Kamoo Taba Ena e Qalileng Kateng

STRATTON, OHIO, U.S.A., ke motsana o haufi le Nōka ea Ohio, e arolang Ohio le Virginia Bophirimela. E hlalosoa e le motsana ’me e na le ramotse. Ka 1999 ka tšohanyetso ho ile ha e-ba le khanyetsano motsaneng ona o nang le baahi ba ka tlaasana ho 300 ha ba boholong ba leka ho tlamella Lipaki Tsa Jehova, har’a lintho tse ling, ho fumana tumello pele li etela malapeng a batho ba sebakeng seo ka molaetsa oa tsona o thehiloeng Bibeleng.

Ke hobane’ng ha taba ee e le ea bohlokoa? Ha tlaleho ea rōna e tsoela pele, u tla bona hore ha e le hantle hase Lipaki Tsa Jehova feela tseo molao le taelo ena ea ’muso e li amohang tokelo ea ho ba le bolokolohi ba puo empa esita le batho bohle ba lulang United States.

Se Tsositseng Khang Ena

Ka lilemo-lemo basebeletsi ba Lipaki Tsa Jehova Phuthehong ea Wellsville e sebakeng seo ba ’nile ba etela baahi ba Stratton, ’me ho tloha ka 1979 ba bile le mathata le ba ’maloa ba boholong sebakeng seo ka mosebetsi oa bona oa ho ea ka ntlo le ntlo. Mathoasong a bo-1990, lepolesa le leng la moo le ile la leleka sehlopha sa Lipaki motseng oo, la re: “Ha ke khathalle litokelo tseo tsa lōna.”

Taba ena e ile ea fihla sehlohlolong ka 1998 ha ramotse oa Stratton a ne a tjamela Lipaki tse ’nè Tsa Jehova. Li ne li khutla motsaneng oo li tsamaea ka koloi li tsoa buisana le baahi ba oona ba neng ba bontšitse hore ba thahasella puisano ea Bibele. Ho ea ka e mong oa basali bao a ileng a buisana le bona, ramotse o ile a re haeba e ne e le banna, o ne a tla ba koalla teronkong.

Sesosa sa taba e ne e le molao oa motsana o “Laolang ho Rekisa le ho Thaotha ho sa Batleheng Malapeng a Batho,” e leng o hlokang hore motho leha e le ofe ea batlang ho kopanela mosebetsing oa ho ea ka ntlo le ntlo a fumane tumello e sa lefelloeng ho ramotse. Lipaki Tsa Jehova li ne li nka hore molao ona o kena-kenana le bolokolohi ba motho ba puo, bolokolohi ba ho latela tumelo le bolokolohi ba phatlalatso. Ka hona, li ile tsa hlahlela nyeoe ka lekhotleng la ’muso ka mor’a hore motsana o hane ho fetola tšebeliso ea molao ona.

Nyeoe ena e ile ea lula ka pel’a moahloli oa lekhotla la setereke la United States, Seterekeng sa Ohio se ka Boroa, ka la 27 July, 1999. O ile a tšehetsa taba ea hore molao o hlokang hore ho fumanoe tumello motsaneng o lumellana le molao oa motheo. Ka mor’a moo, ka la 20 February, 2001, Lekhotla la Maipiletso la United States le Potolohong ea Botšelela le lona le ile la tiisa hore molao oo o lumellana le molao oa motheo.

E le hore taba ena e sebetsoe, mokhatlo oa Watchtower Bible and Tract Society of New York hammoho le Phutheho ea Wellsville ea Lipaki Tsa Jehova o ile oa kōpa Lekhotla le ka Holimo-limo la United States ho hlahloba taba ena.

Lekhotla le ka Holimo-limo le Amohela Nyeoe

LILEMONG TSA MORAO TJENA, Lekhotla le ka Holimo-limo le amohetse ho mamela linyeoe tse ka bang 80 ho isa ho tse 90 likōpong tse ka holimo ho tse 7 000 tse kenang selemo le selemo—e leng ka holimo ho karolo ea ’ngoe lekholong!

