Epafrase—“Mosebeletsi ea Tšepahalang oa Kreste”

KE MANG ea thehileng liphutheho tsa Bokreste tse Korinthe, Efese le Filippi? Mohlomong u ke ke ua ba leqe ho arabela: ‘Ke Pauluse, “moapostola ho lichaba.”’ (Baroma 11:13) U tla be u nepile.

Leha ho le joalo, ke mang ea thehileng liphutheho tse Kolose, Heirapolise le Laodisia? Le hoja re ke ke ra tiisa, e ka ’na eaba e bile monna ea bitsoang Epafrase. Leha ho le joalo, mohlomong u tla rata ho tseba ho eketsehileng ka moevangeli enoa, kaha o bitsoa “mosebeletsi ea tšepahalang oa Kreste.”—Bakolose 1:7.

Moevangeli oa Phuleng ea Lycus

Lebitso Epafrase ke khutsufatso ea Epafroditase. Empa ha hoa lokela hore ho nahanoe hore Epafrase ke Epafroditase oa Filippi. Epafrase o ne a e-tsoa Kolose, se seng sa litsi tse tharo tsa liphutheho tsa Bokreste phuleng ea Nōka ea Lycus, Asia Minor. Kolose e ne e le sebakeng se lik’hilomithara tse 18 feela ho tloha Laodisia le lik’hilomithara tse 19 ho tloha Heirapolise, sebakeng sa boholo-holo sa Frigia.

Bibele ha e hlalose ka ho hlakileng hore na litaba tse molemo tsa ’Muso oa Molimo li ile tsa fihla joang Frigia. Leha ho le joalo, Mafrigia a ne a le teng Jerusalema letsatsing la Pentekonta ka 33 C.E., mohlomong a mang a ’ona a e-tsoa Kolose. (Liketso 2:1, 5, 10) Nakong ea tšebeletso ea Pauluse Efese (hoo e ka bang ka 52-55 C.E.), bopaki bo ileng ba fanoa sebakeng seo e ne e le bo matla le bo atlehileng hoo e seng Baefese feela “ba ileng ba utloa lentsoe la Morena,” empa le ‘bohle ba ahileng seterekeng sa Asia, Bajuda hammoho le Bagerike.’ (Liketso 19:10) Ho bonahala eka Pauluse o ne a sa ka a ruta litaba tse molemo Phuleng eohle ea Lycus, kaha ba bangata ba ileng ba fetoha Bakreste sebakeng seo, ba ne ba e-s’o ka ba mo bona.—Bakolose 2:1.

Ho ea ka Pauluse, motho ea ileng a ruta Bakolose ka “mosa o sa tšoanelang oa Molimo ka ’nete,” e ne e le Epafrase. Taba ea hore ebe Pauluse o bitsa mosebetsi-’moho enoa “mosebeletsi ea tšepahalang oa Kreste bakeng sa rōna,” e bontša hore Epafrase e ne e le moevangeli ea mafolofolo sebakeng seo.—Bakolose 1:6, 7.

Moapostola Pauluse le moevangeli Epafrase ba ne ba amehile haholo ka boiketlo ba moea ba balumeli-’moho le bona ba Phuleng ea Lycus. E le “moapostola ho lichaba,” e tlameha ebe Pauluse o ile a thabisoa ke ho fumana litaba tsa khatelo-pele ea bona. Ha ho e mong eo Pauluse a ileng a utloa boemo ba moea ba Bakolose ka eena, haese Epafrase.—Bakolose 1:4, 8.

Tlaleho ea Epafrase

Bakolose ba ne ba tobane le mathata a tebileng hoo a ileng a susumelletsa Epafrase hore a nke leeto le lelelele ho ea Roma ka morero o khethehileng oa ho buisana le Pauluse ka mathata ana. Tlaleho e qaqileng e neng e entsoe ke Epafrase ke eona eo ka ho hlaka e ileng ea susumelletsa Pauluse hore a ngole mangolo a mabeli a eang ho bara bao babo bao ha e le hantle a neng a sa ba tsebe. Lengolo le leng le ne le e-ea ho Bakolose. Lengolo le leng, leo kamoo ho bonahalang kateng le sa kang la bolokoa, le ile la romeloa ho Balaodisia. (Bakolose 4:16) Ke ho utloahalang ho nahana hore se neng se le mangolong ao se ne se reretsoe ho sebetsana le litlhoko tsa Bakreste bao tse neng li hlokometsoe ke Epafrase. O ile a hlokomela litlhoko life? ’Me see se re bolella eng ka botho ba hae?

