Bolelang Litaba Tse Molemo ka Cheseho
“Chesehang ke moea. Sebeletsang Jehova joaloka makhoba.”—BAROMA 12:11.
1, 2. Bakreste ba loanela ho boloka boikutlo bofe e le baboleli ba litaba tse molemo?
MOHLANKANA o thabetse mosebetsi o mocha. Letsatsing la pele a le mosebetsing, ka tabatabelo o letela litaelo tsa mohiri oa hae. O lebella ka thabo mosebetsi oa pele oo a tla o fuoa ’me o o nka ka botebo. O chesehela ho o etsa hamolemohali.
2 Ka tsela e tšoanang, rōna joaloka Bakreste re ka inka re le basebetsi ba bacha. Kaha tšepo ea rōna ke ho phela ka ho sa feleng, ho ka boleloa hore re sa tsoa qala ho sebeletsa Jehova. Ka sebele ’Mōpi oa rōna o re hopoletse mesebetsi e mengata e tla re boloka re tšoarehile ka ho sa feleng. Empa thōmo ea pele eo re e amohetseng ke ea ho bolela litaba tse molemo tsa ’Muso oa hae. (1 Bathesalonika 2:4) Re ikutloa joang ka kabelo ee e tsoang ho Molimo? Joaloka mohlankana eo, re batla ho e etsa hamolemohali kamoo re ka khonang, ka sehlahlo le ka thabo—e, ka cheseho!
3. Ho hlokoa eng hore u atlehe u le mosebeletsi oa litaba tse molemo?
3 Ke ’nete hore ho boloka boikutlo bo botle joalo e ka ba phephetso. Ho phaella bosebeletsing, re na le boikarabelo bo bong bo bongata, ’me bo bong ba bona bo ka ’na ba re imela haholo ’meleng le maikutlong. Ka kakaretso, re khona ho hlokomela lintho tsena empa ka nako e tšoanang re ntse re hlokomela bosebeletsi ba rōna ka mokhoa o lekaneng. Leha ho le joalo, e ka ba ntoa e tsoelang pele. (Mareka 8:34) Jesu o hatisitse hore katleho ea rōna re le Bakreste e ne e tla hloka boiteko bo matla.—Luka 13:24.
4. Matšoenyeho a letsatsi le letsatsi a ka ama pono ea rōna ea moea joang?
4 Kaha ho na le lintho tse ngata tseo re lokelang ho li etsa, ho bonolo ho ikutloa re tsielehile kapa re nyahame ka linako tse ling. “Matšoenyeho a bophelo” a ka ’na a pupetsa cheseho ea rōna le kananelo bakeng sa mesebetsi ea puso ea Molimo. (Luka 21:34, 35; Mareka 4:18, 19) Kaha ha rea phethahala, re ka ’na ra tlohela ‘lerato leo re neng re e-na le lona pele.’ (Tšenolo 2:1-4) Litšobotsi tse itseng tsa mosebetsi oo re o etsetsang Jehova li ka ’na tsa fetoha tloaelo. Bibele e fana joang ka khothatso e hlokahalang hore re boloke cheseho ea rōna ea bosebeletsi e phela?
Joaloka “Mollo o Tukang” ka Lipelong Tsa Rōna
5, 6. Moapostola Pauluse o ne a nka tokelo ea hae ea ho bolela joang?
5 Bosebeletsi boo Jehova a bo behileng tlhokomelong ea rōna ke ba bohlokoa haholo hoo bo ke keng ba nkoa habobebe feela tjee. Moapostola Pauluse o ne a nka ho bolela litaba tse molemo e le tokelo e khōlō haholo, ’me o ne a inka a sa tšoanelehe hore ho ka behoa tlhokomelong ea hae. O itse: “Ho ’na, motho ea ka tlaase ho e monyenyane ka ho fetisisa ho bahalaleli bohle, ho ile ha fanoa ka mosa ona o sa tšoanelang, e le hore ke bolelle lichaba litaba tse molemo tse mabapi le maruo a ke keng a lekanngoa a Kreste le hore ke etse hore batho ba bone kamoo sephiri se halalelang se tsamaisoang kateng seo ho tloha nakong e sa tsejoeng e fetileng se ’nileng sa patoa ho Molimo, ea bōpileng lintho tsohle.”—Baefese 3:8, 9.
