Khaolo ea Mashome a Mabeli a Motso o Mong
Morero oa Jehova o Finyella Katleho e Khanyang
1, 2. (a) Morero oa Jehova ke ofe ka libōpuoa tsa hae tse bohlale? (b) Ke bo-mang ba neng ba akarelelitsoe lelapeng la Molimo la barapeli ba kopaneng?
PŌPO eohle e bohlale e kopane ho rapeleng Molimo a le mong feela oa ’nete, ’me kaofela ha eona e thabela tokoloho e khanyang ea bana ba Molimo—oo ke morero o lerato oa Jehova. Hape ke seo barati bohle ba ho loka ba se labalabelang ka tieo.
2 Jehova o ile a qala ho phethahatsa morero ona o moholo ha a qala mesebetsi ea hae ea pōpo. Pōpo ea hae ea pele e bile Mora eo ho tloha ha a tsosoa e bileng “ponahatso ea khanya ea [Molimo] le setšoantšo se nepahetseng hantle sa boleng ba hae.” (Baheberu 1:1-3) Mora enoa e bile ea khethehileng, kaha e le eena feela ea bōpiloeng ke Molimo. Ka mor’a moo, e ne e tla ba ka Mora enoa ba bang bohle ba neng ba tla ba teng: pele e bile mangeloi leholimong, ea ntan’o ba batho lefatšeng. (Jobo 38:7; Luka 3:38) Bana kaofela ba ile ba bōpa lelapa le le leng la bokahohleng. Ho bona kaofela, Jehova e ne e le Molimo, ’Musi oa Bokahohleng, hape e le Ntate oa bona ea lerato.
3. (a) Kaofela ha rōna re futsitse eng ho batsoali ba rōna ba pele? (b) Jehova o ile a etsetsa bana ba Adama tokisetso efe e lerato?
3 Ha batsoali ba rōna ba pele ba ne ba ahloleloa lefu e le baetsalibe ba ka boomo, ba ile ba lelekoa Edeneng ’me Molimo a ba tsoa. Ba ile ba khaotsa ho ba karolo ea lelapa la hae la bokahohleng. (Genese 3:22-24; Deuteronoma 32:4, 5) Kaofela ha rōna re litloholo tsa bona, kahoo re tsoetsoe re e-na le litšekamelo tsa boetsalibe. Empa Jehova o ne a tseba hore bana ba bang ba Adama le Eva ba tla rata ho loka. Kahoo ka lerato A etsa tokisetso eo ka eona ba neng ba ka fumana “tokoloho e khanyang ea bana ba Molimo.”—Baroma 8:20, 21.
Iseraele e Lahleheloa ke Boemo bo Amohelehang
4. Ke tokelo efe eo Jehova a ileng a e fa Iseraele ea boholo-holo?
4 Lilemo tse ka bang 2 500 ka mor’a hore Adama a bōptjoe, Jehova o ile a fa batho ba itseng tokelo ea ho ba kamanong e khethehileng le Eena. O ile a khetha Iseraele ea boholo-holo hore e be sechaba sa hae ’me a e fa Molao oa hae. (Genese 12:1, 2) A e etsa sechaba ’me a e sebelisa mabapi le morero oa hae. (Deuteronoma 14:1, 2; Esaia 43:1) Leha ho le joalo, ba ne ba ntse ba le botlamuoeng ba sebe le lefu, kahoo ba ne ba sa thabele tokoloho e khanyang eo Adama le Eva ba neng ba e-na le eona qalong.
