Ho Etsa Sohle se Matleng a Rōna ho Bolela Litaba tse Molemo
“Etsa ka matla ho ba ea amohelehang ho Molimo, mosebetsi ea ke keng a hlajoa ke lihlong.”—2 TIMOTHEA 2:15, TLP.
1, 2. U hlokometse keketseho efe lenaneng la basebeletsi ba nako e tletseng? E tlatselitsoe ke eng?
PULA-MALIBOHO, kapa mosebeletsi e mong oa nako e tletseng Japane, o ile a ngola, “Lilengoaneng tsa ho feta, ba bangata ho rōna re ne re nahana hore ba maemong a khethehileng ke bona feela ba ka bulang maliboho. Ho bonahala hore re ne re fositse. Re ithuta hore ke feela ba maemong a khethehileng ba ke keng ba bula maliboho.”
2 Pono eo e molemo e felletse ka keketseho e ’ngoe ea tse tsotehang ka ho fetisisa lenaneng la basebeletsi ba nako e tletseng har’a Lipaki tsa Jehova lilemong tsa morao tjena. Kajeno Japane, baboleli ba ’Muso ba babeli ho ba bang le ba bang ba bahlano ba tšoarehile tšebeletsong e itseng ea nako e tletseng. Empa moea ona oa cheseho ha oa fella Japane feela. Selemong se fetileng sa tšebeletso, palo ea baboleli ho pota lefatše e eketsehile ka karolo ea 5 lekholong, ha palo ea basebeletsi ba nako e tletseng e eketsehile ka karolo ea 22 lekholong. Ka ho hlakileng, batho ba Jehova ba nkile ka botebo mantsoe a moapostola Pauluse: “Etsa ka matla ho ba ea amohelehang ho Molimo, mosebetsi ea ke keng a hlajoa ke lihlong.” (2 Timothea 2:15, TLP) Na u etsa hoo?
“Seo Lerato la Molimo le Leng Sona”
3. Matla a susumetsang khōlo ee ke afe?
3 Ha bo-pula-maliboho ba botsoa hore na ba nketse tšebeletso ea nako e tletseng ka lebaka lefe, ka mehla ba arabela ka hore ke ka lebaka la lerato la bona ho Jehova Molimo. (Mattheu 22:37, 38) Ho lokela ho ba joalo, hobane ha lerato le le sieo joaloka tšusumetso e nepahetseng, boiteko leha e le bofe e ne e tla ba ba lefeela. (1 Ba-Korinthe 13:1-3) Ruri ke ho babatsehang hore ba bangata hakana ho Bakreste bahabo rōna—karolelano ea baboleli ba ka holimo ho ba supileng phuthehong e ’ngoe le e ’ngoe ho potoloha lefatše—ba butse monyetla bophelong ba bona oa ho bontša lerato la bona ho Molimo ka tsela ena.
4. Ho tlile joang hore re rate Molimo? (Ba-Roma 5:8)
4 Rōna bohle ba neetseng bophelo ba rōna ho Jehova re ho entse hobane re mo rata. Ha re ithuta ka lerato leo Jehova le Mora oa hae, Jesu Kreste, ba nang le lona ho rōna, le ka mahlohonolo a babatsehang ao ’Muso oa hae o tlang ho a tlisa, lipelo tsa rōna li ile tsa susumetseha hore re arabele ka lerato ho eena. Ke kamoo moapostola Johanne a ho bolelang: “Rea mo rata, kahobane e le eena ea re ratileng pele.” (1 Johanne 4:19) Re arabela ka tlhaho ka tsela eo hobane ke kamoo re bōpiloeng kateng. Empa na lerato la Molimo le akarelletsa feela boikutlo boo bo mofuthu lipelong tsa rōna?