Ka May 2001, Lipaki Tsa Jehova li ile tsa kenya Kōpo ea tsona ea Boipiletso (tumello ea ho hlahloba nyeoe hape) Lekhotleng le ka Holimo-limo, li ile tsa botsa: “Na ho ea ka molao basebeletsi ba bolumeli ba latelang mokhoa o thehiloeng Mangolong o ’nileng oa sebelisoa ka lilemo tse makholo oa ho bua ka litumelo tsa bona tsa bolumeli ka ntlo le ntlo ba tšoana le barekisi, ba tlamehang ho ba tlas’a thibelo e behiloeng ea hore ba fumane tumello ho ’masepala ea hore ba bue ka Bibele kapa ba fane ka lingoliloeng tse thehiloeng Bibeleng ntle ho tefiso?”

Ka la 15 October, 2001, Lefapha la Tsa Molao la Watchtower le ile la tsebisoa hore Lekhotla le ka Holimo-limo la United States le amohetse ho mamela boipiletso nyeoeng ea Watchtower Bible and Tract Society of New York, Inc., et al. v. Village of Stratton et al.!

Lekhotla le ile la amohela nyeoe ena le e tobisitse tabeng ea bolokolohi ba puo, e leng taba ea hore na ha Sehlomathiso sa Pele se sireletsa bolokolohi ba puo ha se akarelletse le tokelo ea batho ea ho buisana le ba bang ntle le hore ba qale ka ho itlhahisa ho ba itseng ba boholong pusong.

Joale nyeoe ena e ne e tla lokela ho lula ka pel’a baahloli ba robong ba Lekhotla le ka Holimo-limo la United States. Lipaki li ne li tla ba le babuelli ba tsona ba molao; le Motsana oa Stratton o be le babuelli ba oona. Lintho li ne li tla tsamaea joang nyeoeng ee?

[Lebokose le leqepheng la 5]

SEHLOMATHISO SA PELE KE ENG?

“SEHLOMATHISO SA 1 (HO THEHOA HA BOLUMELI; BOLOKOLOHI BA BOLUMELI, BA PUO, BA PHATLALATSO, BA HO BOKANA, BA HO ETSA KŌPO) Lekhotla la Ketsa-melao ha le na ho etsa melao e amanang le ho thehoa ha bolumeli, kapa e thibelang bolokolohi ba ho bo sebelisa; kapa e sitisang bolokolohi ba puo kapa ba phatlalatso; kapa tokelo ea batho ea ho bokana ka khotso le ea ho kōpa ’Muso ho sekehela lillo tsa bona tsebe.”—The U.S. Constitution.

“Sehlomathiso sa Pele ke motheo oa tsamaiso ea demokrasi, United States. Sehlomathiso sa Pele se thibela Lekhotla la Ketsa-melao ho fetisa melao e thibelang bolokolohi ba puo, ba phatlalatso, ba ho bokana ka khotso, kapa ba ho etsa kōpo. Batho ba bangata ba nka bolokolohi ba puo e le bona ba bohlokoa ka ho fetisisa ebile e le motheo oa bolokolohi bohle. Sehlomathiso sa Pele se boetse se thibela Lekhotla la Ketsa-melao ho fetisa melao e thehang bolumeli ba naha kapa ho thibela bolokolohi ba bolumeli.” (The World Book Encyclopedia) Ho thahasellisang ke hore Lekhotla le ka Holimo-limo le ile la etsa qeto ea bohlokoa nyeoeng ea Cantwell v. Connecticut, 310 U.S. 296 (1940), e neng e ntse e ama Lipaki Tsa Jehova ea hore lintlha tsa Sehlomathiso sa Pele ha li thibele feela “Lekhotla la Ketsa-melao” (la ’muso oa federale) empa le thibela le baeta-pele ba sechaba (’muso le ’masepala) ho fetisa melao e tlang ho kena-kenana le litokelo tse Sehlomathisong sa Pele.

