Hlokomelang Bakoenehi!

Lintlha tse Khōlō tsa Lengolo la Juda

BAHLANKA ba Jehova ba tšoanetse ho “nyonya bobe” ’me “ba khomarele ho molemo.” (Ba-Roma 12:9, NW) Mongoli oa Bibele Juda o thusitse ba bang ho etsa sena lengolong la hae leo a le rometseng a le Palestina mohlomong hoo e ka bang ka 65 C.E.

Juda o ile a ipitsa “lekhoba la Jesu Kreste, empa ngoan’abo Jakobo.” Jakobo enoa ea tsebahalang ka ho hlakileng e ne e le ngoan’abo Jesu Kreste ka ’m’a bona. (Mareka 6:3; Liketso 15:13-21; Ba-Galata 1:19) Kahoo Juda ka boeena e ne e le ngoan’abo Jesu ka ’m’a bona. Leha ho le joalo, mohlomong o ile a nahana hore ha ho tšoanelehe ho bolela tlamahano ena ea nama, kaha joale Kreste e ne e se e le motho oa moea ea tlotlisitsoeng leholimong. Lengolo la Juda le ne le tobile haholo ho faneng ka keletso e ka re thusang hore re “khomarele ho molemo” le ho hlokomela bakoenehi.

“Loana Ntoa e Matla”

Le hoja Juda a ne a ikemiselitse ho ngola ka poloko eo Bakreste bohle ba nang le eona, o ile a fumana ho hlokahala ho phehella babali ba hae ho “loana ntoa e matla bakeng sa tumelo.” (Litemana 1-4, NW) Hobane’ng? Hobane batho ba se nang bomolimo ba ne ba khukhunetse ka har’a phutheho ’me ba ne ba ‘fetola mosa o sa tšoanelang oa Molimo phephi bakeng sa boitšoaro bo hlephileng.’ Ka phoso ba ne ba nahana hore ba ka tlōla melao ea Molimo ’me ba ’na ba lula har’a batho ba oona. E se eka le ka mohla re ke ke ra lumella monahano o khopo joalo empa ka mehla re phehelle ho loka, re lebohe hore ka mali a Jesu Molimo ka mohau o ile oa re hlatsoa libe tsa rōna.—1 Ba-Korinthe 6:9-11; 1 Johanne 1:7.

Litemoso li Behiloe ka Pel’a Rōna

Ho hlokahala hore re itebele khahlanong le mekhoa e itseng, boitšoaro, le batho. (Litemana 5-16) Kahobane Baiseraele ba bang ba lopollotsoeng Egepeta ba ne ba hloka tumelo, ba ile ba felisoa. Mangeloi a ileng a tlohela boemo ba oona bo loketseng a ‘bolokiloe litlamong tse sa feleng tsa lefifi [la moea] ho lebella kahlolo ea letsatsi le leholo teng.’ Boitšoaro bo bobe bo fetelletseng bo ile ba tlisa ‘kotlo ea mollo o sa feleng’ holim’a Sodoma le Gomorrha. Kahoo, a re khahliseng Molimo ka mehla ’me le ka mohla re se ke ra fapoha “tsela ea bophelo.”—Pesaleme ea 16:11.

Ho fapana le arekangeloi Mikaele, ea neng a ke ke a tlisa kahlolo khahlanong le Diabolose ka tsela e nyefolang, batho ba se nang bomolimo ba ne ba nyefola “ba khanyang,” bao ka ho hlakileng e neng e le ba nang le tlotla e itseng eo ba e fuoeng ke Molimo le Kreste joaloka baholo ba tlotsitsoeng. A re qobeng ho bontša ho se hlomphe bolaoli bo fanoeng ke Molimo!

Batho bao ba se nang bomolimo ba ile ba latela mohlala o mobe oa Kaine, Balaame, le Kore. Ba ne ba tlisa tšokelo ea moea e tšoanang le mafika a patehileng ka tlas’a metsi ’me ba ne ba tšoana le maru a se nang metsi, le lifate tse shoeleng tse fothotsoeng tse sa beheng letho le molemo. Bakoenehi bao e ne e boetse e le batho ba koma-komang, batletlebi, le ‘ba talimang tšobotsi ea batho ka takatso ea moruo.’

Tsoelang Pele ho Loana

Ka mor’a moo, Juda o ile a fana ka keletso ea ho loantša litšusumetso tse mpe. (Litemana 17-25) Ho ne ho tla ba le basomi “mehleng ea qetello,” ’me Bakreste ba ’nete ba lokela ho ba mamella le ho mamella mantsoe a bona a nyatsang kajeno. Ho loantša litšusumetso tseo tse mpe, re lokela ho ikaha ‘tumelong ea rōna e halalelang ka ho fetisisa,’ re rapele ka moea o halalelang, ’me re lule leratong la Molimo, ha re ntse re emetse hore mohau oa Jesu o bonahatsoe.

Hoa bonahala hore karolong ea matichere a bohata, batho ba se nang bomolimo ba ne ba etsa hore ba bang ba be le lipelaelo. (Bapisa le 2 Petrose 2:1-3.) ’Me ba belaelang ba ne ba hloka eng? Thuso ea moea ho ba hlotha “mollong,” phelisong ea ka ho sa feleng! (Mattheu 18:8, 9) Empa ha ho hlokahale hore batho ba nang le bomolimo ba tšabe nako eo, hobane Jehova o tla ba sireletsa ho ‘oeleng’ sebeng le timetsong e emetseng bakoenehi.

[Lebokose le leqepheng la 31]

Mafika a Patehileng: Juda o lemositse Bakreste-’moho ka ‘mafika a patehileng tlas’a metsi meketeng ea bona ea lerato.’ (Juda 12) Kaha ba ne ba etsa joaloka hoja ba rata balumeli, bakoenehi bao ba ne ba tšoana le mafika a makeketla a ka har’a metsi a ka ’nang a roba sekepe kapa a hohola le ho bolaea batho ba sesang. Mekete ea lerato e ka ’na eaba e ne e le mekete eo Bakreste ba atlehileng linthong tse bonahalang ba neng ba memela balumeli-’moho le bona ba futsanehileng ho eona. Moruti oa Kereke Chrysostom (347?–407 C.E.) o itse: “Kaofela ba ne ba kopanela meketeng e tloaelehileng: ba ruileng ba tlisa lijo, ’me ba futsanehileng le ba se nang letho ba mengoa, kaofela ba keteka ka ho tšoana hammoho.” Ho sa tsotellehe hore na mekete ea lerato ea pele e ne e le joang, temoso ea Juda e ile ea thusa ba tšepahalang ho hlokomela ‘mafika a patehileng’ a bakoenehi a ka tlisang lefu la moea. Le hoja Bakreste ba ne ba sa laeloa hore ba etse mekete ea lerato, ebile e sa etsoe kajeno, batho ba Jehova ba thusana ka lintho tse bonahalang nakong eo li hlokahalang ’me ba na le botsoalle bo nyakallisang.