Boloka Tšepo ea Hao e Tiile ho Isa Bofelong
NAHANA ka sefofane se senyenyane se fofa maemong a thata a leholimo. Mokhanni oa sefofane ha a sa khona le ho bona matšoao a fatše. O koahetsoe ke maru a teteaneng. Ha a bone ka ’nģane ho khalase e sireletsang moea, empa o kholisehile hore o tla phetha leeto la hae a sireletsehile. Lebaka la tšepo ea hae ke lefe?
O na le lisebelisoa tse nepang tse mo nolofaletsang ho fofisa ka har’a maru le ho lulisa sefofane har’a lefifi. Tseleng ea hae, haholo-holo ha a atamela boema-fofane, matšoao a tsamaisoang ka motlakase aa mo tataisa, ’me o na le seea-le-moea ho mo kopanya le balaoli ba sephethe-phethe sa moeeng ba fatše.
Ka tsela e tšoanang, re ka talima bokamoso ka tšepo, le hoja maemo a lefatše a ntse a fifala letsatsi le letsatsi. Leeto la rōna le pholletsang har’a tsamaiso ena e khopo le ka ’na la nka nako e teletsana ho feta kamoo ba bang ba neng ba lebeletse, empa re ka kholiseha hore re tseleng e nepahetseng ’me re nakong. Ke hobane’ng ha re ka kholiseha hakaalo? Hobane re na le tataiso e re nolofaletsang ho lemoha seo pono ea batho e ke keng ea se lemoha.
Lentsoe la Molimo ke ‘lebone la maoto a rōna,’ ’me lea ‘tšepeha, le hlalefisa sethoto.’ (Pesaleme ea 19:7; 119:105) Ho tšoana le matšoao a boema-fofane a supisang mokhanni oa sefofane tsela, Bibele e thathamisa ka nepo liketsahalo tsa nako e tlang ’me e re fa litaelo tse hlakileng ho tiisa hore re fihla moo re eang teng re sireletsehile. Leha ho le joalo, hore re rue molemo tataisong ea bomolimo, re tlameha ho e tšepa.
Lengolong la hae ho Baheberu, Pauluse o ile a khothaletsa Bakreste ba Bajuda ‘ho tšoarella kholisehong eo ba neng ba e-na le eona tšimolohong ka tieo ho isa bofelong.’ (Baheberu 3:14) Tšepo e ka sisinyeha haeba re sa e tšoare ka “tieo.” Kahoo potso ea phahama, Re ka boloka tšepo ea rōna ho Jehova e tiile joang ho isa bofelong?
Sebelisa Tumelo ea Hao
Pele mokhanni oa sefofane a ka sebelisa lisebelisoa tsa hae bakeng sa ho fofisa, a itšetleha ka tsona ka ho feletseng le ka ho laoloa fatše, o hloka koetliso e lekaneng le lihora tse ngata a fofisa. Ka ho tšoanang, Mokreste o lokela ho sebelisa tumelo ea hae ka ho tsoelang pele e le hore a boloke tšepo ea hae e tiile ho tataisoeng ke Jehova, haholo-holo ha maemo a thata a hlaha. Moapostola Pauluse o ile a ngola: “Kahobane re na le moea o tšoanang oa tumelo o kang oo ho ngoliloeng ka oona: ‘Ke ile ka sebelisa tumelo, ka hona ke ile ka bua,’ le rōna re sebelisa tumelo ’me ka hona rea bua.” (2 Bakorinthe 4:13) Kahoo, ha re bua ka litaba tse molemo tsa Molimo, re sebelisa le ho matlafatsa tumelo ea rōna.
