Boloka ‘Tšepo ea Hao ea Poloko’ e Khanya!
“Le [roale] tšepo ea poloko e le helmete.”—1 BATHESALONIKA 5:8.
1. “Tšepo ea poloko” e thusa joang tabeng ea ho mamella?
TŠEPO ea ho bolokoa e ka thusa motho hore a tiisetse le tlas’a maemo a thata ka ho fetisisa. Motho ea robehetsoeng ke sekepe ea phaphametseng ka thuso ea ngata ea likoqo a ka mamella ka nako e teletsana haeba a tseba hore thuso e haufi. Ka mokhoa o tšoanang, ka lilemo tse likete, ho ba le tšepo ‘polokong ea Jehova’ ho matlafalitse banna le basali ba tumelo linakong tsa mathata, ’me ha ho mohla tšepo ena e kileng ea tsoala masoabi. (Exoda 14:13, NW; Pesaleme ea 3:8; Baroma 5:5; 9:33) Moapostola Pauluse o ile a tšoantša “tšepo ea poloko” le “helmete” ea lihlomo tsa moea tsa Mokreste. (1 Bathesalonika 5:8; Baefese 6:17) E, ho kholiseha hore Molimo o tla re boloka, ho sireletsa matla a rōna a ho nahana, ho re thusa hore re lule re hlaphohetsoe kelellong ho sa tsotellehe maemo a bohloko, khanyetso le liteko.
2. Ke ka litsela life “tšepo ea poloko” e leng ea bohlokoa borapeling ba ’nete?
2 The International Standard Bible Encyclopedia e bolela hore, “tšepo ea bokamoso e ne e le sieo har’a bahetene,” ba neng ba pota-potile Bakreste ba lekholo la pele la lilemo. (Baefese 2:12; 1 Bathesalonika 4:13) Leha ho le joalo, “tšepo ea poloko” ke karolo ea bohlokoa ea borapeli ba ’nete. Joang? Taba ea pele, poloko ea bahlanka ba Jehova e tlamahane le lebitso la hae. Mopesaleme Asafe o ile a rapela: “Oho Molimo oa poloko ea rōna, ka baka la khanya ea lebitso la hao, u re thuse, u re namolele.” (Pesaleme ea 79:9; Ezekiele 20:9) Ho feta moo, ho kholiseha ka litlhohonolofatso tseo Jehova a li tšepisitseng ke habohlokoa hore motho a be le kamano e ntle le eena. Pauluse o ile a beha taba ka tsela ena: “Ka ntle ho tumelo ho ke ke ha khoneha ho mo khahlisa haholo, kaha ea atamelang Molimo o lokela ho lumela hore o teng le hore e ba moputsi oa ba mo batlang ka tieo.” (Baheberu 11:6) Ho feta moo, Pauluse o hlalositse hore lebaka le ka sehloohong la hore Jesu a tle lefatšeng e ne e le hore batho ba bakileng ba bolokehe. O itse: “Ea tšepahala hape e tšoanela ho amoheloa ka botlalo polelo ena ea hore Kreste Jesu o ile a tla lefatšeng ho pholosa baetsalibe.” (1 Timothea 1:15) Moapostola Petrose o buile ka poloko e le ‘pheletso [kapa, tholoana] ea tumelo ea rōna.’ (1 Petrose 1:9) Ho hlakile hore ke ntho e loketseng ho ba le tšepo ea poloko. Empa ha e le hantle poloko ke eng? Hona ho e finyella ho hloka eng?
Poloko ke Eng?
3. Bahlanka ba Jehova ba boholo-holo ba ile ba latsoa poloko ea mofuta ofe?
3 Mangolong a Seheberu, “poloko” e atisa ho bolela ho pholosoa kapa ho lopolloa khatellong kapa lefung le sehlōhō le tlang pele ho nako. Ka mohlala, ha Davida a bitsa Jehova “Mopholosi,” o ile a re: “Molimo oa ka ke lefika la ka. . . . Sebaka seo ke balehelang ho sona, Mopholosi oa ka; u mpholosa pefong. Ke tla ipiletsa ho Ea lokelang ho rorisoa, Jehova, ke tla pholosoa lireng tsa ka.” (2 Samuele 22:2-4, NW) Davida o ne a tseba hore Jehova oa mamela ha bahlanka ba Hae ba tšepahalang ba kōpa thuso.—Pesaleme ea 31:22, 23; 145:19.