6 Boikutlo bo botle ba Pauluse ka bosebeletsi ba hae ke mohlala o motle haholo ho rōna. Lengolong la hae le eang ho Baroma, o itse: “Taba-tabelo e teng ka lehlakoreng la ka ea ho bolela litaba tse molemo.” O ne a se lihlong ka litaba tse molemo. (Baroma 1:15, 16) O ne a e-na le boikutlo bo nepahetseng ’me a chesehela ho phethahatsa bosebeletsi ba hae.
7. Lengolong la hae le eang ho Baroma, Pauluse o ile a lemosa ka eng?
7 Moapostola Pauluse o ile a hlokomela bohlokoa ba ho boloka boikutlo ba cheseho, kahoo o ile a eletsa Bakreste ba Roma: “Le se ke la ba botsoa mosebetsing oa lōna. Chesehang ke moea. Sebeletsang Jehova joaloka makhoba.” (Baroma 12:11) Lentsoe la Segerike le fetoletsoeng e le “le se ke la ba botsoa” le na le moelelo oa ho ba “monyebe, ho noaboloha.” Le hoja re ke ke ra hla ra hulanya maoto bosebeletsing ba rōna, bohle ho hlokahala hore re falimehele lipontšo leha e le life tsa ho ba monyebe moeeng ebe re etsa litokiso tse loketseng boikutlong ba rōna haeba re lemoha hore re na le matšoao a joalo.—Liproverbia 22:3.
8. (a) Ke eng e ileng ea tšoana le “mollo o tukang” ka pelong ea Jeremia, hona hobane’ng? (b) Re ka ithuta eng phihlelong ea Jeremia?
8 Moea oa Molimo le oona o ka re thusa ha re nyahame. Ka mohlala, ka lekhetlo le leng moprofeta Jeremia o ile a iphumana a nyahame, ’me o ile a nahana ho tlohela mosebetsi oa hae oa boprofeta. O bile a re ka Jehova: “Nke ke ka bua ka eena, ’me ha ke sa tla hlola ke bua ka lebitso la hae.” Na see e ne e le bopaki ba hore Jeremia o ne a e-na le bofokoli bo tebileng moeeng? Che. Ha e le hantle, bomoea bo matla ba Jeremia, lerato la hae ho Jehova le cheseho ea hae bakeng sa ’nete li ile tsa mo matlafatsa hore a tsoele pele ho profeta. Oa hlalosa: “Ka pelong ea ka [lentsoe la Jehova] le ile la ba joaloka mollo o tukang o koaletsoeng masapong a ka; ka khathala ke ho le tiisetsa, ’me ke ne ke sa khone ho le mamella.” (Jeremia 20:9, NW) Ho tloaelehile hore nako le nako bahlanka ba tšepahalang ba Molimo ba ikutloe ba nyahame. Empa ha ba rapella thuso ho Jehova, o tla bala se lipelong tsa bona ’me ka bolokolohi a fetisetse ho bona moea o halalelang oa hae haeba, joaloka Jeremia, ba e-na le lentsoe la hae ka lipelong tsa bona.—Luka 11:9-13; Liketso 15:8.
“Le se ke la Tima Mollo oa Moea”
9. Ke eng e ka sitisang moea o halalelang ho sebetsa molemong oa rōna?
9 Moapostola Pauluse o ile a eletsa Bathesalonika, a re: “Le se ke la tima mollo oa moea.” (1 Bathesalonika 5:19) E, boikutlo le liketso tse hananang le melao-motheo ea bomolimo li ka sitisa moea o halalelang ho sebetsa molemong oa rōna. (Baefese 4:30) Kajeno Bakreste ba fuoe kabelo ea ho bolela litaba tse molemo. Tokelo ena re e tšoara ka tlhompho e tebileng. Ha ho re makatse hore ba sa tsebeng Molimo ba khesa mosebetsi oa rōna oa boboleli. Empa ha Mokreste ka boomo a hlokomoloha bosebeletsi ba hae, phello e ka ’na ea e-ba hore mollo oa moea oa Molimo o susumetsang o time.
