“Rorisang Jah!”
“Ntho e ’ngoe le e ’ngoe e phefumolohang—a e rorise Jah.”—PESALEME EA 150:6, NW.
1, 2. (a) Bokreste ba ’nete bo ile ba hōla ho isa tekanyong efe lekholong la pele la lilemo? (b) Baapostola ba ne ba fane ka temoso efe esale pele? (c) Bokoenehi bo ile ba hlaha joang?
JESU o ile a hlophisa barutuoa ba hae ka phutheho ea Bokreste, e ileng ea hōla haholo lekholong la pele la lilemo. Ho sa tsotellehe khanyetso e matla ea bolumeli, ‘litaba tse molemo li ile tsa boleloa pōpong eohle e tlas’a leholimo.’ (Bakolose 1:23) Empa ka mor’a lefu la baapostola ba Jesu Kreste, ka bolotsana Satane o ile a hlohlelletsa bokoenehi.
2 Baapostola ba ne ba lemositse esale pele ka sena. Ka mohlala, Pauluse o ile a bolella baholo ba tsoang Efese: “Ikeleng hloko le mohlape oohle, oo moea o halalelang o le behileng balebeli har’a oona, ho lisa phutheho ea Molimo, eo a e rekileng ka mali a Mora oa hae. Kea tseba hore ka mor’a hore ke tlohe liphiri tse hatellang li tla kena har’a lōna ’me ha li na ho tšoara mohlape ka bonolo, ’me har’a lōna ka bolōna batho ba tla hlaha ’me ba bue lintho tse sothehileng ho ikhulela barutuoa ka mor’a bona.” (Liketso 20:28-30; bona le 2 Petrose 2:1-3; 1 Johanne 2:18, 19.) Kahoo, lekholong la bone la lilemo, Bokreste ba bokoenehi bo ile ba qala ho iketsa khokanyan’a-phiri le ’Muso oa Roma. Makholo a seng makae a lilemo hamorao, ’Muso o Halalelang oa Roma, o neng o entse maqhama le mopapa oa Roma, o ile oa busa karolo e khōlō ea moloko oa batho. Qetellong, Phetohelo ea Maprostanta ka likhoka e ile ea hanyetsa bokhopo bo feteletseng ba Kereke e K’hatholike, empa e ile ea hlōleha ho tsosolosa Bokreste ba ’nete.
3. (a) Litaba tse molemo li ile tsa boleloa pōpong eohle neng hona joang? (b) Ka 1914 ho ile ha phethahala litebello life tse thehiloeng Bibeleng?
3 Leha ho le joalo, ha bofelo ba lekholo la bo19 la lilemo bo atamela, sehlopha se tšepahalang sa liithuti tsa Bibele se ne se boetse se phathahane se bolela le ho atolosetsa ‘tšepo ea litaba tse molemo ho pōpo eohle e tlas’a leholimo.’ Ka lebaka la ho ithuta ha sona boprofeta ba Bibele, sehlopha sena se ile sa supa selemo sa 1914 lilemo tse ka holimo ho 30 esale pele hore ke selemo se tšoaeang ho fela ha “linako tse behiloeng tsa lichaba,” mehla e etsang “linako tse supileng” kapa lilemo tse 2 520, tse ileng tsa qala ka ho etsoa ha Jerusalema lesupi ka 607 B.C.E. (Luka 21:24; Daniele 4:16, NW) Tumellanong le litebello tsa sona, 1914 e ile ea ipaka ho ba nako ea phetoho e khōlō litabeng tsa batho lefatšeng. Le leholimong ho ile ha etsahala liketsahalo tsa bohlokoahali. E bile nakong eo moo Morena oa bosafeleng a ileng a beha Morena hammoho le eena, Jesu Kreste, teroneng ea leholimo, a lokisetsa ho felisa bokhopo bohle lefatšeng lena le ho tsosolosa Paradeise.—Pesaleme ea 2:6, 8, 9; 110:1, 2, 5.
Bonang Morena oa Bomesia!
