Molimo

Tlhaloso: Boleng bo Holimo-limo, bo khetholloang ka lebitso, Jehova. Bakeng sa “Molimo,” puo ea Seheberu e sebelisa mantsoe a fanang ka maikutlo a matla, hape a bokhabane, seriti le boholo. Ha ho bapisoa le Molimo oa ’nete, ho na le melimo ea bohata. E meng ho melimo ena e ipeile; e meng e entsoe lintho tse rapeloang ke ba e sebeletsang.

Na ho na le mabaka a utloahalang a ho lumela ho Molimo?

Pes. 19:1: “Maholimo a bolela khanya ea Molimo, ’me sebaka sa leholimo se bonahatsa mosebetsi oa liatla tsa oona.”

Pes. 104:24: “Jehova, mesebetsi ea hao e mengata hakakang! U e entse kaofela ka bohlale; lefatše le tletse matlotlo a hao.”

Ba-Roma 1:20: “Tse sa bonoeng tsa oona, e leng matla a oona a ka mehla le bomolimo ba oona, li bonahala haholo, ha e sa le lintho li hloloa.”

Makasine oa New Scientist o itse: “Maikutlo a batho ba sa rutehang a ntse a tsoela pele—a hore bo-ramahlale ba ‘shanofalitse’ bolumeli. Ke maikutlo ao ka kakaretso a lebelletseng hore bo-ramahlale hase balumeli; hore Darwin o ile a otlella lipekere tsa ho qetela lekeseng la bafu la Molimo; le hore ho tloha nakong eo letoto la liphetoho linthong tsa mahlale le tse sebelisoang le felisitse monyetla leha e le ofe oa tsoho. Ke maikutlo a fosahetseng haholo.”—May 26, 1977, leq. 478.

Setho sa Mokhatlo oa Mahlale oa Mafora se itse: “Taolo ea tlhaho ha e-ea qaptjoa ke kelello ea motho kapa ea hlongoa ke matla a mang a itseng a hlokolosi. . . . Boteng ba taolo bo fana ka maikutlo a tlang esale pele a hore ho na le bohlale bo hlophisang. Bohlale bo joalo hase ba mang kapa mang ha e se ba Molimo.”—Dieu existe? Oui (Paris, 1979), Christian Chabanis, a qotsa Pierre-Paul Grassé, leq. 94.

Bo-ramahlale ba khethollotse metsoako ea lintho tse etsang bokahohle e fetang 100. Kaheho ea tsona eona e bontša kamano e rarahaneng ea lipalo metsoakong ena e etsang bokahohle. Lethathamo la kaheho ea metsoako le bontša boqapi bo totobetseng. Boqapi bo rarahaneng joalo bo ke ke ba e-ba teng ka tsietsi kapa ka mohlolo feela.

Papiso: Ha re bona k’hamera, sea-le-moea, kapa computer, re lumela habonolo hore e tlameha e be li entsoe ke moqapi ea bohlale. Na ekaba ho utloahalang he, ho bolela hore lintho tse rarahaneng ho feta—leihlo, tsebe, le boko ba motho—ha lia qaloa ke Moqapi ea bohlale?

Bona le maqephe 371, 373, tlas’a sehlooho “Pōpo.”

Na boteng ba bokhopo le ba mahlomola bo paka hore Molimo ha o eo?

Nahana ka mehlala: Na ’nete ea hore lithipa li ’nile tsa sebelisetsoa ho bolaea e paka hore ha ho ea li qapileng? Na ho sebelisoa hoa lifofane tse khōlō ho liha liqhomane nakong ea ntoa ke bopaki ba hore ha lia ba le moqapi? Kapa na ho e-na le hoo ke tsela eo lintho tsee li sebelisoang ka eona e bakelang batho mahlomola?

Na hase ’nete hore ho kula ho hongata ke phello ea mekhoa e seng metle eo motho a phelang ka eona le ho itšenyetsa hoa hae tikoloho le ba bang? Na lintoa tse loanoang ke batho hase mohloli o moholo oa mahlomola a batho? Na hase ’nete hape hore, ha ba limillione ba hlomohile ke ho hloka lijo, linaheng tse ling khora e feteletse, hoo bothata ba sebele e leng meharo ea botho? Lintho tsena tsohle li fana ka bopaki ba hore ka masoabi batho ba sebelisa hampe matla ao ba a filoeng ke Molimo le lefatše ka bolona, e seng hore Molimo ha o eo.

Na ka sebele Molimo o tsotella se etsahallang rōna batho?

