Khaolo ea 112
Paseka ea ho Qetela ea Jesu e Haufi
HA LABOBELI, la 11 Nisane, le ea malikelong, Jesu o qetella ho ruta baapostola Thabeng ea Mehloare. E bile letsatsi le maphathe-phathe le le boima hakaakang! Hona joale, mohlomong ha a khutlela Bethania hore a robaletse teng, o bolella baapostola ba hae: “Lea tseba hore kamora’ matsatsi a mabeli e tla ba Paseka, ’me Mor’a Motho o tla neeloa ho thakhisoa.”—TLP.
Ka ho hlakileng Jesu o hlola letsatsi le latelang, ka Laboraro, la 12 Nisane, a phomotse le baapostola ba hae moo ho khutsitseng. Letsatsing la pele, o ne a ile a khalemela baeta-pele ba bolumeli phatlalatsa, ’me oa hlokomela hore ba batla ho ’molaea. Ka hona ka Laboraro ha a itlhahise pontšeng, kaha ha a batle hore ntho leha e le efe e mo sitise ho keteka Paseka le baapostola ba hae mantsiboea a letsatsi le latelang.
Nakong ena, baprista ba baholo le baholo ba sechaba ba bokane lebaleng la moprista e moholo, Kaiafa. Ba hlabisitsoe lihlong ke tlhaselo ea Jesu letsatsing le fetileng, ba loha mano a ho mo tšoara ka leraba la bolotsana ’me ba etse hore a bolaoe. Leha ho le joalo ba tsoela pele ho re: “A e se be mohl’a mokete, e se re mohlomong mofere-fere oa e-ba teng har’a sechaba.” Ba tšaba batho bao Jesu a fumaneng tšehetso ea bona.
Le hoja baeta-pele bao ba bolumeli ba etsa morero oa bolotsana oa ho bolaea Jesu ka bokhopo, ba fumana moeti. Ho makaleng ha bona, ke e mong oa baapostola ba Jesu, Judase Iskariota, eo Satane a jetseng ka ho eena khopolo e nyelisehang ea hore a eke Monghali oa hae! Ba khotsofala hakaakang ha Judase a ba botsa: “Le tla ’nea’ng, ke tle ke le neele eena?” Ka thabo ba lumela ho mo lefa likotoana tse 30 tsa silevera, e leng moputso oa lekhoba ho latela selekane sa Molao oa Moshe. Ho tloha ka nako eo ho ea pele, Judase o leka matsapa a ho ba ekela Jesu letšoele le le sieo haufi le eena.
La 13 Nisane le qala ka Laboraro ka shoalane. Jesu o ne a fihlile ka Labohlano ho tsoa Jeriko, ka hona bona ke bosiu ba botšelela le ba ho qetela a robaletsa Bethania. Letsatsing le latelang, ka Labone, ho tla hlokahala hore ho etsoe litokisetso tsa ho qetela bakeng sa Paseka, e qalang ka shoalane. Ke nako eo konyana ea Paseka e tlamehang hore e hlajoe ka eona ’me e besoe e felletse. Ba tla ketekela mokete hokae, hona ke mang ea tla etsa litokisetso?
Jesu ha aa fana ka makolopetso a joalo, mohlomong ho thibela Judase ho loma baprista ba baholo tsebe e le hore ba ka tšoara Jesu nakong ea mokete oa Paseka. Empa joale, mohlomong ka Labone motšehare oa mantsiboea, Jesu o roma Petrose le Johanne ba tloha Bethania, o re: “E-eang, le re lokisetse Paseka, re tle re e je.”
Baa botsa: “U rata hore re e lokise kae?”
Jesu oa hlalosa: “Etlare ha le kena motseng, le tla khahlana le motho ea jereng nkho ea metsi; le mo latelle tlung eo a tla kena ho eona; ’me le re ho mong a ntlo: Moruti o re ho uena: Ntlo e kae eo ke tla jela Paseka le barutuoa ba ka ho eona? O tla le bontša ntlo e kaholimo e kholo, e khabisitsoeng. Le lokise Paseka teng.”
Ntle ho pelaelo mong’a ntlo ke morutuoa oa Jesu eo mohlomong a lebelletseng kōpo ea Jesu ea ho sebelisa ntlo ea hae bakeng sa ketsahalo ena e khethehileng. Leha ho le joalo, ha Petrose le Johanne ba fihla Jerusalema, ba fumana ntho e ’ngoe le e ’ngoe e le joalokaha Jesu a boletse esale pele. Ka hona ka bobeli ba bona ba tiisa hore konyana e lokisitsoe le hore litokisetso tse ling tsohle li entsoe e le ho hlokomela litlhokahalo tsa ba 13 ba tlil’o keteka Paseka, Jesu le baapostola ba hae ba 12. Mattheu 26:1-5, 14-19; Mareka 14:1, 2, 10-16; Luka 22:1-13; Exoda 21:32.
▪ Kamoo ho bonahalang ka teng Jesu o etsa eng ka Laboraro, hona hobane’ng?
▪ Ho tšoaroa seboka sefe lehaeng la moprista e moholo, hona Judase o etela baeta-pele ba bolumeli ka morero ofe?
▪ Ke bo-mang bao Jesu a ba romang Jerusalema ka Labone, hona ka morero ofe?
▪ Bana ba romiloeng ba fumana eng e senolang matla a Jesu a mohlolo ka lekhetlo le leng hape?