Lebaka Leo ka Lona Borapeli ba Bakreste e Leng bo Phahameng
Lintlha tse Khōlō tse Tsoang Lengolong le Eang ho Baheberu
JEHOVA MOLIMO o ile a theha litšobotsi tse phahameng tsa borapeli ha a ne a romela Mora oa hae Jesu Kreste, lefatšeng. Ho bile joalo ka lebaka la hore Jesu, Mothei oa Bokreste, o phahametse mangeloi le moprofeta Moshe. Boprista ba Kreste ke bo phahameng haholo ha bo bapisoa le ba Balevi Iseraeleng ea boholo-holo. ’Me sehlabelo sa Jesu se phahametse hōle sehlabelo sa liphoofolo se neng se fanoa tlas’a Molao oa Moshe.
Lintlha tsena li hlakisoa lengolong le eang ho Baheberu. Ho bonahala eka le ngotsoe ke moapostola Pauluse a le Roma hoo e ka bang ka 61 C.E. ’me la romelloa balumeli ba Baheberu ba Judea. Ho tloha linakong tsa pele, Bakreste ba Bagerike le ba Asia ba ne ba lumela hore Pauluse e ne e le mongoli oa lona, ’me sena se tšehetsoa ke ho tloaelana ho batsi ha mongoli le Mangolo a Seheberu le tšebeliso ea hae ea tlaleho e hlophisitsoeng hantle, e leng tseo moapostola enoa a tsebjoang ka tsona. E ka ’na eaba o ile a siea lebitso la hae ka thōko ka lebaka la lehloeo la Bajode le se nang mabaka ho eena le ka lebaka la hore o ne a tsebjoa e le “moapostola oa ba-lichaba.” (Ba-Roma 11:13) Joale a re hlahlobisiseng litšobotsi tse phahameng tsa Bokreste, joalokaha li senotsoe lengolong la Pauluse le eang ho Baheberu.
Kreste o Phahametse Mangeloi le Moshe
Boemo bo phahameng ba Mora oa Molimo ke bona bo bontšitsoeng pele. (1:1–3:6) Mangeloi aa mo khumamela, ’me puso ea hae ea borena e itšetlehile ka Molimo. Kahoo re lokela ho ela hloko ka ho fetisisa lintho tse builoeng ke Mora. Ho feta moo, re lokela ho hopola hore esita le hoja motho Jesu a ne a le ka tlaasana ho mangeloi, o ile a phahamisetsoa ka holimo ho ’ona ’me a fuoa borena holim’a lefatše leo ho ahiloeng ho lona leo e neng e le hona le tla tla.
Jesu Kreste o boetse o phahametse Moshe. Ho joalo joang? Moshe e ne e le mohlokomeli feela ka tlung ea Molimo ea Iseraele. Leha ho le joalo, Jehova o ile a phahamisetsa Jesu holim’a ntlo eo kaofela, kapa phutheho ea batho ba Molimo.
Bakreste ba Kena Phomolong ea Molimo
Ha a tsoela pele moapostola o bontša hore ho kena phomolong ea Molimo ho ka khoneha. (3:7–4:13) Baiseraele ba lopolotsoeng botlamuoeng Egepeta ba ile ba hlōleha ho kena ho eona hobane ba ne ba sa utloe ’me ba haelloa ke tumelo. Empa re ka kena phomolong eo haeba re bontša tumelo ho Molimo ’me ka kutlo re latela Kreste. Joale, ho e-na le ho boloka Sabbatha ea beke le beke feela, letsatsi le leng le le leng re tla thabela tlhohonolofatso e phahameng ea ho phomola mesebetsing eohle ea boithati.
Ho kena phomolong ea Molimo ke tšepiso e ’ngoe ea lentsoe la oona, ‘le fetisang ka bohale lisabole tsohle tse leolitsoeng ka nģa tse peli; ’me lea hlaba, le ee ho kena le likhaohanong tsa pelo [“sephefumolohi,” NW] le tsa moea.’ Le etsa joalo ka hore le kenella ka hare-hare ho lemoha tšusumetso le boikutlo, ho arola litakatso tsa nama le boemo ba kelello. (Bapisa le Ba-Roma 7:25.) Haeba “sephefumolohi” sa rōna, kapa bophelo ba rōna ka bomong, bo kopane le “moea” oa bomolimo, kapa boikutlo ba bomolimo, re ka kena phomolong ea Molimo.