[Litšoantšo tse leqepheng la 5]

Taba ena e ne e ama litsela tse sa tšoaneng tsa ho ea ka ntlo le ntlo

[Tlhaloso ea Moo Setšoantšo se Nkiloeng Teng e leqepheng la 4]

Photograph by Franz Jantzen, Collection of the Supreme Court of the United States

Mohato oa Pele—Ho Tšetleha Mabaka Lekhotleng le ka Holimo-limo

LETSATSI la ho tšetleha mabaka ka pel’a Moahloli e Moholo William Rehnquist le batlatsi ba hae ba robeli Lekhotleng le ka Holimo-limo, e bile la 26 February, 2002. Lipaki Tsa Jehova li ne li emetsoe ke babuelli ba molao ba bane.

’Muelli ea ka sehloohong oa Lipaki o ile a qala taba ea hae ka ho etsa kenyelletso e hapang thahasello: “Ke hora ea 11:00 Moqebelo hoseng Motsaneng oa Stratton. [Eaba o kokota ka makhetlo a mararo sefalaneng.] ‘Lumela. Ka lebaka la lintho tse etsahalang morao tjena, ke entse boiteko bo khethehileng ba ho tla bua le uena ka seo Moprofeta Esaia a se boletseng e le ntho e molemo. Ke litaba tse molemo tseo Kreste Jesu a buileng ka tsona, litaba tse molemo tsa ’Muso oa Molimo.’”

O ile a tsoela pele: “Motsaneng oa Stratton, ke tlōlo ea molao ho ea ka ntlo le ntlo le ho fana ka molaetsa oo ntle leha motho a ile a fumana tumello ea ho etsa joalo ho ba boholong.”

‘Na ha le Kōpe Chelete?’

Moahloli Stephen G. Breyer o ile a botsa Lipaki lipotso tse ling tse tobileng. O ile a botsa: “Na ke ’nete hore ho hang batho ba hao ha ba kōpe chelete, le [hore] ha ba rekise Libibele, kapa ntho leha e le efe, haese feela ho re: ‘Ke rata ho bua le uena ka bolumeli’?”

’Muelli oa Lipaki o ile a arabela: “Mohlomphehi, tlaleho e bontša ka ho hlaka hore Lipaki Tsa Jehova li ne li sa kōpe chelete, Motsaneng oa Stratton. Tlaleho e tsoang libakeng tse ling le eona e bontša hore ka linako tse ling li ee li ame taba ea monehelo oa boithatelo. . . . Ha re qele lichelete. Re mpa re batla ho bua le batho ka Bibele.”

Na ho Hlokahala Tumello ea ’Muso?

Moahloli Antonin Scalia o ile a botsa ka bohlale: “Na maikutlo a hao hase hore ha lea lokela ho ea ho ramotse ho ea kōpa tumello ea ho bua le moahelani ka taba e itseng e thahasellisang?” ’Muelli oa Lipaki o ile a arabela: “Re lumela hore Lekhotla lena ha lea lokela ho amohela molao oa ’Muso o batlang hore moahi e mong a fumane tumello ea ho bua le e mong lelapeng la eo.”

Karabisano, Boikutlo Boa Fetoha

Joale e ne e le nako ea hore Motsana o tšetlehe mabaka a oona. Leqoetha le ka sehloohong le ile la hlalosa molao oa Stratton, la re: “Stratton e sebelisa matla a eona a puso e le ha e batla ho sireletsa khutso ea baahi ba eona le ha e batla ho thibela tlōlo ea molao. Molao oa hore ho se ke ha thaothoa kapa ha qeloa lichelete malapeng a batho o mpa o hloka hore motho a ingolise pele le hore a tsamaee a nkile lengolo la tumello ha a etsa mosebetsi oa ntlo le ntlo.”