10. (a) Pono ea batho ba bang e ka re ama joang? (b) Ke pono efe e khabane ka bosebeletsi ba rōna e boletsoeng ho 2 Bakorinthe 2:17?
10 Ba bang bao e seng litho tsa phutheho ea Bokreste ba ka ’na ba nka bosebeletsi ba rōna e le feela ho aba lingoliloeng. Ba bang ka phoso ba ka ’na ba etsa qeto ea hore re ea ka ntlo le ntlo feela hore re fumane menehelo. Haeba re lumella pono eo e mpe hore e susumetse boikutlo ba rōna, sena se ka ’na sa fokotsa katleho ea rōna bosebeletsing. Ho e-na le ho lumella monahano o joalo ho re ama, a re bolokeng pono eo Jehova le Jesu ba nang le eona ka bosebeletsi ba rōna. Moapostola Pauluse o ile a bolela pono eo e khabane ha a ne a re: “Ha re ba tsamaeang ba rekisa lentsoe la Molimo joalokaha batho ba bangata ba tsamaea ba le rekisa, empa joaloka ho tsoa botšepehing, e, joaloka ba romiloeng ba tsoa ho Molimo, tlas’a pono ea Molimo, hammoho le Kreste rea bua.”—2 Bakorinthe 2:17.
11. Ke eng e ileng ea nolofalletsa Bakreste ba pele hore ba lule ba cheseha le har’a mahloriso, ’me mohlala oa bona o lokela ho re ama joang?
11 Nakoana ka mor’a lefu la Jesu, barutuoa ba hae ba Jerusalema ba ile ba tobana le nako ea mahloriso. Ba ile ba sokeloa hape ba laeloa hore ba khaotse ho bolela. Leha ho le joalo, Bibele e re ba ile ba ‘tlala moea o halalelang ’me ba bolela lentsoe la Molimo ka sebete.’ (Liketso 4:17, 21, 31) Mantsoe a Pauluse ho Timothea lilemo tse itseng hamorao, a bontša boikutlo bo botle boo Bakreste ba lokelang ho bo boloka. Pauluse o itse: “Molimo o re file eseng moea oa bokoala, empa oa matla le oa lerato le oa ho hlaphoheloa kelellong. Ka hona u se ke ua hlajoa ke lihlong ka bopaki bo mabapi le Morena oa rōna, leha e le ka ’na motšoaruoa ka lebaka la hae, empa u be le karolo ho utloisoeng bohloko ke bobe bakeng sa litaba tse molemo ho ea ka matla a Molimo.”—2 Timothea 1:7, 8.
Re na le Molato oa Eng ho Baahisani ba Rōna?
12. Ke lebaka lefe le ka sehloohong leo ka lona re bolelang litaba tse molemo?
12 E le hore re be le boikutlo bo loketseng ka bosebeletsi ba rōna, re lokela ho ba le sepheo se nepahetseng. Ke hobane’ng ha re bolela? Lebaka le ka sehloohong le bonoa mantsoeng a mopesaleme: “Jehova, ba tšepahalang ba hao ba tla u boka. Ba tla bua ka khanya ea borena ba hao, ba tla bua ka matla a hao, hore ba tsebise bara ba batho liketso tsa hae tse matla le khanya ea bokhabane ba borena ba hae.” (Pesaleme ea 145:10-12, NW) E, re bolela e le hore re rorise Jehova phatlalatsa le ho halaletsa lebitso la hae ka pel’a moloko oohle oa batho. Esita leha re mameloa ke ba fokolang feela, ho phatlalatsa ha rōna molaetsa oa poloko ka botšepehi ho tlisetsa Jehova thoriso.