4. Jesu o ile a phelela moelelo oa lebitso la hae la Mikaele joang?
4 Ka 1914 Morena enoa oa Bomesia, Jesu, o ile a qala ho nka bohato. Ka Bibeleng o boetse o bitsoa Mikaele, e bolelang “Ke Mang ea Tšoanang le Molimo?,” hobane morero oa hae ke ho tlosa qoso bobusing ba Jehova. Joalokaha ho tlalehiloe ho Tšenolo 12:7-12, ponong moapostola Johanne o ile a hlalosa se neng se tla etsahala: “Ntoa ea qhoma leholimong: Mikaele le mangeloi a hae ba loana le drakone, ’me drakone le mangeloi a eona ba loana empa ha ea ka ea hlōla, leha e le hore ho ile ha hlola ho fumanoa sebaka bakeng sa bona leholimong. Kahoo drakone e khōlō ea liheloa tlaase, noha ea pele, e bitsoang Diabolose le Satane, e khelosang lefatše kaofela leo ho ahiloeng ho lona; ea liheloa tlaase lefatšeng, ’me mangeloi a eona a liheloa tlaase le eona.” Ka sebele, ke ho oa ho hoholo!
5, 6. (a) Ka mor’a 1914, ho ile ha etsoa phatlalatso efe e thabisang e tsoang leholimong? (b) Matheu 24:3-13 e amana joang le see?
5 Eaba lentsoe le molumo o moholo ka ho fetisisa leholimong lea phatlalatsa: “Joale ho hlahile poloko le matla le ’muso oa Molimo oa rōna le tokelo ea ho laela ea Kreste oa hae, hobane moqosi oa barab’abo rōna o lihetsoe tlaase, ea ba qosang motšehare le bosiu ka pel’a Molimo oa rōna! ’Me ba [Bakreste ba tšepahalang] ile ba mo hlōla ka lebaka la mali a Konyana [Kreste Jesu] le ka lebaka la lentsoe la ho paka ha bona, ’me ha baa ka ba rata lisoule tsa bona esita leha ba talimane le lefu.” Sena se bolela topollo ho baboloki ba botšepehi, ba bontšitseng tumelo sehlabelong sa bohlokoa sa Jesu sa thekollo.—Liproverbia 10:2; 2 Petrose 2:9.
6 Lentsoe le molumo o moholo leholimong le ile la tsoela pele ho phatlalatsa: “Thabang, lōna maholimo le lōna ba lulang ho ’ona! Ho malimabe lefatše le leoatle, hobane Diabolose o theohetse ho lōna, a halefile haholo, a tseba hore o na le nako e khutšoanyane.” Kahoo, ‘bomalimabe’ bo profetetsoeng lefatše lena bo bonahala ka lintoa tsa lefatše, litlala tsa sekoboto, mafu a seoa, litšisinyeho tsa lefatše le ho se ee ka molao tse hlasetseng lefatše lekholong lena la lilemo. Joalokaha Matheu 24:3-13 e qaqisa, Jesu o ile a bolela esale pele hore lintho tsena e ne e tla ba karolo ea ‘pontšo ea qetello ea tsamaiso ea lintho.’ Tumellanong le boprofeta, ho tloha ka 1914 moloko oa batho o latsoitse bomalimabe boo ho seng bo kileng ba lekana le bona historing eohle e fetileng ea batho.
7. Ke hobane’ng ha Lipaki tsa Jehova li bolela ka potlako?
7 Mehleng ena e khetholloang ka bomalimabe ba bokhopo bo feteletseng, na moloko oa batho o ka ba le tšepo ea bokamoso? E, hobane Matheu 12:21 e re ka Jesu: “Ka sebele, lichaba li tla tšepela lebitsong la hae”! Maemo a sithabetsang har’a lichaba ha a tšoaee feela ‘pontšo ea qetello ea tsamaiso ea lintho’ empa a boetse a tšoaea ‘pontšo ea ho ba teng ha Jesu’ e le Morena oa leholimong oa ’Muso oa Bomesia. Mabapi le ’Muso oo, Jesu o eketsa ka ho re: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; ’me joale e ntan’o ba hona bofelo bo tla tla.” (Matheu 24:14) Ke batho bafe feela lefatšeng kajeno ba bolelang tšepo e hlollang ea puso ea ’Muso oa Molimo? Lipaki tsa Jehova! Ka potlako, li bolela phatlalatsa le ka ntlo le ntlo hore ’Muso oa Molimo oa ho loka le khotso o haufi le ho laola litaba tsa lefatše. Na u kopanela tšebeletsong ee? Ha ho tokelo e khōlō ho feta ena eo u ka bang le eona!—2 Timothea 4:2, 5.