5. Ho rata Molimo ho akarelletsa eng? (1 Johanne 2:5)
5 Che, ho rata Molimo ho bolela ho fetang hoo. Moapostola Johanne oa re bolella: “Seo lerato la Molimo le leng sona ke hore re bōlōke litaelo tsa hae. Litaelo tsa hae ha li boima.” (1 Johanne 5:3, TLP) E, lerato la ’nete, joaloka tumelo ea ’nete, le bontšoa ka liketso. (Bapisa 2 Ba-Korinthe 8:24.) Le batla ho khahlisa le ho fumana kamohelo ea ea ratoang. Ke tsela e babatsehang hakaakang eo ba tšebeletsong ea nako e tletseng ba e khethileng ho bontša lerato la bona ho Jehova le Jesu Kreste!
6. (a) Ke batho ba mofuta ofe ba nolofaletsoeng ke ho bula maliboho? Ke eng e ba nolofalelitseng ho etsa joalo? (b) Na u tseba mehlala leha e le efe e joalo?
6 Maemo a batho aa fapana, ’me a tlameha hore a nahaneloe. Empa ha re sheba ba tšebeletsong ea nako e tletseng, re fumana hore ba akarelletsa hoo e ka bang batho ba maemo ’ohle—ba banyenyane le ba baholo, masooa le ba lenyalong, ba phelang hantle le ba kulang, ba nang le boikarabelo ba malapa le ba se nang bona, joalo-joalo. Phapang ke hore, ho e-na le ho lumella lintlha tsena hore li fetohe litšitiso, bona, joaloka moapostola Pauluse, ba ithutile ho li pota ka thōko ha ba sebetsa kapa ho phela le tsona. (2 Ba-Korinthe 11:29, 30; 12:7) Ka mohlala, nahana ka lelapa la sebele.
Eiji ke moholo phuthehong ea habo. Eena le mosali oa hae e bile bo-pula-maliboho hammoho ka lilemo tse 12 ha ba ntse ba hōlisa bana ba bararo. Ba ho entse joang? Eiji o re, “Re lokela ho phela ka mokhoa o itekanetseng.” Le bana ba ile ba lokela ho ithuta ho amohela taba ea hore ba ke ke ba fumana lintho tse ngata tseo ba li batlang. “Le hoja ka linako tse ling ho ne ho ba thata, Jehova kamehla o ’nile a fana ka seo re se hlokang.”
Na boitelo boo e bile bo tšoanelehang? Eiji o re, “Mantsiboea a mang le a mang pele re tima mabone, ke shebella mosali oa ka ha a ngola tlaleho ea hae ea boboleli bakeng sa letsatsi leo. Ha ke bona lelapa la ka le etelletsa pele lithahasello tsa moea ka tsela ena, ke ikutloa hore sohle se ka tsela e nepahetseng, ’me ke utloa hore ke finyelletse ho hong. Ke sitoa ho nahana re se re sa bule maliboho hammoho.” Mosali oa hae o ikutloa joang ka hona? O re, “Eiji o re hlokometse hantle haholo. Ha ke mo bona a tšoarehile ka litaba tsa moea, ke ikutloa ke khotsofetse haholo. Kea tšepa re tla ’ne re tsoele pele.”
Kaha ntate le ’mè ba sebelisa nako e ngata haholo mosebetsing oa ho bolela letsatsi le leng le le leng, ho bile le phello efe ho bana ba bona? Mora e moholo hona joale o sebetsa lenaneong la kaho la lilemo tse ’nè lekaleng la Mokhatlo oa Watch Tower. Morali ke pula-maliboho oa ka mehla, ’me mora ea ntseng a kena sekolo o hopotse hore e tla ba pula-maliboho ea khethehileng. Kaofela ba thabetse hore e be batsoali ba bona ke bo-pula-maliboho.
7. (a) Fana ka mehlala eo u e tsebang mabapi le batho ka bomong ba hlōtseng litšitiso tsa ho kenela tšebeletso ea nako e tletseng. (b) Ke keletso efe ea Bibele eo ba e nkileng ka botebo?
7 Malapa a kang lena a ka fumanoa har’a Lipaki tsa Jehova linaheng tse ngata ho pota lefatše. A iteka ka sebele ho sebelisa maemo a oona hamolemohali e le hore a ka kena ’me a lula tšebeletsong ea nako e tletseng. Ka liketso tsa oona, a bontša hore na ho rata Molimo ho hlile ho seng ho oona. Ka tieo, a ela hloko khothatso ea Pauluse: “Etsa ka matla ho ba ea amohelehang ho Molimo, mosebetsi ea ke keng a hlajoa ke lihlong.”—2 Timothea 2:15, TLP.
