KHAOLO EA 29
Na Batho ba Hlokahetseng ba Ntse ba Phela?
Na u kile oa hlokahalloa ke motho eo u mo ratang? Ka nako eo e bohloko, u ka ’na oa ipotsa: ‘Na batho ba hlokahetseng ba ntse ba phela? Na re tla boela re bone batho bao re ba ratang ba hlokahetseng?’ Khaolo ena le e latelang li tl’o araba lipotso tsena.
1. Na motho ea hlokahetseng o ntse a phela?
Jesu o ile a tšoantša lefu le boroko. Motho ea robetseng ha a bone lintho tse etsahalang. Lefu le tšoana le boroko ka tsela efe? Motho ea hlokahetseng ha a utloe bohloko. Ha a hopole metsoalle le ba lelapa la hae, ho sa tsotellehe hore na o ne a ba rata hakae. Bibele e re “ba shoeleng, ho hang ha ba tsebe letho.”—Bala Moeklesia 9:5.
2. Ho tseba ’nete ka boemo ba bafu ho re thusa joang?
Batho ba bangata ba tšaba ho shoa ebile ba tšaba bafu. Empa seo Bibele e se buang ka lefu se ka u khothatsa. Jesu o itse: “’Nete e tla le lokolla.” (Johanne 8:32) Likereke tse ling li ruta hore ha motho a hlokahala moea oa hae o tsoela pele o phela empa Bibele ha e rute seo. Bafu ha ba utloe bohloko. Kaha ha ba tsebe letho, ba ke ke ba re lematsa. Kahoo ha ho hlokahale hore re ba rapele, re ba rapelle kapa re etse meetlo e itseng hobane re re ha re batle ba re halefele.
Batho ba bang ba re ba khona ho bua le bafu. Empa ha se ntho e ka etsahalang hobane re ithutile hore bafu “ho hang ha ba tsebe letho.” Ho ka etsahala hore ebe batho ba nahanang hore ba bua le bafu ba ntse ba bua le bademona, ba iketsang eka ke baratuoa ba rona ba hlokahetseng. Ho tseba hore na bafu ba boemong bofe ho re sireletsa ho bademona. Jehova oa tseba hore ho sebelisana le bademona ho kotsi, ke kahoo a reng re se ke ra bua le bafu.—Bala Deuteronoma 18:10-12.
ITHUTE LINTLHA TSE LING
Ithute lintho tse ling tseo Bibele e li rutang ka bafu ’me u be le tumelo ho Molimo ea lerato, ea sa utloiseng batho ba hlokahetseng bohloko.
3. Ithute seo e leng ’nete ka boemo ba bafu
Batho ba na le maikutlo a sa tšoaneng ka boemo ba bafu empa ha ho bolele hore kaofela ba nepile.
Na moo u lulang teng batho ba lumela hore bafu ba ntse ba phela?
E le hore u bone seo Bibele e se rutang, bapala VIDEO ena.
Bala Moeklesia 3:20 ebe le buisana ka lipotso tsena:
Ho ea ka temana ee, na batho ba hlokahetseng ba ntse ba phela?
Na ha motho a hlokahala moea oa hae o tsoela pele o phela?
Bibele e re bolella ka lefu la motsoalle oa Jesu e leng Lazaro. Ha u ntse u bala Johanne 11:11-14, hlokomela hore na Jesu o ile a re ho etsahetse’ng ka Lazaro ebe le buisana ka lipotso tsena:
Jesu o ile a bapisa lefu le eng?
Papiso ee e re batho ba hlokahetseng ba boemong bofe?
Na taba ea hore Bibele e re bafu ha ba tsebe letho ea utloahala?
4. Ho tseba ’nete ka bafu hoa re thusa
Ho tseba hore batho ba hlokahetseng ha ba phele ho re thusa hore re se ke ra tšaba bafu. Bala Moeklesia 9:10 ebe le buisana ka potso ena:
Na bafu ba ka re lematsa?
Ho tseba ’nete ka seo Bibele e se buang ka bafu ho re thusa hore re se ke ra rapela bafu kapa ra ba etsetsa meetlo e itseng hobane re re ha re batle ba re halefele. Bala Esaia 8:19 le Tšenolo 4:11 ebe le buisana ka potso ena:
Jehova o ikutloa joang ha motho a rapela bafu kapa a kopa thuso ho bona?
Ho tseba ’nete ka bafu ho re thusa hore re se ke ra etsa meetlo e sa thabiseng Jehova
5. Ho tseba ’nete ka bafu hoa re tšelisa
Batho ba bangata ba rutiloe hore ha ba hlokahetse ba tl’o ahloloa ka lebaka la lintho tse mpe tseo ba li entseng. Empa ho tseba hore bafu ha ba chesoe liheleng, esita le ba entseng lintho tse mpe ka ho fetisisa hoa re tšelisa. Bala Baroma 6:7 ebe le buisana ka potso ena:
Bibele e re ha motho a shoele libe tsa hae li hlakotsoe ’me Molimo ha a sa mo nka a le molato. Joale na ha motho a shoele o ahloleloa lintho tse mpe tseo a li entseng?
Ha re ntse re ithuta ka Jehova, rea hlokomela hore le ka mohla a ke ke a utloisa batho ba hlokahetseng bohloko. Bala Deuteronoma 32:4 le 1 Johanne 4:8 ebe le buisana ka lipotso tsena:
Na Molimo ea nang le makhabane a boletsoeng litemaneng tsee a ka utloisa batho ba hlokahetseng bohloko?
Na ho tseba ’nete ka batho ba hlokahetseng hoa u tšelisa? Hobane’ng?
BATHO BA BANG BA RE: “Kea tšoha ha ke nahana hore na ho tl’o etsahala’ng ka ’na ha ke shoa.”
Ke litemana life tsa Bibele tse tšelisang tseo u ka qoqang le batho bao ka tsona?
KAKARETSO
Ha motho a shoa, bophelo ba hae boa fela. Bafu ha ba utloe bohloko ebile ba ke ke ba lematsa batho ba phelang.
Re Ithutile’ng?
Na motho ea hlokahetseng o ntse a phela?
Ho tseba hore batho ba hlokahetseng ha ba phele ho re thusa joang?
Ho tseba hore batho ba hlokahetseng ha ba phele ho re tšelisa joang?
BATLA
Sheba hore na lentsoe “moea” le bolela’ng ka Bibeleng.
Ithute hore na ehlile Molimo o chesa batho ba khopo liheleng.
Na re lokela ho tšaba bafu?
Meea ea Bafu—Na e ka U Thusa Kapa ea U Ntša Kotsi? Na Ehlile e Teng? (bukana)
Ho tseba hore bafu ha ba phele ho ile ha thusa ntate e mong joang?