Johanne o Batla ho Utloa Litaba ho Tsoa ho Jesu

Johanne Mokolobetsi o se a qetile nako e ka etsang selemo a le teronkong. O utloela ka mesebetsi ea Jesu e hlollang. Ak’u nahane feela hore na Johanne o ikutloa joang ha barutuoa ba hae ba mo bolella hore Jesu o tsositse mora oa mohlolohali oa Naine. Leha ho le joalo, o batla ho ikutloela ho tsoa ho Jesu hore na lintho tsena kaofela li bolela’ng. Kahoo, o roma barutuoa ba hae ba babeli hore ba re ho Jesu: “Na u Ea Tlang kapa re lokela ho lebella ea fapaneng?”​—Luka 7:19.

Na potso ee ha e makatse? Johanne ke monna ea nang le tumelo, ’me ha a ne a kolobetsa Jesu lilemong tse ka bang peli tse fetileng, o ile a bona ha moea o halalelang o lula holim’a Jesu, a boela a utloa le lentsoe la Molimo ha Molimo a re o amohela Jesu. Ha re na lebaka la ho nahana hore tumelo ea Johanne e se e fokola. Haeba ho joalo, Jesu a ka be a sa bue hantle hakana ka eena lekhetlong lena. Haeba Johanne ha a na lipelaelo, ke hobane’ng ha a botsa Jesu potso ee?

E ka ’na eaba Johanne o batla feela hore Jesu a mo tiisetse hore ke eena Mesia. Taba ena e ne e tla matlafatsa tumelo ea hae ha a ntse a hoehla teronkong. Kamoo ho bonahalang kateng, ho na le ntho e ’ngoe hape eo Johanne a batlang hore e mo hlakele. O tseba boprofeta bo reng Motlotsuoa oa Molimo e tla ba morena le molopolli. Leha ho le joalo e se e le likhoeli tse ngata Jesu a kolobelitsoe empa Johanne o ntse a le teronkong. Kahoo Johanne oa ipotsa hore na ho na le ea tlang ea hlahlamang Jesu ea tla phethahatsa boprofeta bohle bo buoang ka Mesia.

Ho e-na le hore Jesu a bolelle barutuoa ba Johanne feela hore ke “Ea Tlang,” o ba fa bopaki bo bontšang hore o tšehetsoa ke Molimo kaha o folisa batho ba bangata ba tšoeroeng ke mafu a fapaneng. O re ho barutuoa ba Johanne: “Tsamaeang ’me le tlalehele Johanne seo le se utloang le seo le se bonang: Ba foufetseng ba boetse baa bona, le ba holofetseng baa tsamaea, balepera ba ntse ba hloekisoa ’me ba sa utloeng litsebeng baa utloa, le bafu ba ntse ba tsosoa, ’me mafutsana a bolelloa litaba tse molemo.”​—Matheu 11:​4, 5.

Potso ea Johanne e ka ’na ea fana ka maikutlo a hore o batla hore Jesu a etse lintho tse fetang tseo a seng a ntse a li etsa, mohlomong a mo lokolle teronkong. Ho fapana le hoo, Jesu o bolella Johanne hore a se ke a lebella hore a etse mehlolo e fetang eo a seng a ntse a e etsa.

Ha barutuoa ba Johanne ba tsamaea, Jesu o tiisetsa letšoele hore Johanne ha se moprofeta feela. Ke “lenģosa” la Jehova leo ho buuoeng ka lona ho Malakia 3:1. Hape ke moprofeta Elia joalokaha ho profetiloe ho Malakia 4:​5, 6. Jesu oa hlalosa o re: “Kannete ke re ho lona, har’a ba tsoetsoeng ke basali ha ho e-s’o hlahisoe e moholo ho Johanne Mokolobetsi, empa motho e monyenyane ’Musong oa maholimo o moholo ho eena.”​—Matheu 11:11.

Ha Jesu a re motho e monyenyane ’Musong oa maholimo o moholo ho Johanne o bolela hore Johanne ha a tl’o phela leholimong. O lokisitse tsela bakeng sa Jesu empa o hlokahala pele Kreste a bulela batho monyetla oa ho phela leholimong. (Baheberu 10:​19, 20) Johanne ke moprofeta oa Molimo ea tšepahalang ’me e tla ba mofo ’Musong oa Molimo.