5. Baiseraele ba ile ba lahleheloa ke boemo ba bona bo khethehileng ho Molimo joang?
5 Leha ho le joalo, Baiseraele ba ne ba e-na le boemo bo amohelehang ho Molimo. Hape ba ne ba e-na le boikarabelo ba ho hlompha Jehova e le Ntat’a bona le ba ho sebetsa tumellanong le morero oa hae. Jesu o ile a hatisa bohlokoa ba ho phethahatsa ha bona boikarabelo boo. (Matheu 5:43-48) Leha ho le joalo, sechaba sa Iseraele se ile sa hlōleha ho etsa sena. Le hoja Bajuda bao ba ne ba re “re na le Ntate a le mong, Molimo,” Jesu o ile a re liketso tsa bona le moea oo ba o bontšang li shanofatsa seo. (Johanne 8:41, 44, 47) Ka 33 C.E., Molao o ile oa felisoa ke Molimo, ’me kamano e khethehileng eo Iseraele e neng e e-na le eona le eena e ile ea fela. Empa na hoo ho ne ho bolela hore batho ba ke ke ba hlola ba thabela kamano e amohelehang le Molimo?
Ho Bokella “Lintho Tse Maholimong”
6. Morero oa “tsamaiso” eo Pauluse a buileng ka eona ho Baefese 1:9, 10 ke ofe?
6 Moapostola Pauluse o ile a bontša hore ba bang har’a moloko oa batho ba ka thabela kamano e khethehileng le Molimo. Ka mohlala, mabapi le tokisetso ea Jehova eo ka eona ba nang le tumelo ba ka fetohang litho tsa ntlo ea Hae, Pauluse o ile a ngola: “[Molimo] o ile a re tsebisa sephiri se halalelang sa thato ea hae. Ke ho ea ka ho khahloa ha hae hoo a ileng a ho rera ka ho eena bakeng sa tsamaiso tekanyong e feletseng ea linako tse behiloeng, e leng ho bokella lintho tsohle hape ho Kreste, lintho tse maholimong le lintho tse lefatšeng.” (Baefese 1:9, 10) “Tsamaiso” ena e likoloha ho Jesu Kreste. Ka eena, batho ba tlisoa boemong bo amohelehang ka pel’a Molimo. Palo ea bona e lekanyelitsoeng e na le tebello ea ho ba leholimong. Palo e fetang eo hōle e tla phela ka ho sa feleng lefatšeng.
7. “Lintho tse maholimong” ke bo-mang?
7 Ntlha ea pele, ho tloha ka Pentekonta ea 33 C.E., ho ile ha lebisoa tlhokomelo ho “lintho tse maholimong,” ke hore, bao e tlang ho ba majalefa-’moho le Kreste ’Musong oa leholimo. Motheong oa tumelo ea bona molemong oa sehlabelo sa Jesu, Molimo o ile a ba bolela ba lokile. (Baroma 5:1, 2) Ka nako ea teng, Bajuda le Balichaba ba ile ba akarelletsoa ’me “lintho tse maholimong” li ne li tla ba 144 000. (Bagalata 3:26-29; Tšenolo 14:1) Ke masala feela a bona a ntseng a le lefatšeng.
Ho Bokella “Lintho Tse Lefatšeng”
8. “Lintho tse lefatšeng” ke bo-mang, hona ba amana joang le Jehova?
8 Tsamaiso e tšoanang e boetse e bokella “lintho tse lefatšeng.” Hona joale ho bokelloa batho ba limilione ba nang le tebello ea ho phela ka ho sa feleng lefatšeng. Ba le bonngoeng le masala a majalefa a ’Muso, ba tlotlisa lebitso la Jehova le ho phahamisa borapeli ba hae. (Esaia 2:2, 3; Sofonia 3:9) Le bona ba bitsa Jehova “Ntate” hobane ba mo nka e le mohloli oa bophelo. ’Me ba thabela boemo bo amohelehang ka pel’a hae motheong oa tumelo ea bona maling a tšolotsoeng a Jesu. (Tšenolo 7:9, 14) Empa kaha ba ntse ba sa phethahala, taba ea hore Molimo a ba amohele ka ho feletseng e le bana ba hae ke hona e tla tla.