Moahloli Scalia o ile a toboketsa taba ha a botsa: “Na ho na le nyeoe e ’ngoe eo le e tsebang eo [re le Lekhotla le ka Holimo-limo] re kileng ra e sebetsa e neng e ama molao o tšoanang le oo, o amang ho thaotha, ho qela chelete, ho se rekise, e be feela taba ea hore, ‘Ke rata ho bua ka Jesu Kreste,’ kapa ‘Ke rata ho bua ka ho sireletsa tikoloho?’ Na re kile ra ba le nyeoe ea mofuta oo?”

Moahloli Scalia o ile a tsoela pele: “Ha ke e-s’o ka ke utloa ka nyeoe e joalo lilemong tse makholo a mabeli tse fetileng.” Mona Moahloli Rehnquist o ile a mo araba ka ho re: “Ha u e-s’o phele nako e telele hakaalo.” Sena se ile sa etsa hore lekhotla le hasane ke litšeho. Moahloli Scalia o ile a tsoela pele ka taba ea hae, a re: “Boleng ba taba ena ke ntho e ncha ho ’na.”

Na Ebe ke Khopolo e Ntle?

Moahloli Anthony M. Kennedy o ile a botsa potso e tobileng a re: “U nahana hore ho tla be ho loketse hore ke e’o kōpa tumello Pusong pele ke e-ea le literata, tseo ke sa tsebeng batho ba teng kaofela, [’me] ke re, ke rata ho buisana le lōna beng ba matlo hobane ke amehile ka hore ho tlosoe litšila, [kapa] ke amehile ka Setho sa Paramente ea rōna. Na ke lokela ho ea batla tumello Pusong pele nka etsa seo?” O ile a phaella, “Taba ena ea makatsa.”

Joale Moahloli Sandra Day O’Connor o ile a kenella tabeng, a botsa: “Joale ho thoe’ng ka ba bapalang papali ea lesokoana? Na ba lokela ho fumana tumello?” Moahloli O’Connor le Moahloli Scalia ba ile ba tsepama tabeng ena. Moahloli O’Connor o ile a hlahisa taba e ’ngoe: “Ho thoe’ng haeba motho a alima tsoekere ho moahelani? Na ke lokela ho fumana tumello ea ho ea alima tsoekere ho moahelani?”

Na Lipaki ke Bathaothi?

Moahloli David H. Souter o ile a botsa: “Ke hobane’ng ha Lipaki Tsa Jehova li angoa ke see? Na ke bathaothi, li qela chelete, lia rekisa, ke bahoebi, ke bahahlauli ba khoebo kapa ba litšebeletso tse ling? Ha ho le e ’ngoe ea lintho tsena eo li leng eona, na ha ho joalo?” Leqoetha la Motsana le ile la qotsa boitsebiso bo bongata molaong ’me la phaella ka hore lekhotla le tlaasana le hlalositse Lipaki Tsa Jehova e le bathaothi. Ho sena Moahloli Souter a araba ka ho re: “Kahoo u na le tlhaloso e pharaletseng ea bathaothi, haeba e akarelletsa le Lipaki Tsa Jehova.”

Joale Moahloli Breyer o ile a qotsa tlhaloso ea bathaothi dikishinaring ho bontša hore e ne e sa sebetse ho Lipaki. A phaella ka ho re: “Ha kea bala letho mabakeng ao u faneng ka ’ona le bontšang hore na sepheo sa hore batho bana [Lipaki Tsa Jehova] ba se nang taba le chelete, ba se nang taba le ho rekisa, ba bileng ba sa thahaselleng livoutu, ba ee holong ea motse ho ea ingolisa teng ke sefe. Sepheo sa motse ke sefe?”

“Tokelo” ea ho Buisana

Leqoetha la Motsana le ile la tšetleha lebaka la hore “sepheo sa motse ke ho thibela mong’a ntlo ho khathatsoa.” Le ile la tsoela pele ho hlakisa hore e ne e le ho sireletsa baahi ho baqhekelli le ho linokoane. Moahloli Scalia o ile a qotsa molao ho bontša hore ramotse a ka batla boitsebiso bo eketsehileng mabapi le motho ea ingolisang le sepheo sa hae e le hore “ho hlalosoe ka ho nepahetseng boleng ba tokelo e hlokoang.” O ile a phaella a sa hlathe koana le koana: “Tokelo ea ho tsamaea motho a susumetsa baahi-’moho le eena ka taba ena kapa eane—ke sitoa ho e utloisisa.”

