Linehelano Tseo Batho ba Arabelang ho Tsona

¹ Linehelano tseo batho ba arabelang ho tsona ke tse bontšang ka ho hlaka kamoo taba eo ho tla buisanoa ka eona e amang mong’a ntlo ka teng, hore ke ntho eo a e hlokang kapa eo a ka e sebelisang. Moqoqong oa hao kaofela, thusa mong’a ntlo ho hlokomela hore, “Sena sea nkama.” Ha re lokisetsa nehelano, re lokela ho ipotsa: ‘Tšimong ea rōna, ke litaba life tseo batho ba amehileng ka tsona haholo? Litlhoko tsa bona ke life? Nka nehelana joang ka molaetsa ho ba bontša hore Jehova o nahana ka litlhoko tsa bona?’ Lirapeng tse ka tlaase ho thathamisitsoe lintho tse ’maloa tseo batho ba nang le thahasello e khōlō ho tsona kajeno. Na u ka sebelisa e le ’ngoe ea tsona kapa ho hong ho tšoanang nehelanong ea hao? Hape u hlokomele kamoo lintlha tsa buka ea Tlhōrō ea Tšenolo li ka kopanyelletsoang ka teng.

² Ho Ameha ka ho Haella ha Thabo: “Re buisana le batho ba hlileng ba amehileng ka mofuta oa bophelo bo pheloang sebakeng sa rōna. Le hoja batho ba e-na le lintho tse bonahalang tse hlokahalang, ba bangata ehlile ha baa thaba bophelong. Na u nahana hore ho ka etsahala hore re thabele bophelo bo thabileng e le kannete? [Emela karabo.] Se seng sa linotlolo tsa thabo se fumanoa ka Bibeleng ho Tšenolo 1:3. [E bale.] Ho utloisisa seo Tšenolo e se bolelang ka bokamoso ho ka u tlisetsa thabo. Hlokomela boprofeta bo le bong feela ba eona.” Bala Tšenolo 21:3, 4 ebe u supa setšoantšo se ho leqephe 302 bukeng ea Tlhōrō ea Tšenolo.

³ Ho Ameha ka Bokamoso: “Re leka ho abelana le baahisani ba rōna pono e nang le tšepo ka bokamoso. Na le uena u leka ho talima bophelo ka tsela eo? [Emela karabo.] Ho latela Bibele, re na le lebaka la ho ba le tšepo haeba re etsa se boletsoeng ho Tšenolo 1:3.”

⁴ Ho Ameha ka ho ba le Bophelo bo Botle: “Batho ba bangata motseng oa rōna ba amehile ka ho ba le bophelo bo botle. Leha ho le joalo, ho sa tsotellehe mekhoa eo re e sebelisang bakeng sa ho itšireletsa, re ntse re kula. Na u ka thabela ho phela lefatšeng leo ho lona e mong le e mong a tla thabela bophelo bo phethahetseng le matla? Le hoja ho bonahala ho le thata ho ho lumela, buka ea Bibele ea Tšenolo e bua ka nako e joalo ’me e re bolella hore e se e le haufi haholo.” Bala Tšenolo 21:3, 4. Joale u ka supa setšoantšong se ho maqephe 308-9 bukeng ea Tlhōrō ea Tšenolo, o ’montše kamoo batho ba tla kopanela ka teng litokisetsong tsa bophelo Pusong ea Kreste ea Lilemo tse Sekete.

⁵ Ho Ameha ka Tšilafalo le Tikoloho: “Ha re ntse re buisana le baahisani ba rōna, re fumane hore ba bangata ba amehile ka tsela eo moea, metsi, le lijo li silafatsoang ka eona. Na u nahana hore mebuso e tla ke e felise see? [Emela tlhaloso.] Hoa khothatsa ho hlokomela seo Bibele e bolelang hore se tla etsahalla ba senyang lefatše.” Bala Tšenolo 11:18b. Totobatsa hore ka ntle le ho felisa ba senyang lefatše, ke morero oa Molimo hore ba bonolo ba etse lefatše paradeise, joalokaha ho bontšitsoe ho Pesaleme ea 37:10, 11 kapa Esaia 65:21, 22.

⁶ Ho ba Sekametseng Bolumeling: “Re ntse re botsa baahisani ba rōna potso e reng: Na u nahana hore buka ea Tšenolo e ne e etselitsoe hore re e utloisise, kapa hore e ’ne e lule e le sephiri? [Emela tlhaloso.] Batho ba bangata ba lumellana le uena. Hlokomela se boleloang ke Bibele ho Tšenolo 1:3.”

⁷ Ha u ntse u leka ka tieo ho finyella lipelo tsa batho ba u mamelang, ke ba lapetseng ’nete le ho loka ba tla arabela.—Matt. 5:3, 6.

Ke Tla Re’ng ho Tsosa Thahasello e Eketsehileng?

