Ho Tseba Molimo ho re Atametsa ho Eena
’Mopi oa rona ha a matla feela empa o boetse o na le makhabane a ratehang. Hape o batla hore re ithute ka eena le hore re be metsoalle ea hae. (Johanne 17:3; Jakobo 4:8) Ke ka lebaka leo a re boleletseng lintho tse ngata ka eena.
’Mopi oa Rona o na le Lebitso
“E le hore batho ba ka tseba hore uena, eo lebitso la hao e leng Jehova, uena u le mong u Ea Phahameng ka ho Fetisisa holim’a lefatše lohle.”—PESALEME EA 83:18.
Bibele e ruta hore Jehova ke eena feela Molimo oa ’nete. Ke eena ’Mopi oa maholimo le lefatše le lintho tsohle tse phelang. Ke eena feela eo re lokelang ho mo rapela.—Tšenolo 4:11.
Jehova ke Molimo ea Lerato
“Molimo ke lerato.”—1 JOHANNE 4:8.
Jehova o sebelisa Bibele le lintho tseo a li bopileng ho re ruta hore na ke motho ea joang. Lerato ke eona ntho e ka sehloohong eo a nang le eona. Ntho e ’ngoe le e ’ngoe eo a e etsang e susumetsoa ke lerato. Ha re ithuta ka Jehova haholoanyane, re mo rata le ho feta.
Jehova ke Molimo ea Tšoarelang
“U Molimo oa liketso tsa tšoarelo.”—NEHEMIA 9:17.
Jehova oa tseba hore ha rea phethahala. Kahoo o ikemiselitse ho re tšoarela. Ha re kopa tšoarelo ho eena ebile re khaotsa ho etsa lintho tse mpe, o tla re tšoarela ebile a ke ke a re fa kotlo bakeng sa libe tsa rona tsa nakong e fetileng. —Pesaleme ea 103:12, 13.
Jehova o Batla Hore re mo Rapele
“Jehova o haufi le bohle ba ipiletsang ho eena . . . O tla utloa mohoo oa bona o kopang thuso.”—PESALEME EA 145:18, 19.
Jehova ha a hloke hore re latele meetlo e itseng kapa re sebelise litšoantšo ha re mo rapela. O mamela lithapelo tsa rona joalokaha batsoali ba lerato ba mamela bana ba bona.