“Bofelo” bo Tla Joang?
8, 9. (a) Kahlolo e ile ea qala “ka ntlo ea Molimo” joang? (b) Bokreste-’mōtoana bo hlompholotse Lentsoe la Molimo joang?
8 Moloko oa batho o kene mehleng ea kahlolo. Ho 1 Petrose 4:17 re bolelloa hore kahlolo e qalile “ka ntlo ea Molimo”—kahlolo ea mekhatlo e hlophisitsoeng e ipolelang hore ke ea Bokreste e ileng ea totobala haesale ‘matsatsi a ho qetela’ a qaleha ka polao ea Ntoa ea I ea Lefatše ka 1914-18. Bokreste-’mōtoana bo tsoelletse joang kahlolong ee? Nahana ka boemo ba likereke ha li tšehetsa lintoa ho tloha ka 1914. Na baruti ha baa qaphaletsoa ke “mali a [lisoule tsa, NW] mafutsana a se nang molato” tseo ba ileng ba li ruta hore li ee ntoeng?—Jeremia 2:34.
9 Ho ea ka Matheu 26:52, Jesu o itse: “Bohle ba nkang sabole ba tla timela ka sabole.” Sena e bile ’nete hakaakang lintoeng tsa lekholong lee la lilemo! Baruti ba khothalelitse bahlankana ho bolaea bahlankana ba bang ka sehlōhō, esita le ba bolumeli ba bona—Mak’hatholike a bolaea Mak’hatholike le Maprostanta a bolaea Maprostanta. Bochaba bo phahamiselitsoe ka holim’a Molimo le Kreste. Haufinyane, lichabeng tse ling tsa Afrika, likamano tsa morabe li etellelitsoe ka pele ho melao-motheo ea Bibele. Rwanda, moo boholo ba baahi e leng Mak’hatholike, bonyane ba etsang halofo ea milione ba ile ba bolaoa pefong ea merabe. Mopapa o ile a lumela koranteng ea Vatican L’Osservatore Romano: “Sena ke ho timetsa morabe ka ho feletseng, hoo ka bomalimabe le Mak’hatholike a ikarabellang ho hona.”—Bapisa le Esaia 59:2, 3; Mikea 4:3, 5.
10. Jehova o tla phethahatsa kahlolo efe holim’a bolumeli ba bohata?
10 Morena oa bosafeleng o talima joang malumeli a khothaletsang batho ho bolaeana kapa a emang a shebeletse ha litho tsa mehlape ea ’ona li bolaeana? Mabapi le Babylona e Moholo, tsamaiso ea lefatše ka bophara ea bolumeli ba bohata, Tšenolo 18:21, 24 ea re bolella: “Lengeloi le matla la phahamisa lejoe le joaloka lejoe le leholo la leloala ’me la le lihela ka leoatleng, le re: ‘Ka tsela ena ka ho akheloa ka sekhahla Babylona motse o moholo o tla liheloa tlaase, ’me le ka mohla ha a na ho fumanoa hape. E, ho eena ho ile ha fumanoa mali a baprofeta le a bahalaleli le a bohle ba bolailoeng ka mabifi lefatšeng.’”