4. Bahlanka ba Jehova ba mehleng ea pele ho Bokreste ba ne ba e-na le tšepo efe bakeng sa bophelo ba nakong e tlang?
4 Bahlanka ba Jehova ba pele ho Bokreste le bona ba ne ba e-na le tšepo ea bophelo ba nako e tlang. (Jobo 14:13-15; Esaia 25:8; Daniele 12:13) Ha e le hantle, litšepiso tse ngata tsa pholoho tse fumanoang ka Mangolong a Seheberu e ne e le boprofeta ba poloko e khōloanyane—e isang bophelong bo sa feleng. (Esaia 49:6, 8; Liketso 13:47; 2 Bakorinthe 6:2) Mehleng ea Jesu, Bajuda ba bangata ba ne ba e-na le tšepo ea bophelo bo sa feleng, empa ba ile ba hana ho amohela Jesu e le senotlolo sa ho finyella tšepo ea bona. Jesu o ile a bolella baeta-pele ba bolumeli ba mehleng ea hae, a re: “Le phenya Mangolo, hobane le nahana hore ka ’ona le tla ba le bophelo bo sa feleng; ’me ana ke ’ona a mpakang.”—Johanne 5:39.
5. Ha e le hantle poloko e bolela eng?
5 Ka Jesu, Molimo o senotse sohle se boleloang ke poloko. E akarelletsa ho lokolloa pusong ea sebe, botlamuoeng ba bolumeli ba bohata, lefatšeng le tlas’a taolo ea Satane, tšabong ea motho, esita le tšabong ea lefu. (Johanne 17:16; Baroma 8:2; Bakolose 1:13; Tšenolo 18:2, 4) Qetellong, ho bahlanka ba tšepahalang ba Molimo, ho bolokoa ke Molimo ha ho bolele feela ho lokolloa khatellong le matšoenyehong empa ho boetse ho bolela monyetla oa ho ba le bophelo bo sa feleng. (Johanne 6:40; 17:3) Jesu o rutile hore bakeng sa “mohlape o monyenyane,” poloko e bolela ho tsosetsoa ha oona bophelong ba leholimo ho ea kopanela le Kreste pusong ea ’Muso. (Luka 12:32) Bakeng sa moloko oa batho kaofela, poloko e bolela ho khutlisetsoa bophelong bo phethahetseng le kamanong le Molimo tseo Adama le Eva ba neng ba li thabela tšimong ea Edene pele ba etsa sebe. (Liketso 3:21; Baefese 1:10) Bophelo bo sa feleng tlas’a maemo a joalo a paradeise e ne e le morero oa Molimo oa tšimolohong bakeng sa moloko oa batho. (Genese 1:28; Mareka 10:30) Leha ho le joalo, ho khutlisetsoa maemong a joalo ho ka khoneha joang?
Motheo oa Poloko ke Thekollo
6, 7. Karolo ea Jesu ke efe polokong ea rōna?
6 Poloko ea ka ho sa feleng e ka finyelloa feela ka sehlabelo sa thekollo sa Kreste. Hobane’ng? Bibele e hlalosa hore ha Adama a etsa sebe, o ile a ‘ithekisa’ sebeng le bana bohle ba hae ba nakong e tlang, ho akarelletsa le rōna—kahoo a etsa hore ho hlokahale thekollo e le hore moloko oa batho o be le tšepo e itseng ea ’nete. (Baroma 5:14, 15; 7:14) Hore Molimo o ne a tla fana ka thekollo bakeng sa moloko oohle oa batho ho ile ha tšoantšoa esale pele ka mahlabelo a liphoofolo tlas’a Molao oa Moshe. (Baheberu 10:1-10; 1 Johanne 2:2) Jesu ke eena eo sehlabelo sa hae se phethahalitseng litšoantšo tseo tsa boprofeta. Lengeloi la Jehova le ile la phatlalatsa pele Jesu a tsoaloa: “O tla pholosa batho ba habo libeng tsa bona.”—Matheu 1:21; Baheberu 2:10.
7 Jesu o ile a tsoaloa ka mohlolo ke moroetsana Maria, ’me e le Mora oa Molimo, ha aa ka a futsa lefu ho Adama. ’Nete ena hammoho le tsela ea hae ea botšepehi bo phethahetseng e ile ea fa bophelo ba hae matla a hlokahalang a ho reka moloko oa batho sebeng le lefung. (Johanne 8:36; 1 Bakorinthe 15:22) Ho fapana le batho ba bang bohle, Jesu o ne a sa ahloleloa ho shoa ka lebaka la sebe. O tlile ka morero lefatšeng “ho fana ka soule ea hae ho ba thekollo e le phapanyetsano bakeng sa ba bangata.” (Matheu 20:28) Ha a entse seo, Jesu eo hona joale a tsositsoeng ’me a behiloeng boreneng o boemong ba ho fana ka poloko ho bohle ba finyellang litlhoko tsa Molimo.—Tšenolo 12:10.
