Na re Lokela ho Tšaba ho Tla ha Kreste?

U NAHANA hore ho tla ha Kreste ho tla ba joang? Na u nahana hore ho tla tlisetsa moloko oa batho timetso, tšenyo le kahlolo? Kapa na u nahana hore ho tla felisa mathata ’ohle ao re nang le ’ona? Na re lokela ho tšaba ho tla ha Kreste? Kapa na re lokela ho ho lebella ka thabo?

Ha Bibele e bua ka ho tla ha Kreste, e re: “Bonang! O tla ka maru, ’me leihlo le leng le le leng le tla mo bona, . . . ’me meloko eohle ea lefatše e tla ikotla ka ho sareloa ka lebaka la hae.” (Tšenolo 1:7) Mona ho buuoa ka ho tla ha Jesu nakong e tlang ha a tl’o putsa ba lokileng le ho otla ba khopo.

Moapostola Johanne ha aa ka a tšaba ho tla ha Kreste, empa o ile a ho lebella ka thabo. Ka mor’a hore Johanne a amohele tšenolo e buang ka ho tla hona le ka seo ho tlang ho se bolela bakeng sa lefatše, o ile a rapela ka tieo a re: “Tloo, Morena Jesu.” (Tšenolo 22:20) Empa ke hobane’ng ha “meloko eohle ea lefatše e . . . ikotla ka ho sareloa ka lebaka la hae”? Hona “leihlo le leng le le leng le tla mo bona” ka tsela efe? Ho tla ha Kreste ho tla finyella eng? Ho ba le tumelo ho tleng ha hae ho ka re tsoela molemo joang hona joale? Sehlooho se latelang se tla araba lipotso tsena.