Boprista le Selekane tse Phahameng
Ha a tsoela pele Pauluse o bontša bophahamo ba boprista ba Kreste le ba selekane se secha. (4:14–10:31) Jesu Kreste ea se nang sebe o na le kutloelo-bohloko ho batho ba baetsalibe hobane joaloka rōna, o ile a lekoa maemong ’ohle. Ho feta moo, Molimo o mo khethetse ho ba “moprista ka ho sa feleng, ka mokhoa oa Melkisedeke.” Ho fapana le baprista ba phahameng ba Balevi, Jesu o na le bophelo bo ke keng ba felisoa ka hona ha a hloke bahlahlami mosebetsing oa hae o pholosang. Ha ho hlokahale hore a fane ka mahlabelo a liphoofolo, hobane o fane ka ’mele oa hae o phahameng ka ho fetisisa o se nang libe ’me o kene leholimong ka bohlokoa ba mali a hae.
Selekane se secha, se tiisitsoeng ke mali a Jesu, se phahametse selekane sa Molao. Melao ea Molimo e ngotsoe lipelong tsa ba selekaneng se secha ’me ba thabela tšoarelo ea libe. (Jeremia 31:31-34) Teboho bakeng sa sena e ba susumelletsa ho etsa polelo ea phatlalatsa ea tšepo ea bona le ho bōkana le balumeli-’moho. Ho fapana le bona, baetsalibe ba ka boomo ha ba sa na sehlabelo leha e le sefe bakeng sa libe.
Tumelo ke ea Bohlokoa!
Re hloka tumelo hore re tle re rue molemo selekaneng se secha se phahameng. (10:32–12:29, NW) Mamello le eona ea hlokahala haeba re tla fumana seo Jehova a se tšepisitseng. Re na le ‘leru le leholo’ la lipaki tsa pele ho nako ea Bokreste le re pota-potileng, e le khothatso bakeng sa hore re mamelle. Leha ho le joalo, ka ho khethehileng re lokela ho nahanisisa ka tsela e se nang sekoli ea Jesu tlas’a tlhokofatso. Ho hlokofatsoa leha e le hofe hoo Molimo o ho lumellang hore ho re hlahele ho ka talingoa joaloka taeo e ka hlahisang tholoana ea khotso ea ho loka. Ho tšepahala ha litšepiso tsa Jehova ho lokela ho hōlisa takatso ea rōna ea ho nehelana ka tšebeletso e halalelang ho eena “ka tšabo ea bomolimo le ka thothomelo.”
Pauluse o qetella ka likhothatso tse matla. (13:1-25) Tumelo e lokela ho re susumelletsa ho bonahatsa lerato la boena, ho rata ho amohela baeti, ho hopola balumeli-’moho ba hlokofatsoang, ho nka lenyalo le hlompheha, le ho ‘kholoa ke tseo re nang le tsona.’ Re lokela ho etsisa tumelo ea ba etelletseng pele ka phuthehong ’me re ba utloe. Ho feta moo, re lokela ho qoba bokoenehi, re mamelle thohako eo Jesu a ileng a e mamella, ‘re hlahise ka mehla ho Molimo sehlabelo sa poko,’ ’me re tsoele pele ho etsa hantle. Boitšoaro bo joalo hape ke e ’ngoe ea litšobotsi tse phahameng tsa Bokreste ba ’nete.
[Lebokose/Setšoantšo se leqepheng la 24]
Likolobetso tse Fapa-fapaneng: Litšobotsi tsa borapeli tabernakeleng ea Iseraele li ne li sebetsana “feela le lijo le lino le likolobetso tse fapa-fapaneng.” (Ba-Heberu 9:9, 10, NW) Likolobetso tsena e ne e le ho itlhatsoa le ho hlatsoa lintho tse ling bakeng sa litšebeletso ho neng ho hlokoa ke Molao oa Moshe. Lipitsa tse silafalitsoeng li ne li hlatsuoa, ’me ho itlhoekisa ka mokhoa oa tšebeletso ho ne ho kopanyelletsa hore motho a hlatsoe liaparo tsa hae le hore a tole. (Levitike 11:32; 14:8, 9; 15:5) Baprista ba ne ba tola, ’me lintho tse neng li amana le licheso li ne li tsokotsoa ka metsing. (Exoda 29:4; 30:17-21; Levitike 1:13; 2 Likronike 4:6) Empa “likolobetso tse fapa-fapaneng” li ne li sa kopanyelletse ‘kolobetso ea likopi, lijeke, le lijana tsa koporo’ tse neng li etsoa ke Bajode ka mokhoa oa litšebeletso nakong eo Messia a ileng a tla ka eona; leha e le hona hore Ba-Heberu 9:10, (NW) e bua ka ho qoelisoa metsing ho neng ho etsoa ke Johanne Mokolobetsi kapa hore e bua ka kolobetso ea ba tšoantšetsang boinehelo ba bona ho Molimo joaloka Bakreste.—Mattheu 28:19, 20; Mareka 7:4; Luka 3:3.