ho Molimo ’me ke sebaka se setle sa ho bontša lerato le se nang boithati.—Baefese 3:14, 15.

Malapa a rōna a ka etsa joang hore bophelo ba rōna e be bo nang le morero haholoanyane? Ha e le hantle, lelapa le momahaneng le ka tšoantšoa le serapa se setle se fanang ka tšireletso e khathollang likhatellong tsa bophelo ba letsatsi ka leng. Ka ho tšoanang, ka lapeng, re ka fumana bolekane bo khathollang le mofuthu tse lelekang bolutu. ’Nete ke hore ha ho itlise hore lelapa le fane ka tšireletso e joalo. Leha ho le joalo, ha re ntse re tiisa maqhama a lelapa, re atamelana haholo, ’me bophelo e ba bo enneng haholoanyane. Ka mohlala, nako le tlhokomelo tseo re fanang ka tsona ho bontša lerato le tlhompho ho balekane ba rōna ba lenyalo ke matsete a letsatsi le letsatsi ao qetellong a ka ’nang a tsoala liphello tse enneng haholo.—Baefese 5:33.

Haeba re e-na le bana, re lokela ho loanela hore ho be le tikoloho e nepahetseng eo ba ka hōlisetsoang ho eona. Ho qeta nako le bona, ho bula monyetla oa puisano le ho ba laea moeeng ho ka ’na ha e-ba boima. Empa nako e joalo le boiteko li ka re tlisetsa khotsofalo e khōlō. Batsoali ba atlehang ba nka bana e le tlhohonolofatso, e le lefa le tsoang ho Molimo le lokelang ho hlokomeloa hantle.—Pesaleme ea 127:3.

Metsoalle e molemo le eona e tlatsetsa bophelong bo khotsofatsang le bo nang le morero. (Liproverbia 27:9) Re ka etsa metsoalle e mengata ka ho bontša ho nahanela. (1 Petrose 3:8) Ha re khoptjoa, metsoalle ea ’nete e re thusa hore re khutlele tseleng. (Moeklesia 4:9, 10) “Motsoalle oa ’nete . . . ke mor’abo motho ea tsoaletsoeng ha ho e-na le mahlomola.”—Liproverbia 17:17, NW.

Setsoalle sa ’nete e ka ba se khotsofatsang hakaakang! Ha motsoalle a le teng, ho likela ha letsatsi ho ba hotle haholo, lijo li hlabosa haholo le ’mino o ba monate haholo. Ha e le hantle, lelapa le momahaneng le metsoalle e tšepahalang ke feela litšobotsi tse peli tsa bophelo bo nang le morero. Ke litokisetso life hape tseo Molimo a li entseng tse ka etsang hore bophelo ba rōna bo be le morero haholoanyane?

Ho Khotsofatsa Litlhoko Tsa Rōna Tsa Moea

Joalokaha ho hlokometsoe pejana, Jesu Kreste o amahantse thabo le ho hlokomela litlhoko tsa rōna tsa moea. Re bōpelletsoe le matla a moea le a boitšoaro. Kahoo, Bibele e bua ka “motho oa moea” le “motho ea ka sephiring oa pelo.”—1 Bakorinthe 2:15; 1 Petrose 3:3, 4.

Ho latela An Expository Dictionary of New Testament Words, ea W. E. Vine, pelo ea tšoantšetso e emela “mesebetsi eohle ea motho ea kelello le ea boitšoaro, likarolo tse phethoang ke kelello le maikutlo.” E le ho hlalosa, Vine oa eketsa: “Ka mantsoe a mang, ka tšoantšetso pelo e sebelisetsoa ho emela mohloli oa maikutlo a patehileng a motho.” Buka eona eo e boetse e bolela hore “pelo, kaha e ka hare-hare, e na le ‘motho ea patehileng,’ . . . motho oa sebele.”