Moahloli Scalia o ile a thasiselletsa: “Na joale ho tla hlokahala hore motho e mong le e mong ea kokotang monyako a hatise monoana liofising tsa ’masepala pele [a] ka kokota monyako? Na monyetla oo o fokolang oa hore ho etsoe tlōlo ea molao o lekane ho etsa hore motho e mong le e mong ea batlang ho kokota monyakong oa e mong a tlamehe ho ingolisa liofising tsa ’masepala? Ka sebele ha oa lekana.”

Na Baahi ba Sirelelitsoe?

Ha metsotso e 20 eo le e filoeng e fela, leqoetha la Motsana le ile la fetisetsa marapo ho motlatsi oa moeletsi oa ’muso litabeng tsa molao naheng ea Ohio. O ile a tšetleha lebaka le reng molao oa ho se thaothe o sireletsa baahi hore ba se ke ba eteloa ke motho eo ba sa mo tsebeng, “eo ka sebele a sa mengoang, [ea] tlileng ha ka . . . ’me ke nahana hore motsana o na le tokelo ea ho re, ‘Re amehile ka tšebetso ea mofuta ona.’”

Joale Moahloli Scalia a re: “Ba motsana ba bolela hore le batho ba amohelang Lipaki Tsa Jehova, ba jeoa ke bolutu, ba ka rata ho bua le motho e mong ka taba e itseng, empa batho bana [Lipaki Tsa Jehova] ba ntse ba lokela ho ea ho ingolisa ho ramotse ho fumana tokelo ea ho kokota malapeng a bona.”

“Thibelo e Nahanelang”

Nakong ea lipotso Moahloli Scalia o ile a hlahisa ntlha ea bohlokoa ha a re: “Bohle re ka lumellana hore batho ba sireletsehileng ka ho fetisisa lefatšeng ke ba tlas’a puso ea bohatelli le bompoli. Ho na le tlōlo ea molao e fokolang. Ke taba e tloaelehileng, ’me e ’ngoe ea lintho tseo e bang bothata ha bolokolohi bo e-ba teng ke monyetla o batlang o phahame oa lintho tse seng molaong, ’me potso ke hore na molao ona o tla hle o thibele mesebetsi e seng molaong ka hore o laole tokelo ea ho kokota ha motho e mong.” Motlatsi oa moeletsi oa ’muso litabeng tsa molao o ile a arabela ka ho re “ke thibelo e nahanelang haholo.” Moahloli Scalia a bontša hore o nahanela hoo “re sitoang ho fumana leha e le nyeoe e le ’ngoe e tlalehang ’masepala ea kileng a etsa molao o joalo. Ha ke nahane hore hoo ke ho nahanela.”

Qetellong, motlatsi oa moeletsi oa ’muso litabeng tsa molao o ile a tlameha ho lumela ha a utloa khatello ea e mong oa baahloli: “Ke tla thatafalloa ho re u ka thibela ka ho feletseng ho eta kapa ho kokota malapeng.” O ile a phethela lintlha tsa hae ka tsela eo.

Ha a tšetleha mabaka a hae, ’muelli oa molao oa Lipaki o ile a bontša hore ha ho na tsela ea ho netefatsa seo motho a se buang. “Nka ’na ka ea liofising tsa motse eaba ke re, ‘Ke ’na [’nyeo-’nyeo],’ ebe ke fumana tumello ea ho ea ka ntlo le ntlo.” O ile a boela a bontša hore ramotse o na le matla a ho hana ho fana ka tumello ho motho ea reng hase setho sa mokhatlo. O ile a re: “Re lumela hore sena se bontša ka ho hlaka hore matla a ho etsa qeto a ho ba boholong,” ’me a phaella ka ho re: “Ka boikokobetso ke teka taba ena ea hore mosebetsi oa rōna [Lipaki Tsa Jehova] ka sebele o itšetlehile ka lintlha tse Sehlomathisong sa Pele.”