9. Baroma 8:21 e tšoaretse moloko oa batho tšepiso efe?
9 Bana ba nang le tšepo ea lefatšeng hona joale ba letetse ka cheseho nako eo ka eona pōpo ea batho e tlang ho “lokolloa bokhobeng ba ho bola.” (Baroma 8:21) Tokollo eo e tla qala ka mor’a hore Kreste le makhotla a hae a leholimo ba felise matšoenyeho a maholo ka tlhōrō ea Armagedone. Hona ho tla bolela ho timetsoa ha tsamaiso eohle e khopo ea lintho ea Satane, ’me e lateloe ke litlhohonolofatso tsa Puso ea Kreste ea Lilemo tse Sekete matleng a ’Muso.—Tšenolo 19:17-21; 20:6.
10. Bahlanka ba Jehova ba tla bina pina efe ea thoriso?
10 E tla ba ho thabisang hakaakang ha bahlanka ba Jehova lefatšeng ba pheta maikutlo a bahlanka ba hae leholimong, bao ka thabo ba phatlalatsang: “Jehova Molimo, ea Matla ’Ohle, mesebetsi ea hao e meholo ’me ea hlolla. Morena oa bosafeleng, litsela tsa hao li lokile ’me ke tsa ’nete. Jehova, ka sebele ke mang ea ke keng a u tšaba, ’me a tlotlisa lebitso la hao, hobane ke uena feela ea tšepahalang? Etsoe lichaba kaofela li tla tla ’me li rapele ka pel’a hao, hobane melao-taelo ea hao e lokileng e bonahalitsoe.” (Tšenolo 15:3, 4) E, bahlanka bohle ba Jehova ba tla kopana borapeling ba Molimo a le mong feela oa ’nete. Esita le bafu ba tla tsosoa ’me ba fuoe monyetla oa ho kopanya mantsoe a bona ho roriseng Jehova.—Liketso 24:15.
Tokoloho e Babatsehang e Larile ka Pele
11. Ke tokoloho efe e babatsehang e tlang ho thabeloa ke baphonyohi ba matšoenyeho a maholo?
11 Ka mor’a hore matšoenyeho a maholo, a tla fihla tlhōrōng ea ’ona ka Armagedone, a hloekise bokhopo lefatšeng, Satane Diabolose ha e sa tla hlola e e-ba “molimo oa tsamaiso ena ea lintho.” Barapeli ba Jehova ba ke ke ba hlola ba loantšana le tšusumetso ea Satane e mpe. (2 Bakorinthe 4:4; Tšenolo 20:1, 2) Bolumeli ba bohata bo ke ke ba hlola bo emela Jehova hampe le ho sebeletsa e le tšusumetso e arohanyang batho. Bahlanka ba Molimo oa ’nete ba ke ke ba hlola ba utloa ho hloka toka le tlatlapo matsohong a ba boholong. Ba tla thabela tokoloho e babatsehang hakaakang!
12. Bohle ba tla lokolloa sebeng le liphellong tsa sona joang?
12 Joaloka “Konyana ea Molimo e tlosang sebe sa lefatše,” Jesu o tla sebelisa molemo oa sehlabelo sa hae hore a hlakole libe tsa moloko oa batho. (Johanne 1:29) Ha Jesu a ne a le lefatšeng ’me a tšoarela motho libe, o ile a phekola ea tšoaretsoeng e le bopaki ba hoo. (Matheu 9:1-7; 15:30, 31) Ka mokhoa o tšoanang, Kreste Jesu, joaloka Morena oa leholimo oa ’Muso oa Molimo, ka mohlolo o tla folisa lifofu, limumu, ba thibaneng litsebe, ba holofetseng, ba kulang kelellong le ba nang le maloetse leha e le afe a mang. (Tšenolo 21:3, 4) ‘Molao oa sebe’ o tla felisoa ho bohle ba mamelang e le hore mehopolo ea bona le liketso tsa bona li ka ba thabisa, eseng bona feela empa le Molimo. (Baroma 7:21-23) Qetellong ea Lilemo tse Sekete, ba tla be ba fihlisitsoe phethehong ea botho, ka ‘setšoantšo le ka sebōpeho’ sa Molimo a le mong feela oa ’nete.—Genese 1:26.