“Mosebetsi ea ke Keng a Hlajoa ke Lihlong”
8. Ke hobane’ng ha Pauluse a ile a phehella Timothea hore a ‘etse ka matla’ ’me hoo ho bolela eng?
8 Ha Pauluse a ngolla Timothea mantsoe ao, hoo e ka bang ka 65 C.E., Timothea o ne a se a ntse a sebeletsa sebakeng sa boikarabelo bo matla phuthehong ea Bokreste. Pauluse o itse ke “mohlabani ea molemo oa Jesu Kreste” ’me nako le nako a mo hopotsa ka boikarabelo ba hae ba ho laea le ho ruta ba bang. (2 Timothea 2:3, 14, 25; 4:2) Leha ho le joalo, a phehella Timothea: “Etsa ka matla ho ba ea amohelehang ho Molimo.” Poleloana “etsa ka matla” e fetoletsoe lentsoeng la Segerike le bolelang “potlakisa.” (Bona Kingdom Interlinear Translation.) Ka mantsoe a mang, Pauluse o ne a bolella Timothea hore, haeba a lakatsa ho amoheloa ke Molimo, ho ne ho hlokahala hore a potlakise tšebetso ea hae, le hoja a ne a se a ntse a phethahatsa boikarabelo bo boima haholo. Hobane’ng? E le hore e ka ba “mosebetsi ea ke keng a hlajoa ke lihlong.”
9. Ke setšoantšo sefe sa Jesu se ka re thusang ho utloisisa mantsoe a Pauluse ka “mosebetsi ea ke keng a hlajoa ke lihlong”?
9 Polelo ena ea bobeli e re hopotsa ka bahlanka ba bararo ba setšoantšo sa Jesu sa litalenta, joalokaha se ngotsoe ho Mattheu 25:14-30. Mohla morena a khutlang, e ne e tla ba nako ea hore ba hlahise tšebetso ea bona ho morena hore a e ananele. Mohlanka ea neng a neiloe litalenta tse hlano le ea neng a neiloe tse peli ba ile ba babatsoa ke morena ka lebaka la seo ba se entseng ka lintho tseo ba neng ba li abetsoe. Ba memeloa ho ‘kena thabong ea morena oa bona.’ Empa mohlanka ea neng a neiloe talenta e le ’ngoe a fumanoa a haelloa ho se hlokoang. A amohuoa seo a neng a e-na le sona, ’me ho tlontlolleheng ha hae, a akheloa “mafifing a kantle.”
10. Ke hobane’ng ha mohlanka ea ileng a neoa talenta e le ’ngoe a ile a hlabisoa lihlong a ba a otloa?
10 Bahlanka ba babeli ba pele ba ile ba sebetsa ka thata ’me ba eketsa matlotlo a morena oa bona. Ka sebele e ne e le banna ba “ke keng ba hlajoa ke lihlong.” Empa ke hobane’ng ha mohlanka oa boraro a ile a hlabisoa lihlong ’me a otloa le hoja a ne a sa lahla seo a se neiloeng? Ke hobane ha a ka a etsa letho le molemo ka sona. Joalokaha morena a mo totobalelitse, bonyane a ka be a ile a kenya chelete eo bankeng. Empa ho neng ho hlile ho fosahetse, ke hore o ne a se na lerato la ’nete ho morena oa hae. O ile a ipolela ho morena, “Ke tšabile ke hona, ’me ke ile ka pata talenta ea hao mobung.” (Mattheu 25:25; bapisa 1 Johanne 4:18.) O ile a talima morena oa hae e le motho ea khopo, “ea thata” ’me kabelo ea hae e le moroalo. O ile a etsa ho honyenyane hoo a ka ho khonang e le hore a ka ’na a tsoela pele ho e-na le ho ‘etsa sohle se matleng a hae’ hore a hape kamohelo ea morena oa hae.