Nakoana ka mor’a moo, nyeoeng ena Moahloli e Moholo Rehnquist o ile a qetella ka ho re: “Nyeoe ena e fetisetsoa pele [Lekhotleng le ka Holimo-limo].” Sena sohle se ile sa nka nako e ka holingoana ho hora. Qeto ea lekhotla e ileng ea phatlalatsoa ka June e ne e tla bontša kamoo hora eo e bileng ea bohlokoa kateng.

[Litšoantšo tse leqepheng la 6]

Moahloli e Moholo Rehnquist

Moahloli Breyer

Moahloli Scalia

[Litlhaloso Tsa Moo Litšoantšo li Nkiloeng Teng]

Rehnquist: Collection, The Supreme Court Historical Society/Dane Penland; Breyer: Collection, The Supreme Court Historical Society/Richard Strauss; Scalia: Collection, The Supreme Court Historical Society/Joseph Lavenburg

[Litšoantšo tse leqepheng la 7]

Moahloli Souter

Moahloli Kennedy

Moahloli O’Connor

[Tlhaloso ea Moo Setšoantšo se Nkiloeng Teng]

Kennedy: Collection, The Supreme Court Historical Society/Robin Reid; O’Connor: Collection, The Supreme Court Historical Society/Richard Strauss; Souter: Collection, The Supreme Court Historical Society/Joseph Bailey

[Setšoantšo se leqepheng la 8]

Ka hare Khotla

[Tlhaloso ea Moo Setšoantšo se Nkiloeng Teng]

Photograph by Franz Jantzen, Collection of the Supreme Court of the United States

Lekhotla le ka Holimo-limo le Tšehetsa Bolokolohi ba Puo

LETSATSI LA MAKHAOLA-KHANG le ile la fihla ka la 17 June, 2002, ha Lekhotla le ka Holimo-limo le ne le ntša qeto ea lona e ngotsoeng fatše. Qeto e ile ea e-ba efe? Lihlooho tsa litaba likoranteng li ile tsa tlaleha taba ena. The New York Times e ile ea phatlalatsa: “Lekhotla le Qhelela Thōko Molao o Thibelang Lipaki Tsa Jehova ho Etela Batho.” The Columbus Dispatch ea Ohio e ile ea re: “Lekhotla le ka Holimo-limo le Phubula Qeto ea ho Batla Tumello.” The Plain Dealer ea Cleveland, Ohio, e ile ea re feela: “Ba Qelang Menehelo ha ba Hloke Tumello ea Ofisi ea Motse.” USA Today leqepheng le latelang la mohatisi e ile ea phatlalatsa: “Bolokolohi ba Puo Boa Hlōla.”

Qeto ea lekhotla le tlaasana e neng e le khahlanong le Lipaki Tsa Jehova e ile ea qheleloa thōko ke livoutu tsa batho ba robeli khahlanong le a le mong! Moahloli John Paul Stevens o ile a ngola Qeto ea Lekhotla e maqephe a 18. Qeto eo e ne e le tiiso e matla ea hore Sehlomathiso sa Pele se tšehetsa tšebeletso ea phatlalatsa ea Lipaki Tsa Jehova. Qetong ea lona, Lekhotla le ile la hlalosa hore Lipaki ha lia ka tsa kōpa tumello hobane li bolela hore “li laetsoe ke Mangolo hore li bolele.” Joale Lekhotla le ile la qotsa bopaki bo fanoeng mabakeng a tsona: “Re nka hore ho kōpa tumello ea ho bolela ho ’masepala ho tla tšoana le ho nyefola Molimo.”

