10, 11. (a) Ba linku tse ling ba na le tšepo efe? (b) Ho phethahala ha tšepo ea ho phela lefatšeng ho amana joang le Kreste le “ho senoloa ha bara ba Molimo”?

¹⁰ Moapostola Pauluse o ile a ngola ka tšepo e khanyang eo “bara ba Molimo” ba tsoetsoeng ka moea ba nang le eona ea ho ba “majalefa hammoho” le Kreste. Ka mor’a moo, o ile a bua ka tšepo e hlollang eo Jehova a e fang linku tse ling tse se nang palo ha a ne a re: “Tebello e nang le tabatabelo ea pōpo [e leng batho] e letetse ho senoloa ha bara ba Molimo [e leng batlotsuoa]. Kaha pōpo e ile ea behoa tlas’a lefeela, eseng ka thato ea eona empa ka ea ileng a e beha tlaase, ka tšepo ea hore pōpo le eona e tla lokolloa bokhobeng ba ho bola ’me e be le tokoloho e khanyang ea bana ba Molimo.”—Bar. 8:14-21.

12. Ho senoloa ha batlotsuoa ho tla tsoela batho melemo efe e babatsehang?

¹² Ruri batho ba tla imoloha haholo nakong ea Puso ea Kreste ea Lilemo Tse Sekete! Nakong eo, “bara ba Molimo” ba tlotlisitsoeng ba tla tsoela pele ba “senoloa” ha e e-ba baprista hammoho le Kreste, ’me ba thusa batho hore ba fumane melemo ea sehlabelo sa hae. Ha ’Muso oa Molimo o busa lefatšeng, butle-butle batho ba mamelang Molimo ba “tla lokolloa bokhobeng ba ho bola.” Ba tla lokolloa liphellong tsa sebe le lefu. Haeba ba ka lula ba tšepahala ho Jehova nakong eo ea Lilemo Tse Sekete le nakong ea teko ea ho qetela e tla tla qetellong ea lilemo tseo, mabitso a bona a tla lula a ngotsoe ‘moqolong oa bophelo.’ Ba tla kena ‘tokolohong e khanyang ea bana ba Molimo.’ (Tšen. 20:7, 8, 11, 12) Ruri ena ke tšepo e khanyang!