Magdalena, ea ileng a qeta lilemo tse ’ne a le kampong ea mahloriso nakong ea ntoa ea bobeli ea lefatše, o hlalosa bohlokoa ba mosebetsi oa boboleli: “’Mè o ile a nthuta hore ho boloka tumelo e le matla, ke habohlokoa ho ameha ka boiketlo ba ba bang moeeng. Ke hopola ketsahalo e ’ngoe e bontšang kamoo re neng re ikutloa kateng. Ka mor’a hore ’na le ’Mè re lokolloe kampong ea mahloriso ea Ravensbrück, re ile ra fihla lapeng e le Labohlano. Matsatsi a mabeli hamorao, ka Sontaha, re ile ra kopanela le barab’abo rōna boboleling ba ntlo le ntlo. Ke lumela ka tieo hore haeba re ameha ka ho teba ka ho thusa ba bang ho tšepa litšepiso tsa Molimo, litšepiso tsona tseo e tla ba tsa sebele haholoanyane ho rōna.”—Bapisa le Liketso 5:42.
Ho boloka tšepo ea rōna e tiile ho isa bofelong ho hloka hore re be mafolo-folo moeeng likarolong tse ling. Thuto ea botho ke tšebeliso e ’ngoe e babatsehang e matlafatsang tumelo. Haeba re etsisa Baberea ’me ka mafolo-folo re hlahloba Mangolo letsatsi le leng le le leng, ho tla re thusa hore re “be le kholiseho e feletseng ea tšepo ho fihlela bofelong.” (Baheberu 6:11; Liketso 17:11) Ke ’nete, thuto ea botho e hloka nako le boikemisetso. Mohlomong, ke ka lebaka leo Pauluse a ileng a lemosa Baheberu ka kotsi ea ho ba “ba noabolohang,” kapa ho ba botsoa, litabeng tse joalo.—Baheberu 6:12.
Ho ba botsoa ho ka ba le liphello tse tebileng likarolong tse ngata tsa bophelo. Solomone o ile a hlokomela hore “ntlo e nela ka baka la matsoho a tsoafang ho sebetsa.” (Moeklesia 10:18) Ka mor’a nakoana pula e qala ho nela marulelong a sa hlokomeloeng. Haeba re lumella hore matsoho a rōna e be masoto a moea ’me re hlōleha ho boloka tumelo, lipelaelo li ka ’na tsa re khukhunela. Ka lehlakoreng le leng, ho thuisa le ho ithuta Lentsoe la Molimo kamehla ho tla hōlisa le ho sireletsa tumelo ea rōna.—Pesaleme ea 1:2, 3.
Ho Haha Tšepo ka Phihlelo
Ka ho hlakileng, mokhanni oa sefofane o ithuta ka phihlelo le ka ho ithuta kamoo lisebelisoa tsa hae li tšepahalang kateng. Ka ho tšoanang, tšepo ea rōna ho Jehova ea hōla ha re bona bopaki ba tlhokomelo ea hae e lerato bophelong ba rōna. Joshua o ile a ba le phihlelo ea seo, ’me o ile a hopotsa Baiseraele ba habo: “Lea itsebela pelong tsa lōna bohle le meeeng ea lōna bohle hobane ha ho ntho leha e le ’ngoe ea tsohle tse molemo tsee Jehova Molimo oa lōna, a le baletseng tsona, e hlokahetseng; tsohle li etsahetse ho lōna.”—Joshua 23:14.
Josefina, morali’abo rōna ea nyetsoeng oa Philippines, o ile a ithuta thuto e tšoanang. O hlalosa kamoo bophelo bo neng bo le kateng pele a tseba ’nete: “Monna oa ka o ne a atisa ho noa haholo, ’me ha a ile a tahoa, o ne a ba bohale ’me a nkotla. Lenyalo la rōna le sa thabang le ne le boetse le ama mora oa rōna. Ka bobeli ’na le monna oa ka re ne re sebetsa, re fumana chelete e ngata, empa re ne re lahla boholo ba moputso oa rōna ka ho becha. Monna oa ka o ne a e-na le metsoalle e mengata, empa boholo ba eona e ne e batla setsoalle le eena molemong oa hore a tle a e lefelle lino, ’me ba bang ba bile ba leka le ho mo tahisetsa feela ho mo tšeha.