Ho Fumana Poloko ho Hloka Eng?
8, 9. (a) Jesu o ile a araba joang potso ea ’musi e monyenyane ea ruileng mabapi le poloko? (b) Jesu o ile a sebelisa ketsahalo ee joang ho ruta barutuoa ba hae?
8 Khale, ’musi e mong e monyenyane oa Moiseraele ea ruileng o ile a botsa Jesu: “Ke lokela ho etsa’ng hore ke rue bophelo bo sa feleng?” (Mareka 10:17) Mohlomong potso ea hae e ne e bonahatsa monahano o neng o atile har’a Bajuda ba mehleng ea hae—oa hore Molimo o batla mesebetsi e itseng e molemo le hore ka ho etsa mesebetsi eo e lekaneng, Molimo a ka lefa motho ka poloko. Empa mofuta oo oa boinehelo bo hlophisitsoeng o ne o ka ’na oa tsoaloa ke boithati. Mesebetsi e joalo e ne e hlōleha ho fana ka tšepo e tiileng ea poloko, kaha ha ho motho ea sa phethahalang ea neng a hlile a ka finyella litekanyetso tsa Molimo.
9 Ha Jesu a araba potso ea monna eo, o ile a mo hopotsa feela hore a boloke litaelo tsa Molimo. ’Musi eo e monyenyane o ile a potlakela ho tiisetsa Jesu hore o li bolokile ho tloha bonyenyaneng. Karabo ea hae e ile ea susumetsa Jesu hore a ikutloe a mo rata. Jesu a re ho eena: “Ho haella ntho e le ’ngoe ho uena: E-ea, u rekise lintho tseo u nang le tsona ’me u fe mafutsana, ’me u tla ba le letlotlo leholimong, u tle ’me u be molateli oa ka.” Leha ho le joalo, mohlankana eo o ile a tloha a saretsoe, “kaha o ne a e-na le matlotlo a mangata.” Ka mor’a moo Jesu o ile a hatisa ho barutuoa ba hae hore ho rata lintho tse ntle tsa lefatše lena ho tlōlisa, ho sitisa ho fumana poloko. A phaella ka hore ha ho ea ka fumanang poloko ka boiteko ba hae. Empa Jesu o ile a tsoela pele a ba kholisa: “Ho batho ho ke ke ha khoneha, empa ho Molimo ha ho joalo, kaha lintho tsohle lia khoneha ho Molimo.” (Mareka 10:18-27; Luka 18:18-23) Poloko e khoneha joang?
10. Ke litekanyetso life tseo re lokelang ho li finyella hore re fumane poloko?
10 Poloko ke mpho e tsoang ho Molimo, empa ha e itlele feela tjee. (Baroma 6:23) Ho na le litekanyetso tse itseng tsa bohlokoa tseo motho ka mong a lokelang ho li finyella hore a tšoanelehe bakeng sa mpho eo. Jesu o itse: “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea sebelisang tumelo ho eena a se ke a timetsoa empa a be le bophelo bo sa feleng.” Moapostola Johanne a eketsa: “Ea sebelisang tumelo ho Mora o na le bophelo bo sa feleng; ea sa mameleng Mora ha a na ho bona bophelo.” (Johanne 3:16, 36) Ho totobetse hore Molimo o batla tumelo le ho mamela ho e mong le e mong ea nang le tšepo ea ho fumana bophelo bo sa feleng. E mong le e mong o lokela ho etsa qeto ea ho amohela thekollo le ho hata moo Jesu a hatileng teng.
11. Motho ea sa phethahalang a ka fumana kamohelo ea Jehova joang?
11 Kaha ha rea phethahala, ha re na tšekamelo ea ho mamela ’me ha re khone ho mamela ka mokhoa o phethahetseng. Ke ka lebaka leo Jehova a faneng ka thekollo hore a koahele libe tsa rōna. Leha ho le joalo, re lokela ho loana kamehla hore re phele tumellanong le litsela tsa Molimo. Joalokaha Jesu a ile a bolella ’musi e monyenyane ea ruileng, re lokela ho boloka litaelo tsa Molimo. Ho etsa joalo ha ho tlise kamohelo ea Molimo feela empa ho boetse ho tlisa thabo e khōlō, kaha “litaelo tsa hae ha li boima”; tsona li bolela “khatholoho.” (1 Johanne 5:3; Liproverbia 3:1, 8, NW) Ho sa tsotellehe seo, ha ho bonolo ho tšoarella tšepong ea poloko.