11. Setšoantšo seo se re ama joang kajeno?
11 Setšoantšo seo sea phethahala kajeno. Morena. Jesu Kreste, o khutlile ’me o hlahloba mosebetsi oa “bahlanka” ba hae, hammoho le oa balekane ba bona, “bongata bo boholo ba batho” ba kang linku. (Mattheu 24:45-47; Tšenolo 7:9, 15) Morena o fumana eng? Haeba re khotsofaletse feela tšebeletso ea ho itlosa molato, joale ho ka ’na ha etsahala hore e be re tla balelloa le ba tla hlabisoa lihlong ’me ba akheloe “mafifing a kantle.” Ka lehlakoreng le leng, haeba re ‘etsa sohle se matleng a rōna,’ ke hore, re “potlakisa” mosebetsi oa rōna ka baka la linako tse potlakileng, re tla fumanoa re le ba amoheloang, ‘basebetsi ba se nang ho hlabisoa lihlong’ ’me re tla kopanela ‘thabong ea morena oa rōna.’
Ho Hlokahala Boikhalemelo le Boitelo
12. Ke lintlha life tse nolofalelitseng karolo e khōlō ea baboleli ba Japane hore e kenele tšebeletso ea nako e tletseng?
12 Lefapha le ntseng le hōla la bo-pula-maliboho ho ea ka linaha tse fapaneng ho pota lefatše ke bopaki bo hlakileng ba hore batho ba Jehova ka kakaretso ba ‘etsa sohle se matleng a bona’ ho ipaka e le ‘basebetsi ba ke keng ba hlajoa ke lihlong.’ Empa na u kile ua ipotsa hore na ke hobane’ng linaheng tse ling karolo e khōlō ea baena e khona ho kenela tšebeletso ea nako e tletseng ho feta linaheng tse ling? Bo-pula-maliboho ba Japane ba ile ba botsoa potso ena e thahasellisang. Nahana ka likarabelo tsena:
“Ha ke lumele hore tumelo, kapa lerato la Lipaki tsa Majapane le feta la baena ba bona linaheng tse ling,” kamoo ho boletseng mosebetsi e mong oa Bethele ea bileng tšebeletsong ea nako e tletseng ka lilemo tse ka bang 30. “Empa ke lumela hore litšobotsi tsa Majapane ho na le moo bo amanang le sena. Ka kakaretso, Majapane ke batho ba ikokobetsang ba nkang bohato habonolo ha ba khothatsoa.”
Moholo e mong o ile a hlalosa, “Kaha ho na le bo-pula-maliboho ba bangata hoo e ka bang phuthehong e ’ngoe le e ’ngoe, maikutlo a akaretsang ke hore mang le mang a ka ho etsa.” Majapane a rata ho etsa lintho ka lihlopha. A na le moea o babatsehang oa ho sebetsa ka lihlopha.
Tsena ruri ke lipolelo tse susumetsang monahano, ’me haeba re tiile re batla ho ntlafatsa tšebeletso ea rōna ho Jehova, ho na le lintlha tse ngata tse totobetseng tse tšoaneloang ke hore re nahane ka tsona ka hloko.
13. Re ka rua molemo joang tabeng ea ho ba ba ikokobelitseng le ba bonolo ho arabela khothatsong?
13 Pele ho tsohle, ke taba ea ho ba ba ikokobelitseng le ba bonolo ho nka bohato ha re khothatsoa. Ha tsamaiso le khothatso li e-tsoa mohloling o tšoanelang, ho nepahetse hore re nolofalloe ke ho nka bohato. Kahoo, ho e-na le ho talima litšoaneleho tsena e le litšobotsi tsa bochaba feela, re hopole mantsoe a Jesu: “Linku tsa ka li utloa lentsoe la ka; kea li tseba, ’me lia ntatela.” (Johanne 10:27) Hape re hopola hore tšobotsi e ’ngoe ea “bohlale bo tsoang holimo” ke ho ba “bonolo.” (Jakobo 3:17) Litšoaneleho tsena ke tseo Bakreste bohle ba khothaletsoang hore ba be le tsona. Ka lebaka la semelo le khōliso, ba bang mohlomong ba ineetse monahanong oa boitaolo le oa boithatelo ho feta ba bang. Mohlomong mona ke hona moo ho hlokahalang hore re ikhalemele ’me re ‘nchafatse mehopolo ea rōna’ e le hore re ka lemoha ka ho hlakileng haholoanyane hore na “thato ea Molimo” ke efe.—Ba-Roma 12:2.
