Lipotso tse Tsoang ho Babali

◼ Ke hobane’ng ha ho fetoleloa ha 2 Petrose 1:19 ho New World Translation of the Holy Scriptures ho fapane le Libibeleng tse ling?

Ha moapostola Petrose a hatella bohlokoa ba lentsoe le bululetsoeng la Molimo, o ile a ngola: “Ka baka leo re na le lentsoe la boprofeta le tiisitsoeng haholoanyane; ’me le etsa hantle ha le le ela hloko joaloka lebone le khanyang sebakeng se lefifi, ho fihlela ha letsatsi le chaba le naleli ea meso e hlaha, ka lipelong tsa lōna.”—2 Petrose 1:19, NW.

Hlokomela hore poleloana e reng “ho fihlela ha letsatsi le chaba le naleli ea meso e hlaha” e khethollotsoe ka lifeheloane. Liphetolelo tse ngata tsa Bibele ha li etse sena.

Ka mohlala, Dr. James Moffatt o fetolela karolo ea ho qetela ea temana ena tjena: “. . . le khanya joaloka lebone le sebakeng se lefifi; ho fihlela ha Letsatsi le chaba ’me naleli ea meso e hlaha ka har’a lipelo tsa lōna.” Liphetolelo tse kang ena li lebisa ponong ea hore ho hlaha ha naleli ea meso ho etsahala ka har’a lipelo tsa balumeli, joaloka nakong ea ha ba latsoa ho khantšetsoa ho itseng ha moea.

Leha ho le joalo, esita le morao koana nakong ea Moshe, ho ile ha ba le sesupo sa hore ‘naleli e tsoang ho Jakobo’ e ne e tla hlaha. (Numere 24:17; bapisa le Pesaleme ea 89:34-37.) Jesu o itsebahalitse ka ho hlakileng e le “setloholo sa Davida, mphatlalatsane e khanyang.”—Tšenolo 22:16, NW.

Ho tsebahatsoa hona ha “naleli ea meso,” kapa “mphatlalatsane,” ho lumellana le taba e potolohileng seo moapostola Petrose a neng a bua ka sona. O ne a sa tsoa bua ka pono ea ho fetoha ha Jesu ho khanyang eo a neng a ile a e bona lilemong tse ka bang 30 pejana. (Mattheu 16:28–17:9) Pono eo e khanyang e ne e supa nakong ea ha Jesu a ‘tla ’musong oa hae,’ kapa a tlotlisoa matleng a ’Muso. Seo Petrose a ileng a se bona se ile sa hatisa bohlokoa ba lentsoe la Molimo; ka ho tšoanang, kajeno ho hlokahala hore Bakreste ba ele lentsoe leo la boprofeta hloko.

Le hoja lipelo tsa batho ka kakaretso li ne li le lefifing—’me li ntse li le lefifing—ha ho hlokahale hore ho be joalo ho Bakreste ba ’nete. Ho joalokaha eka ba na le lebone le khantšang ka lipelong tsa bona tseo ka ntle ho moo li neng li tla ba lefifing. Petrose o ne a tseba hore ka ho ela hloko lentsoe la Molimo la boprofeta le khantšang, Bakreste ba ne ba tla lula ba falimehile ’me ba boneselitsoe ho isa ho chabeng ha letsatsi le lecha. Eo e ne e tla ba nako eo ka eona “naleli ea meso,” kapa “mphatlalatsane e khanyang,” e neng e tla busa ka ho toba matleng a ’Muso.

Ke ho thahasellisang hore ebe E. W. Bullinger o ile a ngola tjena ka 2 Petrose 1:19: “Mona, ho hlakile hore ho ne ho tlameha ho be le masakana, hobane boprofeta ke bona boo e leng leseli le khanyang, ’me Kreste le ho hlaha ha Hae ke Naleli ea meso le Letsatsi le chabang. Ka sebele, moelelo e ke ke ea e-ba hore re khothalletsoa hore re mamele lentsoe la boprofeta ho fihlela ha Kreste a senoloa ka lipelong tsa rōna! Che; empa re tlameha ho ela lentsoe lena la boprofeta hloko ka lipelong tsa rōna, ho fihlela ha le phethahatsoa ho hlaheng ha Kreste—ho hlaha ha Ea bitsoang ‘Mphatlalatsane.’”—Figures of Speech Used in the Bible, 1898.

Ka baka leo, liphetolelo tse ngata tsa Bibele li sebelisa masakana ho 2 Petrose 1:19.a New World Translation of the Holy Scriptures e boloka tatellano ea motheo ea ho ngoloa ha mantsoe e fumanoang Segerikeng sa pele-pele. Empa e sebelisa lifeheloane ho khetholla poleloana “ho fihlela ha letsatsi le chaba le naleli ea meso e hlaha” keletsong ea hore ho eloe lentsoe hloko ‘joaloka lebone le khanyang sebakeng se lefifi, ka lipelong tsa lōna.’

[Mongolo o botlaaseng ba leqephe]