Qeto ea Lekhotla e ile ea re: “Ka lilemo tse fetang 50, Lekhotla le ’nile la qhelela thōko lithibelo tse neng li etsoa mosebetsing oa ho thaotha ka ntlo le ntlo le oa ho fana ka lipampitšana. Tlaleho e bontša hore boholo ba linyeoe tsena tse amang Sehlomathiso sa Pele li ’nile tsa hlahleloa ke Lipaki Tsa Jehova, kaha bolumeli ba tsona bo li hloka hore li ee ka ntlo le ntlo. Joalokaha re hlokometse nyeoeng ea Murdock v. Pennsylvania, . . . (1943), Lipaki Tsa Jehova ‘li bolela hore li latela mohlala oa Pauluse, li ruta “phatlalatsa le ka ntlo le ntlo.” Liketso 20:20. Li nka taelo ea Mangolo joalokaha e le joalo ea hore, “E-eang ka lefatše lohle, le bolelle batho bohle kosepele.” Mareka 16:15. Li lumela hore ha li etsa joalo, li mamela taelo ea Molimo.’”

Joale Qeto eo e ile ea boela ea qotsa nyeoeng eo ea 1943: “Mosebetsi oa mofuta ona oa bolumeli o nkoa e le oa bohlokoa ka ho tšoanang tlas’a Sehlomathiso sa Pele joaloka borapeli likerekeng le boboleli bo etsoang lifalaneng. Le oona o lokela ho sireletsoa joaloka mesebetsi e meng ea bolumeli bo tloaelehileng le ba setso.” Ha e qotsa nyeoe ea 1939, Qeto e ile ea re: “Ho batla ho sitisa ho ajoa ha lipampitšana ka bolokolohi le ntle ho tšitiso ka hore ho fumanoe tumello ho hanana le seo molao oa motheo o hlileng o leng sona.”—Mongolo o tšekaletseng ke oa bona.

Joale Lekhotla le ile la hlahisa ntlha ea bohlokoa: “Linyeoe li bontša hore boiteko ba Lipaki Tsa Jehova ba ho loantša melao e thibelang bolokolohi ba puo ha ea ka ea e-ba bakeng sa litokelo tsa tsona feela.” Qeto e hlalositse hore Lipaki “hase tsona feela ‘batho ba khelloang tlaase’ ba bothateng ba ho khutsisoa ke melao e kang ona oa Motsaneng.”

Qeto eo e ile ea tsoela pele ho bolela hore molao ona “oa nyefola—ha o nyefole litokelo tse sireletsoang ke Sehlomathiso sa Pele feela, empa le eona khopolo ea ho ba le sechaba se lokolohileng—hore ebe moqoqong oa letsatsi le letsatsi moahi o tla tlameha ho bolella ’muso pele ka takatso ea hae ea ho bua le moahelani oa hae ebe ke hona a fumanang tumello ea ho etsa joalo. . . . Molao o batlang hore ho fumanoe tumello ea ho bua le ba bang o fapoha ka ho feletseng lefeng la sechaba sa rōna le setsong sa molao oa motheo.” Joale Qeto eo e ile ea bua ka “phello e kotsi ea molao oo o hlokang hore ho batloe tumello.”

Tšokelo ea Tlōlo ea Molao

Ho thoe’ng ka maikutlo a hore ho kōpa tumello ho sireletsa batho ho masholu le ho linokoane? Lekhotla le ile la beha lebaka: “Le hoja sena seo ho amehiloeng ka sona se utloahala, linyeoe tsa rōna tse fetileng li hlakisitse hore ho lokela ho be le ho leka-lekana pakeng tsa lintho tseo ho amehiloeng ka tsona le phello ea melao e joalo litokelong tse Sehlomathisong sa Pele.”

Qeto ea Lekhotla e ile ea tsoela pele: “Ha ho bonahale eka ho se be le tumello ho tla thibela linokoane hore li kokote menyako le ho bua le batho ka lintho tse sa akaretsoang molaong ona. Ka mohlala, li ka ’na tsa botsa tsela kapa tsa kōpa ho sebelisa thelefono, . . . kapa li ka ’na tsa kōpa tumello li sebelisa lebitso lesele li sa fuoe kotlo.”