‘Loana Ntoa e Thata Bakeng sa Tumelo’
12. Tšepo ea poloko e matlafatsa Mokreste joang hore a hanele liteko tsa boitšoaro bo bobe?
12 Morutuoa Jude o ne a batla ho ngolla Bakreste ba pele ka “poloko eo [ba neng ba e-na] le eona bohle.” Leha ho le joalo, moea oa boitšoaro bo bobe o neng o atile o ile oa mo tlama ho eletsa barab’abo ho ‘loana ntoa e thata bakeng sa tumelo.’ E, ho fumana poloko ha ho felle feela ka ho ba le tumelo, ho khomarela tumelong ea ’nete ea Bokreste, le ho mamela ha ntho e ’ngoe le e ’ngoe e tsoella hantle. Boinehelo ba rōna ho Jehova bo tlameha ho ba matla ka ho lekaneng ho re thusa ho hanyetsa liteko le litšusumetso tsa boitšoaro bo bobe. Ho ntse ho le joalo, ho fetella likamanong tsa botona le botšehali le boitšoarong bo litšila, ho se hlomphe ba boholong, likhaohano le lipelaelo li ne li senya moea oa phutheho ea lekholo la pele la lilemo. E le ho ba thusa hore ba loantše litšekamelo tse joalo, Jude o ile a phehella Bakreste-’moho le eena hore ba hopole ka ho hlaka pakane ea bona: “Baratuoa, ka ho ikaha tumelong ea lōna e halalelang ka ho fetisisa, le ho rapela ka moea o halalelang, le ipoloke leratong la Molimo, ha le ntse le letetse mohau oa Morena oa rōna Jesu Kreste ka tebello ea bophelo bo sa feleng.” (Jude 3, 4, 8, 19-21) Tšepo ea ho fumana poloko e ne e ka ba matlafatsa ntoeng ea bona ea ho lula ba hloekile boitšoarong.
13. Re ka bontša joang hore ha rea lahleheloa ke morero oa mosa o sa tšoanelang oa Molimo?
13 Jehova Molimo o lebelletse hore bao a tla ba boloka ba be le boitšoaro bo behang mohlala. (1 Bakorinthe 6:9, 10) Leha ho le joalo, ho tšoarella litekanyetsong tsa boitšoaro tsa Molimo, ha ho bolele ho ahlola ba bang. Hase rōna ba tla rera hore na qetello ea batho ba bang ke efe. Ho e-na le hoo, Molimo ke eena ea tla rera, joalokaha Pauluse a ile a bolella Bagerike ba Athene: “O behile letsatsi leo ka lona a rerang ho ahlola ka ho loka lefatše leo ho ahiloeng ho lona ka monna eo a mo behileng”—e leng Jesu Kreste. (Liketso 17:31; Johanne 5:22) Haeba re phela ka tumelo thekollong ea Jesu ha ho hlokahale hore re tšohe letsatsi le tlang la kahlolo. (Baheberu 10:38, 39) Ntho ea bohlokoa ke hore ho hang re se ke ra “amohela mosa o sa tšoanelang oa Molimo [poelano ea rōna le eena e entsoeng ka thekollo] ’me [ra] lahleheloa ke morero oa oona” ka ho itumella ho hoheloa monahanong le boitšoarong bo fosahetseng. (2 Bakorinthe 6:1) Ho phaella moo, ka ho thusa ba bang ho fumana poloko, re bontša hore ha rea lahleheloa ke morero oa mohau oa Molimo. Re ka ba thusa joang?
Ho Aba Tšepo ea Poloko
14, 15. Jesu o ile a abela bo-mang mosebetsi oa ho phatlalatsa litaba tse molemo tsa poloko?
14 Ha Pauluse a qotsa moprofeta Joele, o ile a ngola: “E mong le e mong ea ipiletsang lebitsong la Jehova o tla pholoha.” Eaba oa eketsa: “Leha ho le joalo, ba tla ipiletsa joang ho eo ba sa behang tumelo ho eena? Hape, ba tla beha tumelo joang ho eo ba e-s’o utloele ka eena? Hape, ba tla utloa joang ha ho se ea bolelang?” Ka mor’a litemana tse seng kae tse latelang, Pauluse o bontša hore tumelo ha e itlele feela tjee; ho e-na le hoo, e “latela ntho e utloiloeng,” ke hore, “lentsoe le mabapi le Kreste.”—Baroma 10:13, 14, 17; Joele 2:32.