11. Ke lintho life tse tšabehang tse ’nileng tsa etsahala Bokreste-’mōtoaneng?
11 Phethahatsong ea boprofeta ba Bibele, ho ’nile ha etsahala lintho tse tšabehang Bokreste-’mōtoaneng. (Bapisa le Jeremia 5:30, 31; 23:14.) Haholo-holo ka lebaka la boikutlo ba baruti ba ho lumella ntho e ’ngoe le e ’ngoe, ho tletse boitšoaro bo bobe mehlapeng ea bona. United States, sechabeng seo ho nkoang hore ke sa Bokreste, hoo e ka bang halofo ea manyalo ’ohle e fella ka tlhalo. Ho ima ha bacha le bosodoma ha li laolehe har’a litho tsa kereke. Ka makhetlo a mangata—baprista ba hlekefetsa bana ba banyenyane ka likamano tsa botona le botšehali. Ho ’nile ha boleloa hore litefo tsa lekhotla tse mabapi le liqoso tsena li ne li ka bitsa Kereke e K’hatholike, United States lidolara tse limilione tse likete (liranta tse limilione tse 3 600) nakong ea lilemo tse leshome. Bokreste-’mōtoana bo hlokomolohile temoso ea moapostola Pauluse e ho 1 Bakorinthe 6:9, 10: “Khele! Na ha le tsebe hore batho ba sa lokang ha ba na ho rua ’muso oa Molimo? Le se ke la khelosoa. Leha e le lihlola, kapa barapeli ba litšoantšo, kapa bafebi, kapa banna ba boloketsoeng merero eo e seng ea tlhaho, kapa banna ba robalang le banna, kapa masholu, kapa batho ba meharo, kapa matahoa, kapa ba litlhapa, kapa bahanyapetsi ha ba na ho rua ’muso oa Molimo.”
12. (a) Morena oa bosafeleng o tla nka bohato joang khahlanong le Babylona e Moholo? (b) Ho fapana le Bokreste-’mōtoana, batho ba Molimo ba tla bina lik’horase tsa “Halleluja” ka lebaka lefe?
12 Haufinyane, Morena oa bosafeleng, Jehova, a sebetsa ka Molaoli oa Mabotho ea Phahameng ka ho Fetisisa oa leholimo, Kreste Jesu, o tla tlisa matšoenyeho a maholo. Taba ea pele Bokreste-’mōtoana le makala a mang kaofela a Babylona e Moholo bo tla feta tlas’a kahlolo eo Jehova a tla e phethahatsa. (Tšenolo 17:16, 17) Ba iponahalitse hore ha ba tšoaneloe ke poloko eo Jehova a faneng ka eona ka sehlabelo sa thekollo sa Jesu. Ba nyelisitse lebitso la Molimo le halalelang. (Bapisa le Ezekiele 39:7.) Ke ho phoqa ho hokaakang hore ebe ba bina lik’horase tsa “Halleluja” meahong ea bona e meholo e majaba-jaba ea bolumeli! Ba tlosa lebitso la bohlokoa la Jehova liphetolelong tsa bona tsa Bibele empa ba lebala ’nete ea hore “Halleluja” e bolela “Rorisang Jah”—“Jah” e leng khutsufatso ea “Jehova.” Ka ho loketseng, Tšenolo 19:1-6 e tlaleha lik’horase tsa “Halleluja” tse tla binoa haufinyane moketeng oa ha Molimo a phethahatsa kahlolo holim’a Babylona e Moholo.
13, 14. (a) Ke liketsahalo life tsa bohlokoa tse tla latela? (b) Phello e thabisang ke efe bakeng sa batho ba tšabang Molimo?
13 Se latelang tokisetsong ena ke ‘ho fihla’ ha Jesu ho phatlalatsa le ho phethahatsa kahlolo holim’a lichaba le batho. Eena ka boeena o ile a profeta: “Ha Mora oa motho [Kreste Jesu] a fihla ka khanya ea hae, ’me mangeloi ’ohle a e-na le eena, joale o tla lula teroneng ea hae e khanyang [ea kahlolo]. ’Me lichaba tsohle [tse lefatšeng] li tla bokelloa ka pel’a hae, ’me o tla arola batho e mong ho e mong, feela joalokaha molisa a arola linku ho lipōli. ’Me o tla beha linku ka letsohong la hae le letona, empa lipōli ka ho la hae le letšehali. Joale morena o tla re ho ba ka ho la hae le letona, ‘Tloong, lōna ba hlohonolofalitsoeng ke Ntate, le rue ’muso oo le o lokiselitsoeng ho tloha ho thehoeng ha lefatše.’” (Matheu 25:31-34) Temana ea 46 e tsoela pele ho pheta hore sehlopha sa lipōli se “tla ea ho khaoloeng ho sa feleng, empa ba lokileng bophelong bo sa feleng.”