Ha le bua ka liqeto tse ileng tsa etsoa lilemong tsa bo-1940, Lekhotla le ile la ngola: “Mantsoe a ileng a sebelisoa liqetong tse ileng tsa etsoa mehleng ea Ntoa ea II ea Lefatše, tseo hangata li ileng tsa sireletsa likōpo tsa balumeli-’moho [Mokhatlo oa Watch Tower] liqosong tse sa reng letho, a ile a bontša kamoo Lekhotla le nkang bolokolohi bo fanoang ke Sehlomathiso sa Pele bo amehang nyeoeng ena kateng.”

Qeto ea Lekhotla e bile efe? “Kahlolo ea Lekhotla la Maipiletso ea qheloa ’me nyeoe e khutlisetsoa morao ho ea sebetsoa hape tumellanong le qeto ena. Ena ke taelo.”

Ka hona, joalokaha Chicago Sun-Times e boletse, qetello ea taba e bile hore “Lekhotla le Tšehetsa Lipaki Tsa Jehova,” ’me sena e bile ka tumellano ea ba robeli khahlanong le a le mong.

Ho Thoe’ng ka Bokamoso?

Lipaki Tsa Jehova Phuthehong e haufi ea Wellsville li ile tsa nka tlhōlo ee ea ka Lekhotleng le ka Holimo-limo joang? Ka sebele ha li na lebaka la ho ikhantšetsa baahi ba Stratton ka eona. Lipaki ha lia hloea baahi ba molemo ba motsana oo. Gregory Kuhar, Paki ea moo, o itse: “Re ne re sa batle hore taba ena e be e ee ka lekhotleng. Ke feela hore molao o ne o fositse. Seo re se entseng se ne se se molemong oa rōna feela, empa le molemong oa bohle.”

Linnete li bontša hore Lipaki li entse boiteko bo khethehileng hore li se ke tsa halefisa batho ba motsana. Gene Koontz, Paki e ’ngoe, o ile a hlalosa: “Lekhetlo la ho qetela ha re ne re bolela Stratton e ne e le ka la 7 March, 1998—lilemo tse ka holimo ho tse ’nè tse fetileng.” Oa phaella: “Ke ile ka bolelloa hore ke tla tšoaroa. Lilemong tseo re bile le litlaleho tse ngata tsa litšokelo tsa mapolesa tsa ho re tšoara. Joale ha re ne re kōpa ho bona molao o ngotsoeng, re ne re sa fumane karabo.”

Koontz oa phaella: “Re lakatsa ho ba le likamano tse ntle le baahelani ba rōna. Haeba ba bang ba sa batle ha re ba etela, re hlompha qeto ea bona. Empa ho na le ba bang ba botsoalle, ba thabelang puisano ea Bibele.”

Gregory Kuhar o ile a hlalosa: “Ha rea ka ra fetisetsa nyeoe ena pele hobane re loantša batho ba Stratton. Re ne re mpa re batla ho theha ka molao bolokolohi ba rōna ba puo tlas’a Molao oa Motheo.”

O ile a tsoela pele: “Re tšepa hore qetellong re tla khutlela Stratton. Ke tla thabela ho ba oa pele ho kokota monyako mohla re khutlelang teng. Re lokela ho khutlela tumellanong le taelo ea Kreste.”

Qeto nyeoeng ea “Watchtower v. Village of Stratton” e bile le liphello tse khōlō. Ka mor’a ho utloa qeto ea Lekhotla le ka Holimo-limo, liofisiri tse ’maloa tsa ’masepala, United States, li ile tsa hlokomela hore melao ea sebaka e ke ke ea hlola e sebelisoa ho thibela mosebetsi oa Lipaki Tsa Jehova oa boboleli. Ho tla fihlela kajeno, ho rarolotsoe mathata mosebetsing oa boboleli oa ntlo le ntlo libakeng tse ka bang 90, United States.