13. Ke eng e re tlamang ho bolella ba bang ka tšepo ea poloko?
13 Re boetse re bolela ka lebaka la ho rata batho le hore re qobe ho ba le molato oa mali. (Ezekiele 33:8; Mareka 6:34) Se amanang le sena ke mantsoe a Pauluse ha a ne a bua ka bao e neng e se litho tsa phutheho ea Bokreste, a re: “Ho Bagerike hammoho le ho Babarebare, ho ba bohlale hammoho le ho ba se nang kelello ke na le molato.” (Baroma 1:14) Pauluse o ne a ikutloa hore o na le molato oa ho bolella batho litaba tse molemo, kaha ke thato ea Molimo hore “mefuta eohle ea batho e pholohe.” (1 Timothea 2:4) Kajeno, re utloa re e-na le lerato le tlameho tse tšoanang ho baahisani ba rōna. Lerato la Jehova ho moloko oa batho le ile la mo susumelletsa ho rōmela Mora oa hae lefatšeng hore a o shoele. (Johanne 3:16) Seo e ne e le sehlabelo se seholo. Re etsisa lerato la Jehova ha re sebelisa nako, re etsa le boiteko ba ho bolella ba bang litaba tse molemo tsa poloko e thehiloeng sehlabelong sa Jesu.
14. Bibele e hlalosa joang lefatše leo e seng karolo ea phutheho ea Bokreste?
14 Lipaki tsa Jehova li nka batho ba bang e le bao ho lebeletsoeng hore e ka ba litho tsa mokhatlo oa bara ba motho oa Bokreste. Re lokela ho bolela ka sebete, empa ho ba sebete ha rōna ha ho bolele ho hlasela ba bang. Ke ’nete hore Bibele e hlile e sebelisa mantsoe a matla ha e bua ka lefatše ka kakaretso. Lentsoe “lefatše” ka bolona, le sebelisoa ka kutloisiso e seng ntle ke Pauluse ha a bua ka “bohlale ba lefatše lena” le “litakatso tsa lefatše.” (1 Bakorinthe 3:19; Tite 2:12) Pauluse o ile a boela a hopotsa Bakreste ba Efese hore ha ba ne ba tsamaea “ho ea ka tsamaiso ea lintho ea lefatše lena,” ba ne ba “shoele” moeeng. (Baefese 2:1-3) Lipolelo tsena le tse ling tse tšoanang le tsona li lumellana le mantsoe a moapostola Johanne, a reng: “Lefatše lohle le rapaletse matleng a ea khopo.”—1 Johanne 5:19.
15. Mabapi le batho bao e seng litho tsa phutheho ea Bokreste, ke eng eo re sa e etseng, hona hobane’ng?
15 Leha ho le joalo, u hopole hore lipolelo tse joalo li bua ka lefatše ka kakaretso le ikarohantseng le Molimo, eseng batho ka bomong. Bakreste ha ba ahlole pele ho nako hore na motho leha e le ofe o tla arabela joang mosebetsing oa boboleli. Ha ba na motheo oa ho hlalosa hore batho leha e le bafe ke lipōli. Hase rōna ba ka bolelang hore na phello e tla ba efe ha Jesu a e-tla ho tla arola “linku” ho “lipōli.” (Matheu 25:31-46) Jesu ke eena moahloli ea khethiloeng; eseng rōna. Ntle ho moo, liketsahalo li ’nile tsa bontša hore ba bang ba neng ba ameha ka botebo boitšoarong bo bobe ka ho fetisisa ba amohetse molaetsa oa Bibele, ’me ba fetoha Bakreste ba phelang ka bohloeki. Kahoo, le hoja re ke ke ra batla setsoalle sa batho ba itseng, ha re tsilatsile ho bua le bona ka tšepo ea ’Muso ha monyetla o itlhahisa. Mangolo a bua ka batho ba itseng bao, pele e e-ba balumeli, “ba neng ba e-na le tšekamelo e nepahetseng bakeng sa bophelo bo sa feleng.” Qetellong e ile ea e-ba balumeli. (Liketso 13:48) Ha ho kamoo re ka tsebang hore na ke mang ea nang le tšekamelo e nepahetseng joalo ho fihlela ha re fane ka bopaki—mohlomong ka makhetlo a mangata. Re hopotse sena, ba e-song ho amohele molaetsa oa poloko re ba tšoara ka “bonolo” le “tlhompho e tebileng,” re e-na le tšepo ea hore ba bang ba bona ba ka ’na ba nka khato ka molaetsa oa bophelo.—2 Timothea 2:25; 1 Petrose 3:15.