“Lintho li ile tsa fetoha ha re qala ho tseba Jehova ’me re nka keletso ea hae ka ho teba. Monna oa ka ha a sa noa, re khaolitse ho becha, ’me re na le metsoalle ea ’nete e re ratang le e re thusang. Lenyalo la rōna ke le thabileng, ’me mora oa rōna o ntse a hōla ho ba mohlankana e motle. Re sebetsa lihora tse seng kae, empa re na le chelete e eketsehileng. Phihlelo e re rutile hore Jehova o tšoana le Ntate ea lerato, ea re lebisang tseleng e lokileng kamehla.”
Ka lebaka la litaelo tsa seea-le-moea kapa lithibelo tse etsoang ke lisebelisoa, ka linako tse ling bakhanni ba lifofane ba ee ba hlokomele hore ho hlokahala hore ba fetole tsela ea bona. Le rōna ka ho tšoanang re ka ’na ra tlameha ho fetola tsela ea rōna ho latela taelo ea Jehova. “Litsebe tsa hao li tla utloa lentsoe ka mora’ hao le reng: Tsela ke eona ena, tsamaeang ho eona, e se re la ea ka ho le letona, kapa ka ho le letšehali.” (Esaia 30:21) Ka Lentsoe la hae le ka mokhatlo oa hae o hlophisitsoeng, re amohela likeletso tse re hlokomelisang likotsi tsa moea. E ’ngoe ea tsona e mabapi le litloaelano.
Litloaelano li ka re Khelosa Tseleng
Sefofane se senyenyane se ka fefoloa tseleng habonolo haeba ho sa etsoe liphetoho tse hlokahalang. Ka ho tšoanang, litšusumetso tsa kantle li tsoela pele ho tsukutla Bakreste kajeno. Re phela lefatšeng le sekametseng linthong tsa nama leo ho lona ba bangata ba nyelisang lintho tsa bohlokoa tsa moea, ba amehileng haholo ka chelete le menyaka. Pauluse o ile a lemosa Timothea hore matsatsi a qetello a ne a tla ba ‘thata ho sebetsana le ’ona.’ (2 Timothea 3:1-5) Bacha, ba laba-labelang kamohelo le botumo, ba hlaseleha habonolo ke litloaelano tse mpe.—2 Timothea 2:22.
Amanda, ea lilemo li 17, oa hlalosa: “Ka nakoana tumelo ea ka e ile ea fokolisoa ho isa bohōleng bo itseng ke liithuti-’moho. Li ile tsa lula li bolela kamoo bolumeli ba ka bo nang le lithibelo tse ngata le tse sa utloahaleng kateng, ’me sena se ile sa qala ho ’nyahamisa. Leha ho le joalo, batsoali ba ka ba ile ba nthusa ho utloisisa hore melao e tataisang Bakreste e sebeletsa ho ba sireletsa ho e-na le ho ba thibela. Hona joale kea hlokomela hore melao-motheo ena e nthusa ho phela bophelo bo khotsofatsang haholoanyane ho feta ba bao e neng e le metsoalle ea ka ea sekolong. Ke ile ka ithuta ho tšepa batho bao ka sebele ba ntsotellang—batsoali ba ka le Jehova—’me ke thabela tšebeletso ea bopula-maliboho.”