Ho joalo, ka sebele! Nahana ka bopaki: Bibele e re bolella hore Molimo o qalisitse motho phethehong. (Gen. 1:27, 31; Deut. 32:4) Leha ho le joalo, hore motho a ’ne a thabele mohau oa Molimo, ho ne ho tla itšetleha ka hore a utloe Moetsi oa hae. (Gen. 2:16, 17) Haeba motho a ne a utloa, o ne a tla ’ne a thabele bophelo bo phethahetseng ba botho—ho se ho kula, ho se mahlomola, ho se lefu. ’Mōpi o ne a tla lokisetsa motho tataiso e hlokahalang ’me o ne a tla sebelisa matla a Hae ho sireletsa batho tlokotsing efe kapa efe. Empa motho a qhela tataiso ea Molimo; a ikhethela tsela ea ho ipusa. Ka ho leka ho etsa ntho eo a sa kang a e etsetsoa le ka mohla o itliselitse tlokotsi. (Jer. 10:23; Moek. 8:9; Ba-Roma 5:12) Empa leha ho le joalo, ka makholo-kholo a lilemo Molimo o ’nile oa batla ka mamello bao, ka lebaka la ho o rata le litsela tsa oona, ba utloisisang ho o sebeletsa. Ka pel’a bona o tekile monyetla oa ho thabela mahlohonolo ’ohle ao ho se phethahale hoa motho le puso e mpe ea motho li mo amohileng oona. (Tšen. 21:3-5) Tokisetso eo Molimo o e entseng ka Mora oa oona ho lopolla batho sebeng le lefung ke bopaki bo tsotehang ba lerato la oona le leholo bakeng sa batho. (Joh. 3:16) Hape Molimo o beile nako ea ha o tla senya ba senyang lefatše ’me o etse hore ba ratang ho loka ba thabele bophelo tumellanong le morero oa oona oa mathomo.—Tšen. 11:18; Pes. 37:10, 11; bona le lihlooho tse khōlō “Ho Hlomoha” le “Bokhopo.”

Na Molimo ke motho oa sebele?

Ba-Heb. 9:24: “Kreste . . . o kene leholimong la sebele, a tle a hlahe joale pel’a sefahleho sa Molimo, sebakeng sa rōna.”

Joh. 4:24: “Molimo ke Moea.”

Joh. 7:28: Jesu o itse, “Ea nthomileng ke oa ’nete.”

1 Ba-Kor. 15:44: “’Mele oa nama o teng, le ’mele oa moea o teng.”

Na Molimo o na le boikutlo bo tšoanang le boo re bo amahanyang le ba batho ba phelang?

Joh. 16:27: “Ntate oa le rata e le eena, kahobane le nthatile, ’me le lumetse hoba ke tsoa ho Molimo.”

Esa. 63:9: “Litsietsing tsohle tsa bona a ba tsietsing le bona, . . . o ba lopolotse ka lerato le ka mohau oa hae.”

1 Tim. 1:11, NW: “Molimo o thabileng.”

Na Molimo o bile le qaleho?

Pes. 90:2: “Lithaba li e-so ho ka li hlaha, u e-so ho bōpe lefatše le lintho tsohle, e, ho tloha ho bo sa hlaheng ho isa ho bo sa feleng, e sa le u le Molimo.”

Na hoo hoa utloahala? Likelello tsa rōna li ke ke tsa ho utloisisa ka ho feletseng. Empa hoo hase lebaka le utloahalang la ho ho latola. Nahana ka mehlala: (1) Nako. Ha ho ea ka supang motsotso o itseng e le moo nako e qalileng teng. ’Me ke ’nete hore, le hoja bophelo ba rōna bo fela, nako ha e fele. Ha re latole nako kahobane feela e e-na le litšobotsi tseo re sa li utloisiseng. Ho e-na le hoo, re laola bophelo ba rōna ka eona. (2) Sepaka-paka. Ba fofang sepaka-pakeng ha ba fumane qaleho kapa qetello ea sona. Ha ba ntse ba kenella ka botebo bokahohleng, ba fumana ho eketsehileng. Ha ba latole seo ba se bonang; ba bangata ba re sepaka-paka ha se na tekanyo. Motheo oona oo o sebetsa le ho beng teng hoa Molimo.

Mehlala e meng: (1) Litsebi tsa linaleli li re bolella hore mocheso oa letsatsi mpeng ea lona ke 15 000 000° C. Na re lahla maikutlo ao feela hobane re ke ke ra utloisisa ka botlalo mocheso o mokaalo? (2) Ba re bolella hore Sehlopha sa Linaleli sa Molala oa rōna se seholo hoo lehlaseli la khanya le tsamaeang ka lebelo la lik’hilomithara tse 300 000 ka motsotsoana le ka hlokang lilemo tse 100 000 hore le se haole. Na likelello tsa rōna li hlile li utloisisa ka botlalo sebaka se sekaalo? Empa rea ho amohela hobane bopaki ba bo-ramahlale boa ho tšehetsa.