16. Ke lebaka lefe le leng leo ka lona re batlang ho hlaolela “tsebo ea ho ruta”?
16 Ha re le mesuoe e hlaoletseng tsebo ea ho ruta, cheseho ea rōna ea ho bolela litaba tse molemo e tla eketseha. E le ho etsa papiso: Papali e thabisang e ka ’na ea se ke ea thahasellisa ho motho ea sa tsebeng hore na e bapaloa joang. Empa ho ea e bapalang hantle, e monate. Ka ho tšoanang, Bakreste ba hlaolelang “tsebo ea ho ruta” ba eketsa thabo ea bona bosebeletsing. (2 Timothea 4:2; Tite 1:9) Pauluse o ile a eletsa Timothea, a re: “Etsa sohle se matleng a hao ho itlhahisa u amoheleha ho Molimo, mosebetsi eo ho seng letho leo a ka hlajoang ke lihlong ka lona, ea tšoarang lentsoe la ’nete ka nepo.” (2 Timothea 2:15) Re ka ntlafatsa joang tsebo ea rōna ea ho ruta?
17. Re ka ‘hlaolela taba-tabelo’ ea tsebo ea Bibele joang, ’me tsebo e joalo e ka ba molemo joang bosebeletsing ba rōna?
17 Tsela e ’ngoe ke ea ho amohela tsebo e nepahetseng e eketsehileng. Moapostola Petrose oa re khothatsa: “Joaloka masea a sa tsoa tsoaloa, le hlaolele taba-tabelo ea lebese le sa tsoakoang la lentsoe, e le hore ka lona le ka hōlela polokong.” (1 Petrose 2:2) Ka tlhaho ngoana ea phelang hantle o labalabela lebese. Leha ho le joalo, ho ka ’na ha hlokahala hore Mokreste a “hlaolele taba-tabelo” ea tsebo ea Bibele. Sena se ka etsoa ka ho hlaolela mekhoa e metle ea ho ithuta le ho bala. (Liproverbia 2:1-6) Boiteko le ho itaea lia hlokahala e le hore re be mesuoe e nang le tsebo ea Lentsoe la Molimo, empa boiteko bo joalo bo tlisa meputso. Thabo e tlisoang ke ho hlahloba Lentsoe la Molimo e tla etsa hore moea oa Molimo o re tlatse cheseho, re chesehele ho abela ba bang lintho tseo re ithutang tsona.
18. Liboka tsa Bokreste li ka re thusa joang ho tšoara lentsoe la ’nete ka nepo?
18 Liboka tsa Bokreste le tsona li phetha karolo ea bohlokoa hore re sebelise Lentsoe la Molimo ka tsebo. Ha ho baloa litemana tsa Bibele nakong ea puo ea phatlalatsa le lipuisanong tse ling tsa Mangolo, e tla ba hantle hore le rōna re bale Libibeleng tsa rōna. Re bontša hore re bohlale ha re mamela ka hloko lipuo tse fanoang libokeng, ho akarelletsa le tse buang ka ho toba ka mosebetsi oa rōna oa boboleli. Le ka mohla re se ke ra tella molemo oa lipontšo, mohlomong re lumella likelello tsa rōna ho lelera. Hape, ho itaea le ho tsitsisa kelello tabeng, hoa hlokahala. (1 Timothea 4:16) Liboka tsa Bokreste li haha tumelo ea rōna, li re thusa ho hlaolela tabatabelo ea Lentsoe la Molimo, ’me li re koetlisetsa ho ba baboleli ba chesehang ba litaba tse molemo.
