Jesu Bophelo le Tšebeletso tsa Hae

“O Tšoaneloa ke Lefu”

JESU, a tlanngoe joaloka senokoane se tsebahalang, o isoa ho Anna, eo e kileng ea e-ba moprista e moholo ea nang le tšusumetso e khōlō. Anna e ne e le moprista e moholo ha Jesu e le moshemane ea lilemo li 12 a makatsa bo-rabbi ba matichere tempeleng. Bana ba ’maloa ba Anna hamorao ba ile ba sebeletsa joaloka baprista ba baholo, ’me hajoale mokhoenyana oa hae Kaiafa o boemong boo.

Mohlomong Jesu o isoa ntlong ea Anna ka baka la bophahamo ba nako e telele ba moprista eo e moholo bophelong ba bolumeli ba Bojode. Ho emisa ha bona hore ba bone Anna ho neha Kaiafa Moprista e Moholo sebaka sa ho bokella Sanhedrin, lekhotla le phahameng la Bajode le nang le litho tse 71, hammoho le ho bokella lipaki tsa bohata.

Anna moprista e moholo joale o hloma Jesu lipotso mabapi le barutuoa ba hae le ka lithuto tsa hae. Leha ho le joalo, Jesu ha a arabela o re: “Ke buile le batho bohle pepeneneng, ka bua synagogeng le tempeleng ka mehla eohle, moo ba-Jode bohle ba phuthehelang teng; ha kea ka ka bolela letho sephiring. U mpotsetsa’ng? Botsa ba utloileng seo ke ba boleletseng sona; ke bona ba tsebang seo ke se boletseng.”

Eitse ha a rialo, e mong oa bahlanka ba emeng pel’a Jesu a mo jabela sefahlehong, a re: “Na u araba moprista e moholo joalo na”?

Jesu a arabela: “Ha ke buile hampe, bolela bobe ba ka; empa ha ke buile hantle, u nkotlela’ng na”? Ka mor’a ho arabisana hona, Anna a romela Jesu a tlanngoe ho Kaiafa.

Hajoale baprista ba baholo, le banna ba baholo le bangoli, e, lekhotla lohle la Sanhedrin, ba qala ho phutheha. Kamoo ho bonahalang ka teng sebaka seo ba bokanelang ho sona ke ntlo ea Kaiafa. Leha ho le joalo, ho tšoara nyeoe e joalo bosiung ba Paseka ho hlakile hore ho khahlanong le molao oa Sejode. Empa sena ha se thibele baeta-pele ba bolumeli morerong oa bona o khopo.

Libeke tse ngata pele ha Jesu a tsosa Lazaro, lekhotla la Sanhedrin le ne le rerile hore o lokela ho shoa. ’Me matsatsi a mabeli feela pejana, ka Laboraro, baholo ba bolumeli ba etsa morero oa ho tšoara Jesu ka bomene-mene ho ’molaea. Nahana, o se a bile a ahlotsoe pele ho nyeoe ea hae!

Joale ho etsoa boiteko ba ho fumana lipaki tse tla fana ka bopaki ba bohata hore nyeoe e ka etsoa khahlanong le Jesu. Leha ho le joalo, ha ho na lipaki tse ka fumanoang tse lumellanang ka bopaki ba tsona. Qetellong ba babeli ba hlaha ’me ba tiisa: “Re mo utloile a re: Ke tla qhaqha tempele ena e entsoeng ka matsoho, ke hahe e ’ngoe ka matsatsi a mararo, e sa etsoang ka matsoho.”

Kaiafa a botsa: “Na ha u arabe letho na? Seo bao ba u nģosang ka sona ke’ng”? Empa Jesu a khutsa. Esita le qosong ena ea bohata, bakeng sa ho nyenyefatsa lekhotla la Sanhedrin, lipaki ha li tsebe ho etsa hore litaba tsa tsona li lumellane. Kahoo moprista e moholo o leka leqheka le fapaneng.

Kaiafa o tseba kamoo Bajode ba hlabehang habonolo ka teng ka motho ea ipolelang hore ke Mora oa Molimo. Liketsahalong tse peli pejana, ka ho se natse letho ba bitsitse Jesu monyefoli ea tšoaneloang ke lefu, ha pele ka phoso ba ne ba nahanne hore o boletse hore o lekana le Molimo. Kaiafa joale o laela ka masene: “Ke u antša ka Molimo o phelang, hore u re bolelle ha eba u Kreste, Mora oa Molimo.”

Ho sa tsotellehe seo Bajode ba se nahanang, Jesu efela ke Mora oa Molimo. ’Me ho khutsa ho ka utloisisoa joaloka ho latola ho ba ha hae Kreste. Joale Jesu ka sebete oa arabela: “Ke eena; ’me le tla bona Mor’a motho a lutse letsohong le letona la matla a Molimo, a e-tla ka maru a leholimo!”

Eitse ha a rialo, Kaiafa, ka pontšo e matla, a hahola liaparo tsa hae, ’me a hoeletsa: “O nyefotse! Re sa batlela’ng lipaki? Bonang, le utloile nyefolo ea hae joale. Ho joang ho lōna?”

Lekhotla la Sanhedrin la tsebahatsa, “O tšoaneloa ke lefu.” Joale ba qala ho mo soma, ba bua lintho tse ngata tse mo nyefolang. Ba mo jabela le ho mo tšoela ka mathe sefahlehong. Ba bang ba mo koahela sefahleho kaofela ’me ba mo otla ka litebele ’me ba bua ka mokhoa o khesang ba re: “Kreste, u re profetele: ea u otlileng ke mang?” Boitšoaro bona bo bobehali, boo e seng ba molao bo etsahala nyeoeng ea bosiu. Mattheu 26:57-68; 26:3, 4; Mareka 14:53-65; Luka 22:54, 63-65; Johanne 18:13-24; 11:45-53; 10:31-39; 5:16-18.

◆ Ke hokae moo Jesu a isoang teng pele, ’me ke eng se mo hlahelang moo?

◆ Ke hokae moo Jesu joale a isoang teng, hona ke ka morero ofe?

◆ Kaiafa o nolofalloa joang ho etsa hore lekhotla la Sanhedrin le tsebise hore Jesu o tšoaneloa ke lefu?

◆ Ke boitšoaro bofe bo bobehali, boo e seng ba molao bo etsahalang nyeoeng?