Khaolo ea 55

Barutuoa ba Bangata ba Khaotsa ho Latela Jesu

JESU o ntse a ruta synagogeng Kapernauma ka boikarabelo ba hae e le bohobe ba ’nete bo tsoang leholimong. Ka ho totobetseng puo ea hae ke ntšetso-pele ea puisano eo a e qalileng le batho bao ha ba mo fumana ho khutleng ha bona ka lehlakoreng le ka bochabela ho Leoatle la Galilea, moo ba neng ba ile ba ja bohobe le litlhapi tse hlahisitsoeng ka mohlolo.

Jesu o ntšetsa lipolelo tsa hae pele, o re: “Bohobe boo ke tla mo nea bona, ke nama ea ka, ee ke tla e nea lefatše, le tle le phele.” Lilemo tse peli feela pejana, nakong ea selemo ka 30 C.E., Jesu o ile a bolella Nikodema hore Molimo o ratile lefatše haholo hoo o bileng oa nehelana ka Mora oa oona e le ’Moloki. Ka hona, joale Jesu o bontša hore e mong le e mong oa lefatše la batho ea jang ka tšoantšetso nama ea hae, ka ho lumela sehlabelong seo a neng a tla tloha a se etsa, a ka fumana bophelo bo sa feleng.

Leha ho le joalo, batho bao ba khoptjoa ke mantsoe a Jesu. Baa botsa, “Na eo a ka re nea nama ea hae joang, ra e ja?” Jesu o batla hore bamameli ba hae ba utloisise hore ho ja nama ea hae ho ne ho tla etsoa ka tsela ea tšoantšetso. Kahoo, e le ho hatisa sena, o bolela ntho e ’ngoe e ntseng e khopisa le ho feta haeba e nkoa ka tsela ea sebele.

Jesu oa phatlalatsa: “Ekare ha le sa je nama ea Mor’a motho, le sa noe mali a hae, le ke ke la ba le bophelo ka ho lōna. Ea jang nama ea ka, le ho noa mali a ka, o na le bophelo bo sa feleng; ’me ke tla mo tsosa ka letsatsi la bofelo. Hobane nama ea ka ke sejo ka nete, ’me mali a ka ke seno ka ’nete. Ea jang nama ea ka, le ho noa mali a ka, o lula ho ’na, le ’na ho eena.”

Ke ’nete hore haeba mona Jesu a ne a khothaletsa hore batho e be malimo, thuto ea hae e ne e tla utloahala e le e khopisang ka ho fetisisa. Empa ho totobetse hore Jesu ha a buelle ho ja nama ea hae le ho noa mali a hae ka mokhoa oa sebele. O mpa a hatisa hore bohle ba tla fumana bophelo bo sa feleng ba tlameha ho lumela sehlabelong seo a tla se etsa ha a nehelana ka ’mele oa hae o phethahetseng oa botho le ha a tšolla mali a hae a bophelo. Empa, le barutuoa ba hae ba bangata ha ba etse boiteko ba ho utloisisa thuto ea hae, ka hona baa hanyetsa: “Taba ena ea nyarosa; ke mang ka e emelang?”

Ka ho tseba hore ba bangata ba barutuoa ba hae baa korotla, Jesu o re: “Na hoo hoa le khopisa na? Ho tla ba joang, ha le bona Mor’a motho a nyolohela moo a neng a le teng pele? . . . Taba tseo ke le bolellang tsona ke moea, e bile ke bophelo. Empa ba bang ba teng ho lōna ba sa lumeleng.”

Jesu o tsoela pele: “Ke ka baka leo ke le boleletseng, ka re: Ha ho ho motho ea ka tlang ho ’na, ha a sa ho fuoe ke Ntate.” Ha ba utloa tseo, ba bangata ba barutuoa ba hae ba tloha ’me ba khaotsa ho mo latela. Kahoo Jesu o retelehela ho baapostola ba hae ba 12 ’me oa botsa: “Na le lōna le rata ho ikela na?”

Petrose oa arabela: “Morena, re ka ea ho mang? Ke uena ea nang le mantsoe a bophelo bo sa feleng. ’Me re lumetse, ra ba ra tseba hobane ke uena Kreste, Mokhethoa oa Molimo!” Ke pontšo e ntle hakaakang ea botšepehi, le hoja Petrose le baapostola ba bang e ne e ka ’na eaba ha baa utloisisa ka botlalo thuto ea Jesu tabeng ena!

Le hoja a ile a thabisoa ke karabelo ea Petrose, Jesu o re: “Ana hase ’na ke le khethileng, lōna ba leshome le metso e ’meli? athe e mong oa lōna ke diabolose!” O bua ka Judase Iskariota. Mohlomong ke nakong ena Jesu a hlokomelang ka ho Judase ‘qaleho,’ kapa tšimoloho ea tsela e fosahetseng.

Jesu o sa tsoa soabisa batho ka ho hana boiteko ba bona ba ho mo etsa morena, ka hona ba ka ’na ba phea khang, ‘Ke joang eo e ka bang Messia haeba a hana setulo se nepahetseng sa Messia?’ Hona le hona e ne e tla ba taba e ncha likelellong tsa batho. Johanne 6:51-71, NW; 3:16.

▪ Jesu o fana ka nama ea hae bakeng sa bo-mang, hona baa ba ‘ja nama ea hae’ joang?

▪ Ke mantsoe afe hape a Jesu a nyarosang batho, empa ke eng eo a e hatisang?

▪ Ha ba bangata ba khaotsa ho latela Jesu, Petrose o arabela joang?