Le ’ne le “Behe Litholoana Tse Ngata”
1 Jesu o ile a sebelisa mantsoe a tšoantšetso, ka hore a itšoantše le sefate sa ’nete sa morara, a tšoantše Ntate oa hae le Molemi ’me a tšoantše balateli ba hae ba tlotsitsoeng ka moea le makala a sefate sa morara a behang litholoana. Ha Jesu a hlalosa mosebetsi oa Molemi oa tšoantšetso, o ile a bontša kamoo ho leng bohlokoa kateng hore re lule re khomaretse sefate sa morara ka matla. (Joh. 15:1-4) Seo re ithutang sona ke hore e mong e le mong ea nang le kamano e haufi le Jehova o lokela ho tšoana le lekala le behang la “sefate sa morara sa ’nete,” e leng Jesu Kreste. Re lokela ho tsoela pele re beha ‘tholoana ea moea’ haholo, hammoho le tholoana ea ’Muso.—Bagal. 5:22, 23; Mat. 24:14; 28:19, 20.
2 Tholoana ea Moea: Khatelo-pele ea rōna moeeng e ka lekanngoa haholo ka hore na re bonahatsa tholoana ea moea hakae. Na u leka ka matla ho hlaolela tholoana ea moea oa Molimo ka ho ithuta Lentsoe la Molimo kamehla le ho thuisa ka lona? (Bafil. 1:9-11) U se ke ua tsilatsila ho rapella moea o halalelang, o ka etsang hore u be le litšoaneleho tse tlotlisang Jehova le tse ka u thusang hore u hatele pele moeeng.—Luka 11:13; Joh. 13:35.
3 Ho hlaolela tholoana ea moea ho tla boela ho re thuse hore re be basebeletsi ba chesehang haholo. Ka mohlala, ho sa tsotellehe hore na re phathahane hakae, lerato le tumelo li re susumelletsa hore re iphe nako ea ho kopanela tšebeletsong kamehla. Litšoaneleho tse kang khotso, tiisetso, mosa, bonolo le boitšoaro li re thusa hore re nke bohato bo tšoanetseng ha re thulana le bahanyetsi. Thabo e re nolofalletsa hore re khotsofalle tšebeletso esita le ha batho ba sa thabele molaetsa oa rōna.
4 Tholoana ea ’Muso: Re boetse re batla ho beha tholoana ea ’Muso. Seo se akarelletsa hore re nyehele “sehlabelo sa thoriso, ke hore, litholoana tsa melomo e bolelang lebitso la [Jehova] phatlalatsa.” (Baheb. 13:15) Re etsa sena ka hore re bolele litaba tse molemo ka cheseho le ka tieo. Na u leka ka matla hore u behe tholoana ea ’Muso ka ho ntlafatsa tšebeletso ea hao?
5 Jesu o ile a bontša hore balateli ba hae ba tšepahalang ba ne ba tla beha litholoana ka tsela e sa tšoaneng. (Mat. 13:23) Ka hona, ha rea lokela ho ipapisa le ba bang empa re lokela ho fa Jehova sohle seo re ka se khonang. (Bagal. 6:4) Ha re hlahloba maemo a rōna ka botšepehi re sebelisa Lentsoe la Molimo, seo se tla re thusa ho tsoela pele re tlotlisa Jehova ka ho beha “litholoana tse ngata.”—Joh. 15:8.