Re ka khotsofatsa joang litlhoko tsa “motho oa moea,” kapa “motho ea patehileng,” ke hore, “motho ea ka sephiring oa pelo”? Re nka bohato ba bohlokoa ka ho etsa sena ’me re khotsofatsa litlhoko tsa rōna tsa moea ha re amohela ntlha e boletsoeng ke mopesaleme ea bululetsoeng ea ileng a bina, a re: “Le tsebe hobane Jehova ke Molimo! Ke eena ea re entseng, ’me re ba hae, re sechaba sa hae, re mohlape o alosoang ke eena.” (Pesaleme ea 100:3) Ka ho utloahalang, ho ela sena hloko ho re khannela qetong ea hore re ikarabella ho Molimo. Haeba re batla ho akarelletsoa har’a ‘sechaba sa hae le mohlape o alosoang ke eena,’ re tlameha ho sebetsa tumellanong le Lentsoe la hae, e leng Bibele.

Na ho ikarabella ho Molimo ke tšitiso? Che, hobane ho hlokomela hore boitšoaro ba rōna boa tsotelleha ho Molimo ho eketsa morero bophelong ba rōna. Ho re khothalletsa hore re be batho ba molemo haholoanyane, ’me ke pakane e molemo ka sebele. Pesaleme ea 112:1 (NW) e re: “Ho thaba motho ea tšabang Jehova, ea khahloang haholo ke litaelo tsa hae.” Tšabo ea Molimo e nang le tlhompho le ho mamela litaelo tsa hae ka pelo eohle li ka etsa hore bophelo ba rōna bo be le morero haholoanyane.

Ke hobane’ng ha ho mamela Molimo ho re khotsofatsa? Hobane re na le letsoalo, mpho eo Molimo a e fileng moloko oohle oa batho. Letsoalo ke mohlahlobi oa boitšoaro ea tlalehang ho amohela kapa ho hanyetsa seo re se entseng kapa re nahanang ho se etsa. Bohle re utloile mahlomola a ho tšoenngoa ke letsoalo. (Baroma 2:15) Empa matsoalo a rōna a ka boela a re putsa. Ha re natsa Molimo le batho ba bang, re ikutloa re khotsofetse. Re fumana hore “ho na le thabo e eketsehileng ho faneng ho feta e teng ho amoheleng.” (Liketso 20:35) Ho na le lebaka la bohlokoa la sena.

’Mōpi oa rōna o re entse ka tsela eo ka eona re angoang ke litakatso le litlhoko tsa batho ba bang. Ho thusa ba bang ho tsoala thabo lipelong tsa rōna. Ho phaella moo, Bibele e re tiisetsa hore ha re fa ea hlokang, Molimo o nka sena e le mohau o etselitsoeng eena.—Liproverbia 19:17.

Ntle le hore motho o khotsofala botebong ba pelo, na ho hlokomela litlhoko tsa rōna tsa moea ho ka re thusa ka tsela e sebetsang? Monna e mong oa mohoebi oa Bochabela bo Hare ea bitsoang Raymond o lumela hore ho ka etsa joalo. O re: “Pakane feela eo ke neng ke e-na le eona e ne e le ho etsa chelete. Empa ho tloha ka nako eo ka eona ke ileng ka amohela pelong ea ka hore Molimo o teng le hore Bibele e bolela litakatso tsa hae, ke ile ka ba motho osele. Hona joale ho ikhoantlella ho nka sebaka sa bobeli bophelong ba ka. Ka ho leka ho khahlisa Molimo, ke pholohile boikutlong bo senyang ba lehloeo. Le hoja Ntate a ile a shoa qhoebeshanong, ha ke na takatso ea ho iphetetsa ho ba mo bolaileng.”

Joalokaha Raymond a ile a sibolla, ho hlokomela hantle litlhoko tsa “motho oa moea” ho ka phekola maqeba a tebileng a maikutlo. Leha ho le joalo, ntle leha re ka loana ka katleho le mathata a tlisoang ke letsatsi ka leng, bophelo bo ke ke ba khotsofatsa ka ho feletseng.