13. Qetellong ea Puso ea Lilemo tse Sekete, Kreste o tla nka bohato bofe, hona e le ka phello efe?
13 Ha Kreste a fihlisitse moloko oa batho phethehong, joale o tla busetsa ho Ntate matla ao a neng a a filoe bakeng sa mosebetsi ona: “Ha a nehelana ka ’muso ho Molimo le Ntat’ae, ha a entse puso eohle le bolaoli bohle le matla lefeela. Kaha o tla busa e le morena ho fihlela Molimo a behile lira tsohle tlas’a maoto a hae.” (1 Bakorinthe 15:24, 25) Puso ea Lilemo tse Sekete ea ’Muso e tla be e phethile morero oa eona ka botlalo; kahoo ho tla be ho se ho sa hlokahale puso ena ea bobeli hore e be teng pakeng tsa Jehova le moloko oa batho. ’Me kaha sebe le lefu li tla be li tlositsoe ka ho feletseng ’me moloko oa batho o rekolotsoe, tlhokahalo ea hore Jesu e be Morekolli ea fela. Bibele ea hlalosa: “Joale Mora le eena o tla ipeha tlas’a Ea ileng a beha lintho tsohle tlas’a hae, e le hore Molimo e ka ba lintho tsohle ho e mong le e mong.”—1 Bakorinthe 15:28.
14. Batho bohle ba phethahetseng ba tla ba tlas’a teko efe, hona hobane’ng?
14 Ka mor’a sena, moloko oa batho o phethahetseng o tla fuoa monyetla oa ho bontša hore khetho ea oona ke ho sebeletsa Molimo a le mong feela oa ’nete ka ho sa feleng. Kahoo, pele a inkela bona e le bana ba hae, Jehova o tla beha batho bao bohle ba phethahetseng tekong ea ho qetela. Satane le bademona ba hae ba tla lokolloa sekoting. Boemo bona bo ke ke ba tlisa kotsi e sa feleng ho ba ratang Jehova e le kannete. Empa leha e le bafe bao ka ho se tšepahale ba itlohellang hore ba khelosoe ho mameleng Jehova ba tla timetsoa ka ho sa feleng hammoho le lerabele la pele le bademona ba lona.—Tšenolo 20:7-10.
15. Ke boemo bofe bo tla boela bo e-ba teng har’a pōpo eohle e bohlale ea Jehova?
15 Joale Jehova o tla inkela batho bohle ba phethahetseng ba ileng ba tšehetsa bobusi ba Molimo nakong ea teko ea ho qetela e le bana ba hae. Ho tloha ka nako eo ho ea pele, ba tla kopanela ka botlalo tokoloho e khanyang ea bana ba Molimo e le karolo ea lelapa la Molimo la bokahohleng. Pōpo eohle e bohlale e leholimong le lefatšeng e tla boela e kopanngoa borapeling ba Molimo a le mong feela oa ’nete. Morero oa Jehova o tla be o finyeletse katleho e khanyang! Na u rata ho ba karolo ea lelapa leo le thabileng, la ka ho sa feleng la bokahohleng? Haeba ho joalo, re u khothalletsa ho ela hloko seo Bibele e se bolelang ho 1 Johanne 2:17: “Lefatše lea feta ’me ho joalo le ka takatso ea lona, empa ea etsang thato ea Molimo o hlola ka ho sa feleng.”
Tlhahlobo
• Pele ho borabele Edeneng, barapeli bohle ba Jehova ba ne ba e-na le kamano efe le eena?
• Ke boikarabelo bofe bo holim’a bao e leng bahlanka ba Molimo?
• Ke bo-mang bao e sa ntsaneng e tla ba bana ba Molimo, hona see se amana joang le morero oa Jehova mabapi le borapeli bo kopaneng?
[Setšoantšo se leqepheng la 190]
Batho ba mamelang ba tla thabela bophelo paradeiseng ea lefatšeng