Ho sa tsotellehe hore na re sehlopheng sefe lilemong, re tla kopana le batho ba buang lipolelo tse nyelisang ka tumelo ea rōna. Ba ka ’na ba bonahala ba tsoetse pele, empa ho Molimo ke batho ba nama, e seng ba moea. (1 Bakorinthe 2:14) Sehlopha se neng se e-na le tšusumetso Korinthe mehleng ea Pauluse e ne e le sa Bo-ralipelaelo ba bohlale ba lefatše. Lithuto tsa bo-rafilosofi bana mohlomong li ile tsa lebisa Bakreste ba bang ba Korinthe hore ba felloe ke tumelo tšepong ea tsoho. (1 Bakorinthe 15:12) Moapostola Pauluse o ile a lemosa: “Le se ke la khelosoa. Litloaelano tse mpe li senya mekhoa e nang le thuso.”—1 Bakorinthe 15:33.
Ka lehlakoreng le leng, litloaelano tse molemo lia re matlafatsa moeeng. Ka hare ho phutheho ea Bokreste, re na le monyetla oa ho kopana le batho ba phelang bophelo ba tumelo. Norman, mor’abo rōna ea ileng a ithuta ’nete ka 1939, e ntse e le mohloli o moholo oa khothatso ho bohle. Ke’ng se bolokileng pono ea hae ea moea e ntse e chorile? Oa araba: “Liboka le katamelano e haufi ea botsoalle le barab’eso ba tšepahalang ke tsa bohlokoa haholo. Mofuta ona oa botsoalle o nthusitse ho bona ka ho hlakileng phapang pakeng tsa mokhatlo o hlophisitsoeng oa Molimo le oa Satane.”
Matla a Thetsang a Maruo
Brian, mokhanni oa sefofane ea nang le phihlelo, o hlalosa hore “ka linako tse ling mokhanni oa sefofane a ka ’na a fumana ho le thata ho lumela lisebelisoa tsa hae—feela ka lebaka la ho ba le tšekamelo ea tlhaho e fapaneng. Bakhanni ba lifofane ba nang le phihlelo ba masole ba ’nile ba tsebahala ka ho fofisa lifofane ba li hlanamisitse hobane ba bona mabone a fatše a shebahala joaloka linaleli—le hoja lisebelisoa tsa bona li ne li ba bolella se fapaneng.”
Ka ho tšoanang, litšekamelo tsa rōna tsa tlhaho tse nang le boithati li ka re khelosa ka kutloisiso ea moea. Jesu o ile a re maruo a na le “matla a thetsang,” ’me Pauluse o ile a lemosa hore ‘lerato la chelete le khelositse ba bang tumelong.’—Mareka 4:19; 1 Timothea 6:10.
Joaloka mabone a ntseng a panya-panya a thetsang, lipakane tsa lintho tse bonahalang tse majaba-jaba li ka re lebisa tseleng e fosahetseng. Ho e-na le ho thabela “tebello e tiisitsoeng ea lintho tseo ho nang le tšepo bakeng sa tsona,” re ka khelosoa ke pontšo ea mponeng ea lefatše lena le fetang. (Baheberu 11:1; 1 Johanne 2:16, 17) Haeba re le “ba ikemiselitseng” ho phela bophelo ba borui, ho ka etsahala hore re be le nako e fokolang e saletseng khōlo ea moea.—1 Timothea 6:9; Matheu 6:24; Baheberu 13:5.
Monna e mong e mocha ea nyetseng ea bitsoang Patrick o ile a lumela hore eena le mosali oa hae ba ile ba tela lipakane tsa moea molemong oa hore ba thabele maemo a molemo bophelong. Oa hlalosa: “Re ile ra susumetsoa ke bao ba nang le likoloi tse khōlō le matlo a mabotho-botho ka phuthehong. Le hoja le ka mohla re sa ka ra lahleheloa ke pono ea tšepo ea ’Muso, re ile ra ikutloa hore mohlomong ho ka ba molemo ha re boetse re phela bophelo bo mabotho-botho. Leha ho le joalo, ka mor’a nakoana re ile ra hlokomela hore thabo ea ’nete e tlisoa ke ho sebeletsa Jehova le ho hōla moeeng. Hona joale re boetse re phela bophelo bo itekanetseng. Re ile ra fokotsa lihora tsa ho sebetsa ’me ra ba bo-pula-maliboho ba kamehla.”