14. Bakreste bohle ba ineetseng ba amohetse memo efe, ’me e akarelletsa eng?
14 Joaloka Bakreste ba ineetseng, re amohetse memo ea Jesu: “Haeba motho ofe kapa ofe a batla ho ntatela, a ke a tele ho ba pusong ea hae ’me a ipelese thupa ea hae ea tlhokofatso ’me a ntatele a sa khaotse.” (Mattheu 16:24) Ho ‘itela’ ho bolela ‘ho itatola ka ho feletseng’ ’me kamorao ho moo ka boithatelo u amohela ho ruuoa ke Jehova Molimo le Jesu Kreste, re ba lumella hore ba busa bophelo ba rōna le ho re bolella hore na re lokela ho etsa eng le hore na ha rea lokela ho etsa eng. Ke tsela efe e molemo haholoanyane ea ho bontša hore re itetse ho feta ea ho hata moo Jesu a hatileng tšebeletsong ea nako e tletseng?
15. (a) Ho khotsofalla ho honyenyane linthong tse bonahalang ho amana joang le ho latela Jesu? (b) Barutuoa ba pejana ba ile ba arabela joang memong ea Jesu ea hore ba mo latele?
15 Joale ke taba ea ho khotsofalla lintho tse seng kae tse bonahalang. Hona ka ho hlakileng ho hanana le tšekamelo e akaretsang ea lefatše, e hōlisang “takatso ea nama, le takatso ea mahlo, le boikhantšo joa bophelo.” (1 Johanne 2:16) Empa Jesu o hatisitse hore: “Ea sa teleng tsohle tseo a nang le tsona, o sitoa ho ba morutuoa oa ka.” (Luka 14:33) Hobane’ng? Hobane ho ba morutuoa oa Jesu ho bolela ho fetang feela ho ba molumeli. Ha Jesu a bitsa Andrease, Petrose, Jakobo, Johanne le ba bang ho ba barutuoa ba hae selemong sa bobeli sa tšebeletso ea hae, o ne a sa ba kope hore e be ba lumelang ho eena joaloka Messia. Hamorao a ba memela hore ba mo latele le hore ba etse mosebetsi oo a neng a o etsa, ke hore, mosebetsi oa boboleli oa nako e tletseng. Ba ile ba arabela joang? “Ba phakisa ba tlohela matlooa a bona, ba mo latela.” Jakobo le Johanne ba ba “ba tlohela ntat’a bona Zebedea sekepaneng le ba mo sebeletsang, ’me ba mo latela.” (Mareka 1:16-20) Ba siea khoebo ea bona le bao e neng e le metsoalle ea bona ’me ba nka boboleli ba nako e tletseng.
16. Joaloka Bakreste ba ineetseng, re lokela ho boloka nako ea rōna le matla ho eng? (Liproverbia 3:9)
16 Ka baka leo, ho bonolo ho bona hore na ke hobane’ng ha ho khotsofalla ho honyenyane e le ntlha ea bohlokoa hakana hore re tle re etse sohle se matleng a rōna tšebeletsong ea Jehova. Haeba re imetsoe ke lintho tse ngata tse bonahalang kapa re tlanngoe ke lintho tse ngata, re ka ’na ra tšoana le ’musisi e monyenyane oa morui ea ileng a hana memo ea Jesu ea hore e be molateli oa hae, e seng hobane a ne a ke ke a ho etsa, empa hobane a ne a sa utloisise ho siea ‘maruo a mangata haholo’ a hae. (Mattheu 19:16-22; Luka 18:18-23) Ka hona ho e-na le ho senya nako le matla a rōna ho phehella lintho tse tla tloha ‘li feta,’ re batla ho boloka matlotlo ana a bohlokoa bakeng sa boiketlo ba rōna ba ka mehla.—1 Johanne 2:16, 17.