Lengolo le eang ho Bakolose le bontša eka Epafrase o ne a amehile ka hore Bakreste ba Kolose ba ne ba le kotsing ka lebaka la lifilosofi tsa bohetene tse akarelletsang ho fetelletsa lintho, tšebelisano le meea le tumela-khoela ea borapeli ba litšoantšo. Ho feta moo, e ka ’na eaba thuto ea Bajuda ea ho itima lijo le ho boloka matsatsi a itseng e ne e hahlametse litho tse ling tsa phutheho.—Bakolose 2:4, 8, 16, 20-23.

Taba ea hore ebe Pauluse o ngola ka litaba tsena e re bontša kamoo Epafrase a neng a falimehile ’me a le hlokolosi kateng ka litlhoko tsa Bakreste-’moho le eena. O ile a bontša kameho e lerato ka boiketlo ba bona ba moea, a ela hloko likotsi tsa sebaka seo ba neng ba phela ho sona. Epafrase o ile a batla keletso ea Pauluse, ’me sena se senola hore o ne a ikokobelitse. Mohlomong o ile a utloa a hloka keletso ea motho ea nang le phihlelo e khōloanyane. Ka sebele, Epafrase o ile a nka bohato ka bohlale.—Liproverbia 15:22.

Motho ea Neng a Tšepa Thapelo

Qetellong ea lengolo leo a ileng a le romella Bakreste ba Kolose, Pauluse o re: “Epafrase, ea tsoang har’a lōna, lekhoba la Kreste Jesu, o le romela litumeliso, ka mehla a ikitlaetsa molemong oa lōna lithapelong tsa hae, e le hore qetellong le ka ema le feletse le ka kholiseho e tiileng thatong eohle ea Molimo. Ka sebele kea mo pakela hore o etsa boiteko bo matla molemong oa lōna le oa ba leng Laodisia le oa ba leng Hierapolise.”—Bakolose 4:12, 13.

E, esita leha e ne e le “moholehuoa-’moho” le Pauluse Roma, Epafrase o ne a nahana ka barab’abo ba ratoang ba leng Kolose, Laodisia le Heirapolise ’me a ba rapella. (Filemone 23) Ka ho toba, ‘o ile a ba loanela’ thapelong. Ho latela setsebi D. Edmond Hiebert, lentsoe la Segerike le sebelisitsoeng mona le bolela “mosebetsi o boima le o hlokang boitelo,” ntho e tšoanang le “bohloko bo tebileng” ba kelello boo Jesu Kreste a ileng a bo utloa ha a ne a rapela serapeng sa Gethsemane. (Luka 22:44) Epafrase o ne a lakatsa ka tieo hore bara le barali babo ba moea ba fumane botsitso le khōlo e feletseng ea Bokreste. E tlameha ebe mora eo oabo rōna ea neng a le hlokolosi ka lintho tsa moea e ne e le tlhohonolofatso e kaakang ho liphutheho tseo!

Kaha Epafrase o ne a bitsoa ‘lekhoba-’moho le ratoang,’ ha ho pelaelo hore o ne a ile a iketsa ea amohelehang ho Bakreste-’moho le eena. (Bakolose 1:7) Ha maemo a lumela, litho tsohle tsa phutheho li lokela hore ka bolokolohi li itelle tse ling ka mofuthu le ka lerato. Ka mohlala, ho ka eloa seli hore ho thusoe ba kulang, ba hōlileng kapa ba bang ba nang le litlhoko tse khethehileng. Ho ka ’na ha e-ba le boikarabelo bo fapaneng bo lokelang ho phethoa ka phuthehong, kapa ho ka ’na ha khoneha ho kenya letsoho mosebetsing oa kaho ea puso ea Molimo.

Ho rapella ba bang, joalokaha Epafrase a ile a etsa, ke mofuta o mong oa tšebeletso e halalelang oo kaofela ha rōna re ka o etsang. Lithapelo tse joalo li ka ’na tsa kenyelletsa lipolelo tse bontšang kameho ka barapeli ba Jehova ba lokelang ho talimana le likotsi tse fapaneng kapa mathata a moea kapa a botho. Ka ho ikitlaetsa ka matla ka tsela ena, re tla tšoana le Epafrase. E mong le e mong oa rōna a ka ba le tokelo le thabo ea ho ipaka e le ‘lekhoba-’moho le ratoang’ lelapeng la bahlanka ba tšepahalang ba Jehova.