Ke hofe ho utloahalang haholoanyane—hore bokahohleng ke tholoana ea ’Mōpi ea phelang le ea bohlale? kapa hore bo hlahile feela ka tsietsi mohloling o sa pheleng o se nang tsamaiso e bohlale? Batho ba bang ba nka pono ena ea bobeli hobane haeba ba ka lumela ho ea pele ho ne ho tla bolela hore ba lumela hore ’Mōpi o teng eo litšoaneleho tsa hae ba neng ba sa tl’o li utloisisa ka botlalo. Empa hoa tsebisahala hore bahlalefi ha ba utloisise ka botlalo ho sebetsa hoa liphatsa tsa lefutso tse ka liseleng tse phelang tse rerang hore na lisele tsena li tla hōla joang. Leha e le hore ba utloisisa ka botlalo hore na boko ba motho bo sebetsa joang. Empa, ke mang ea ka latolang hore li teng? Na ka sebele re ka lebella ho utloisisa ntho e ’ngoe le e ’ngoe ka Motho ea moholo hoo a neng a ka etsa hore bokahohle bo be teng, ka kaheho eohle ea bona e rarahaneng le boholo ba bona bo fetisisang?

Na ke hoa bohlokoa ho sebelisa lebitso la Molimo?

Ba-Roma 10:13: “Mang le mang ea rapelang lebitso la Morena [Jehova], o tla bolokeha.”

Ezek. 39:6: “Ba tla tseba hoba ke ’na Jehova.”

Jesu o itse ho Ntate oa hae: “Ke ba [balateli ba hae ba ’nete] tsebisitse lebitso la hao, ’me ke tla ’ne ke ba tsebise lona.”—Joh. 17:26.

Bona le leqephe 187, tlas’a “Jehova.”

Na ke hoa bohlokoa hore na re sebeletsa Molimo ofe, hafeela re e-na le bolumeli bo itseng?

1 Ba-Kor. 10:20: “Lintho tsee bahedene ba li hlabelang aletareng, ba li hlabela bademona, e seng Molimo.”

2 Ba-Kor. 4:4: ‘Molimo oa lefatše lena o ba foufalitse likelello, ke ho re, ba sa lumelang, ba tle ba se ke ba chabeloa ke leseli la Evangeli ea khanya ea Kreste, eo e leng setšoantšo sa Molimo.’ (Mona Diabolose o bitsoa “molimo.” Bona 1 Johanne 5:19; Tšenolo 12:9.)

Matt. 7:22, 23: “Tsatsing leo, ba bangata ba tla re ho ’na [Jesu Kreste]: Morena, Morena, na ha rea ka ra profeta ka lebitso la hao na? Na ha rea ka ra leleka bademona ka lebitso la hao na? Na ha rea ka ra etsa mehlolo e mengata ka lebitso la hao na? Mohlang oo, ke tla ba bolella pepeneneng, ke re: Ha kea ka ka le tseba le mehla; ntloheleng, lōna ba sebetsang bokhopo.” (Le hona ho ipolela hore re Bakreste ha ho tiise hore re sebeletsa Molimo oa ’nete ka ho amohelehang.)

Bona le maqephe 72, 73 tlas’a sehlooho “Bolumeli.”

Haeba Jehova ke oona “Molimo o ’notši oa ’nete,” Jesu ke “Molimo” oa mofuta ofe?

Jesu ka seqo o itse Ntate oa hae ke “Molimo o ’notši oa ’nete.” (Joh. 17:3) Jehova ka seqo a re: “Ha e se ’na, ha ho Molimo.” (Esa. 44:6) Moapostola Pauluse a ngola hore, ho Bakreste ba ’nete, “Molimo o mong feela, e leng Ntat’a rōna.” (1 Ba-Kor. 8:5, 6) Kahoo Jehova o khethehile; ha ho e mong eo a arolelanang boemo le eena. Jehova o ema a fapane hole le lintho tse rapeloang tse kang litšoantšo, batho ba entsoeng melimo le Satane. Tsena kaofela ke melimo ea bohata.

Mangolo a bolela Jesu e le “Molimo,” le oona “Molimo o Matla.” (Joh. 1:1; Esa. 9:6) Empa ha ho kae kapa kae moo a boleloang e le ea Matla ’Ohle, joaloka Jehova. (Gen. 17:1) Jesu o bitsoa “lehlaseli la khanya ea oona [Molimo],” empa Ntate ke Mohloli oa khanya eo. (Ba-Heb. 1:3) Ha ho kae kapa kae moo Jesu a batlang boemo ba Ntate oa hae. O itse: “U tla khumamela Morena [Jehova], Molimo oa hao, u sebeletse eena feela.” (Luka 4:8) Jesu o ka “sebopeho sa Molimo,” ’me Ntate o laetse hore “lebitsong la Jesu, mangole ’ohle . . . a khumame,” empa hona hohle ho etsoa ‘tlotlisong ea Molimo Ntate.’—Ba-Fil. 2:5-11; bona le maqephe 192-196.