Re ka ba le “Khotso ea Molimo”

Lefatšeng lena le phathahaneng, ke matsatsi a seng makae a fetang bothebelele feela. Ho hlaha likotsi, merero ea senyeha le batho baa re soabisa. Litšitiso tsena li ka ’na tsa re hlokisa thabo. Leha ho le joalo, ho ba sebeletsang Jehova Molimo, Bibele e tšepisa ho khotsofala ho tloha botebong ba pelo—e leng “khotso ea Molimo.” Khotso ee re e fumana joang?

Moapostola Pauluse o ile a ngola: “Le se ke la tšoenyeha ka ntho leha e le efe, empa nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla a li tsebisoe Molimo; ’me khotso ea Molimo e fetang monahano oohle e tla lebela lipelo tsa lōna le matla a lōna a kelello ka Kreste Jesu.” (Bafilippi 4:6, 7) Ho e-na le ho leka ho jara mathata a rōna re le bang, ho hlokahala hore re rapele ka tieo, re akhele meroalo ea rōna ea letsatsi le letsatsi ho Molimo. (Pesaleme ea 55:22, NW) Tumelo ea hore o arabela thapeli e joalo ka Mora oa hae, Jesu Kreste, e tla eketseha ha re ntse re hōla moeeng ’me re lemoha kamoo Molimo a re thusang kateng.—Johanne 14:6, 14; 2 Bathesalonika 1:3.

Ha re se re hahile kholiseho ea rōna ho Jehova Molimo, “Ea Utloang thapelo,” re atleha hamolemo ho loana le liteko, tse kang ho kula ka nako e telele, botsofali, kapa ho shoeloa. (Pesaleme ea 65:2, NW) Leha ho le joalo, bakeng sa bophelo bo nang le morero e le kannete, re tlameha hore re boele re nahanele bokamoso.

Thabelang ho ba le Tšepo ea se Tlang

Bibele e tšepisa “maholimo a macha le lefatše le lecha,” puso e lokileng le e tsotellang ea leholimo e busang lelapa la motho le mamelang. (2 Petrose 3:13) Lefatšeng leo le lecha le tšepisitsoeng ke Molimo, ntoa le leeme li tla nkeloa sebaka ke khotso le toka. Sena hase takatso feela e fetang, empa ke kholiseho e ka hōlang ka matla letsatsi le leng le le leng. Ke litaba tse molemo e le kannete ’me ruri ke lebaka la ho thaba.—Baroma 12:12; Tite 1:2.

John, ea boletsoeng qalong, hona joale o ikutloa hore bophelo ba hae bo na le morero haholoanyane. O re: “Le hoja ho se mohla nkileng ka nkela bolumeli holimo, haesale ke lumela ho Molimo. Empa ke ne ke sa etse letho ka tumelo ena ho fihlela Lipaki tsa Jehova tse peli li nketela. Ke ile ka li hobela ka lipotso, tse kang, ‘Ke hobane’ng ha re le moo lefatšeng? Bokamoso ba rōna ke bofe?’ Likarabo tsa tsona tse khotsofatsang tsa Mangolo li ile tsa nketsa hore ka lekhetlo la pele ke qale ho ikutloa ke e-na le morero bophelong. Seo e ne e le qalo feela. Ke ile ka hlaolela ho nyoreloa ’nete e ileng ea nkhannela hore ke fetole sohle seo ke neng ke se nka e le sa bohlokoa. Le hoja ke se ke se morui linthong tsa nama, ke ikutloa ke le moruihali moeeng.”

Joaloka John, mohlomong ho lilemo u sa etse letho ka tsebo ea hao ea moea. Leha ho le joalo, ka ho hlaolela “pelo e hlalefileng,” u ka boela ua e sebelisa. (Pesaleme ea 90:12) Ka boikemisetso le boiteko, u ka ba le thabo, khotso le tšepo tsa ’nete. (Baroma 15:13) A ho be joalo, ’me bophelo ba hao bo ka ba le morero haholoanyane.

[Setšoantšo se leqepheng la 6]

Thapelo e ka etsa hore re be le “khotso ea Molimo”

[Litšoantšo tse leqepheng la 7]

Na u tseba se ka etsang hore bophelo ba lelapa e be bo khotsofatsang haholoanyane?