¹ Karolo e khōlō morerong oa rōna oa ho bolela litaba tse molemo ke ho etsa barutuoa, eseng feela ho siea lingoliloeng. Ka baka leo, ka mor’a ho hlokomela thahasello, ho hlokahala hore re hlaolele ’me re hlokomele peō e jaliloeng, re etse karolo ea rōna ho hōlisa tikoloho e ntle eo ho eona Jehova a ka thusang motho hore a hōle moeeng. (1 Ba-Kor. 3:6) U ka re’ng ha u khutla ka mor’a ho sebelisa linehelano tsa pele tse boletsoeng ka holimo? Litlhahiso tse ling ke tsena bakeng sa maemo a sa tšoaneng ao u ka ’nang ua teana le ’ona.

² Ho Hlaolela Thahasello e Fumanoeng: “Nakong e fetileng ha re ne re buisana hakhutšoaane, u ne u hlile u tšoarehile, empa u ile ua ipha nako ea ho bolela kamoo u amehileng ka teng ka bokamoso. Joalokaha u tla hopola, re ile ra bala Bibeleng ho Tšenolo 1:3 hore ‘nako e khethiloeng e haufi.’ Sena se ama bokamoso bo ka pele ho rōna ka ho tobileng. Hlokomela se boleloang ke buka ena mabapi le lengolo lena. [Bala serapa 11 ho leqephe 17 bukeng ea Tlhōrō ea Tšenolo.] Khatiso ena e hlahloba boprofeta bohle bo bukeng ea Bibele ea Tšenolo ’me e bontša kamoo re ka ruang molemo ho bona. Na u ka thahasella ho ithuta ho eketsehileng?”

³ Ho Sebelisa Buka ea Tlhōrō ea Tšenolo ho Qalisa Thuto ea Bibele: “Hoa thabisa ho u bona hape. Ho na le ntlha e eketsehileng eo ke batlang ho e arolelana le uena bukeng eo ke ileng ka u siela eona, ’me e khothatsa haholo. Bibele e bua ka ‘buka ea bophelo’ ha e bua ka ba tla phela ka ho sa feleng. Na u ka thabela ho tseba hore na ke mabitso a joang a leng bukeng eo?” Phetla leqephe 298 bukeng ea Tlhōrō ea Tšenolo. Bala serapa 11, ebe u botsa lipotso tse serapeng seo. Ka mor’a ho bua ka lirapa tse seng kae, ithaopele ho khutla ho tla ntšetsa puisano pele.

⁴ Ho Sebelisa Khatiso e ’Ngoe ho Qalisa Thuto ea Bibele: “Ke thabela ho u fumana lapeng kajeno. Lekhetlong le fetileng ha re ne re buisana, re ile ra bala ’moho tšepiso ea Bibele ho Tšenolo 1:3. [E bale hape.] Hlokomela hore thabo eo ho buuoang ka eona ha e itlele feela. Ho hlokahala lintho tse peli: Re tlameha ho bala se boleloang ke Bibele ebe re boloka, kapa re sebelisa se ngotsoeng. Bukana ‘Bonang, Ntho Tsohle ke li Etsa tse Ncha’ e tla etsa hore ho bala sengoliloeng seo ke u sietseng sona ho be monate hobane e hlalosa seo Molimo o se hlokang ka mokhoa o bonolo. Ho leqephe 30 ho na le lethathamo la lipotso tse 12 tse botsoang ke batho ba bangata. U ka thabela hore u arabeloe efe ea tsona?” Ka mor’a hore mong’a ntlo a arabe, u ka phetla bukaneng moo ho arabeloang potso eo teng ebe u qalisa thuto ea Bibele.

⁵ Sebelisa Litšoantšo ho Tsosa Thahasello: Buka ea Tlhōrō ea Tšenolo e na le litšoantšo tse ngata tse hlakileng. Litšoantšo tsena li ka totobatsoa ho tsosa thahasello. Ka mohlala, ha re etsa leeto la ho boela, re ka phetla leqephe 7. Supa setšoantšo sa Johanne sehleke-hlekeng sa Patmose. Tšenolo 1:3 e bontša hore tšenolo ea Johanne e ne e le molaetsa o thabisang. Ho ka ba joalo joang athe Tšenolo e hlalosa libatana tse tšabehang le timetso? Bua ka lirapa 1 le 2 leqepheng 6 la buka. Ho ka buuoa ka litšoantšo tse maqepheng a ka hare sekoahelong, esita le litšoantšo tse bontšang lefatše la Paradeise maqepheng 302, 308, le 309.

⁶ Ha re le leetong la ho boela, re lokela ho haha motheong o raliloeng ketelong ea pele. Ho lebisa tlhokomelo e seli tšobotsing ena ea tšebeletso ea rōna ho tla tlisetsa rōna le ba re utloang mahlohonolo a enneng a tsoang ho Jehova.—1 Tim. 4:16.