Haeba e Mong a Re—

‘Ha ke lumele ho Molimo’

U ka ’na ua arabela: ‘Na haesale u ikutloa ka tsela eo? . . . Pele u fihlela qeto eo, na u ile ua hlahloba bopaki bo itseng boo u bo fumaneng bo susumetsa?’ ’Me mohlomong u ka eketsa: ‘Ena ke taba e nkhahlang haholo ’me ke e nahanne haholo. Lintlha tse ling tseo ke li fumaneng li thusa haholo ke tsena: . . . (Leqepheng la 329, bona sehlohoana “Na ho na le mabaka a utloahalang a ho lumela ho Molimo?” le maqephe 371-373, tlas’a “Pōpo.”)’

Kapa u ka re: ‘Na u bolela hore ha u kholoe hore ho na le ’Mōpi, kapa ke hobane u bone boikaketsi bo bongata likerekeng hoo u se nang tumelo ho seo li se rutang?’ Haeba ke lebaka la bobeli, u ka ’na ua eketsa: ‘Ho na le phapang e khōlō pakeng tsa likereke tsa Bokreste-’mōtoana le Bokreste ba ’nete. Ke ’nete hore Bokreste-’mōtoana bo hatelletse batho, empa Bokreste ba ’nete ha boa ba hatella. Bokreste-’mōtoana bo loanne lintoa, empa Bokreste ha boa li loana. Bokreste-’mōtoana bo hlōtsoe ho fana ka tataiso e loketseng ea boitšoaro, empa Bokreste ha boa hlōloa. Lentsoe la Molimo, Bibele, ha le tšehetse Bokreste-’mōtoana. Ho fapana le moo, le nyatsa Bokreste-’mōtoana.’

Monyetla o mong: ‘Ke ’nile ka buisana hamonate le ba bang ba neng ba ikutloa joaloka uena. Ba bang ho bona ba ne ba re ba sitoa ho amahanya tumelo ho Molimo le mahlomola ’ohle le bokhopo bohle tse teng lefatšeng. Na ke kamoo u ikutloang kateng? (Haeba ho joalo, sebelisa taba e ’ngoe e maqepheng 330, 331, tlas’a sehlohoana “Na boteng ba bokhopo le ba mahlomola ke bopaki ba hore Molimo ha o eo?”)’

‘Ke lumela feela seo ke se bonang, ’me ha ke e-s’o bone Molimo’

U ka ’na ua arabela: ‘Maikutlo ao a atile haholo matsatsing ana. ’Me a na le lebaka. Re phela mokhatlong o tsitlallelang moruong oa lintho tse bonahalang. Empa u motho ea ratang ho bea mabaka, na ha ho joalo?’ ’Me mohlomong u ka eketsa: (1) ‘Na ho na le lintho tseo re ke keng ra li bona ka mahlo a rōna empa re kholoa hore li teng hobane ho e-na le mabaka a utloahalang a ho etsa joalo? Ho thoe’ng ka moea oo re o phefumolohang? Re ka ’na ra o utloa ha o foka hasesaane. Re ka bolela hore o tlatsa matšoafo a rōna, le hoja re sa o bone. Empa kaha re bona liphello, ho na le lebaka le letle la ho kholoa, na ha ho joalo?’ (2) ‘’Me re ke ke ra bona matla a tosetsang lintho fatše. Empa ha re liha ntho e ’ngoe re bona hore matla a tosetsang lintho fatše a mosebetsing. Leha e le hore re bona menko, empa linko tsa rōna lia e utloa. Re ke ke ra bona maqhubu a molumo, empa litsebe tsa rōna lia a tšoara. Ka hona re kholoa lintho tseo re ke keng ra li bona—hafeela ho e-na le lebaka le letle la ho kholoa, na hase ’nete?’ (3) ‘Na ho na le bopaki ba hore Molimo o sa bonahaleng o hlile o teng? (Sebelisa taba e maqepheng 329, 330, tlas’a sehlohoana “Na ho na le mabaka a utloahalang a ho lumela ho Molimo?”)’

‘Ke na le maikutlo a ka ka Molimo’

U ka ’na ua arabela: ‘Ke thabela ho utloa hore u motho ea kileng a nahana ka taba ena le hore u lumela ho Molimo. Nke ke botse, Maikutlo a hao ke afe ka Molimo?’ ’Me mohlomong u ka eketsa: ‘Kea tiisa hore u ananela hore ke hoa bohlokoa ho tiisa hore eng le eng eo re e lumelang e tumellanong le se boleloang ke Molimo. Na nka arolelana le uena mohopolo o le mong feela o tsoang ka Bibeleng tabeng ee? (Pes. 83:18)’