Tumelo e Itšetlehile ka Pelo e Arabelang
Pelo e arabelang e boetse e phetha karolo ea bohlokoa ho haheng tšepo ho Jehova. Ke ’nete, “tumelo ke tebello e tiisitsoeng ea lintho tseo ho nang le tšepo bakeng sa tsona, bopaki bo totobetseng [kapa, “bopaki bo kholisang,” mongolo o botlaaseng ba leqephe ho NW] ba lintho tsa sebele le hoja li sa bonoe.” (Baheberu 11:1) Empa ntle le hore re be le lipelo tse arabelang, re ke ke ra kholiseha. (Liproverbia 18:15; Matheu 5:6) Ke ka lebaka lena moapostola Pauluse a ileng a re “tumelo hase batho bohle ba nang le eona.”—2 Bathesalonika 3:2.
Kahoo, re ka boloka lipelo tsa rōna e le tse arabelang bopaking bohle bo kholisang bo fumanehang joang? Ka ho hlaolela litšobotsi tsa bomolimo, litšobotsi tse matlafatsang le ho hōlisa tumelo. Petrose o re khothaletsa hore re ‘eketse tumelong ea rōna bokhabane, tsebo, boitšoaro, mamello, boinehelo ba bomolimo, boikutlo bo mofuthu ba bara ba motho le lerato.’ (2 Petrose 1:5-7; Bagalata 5:22, 23) Ka lehlakoreng le leng, haeba re phela bophelo ba boikhabi kapa re etsetsa Jehova tšebeletso ea ho itlosa molato feela, ka ho utloahalang re ke ke ra lebella hore tumelo ea rōna e hōle.
Esdrase “o na a sekehetse pelo” ea hae ho bala Lentsoe la Jehova le ho le sebelisa. (Esdrase 7:10) Mikea ka ho tšoanang o ne a e-na le pelo e arabelang. “Ha e le ’na, ke tla talima ho Jehova, ke lebelle Molimo oa poloko ea ka; Molimo oa ka o tla nkutloa.”—Mikea 7:7.
Magdalena, ea qotsitsoeng pejana, le eena o ile a letela Jehova ka mamello. (Habakuke 2:3) O re: “Re se re ntse re e-na le paradeise ea moea. Mohato oa bobeli ke Paradeise ea sebele, e tlang ho tla haufinyane. Ho sa le joalo ba makholo a likete ba ntse ba ikopanya le bongata bo boholo. Hoa nthabisa ho bona ba bangata joalo ba phallela mokhatlong o hlophisitsoeng oa Molimo.”
Ho Talima ho Molimo oa Poloko ea Rōna
Ho boloka tšepo ea rōna e tiile ho isa bofelong ho hlokahala hore re sebelise tumelo ea rōna ’me re mamele ka hloko tataiso eo re e fumanang ho Jehova le mokhatlong oa hae o hlophisitsoeng. Ka sebele hoa tšoaneleha ho etsa boiteko. Mokhanni oa sefofane o fumana khotsofalo e tebileng ha qetellong ka mor’a leeto le lelelele, le thata, a theoha ’me a phunyeletsa maru a teteaneng. Joale ka pele ho eena ho namme lefatše—le letalana ho mo amohela. Lebala la lifofane le ka tlaase, le letetse ho mo amohela.
Le rōna re letetsoe ke phihlelo e hlollang joalo. Lefatše lena le lefifi le khopo le tla suthela lefatše le lecha la ho loka sebaka. Kamohelo ea bomolimo e re emetse. Re ka fihla moo haeba re ela hloko mantsoe a mopesaleme: “Morena, u tšepo ea ka; e sa le le bocheng ba ka, . . . u tla ’ne u rorisoe ke ’na ka mehla.”—Pesaleme ea 71:5, 6.