15 Ke bo-mang ba tla isa “lentsoe le mabapi le Kreste” lichabeng? Mosebetsi oo Jesu o o abetse barutuoa ba hae—ba seng ba rutiloe “lentsoe” leo. (Matheu 24:14; 28:19, 20; Johanne 17:20) Ha re kopanela mosebetsing oa ho bolela ka ’Muso le ho etsa barutuoa, re etsa sona seo moapostola Pauluse a buileng ka sona, lekhetlong lena a qotsa Esaia: “A khahleha hakaakang maoto a ba bolelang litaba tse molemo tsa lintho tse molemo!” Esita leha ba bangata ba sa amohele litaba tse molemo tseo re ba tlisetsang tsona, maoto a rōna a ntse a “khahleha” ho Jehova.—Baroma 10:15; Esaia 52:7.
16, 17. Mosebetsi oa rōna o phetha merero efe e ’meli?
16 Ho phethahatsa thōmo ena ho finyella merero e ’meli ea bohlokoa. Oa pele, litaba tse molemo li lokela ho boleloa e le hore lebitso la Molimo le tle le phahamisoe le hore ba batlang poloko ba tsebe moo ba ka lebang teng. Pauluse o ile a utloisisa karolo ena ea thōmo. O ile a re: “Ha e le hantle, Jehova o behile taelo holim’a rōna ka mantsoe ana, ‘Ke u behile u le leseli la lichaba, hore u be poloko ho isa pheletsong ea lefatše.’” Kahoo, joaloka barutuoa ba Kreste, e mong le e mong ho rōna o lokela ho ba le karolo ea ho isa molaetsa oa poloko ho batho.—Liketso 13:47; Esaia 49:6.
17 Oa bobeli, ho boleloa ha litaba tse molemo ho rala motheo oa kahlolo ea ho loka ea Molimo. Jesu o ile a bua sena ka kahlolo eo: “Ha Mora oa motho a fihla ka khanya ea hae, ’me mangeloi ’ohle a e-na le eena, joale o tla lula teroneng ea hae e khanyang. ’Me lichaba tsohle li tla bokelloa ka pel’a hae, ’me o tla arola batho e mong ho e mong, feela joalokaha molisa a arola linku ho lipōli.” Le hoja ho ahlola le ho arola li tla etsoa “ha Mora oa motho a fihla ka khanya ea hae,” kajeno mosebetsi oa ho bolela o fa batho monyetla oa ho lemoha barab’abo Kreste ba moea le hore ka tsela eo ba ba tšehetse molemong oa poloko ea bona ea ka ho sa feleng.—Matheu 25:31-46.
Boloka “Kholiseho e Feletseng ea Tšepo”
18. Re ka boloka ‘tšepo ea rōna ea poloko’ e khanya joang?
18 Ho kopanela ha rōna ka mafolofolo mosebetsing oa boboleli le hona ke mokhoa o re thusang ho boloka tšepo ea rōna e khanya. Pauluse o ile a ngola: “Re lakatsa hore e mong le e mong oa lōna a bontše mafolo-folo a tšoanang e le hore a be le kholiseho e feletseng ea tšepo ho fihlela bofelong.” (Baheberu 6:11) E se eka e mong le e mong oa rōna, a ka roala “tšepo ea poloko e le helmete,” kahoo a hopola hore “Molimo o ile a re abela, eseng khalefo, empa ho fumana poloko ka Morena oa rōna Jesu Kreste.” (1 Bathesalonika 5:8, 9) E se eka re ka boela ra nka ka ho teba khothatso ena ea Petrose: “Hlomellang likelello tsa lōna bakeng sa tšebetso, le lule le hlaphohetsoe likelellong ka ho feletseng; behang tšepo ea lōna moseng o sa tšoanelang o tla tlisoa ho lōna.” (1 Petrose 1:13) Bohle ba etsang joalo ba tla bona ‘tšepo ea bona ea poloko’ e phethahala ka ho feletseng!
19. Re tla hlahloba eng sehloohong se latelang?
19 Ho sa le joalo, pono ea rōna e lokela ho ba efe mabapi le nako e saletseng tsamaiso ee? Re ka sebelisa nako eo joang ho fumanela rōna le ba bang poloko? Re tla hlahloba lipotso tsena sehloohong se latelang.
Na U ka Hlalosa?
• Ke hobane’ng ha re lokela ho boloka ‘tšepo ea rōna ea poloko’ e khanya?
• Poloko e akarelletsa eng?
• Re lokela ho etsa eng hore re fumane mpho ea poloko?
• Mosebetsi oa rōna oa ho bolela o finyella eng tumellanong le morero oa Molimo?
[Litšoantšo tse leqepheng la 10]
Poloko e bolela ho fetang ho lopolloa timetsong