Jesu Bophelo le Tšebeletso tsa Hae

Taeo e Tsoelang Pele ea ha ba Tla Arohana

JESU le baapostola ba se ba loketse ho tloha phaposing e ka holimo. O tsoela pele: “Ke le boleletse taba tseo, le tle le se ke la khopjoa.” Joale o fana ka temoso e tiileng: “Ba tla le leleka masynagogeng; esita le nako ea tla, eo e mong le e mong ea le bolaeang a tla hlōma eka o sebeletsa Molimo.”

Kamoo ho bonahalang ka teng baapostola ba ferekantsoe ka ho tebileng ke temoso ena. Le hoja Jesu pejana a ne a ile a bolela hore lefatše le ne le tla ba hloea, o ne a sa bolela hore ba tla bolaoa. Jesu oa hlalosa: “Ha ke sa ka ka le bolella tsona [tsena] e sa le ho qaleng, ke hobane, ke ne ke sa na le lōna.” Leha ho le joalo, ho hotle hakaakang ho ba hlomella esale pele ka boitsebiso bona pele a tsamaea!

Jesu o tsoela pele: “Joale ke ea ho ea nthomileng, ’me ha ho e mong ho lōna ea mpotsang hore: U ea kae?” Pejana ka shoalane, ba ile ba botsa hore na o ne a e-ea kae, empa hona joale ba tšositsoe haholo ke seo a ba boleletseng sona hoo ba hlōlehang ho botsa ho tsoela pele ka sena. Joalokaha Jesu a re: “Empa kahobane ke le boleletse tseo, lipelo tsa lōna li tletse masoabi.” Baapostola ba soabile eseng feela hobane ba utloile hore ba tla hlokofatsoa ke mahloriso a tšabehang ’me ba bolaoe, empa ba soabisitsoe le ke hobane Morena oa bona oa ba siea.

Ka hona Jesu oa hlalosa: “Ho molemo ho lōna ha nka ikela; hobane ha ke sa ee, Moemeli [“mothusi,” NW] a ke ke a tla ho lōna; empa ha ke e-ea ke tla mo romela ho lōna.” Jesu a ka ba feela sebakeng se le seng feela ka nako, empa ha a le leholimong, a ka romela mothusi, moea o halalelang oa Molimo, ho barutuoa ba hae hohle moo ba ka bang teng lefatšeng. Kahoo ho tsamaea ha Jesu ho tla ba molemo.

Jesu o re, moea o halalelang, “o tla kholisa lefatše, hore sebe se teng, le ho loka, le kahlolo.” Sebe sa lefatše, ho hlōleha ha lona ho bontša tumelo ho Mor’a Molimo, se tla pepesoa. Ho phaella moo, bopaki bo kholisang ba ho loka ha Jesu bo tla bontšoa ke ho nyolohela ha hae ho Ntate. ’Me ho hlōleha ha Satane le lefatše la hae le khopo ho senya botšepehi ba Jesu ke bopaki bo kholisang ba hore morena oa lefatše o se a ahlotsoe habohloko.

Jesu o tsoela pele: “Ke sa na le litaba tse ngata tsee nka beng ke le bolella tsona; empa ha e le joale, li ka le imela.” Ka hona Jesu o tšepisa hore ha a tšolla moea o halalelang, e leng matla a sebetsang a Molimo, oona o tla ba tataisetsa kutloisisong ea lintho tsena tumellanong le matla a bona a ho li utloisisa.

Baapostola ba hlōleha haholo ho utloisisa hore Jesu o tla shoa ’me ebe joale o hlaha ho bona ka mor’a hore a tsosoe. Kahoo baa botsana: “Ho se ho se hokae, ’me ha le ka ke la mpona; hape, ho se ho se hokae, ’me le tla boela le mpone; hape ha a re: Taba ee a re bolellang eona ke ea’ng, ha a re: Ke ea ho Ntate?”

Jesu o hlokomela hore ba batla ho ’motsa, kahoo oa hlalosa: “Ka ’nete-nete ke re ho lōna: Le tla lla, le be le lle, ’me lefatše le tla thaba; le tla utloa bohloko, empa bohloko ba lōna bo tla fetoha thabo.” Mantsiboeeng a hlahlamang, ha Jesu a bolaoa, baeta-pele ba lefatše ba bolumeli baa thaba, empa barutuoa ba soabile. Leha ho le joalo, masoabi a bona a fetoha thabo, ha Jesu a tsosoa! ’Me thabo ea bona e tsoela pele ha a ba fa matla ka Pentekonta hore e be lipaki tsa hae ka ho tšollela moea o halalelang oa Molimo holim’a bona!

Ha Jesu a bapisa boemo ba baapostola le ba mosali ha a le mahlabeng a pelehi, o re: “E re mosali ha a beleha, a utloe bohloko, hobane nako ea hae e tlile.” Empa joalokaha a se a sa hlole a hopola mahlomola a hae hang feela ha ngoana a hlahile, Jesu oa hlokomela: “Le lōna le utloa bohloko joale; empa ke tla boela ke le bone, [ha ke se ke tsositsoe] ’me lipelo tsa lōna li tla thaba, ’me ha ho motho ea tla le amoha thabo ea lōna.”

Ho tla fihla nakong ena, ha ho mohla baapostola ba kileng ba kōpa letho ka lebitso la Jesu. Empa joale o re: “Ntho tsohle tsee le tla li qela ho Ntate ka lebitso la ka, o tla le fa tsona. . . . Hobane Ntate oa le rata e le eena, kahobane le nthatile, ’me le lumetse hobane ke tsoa ho Molimo. Ke tsoile ho Ntate, ka tla lefatšeng; joale, ke boela ke tlohela lefatše, ke ea ho Ntate.”

Mantsoe a Jesu ke khothatso e khōlō ho baapostola. Ba re: “Ke ka baka leo re lumelang hobane u tsoa ho Molimo.”

Jesu oa botsa: “Joale lea lumela? Bonang nako ea tla, le joale e se e tlile, eo le tla qhalana ka eona, e mong le e mong a ee ka tsela ea hae, le ntlohele ke ’notši.” Le hoja ho ka bonahala ho le thata ho ho lumela, sena se etsahala pele bosiu bo e-sa!

Jesu oa qetella: “Ke le boleletse taba tseo, hore le be le khotso ho ’na. Le tla ba le mahlomola lefatšeng; le mpe le bete lipelo; ke hlōtse lefatše.” Jesu o hlōtse lefatše ka hore ka botšepehi a phethe thato ea Molimo ho sa tsotellehe sohle seo Satane le lefatše la hae ba lekileng ho se etsa ho senya botšepehi ba Jesu. Johanne 16:1-33; 13:36.

▪ Ke temoso efe ea Jesu e ferekanyang baapostola ba hae?

▪ Ke hobane’ng ha baapostola ba ile ba hlōleha ho botsa Jesu hore na o ne a ea kae?

▪ Ke eng seo baapostola haholo-holo ba hlōlehang ho se utloisisa?

▪ Jesu o tšoantša joang hore boemo ba baapostola bo tla fetoha ho tloha ho masoabi ho isa ho thabo?

▪ Jesu o re baapostola ba tla etsa eng haufinyane?

▪ Jesu o hlōla lefatše joang?