‘Joaloka Lejoe la Bohlokoa le ’Mala o Mofubelu’

MOAPOSTOLA Johanne o ile a bona pono ea terone e khanyang leholimong. Ea lutseng teroneng o ne a shebahala “joaloka lejoe la jaspere.” O ne a boetse a shebahala joaloka “lejoe la bohlokoa le ’mala o mofubelu.” (Tšenolo 4:2, 3) Majoe aa e ne e le a mofuta ofe?

Ana e ne e se majoe a sa bonaletseng a benyang ka holimo. Mehleng ea boholo-holo, lentsoe la Segerike le fetoletsoeng e le “jaspere” le ne le sebelisoa ho hlalosa majoe a mebala e sa tšoaneng, ho akarelletsa le mahakoe a bohlokoa a bonaletsang. Ho Word Pictures in the New Testament, A. T. Robertson o re: “Lejoe la jaspere” leo ho buuoeng ka lona ho Tšenolo 4:3 “ka sebele [e ne] e se jaspere ea rōna ea kajeno e chipi.” Ho feta moo, hamorao bukeng ea Tšenolo, Johanne o hlalosa motse oa leholimo, Jerusalema, o re: “Ho phatsima ha oona ho ne ho le joaloka lejoe la bohlokoa ka ho fetisisa, joaloka lejoe la jaspere le benyang ka ho hlaka joaloka kristale.” (Tšenolo 21:10, 11) Kamoo ho bonahalang kateng, majoe ao Johanne a buang ka ’ona e ne e le a bonaletsang, a etsang hore khanya e khone ho feta.

Ea tšoantšetsoang a lutse teroneng ponong ea Johanne ke Motho ea khanyang ka ho fetisisa bokahohleng, Jehova Molimo. O hloekile ebile o halalela ka tekanyo e phahameng ka ho fetisisa. Tumellanong le seo, moapostola Johanne o ile a ngola a re: “Molimo ke leseli ’me ha ho na lefifi ho hang bonngoeng le eena.” (1 Johanne 1:5) Kahoo, Johanne o ile a phehella balumeli-’moho le eena hore ‘ba itlhoekise feela joalokaha Jehova a hloekile.’—1 Johanne 3:3.

Re lokela ho etsa’ng e le hore Molimo a re nke re hloekile? Ruri ke habohlokoa hore re be le tumelo maling a Kreste a tšolotsoeng bakeng sa tšoarelo ea libe tsa rōna. Re boetse re lokela ho tsoela pele “re tsamaea leseling” ka ho ithuta Bibele kamehla le ka ho phela tumellanong le lithuto tsa eona.—1 Johanne 1:7.