Re ka Tšepa Tšehetso ea Jehova
19. Ke hobane’ng ha ho kopanela kamehla mosebetsing oa ho bolela e le ha bohlokoa?
19 Bakreste ba “chesehang ke moea” le ba chesehelang ho bolela litaba tse molemo ba loanela ho kopanela kamehla bosebeletsing. (Baefese 5:15, 16) Ke ’nete hore maemo aa fapana, ’me hase bohle ba ka qetang nako e tšoanang mosebetsing ona o pholosang bophelo. (Bagalata 6:4, 5) Empa, mohlomong habohlokoa ho feta nako eo re e qetang mosebetsing oa boboleli ke hore na re bua khafetsa hakae ka tšepo ea rōna ho ba bang. (2 Timothea 4:1, 2) Ha re bolela haholo, ke moo re tla ananela haholo bohlokoa ba mosebetsi ona. (Baroma 10:14, 15) Kutloelo-bohloko ea rōna le qenehelo li tla hōla ha re kopana kamehla le batho ba tšepahalang ba bobolang, ba feheloang le ba se nang tšepo.—Ezekiele 9:4; Baroma 8:22.
20, 21. (a) Ke mosebetsi ofe o sa ntsaneng o larile ka pel’a rōna? (b) Jehova o tšehetsa boiteko ba rōna joang?
20 Jehova o behile litaba tse molemo tlhokomelong ea rōna. Ke eona thōmo ea pele eo re e amohelang ho eena re le “basebetsi-’moho” le eena. (1 Bakorinthe 3:6-9) Ka pelo eohle re chesehela ho phethahatsa boikarabelo bona boo Molimo a faneng ka bona, hamolemohali kamoo re ka khonang kateng. (Mareka 12:30; Baroma 12:1) Ho sa ntsane ho e-na le batho ba bangata ba sekametseng ho lokeng lefatšeng ba lapetseng ’nete. Ho na le mosebetsi o mongata o lokelang ho etsoa, empa re ka tšepa tšehetso ea Jehova ha re phetha bosebeletsi ba rōna ka botlalo.—2 Timothea 4:5.
21 Jehova o re fa moea oa hae le ho re hlomella ka “sabole ea moea,” e leng Lentsoe la Molimo. Ka thuso ea hae re ka ahlamisa melomo ea rōna “ka bolokolohi ba puo ho tsebahatsa sephiri se halalelang sa litaba tse molemo.” (Baefese 6:17-20) A ho ke ho boleloe ka rōna se ileng sa ngoloa ke moapostola Pauluse ha a ne a ngolla Bakreste ba Thesalonika, a re: “Litaba tse molemo tseo re li bolelang ha lia ka tsa hlaha har’a lōna ka puo feela empa hape le ka matla le ka moea o halalelang le kholiseho e matla.” (1 Bathesalonika 1:5) E, a re boleleng litaba tse molemo ka cheseho!
Tlhahlobo e Khutšoanyane
• Ka lebaka la matšoenyeho a bophelo, ho ka ’na ha etsahala’ng ka cheseho ea rōna bosebeletsing?
• Ke ka tsela efe takatso ea rōna ea ho bolela litaba tse molemo e ka tšoanang le “mollo o tukang” ka lipelong tsa rōna?
• Ke maikutlo afe a mabe ao re lokelang ho a qoba tabeng ea bosebeletsi?
• Ka kakaretso, ba sa lumeleng seo re se lumelang re lokela ho ba nka joang?
• Jehova o re thusa joang ho boloka cheseho ea rōna mosebetsing oa boboleli?
[Litšoantšo tse leqepheng la 9]
Bakreste ba etsisa cheseho ea Pauluse le Jeremia
[Litšoantšo tse leqepheng la 10]
Cheseho ea rōna bosebeletsing e susumetsoa ke ho rata Molimo le moahisani