17. Moea oa ho sebetsa ka sehlopha e ka ba tšusumetso e molemo ka tekanyo e kae?
17 Qetellong, ke taba ea moea oa ho sebetsa ka sehlopha. Ha ho pelaelo hore Andrease, Petrose, Jakobo le Johanne ba ile ba susumetsana qetong ea bona ea ho amohela memo ea Jesu ea hore ba mo latele. (Johanne 1:41, 42) Ka ho tšoanang, hore baena ba rōna ba bangata ba khona ho bula monyetla bophelong ba bona bo maphatha-phatha hore ba kenele tšebeletso ea nako e tletseng e lokela ho re susumetsa hore re nahane taba ea rōna ka botebo. Ka lehlakoreng le leng, ba har’a rōna ba seng ba ntse ba thabela tokelo ena ba ka kopanela liphihlelo tsa bona tse thabisang le ba bang, kahoo ba ba khothatsa hore le bona ba ikopanya le bona. ’Me, ha e le hantle, basebeletsi ba nako e tletseng ba ka thusana molemong oa bohle.—Ba-Roma 1:12.
18. Bohle re ka tlatsetsa joang moeeng oa bopula-maliboho?
18 Le bao e-bang maemo a bona a hona joale ha a ba lumelle hore ba nkele tšebeletso ea nako e tletseng ba ka etsa ho hongata ho phaella moeeng oa bopula-maliboho. Joang? Ka ho tšehetsa le ka ho khothatsa ba bulang maliboho, ba bontša thahasello e mafolo-folo ho ba nang le monyetla oa ho etsa joalo, ka ho lokisetsa hore bonyane setho se seng sa malapa a bona se bule maliboho, ka ho kopanela tšebeletsong ea bopula-maliboho bo thusang neng le neng ha ho khoneha, le ka ho sebeletsa ho kenela tšebeletso ea nako e tletseng kapele kamoo ho ka khonehang. Ka ho etsa joalo, kaofela ha rōna re ka bontša hore re ‘etsa sohle se matleng a rōna’ ho sebeletsa Jehova e-bang hona joale re ngolisitse joaloka basebeletsi ba nako e tletseng kapa che.
Ho Mamella ha re Etsa Sohle se Matleng a Rōna
19. Re lokela ho etsa qeto ea ho etsa eng ka lebaka la nako?
19 Ka sebele, kaha Jehova a potlakisa mosebetsi ona, joale ke nako ea hore re ‘etse sohle se matleng a rōna’ e le hore re ka ba ‘basebetsi ba se nang ho hlajoa ke lihlong.’ Joaloka masole a molemo a Jesu Kreste, hape ho hlokahala hore re lahle meroalo eohle e sa hlokahaleng e le hore re ka sebeletsa hamolemo ’me ra amoheleha ho eena. (2 Timothea 2:3-5) Ha re sebetsa ka thata ho atolosa karolo ea rōna tšebeletsong ea ’Muso, re ka kholiseha hore boiteko ba rōna bo tla putsoa ka ho enneng. (Ba-Heberu 6:10; 2 Ba-Korinthe 9:6) Kahoo, ho e-na le ho ema lipakeng, a re phehelleng ho etsa sohle se matleng a rōna ho bolela litaba tse molemo, karabelong ea memo ea mopesaleme: “Sebeletsang Jehova ka nyakallo, le itlhahise pel’a sefahleho sa hae ka lipina!”—Pesaleme ea 100:2.
Lebokose la Tlhahlobo
◻ Ho rata Molimo ho akarelletsa eng?
◻ Bothata ba sebele e ne e le bofe ka mohlanka oa boraro setšoantšong sa Jesu sa litalenta?
◻ Ho itela ha rōna ho bolela eng?
◻ Ke hobane’ng ha balateli ba Jesu ba tlameha ‘ho tela matlotlo a bona a bonahalang’?
◻ Bohle re ka tlatsetsa joang moeeng oa bopula-maliboho?
[Setšoantšo se leqepheng la 18]
‘Lahlelang mohlanka ea sebolu kantle’