14 Buka ea Bibele ea Tšenolo e hlalosa kamoo “Morena oa marena le Khosi ea likhosi,” Morena oa rōna oa leholimo, Jesu Kreste, ka nako eo a tla kalla a e-ea ntoeng ea Armagedone, ho senya karolo ea lipolotiki le ea khoebo ea tsamaiso ea Satane. Kahoo Kreste o tla be a tšolletse “bohale ba khalefo ea Molimo ea Matla ’Ohle” ’musong oohle oa Satane oa lefatšeng. Ha ‘lintho tsena tsa pele li ntse li feta,’ batho ba tšabang Molimo ba tla kenngoa lefatšeng le lecha le ikhethang moo Molimo a “tla hlakola meokho eohle mahlong a bona.”—Tšenolo 19:11-16; 21:3-5.
Nako ea ho Rorisa Jah
15, 16. (a) Ke hobane’ng ha e le habohlokoa haholo ho ela hloko lentsoe la Jehova la boprofeta? (b) Baprofeta le baapostola ba bontša hore re tlameha ho etsa eng e le hore re bolokehe, ’me see se ka bolela’ng kajeno ho batho ba bangata?
15 Letsatsi leo la ho liha kahlolo le haufi! Ka lebaka leo, ho molemo ho ela hloko polelo ea boprofeta ea Morena oa bosafeleng. Ho ba sa ntseng ba tšoasehile lithutong le litloaelong tsa bolumeli ba bohata, lentsoe le tsoang leholimong lea phatlalatsa: “Tsoang ho eena, batho ba ka, haeba le sa batle ho kopanela le eena libeng tsa hae, le haeba le sa batle ho amohela karolo ea likotlo tsa hae.” Empa baphonyohi ba tlameha ho ea hokae? Ho na le ’nete e le ’ngoe feela, ka hona ho na le bolumeli bo le bong feela ba ’nete. (Tšenolo 18:4; Johanne 8:31, 32; 14:6; 17:3) Hore re fumane bophelo bo sa feleng ho itšetlehile ka ho fumana bolumeli boo le ho utloa Molimo oa bona. Bibele e re lebisa ho eena ho Pesaleme ea 83:18, e balehang tjena: “Uena, eo lebitso la hao u le mong e leng JEHOVA, u ea phahameng ka ho fetisisa lefatšeng lohle.”—King James Version.
16 Leha ho le joalo, ho hlokahala hore re etse se fetang feela ho tseba lebitso la Morena oa bosafeleng. Ho hlokahala hore re ithute Bibele ’me re tsebe litšoaneleho tsa hae tse phahameng le merero. Joale ho hlokahala hore re etse thato ea hae bakeng sa mehla ena, joalokaha ho boletsoe ho Baroma 10:9-13. Moapostola Pauluse o ile a qotsa boprofeta bo boluletsoeng ’me a etsa qeto ena: “E mong le e mong ea ipiletsang lebitsong la Jehova o tla pholoha.” (Joele 2:32; Sofonia 3:9) O tla pholoha? E, kajeno ba bangata ba sebelisang tumelo tokisetsong ea Jehova ea thekollo ka Kreste ba tla pholosoa matšoenyehong a maholo a tlang, ha ho phethahatsoa kahlolo holim’a lefatše la Satane le senyehileng.—Tšenolo 7:9, 10, 14.
17. Ke tšepo efe e hlollang e lokelang ho re susumeletsa hore hona joale re kopanele ho bineng pina ea Moshe le ea Konyana?
17 Thato ea Molimo ke efe ho ba nang le tšepo ea ho pholoha? Ke hore esita le hona joale re kopanele ho bineng pina ea Moshe le ea Konyana, re rorise Morena oa bosafeleng re lebeletse tlhōlo ea hae. Re etsa sena ka ho bolella ba bang ka merero ea hae e ikhethang. Ha re ntse re tsoela pele kutloisisong ea rōna ea Bibele, re ka nehela bophelo ba rōna ho Morena oa bosafeleng. Seo se tla etsa hore re phele ka ho sa feleng tlas’a tokisetso eo Morena enoa ea matla a e hlalosang, joalokaha e fumanoa ho Esaia 65:17, 18: “Hobane bonang, ke ea bōpa maholimo a macha [’Muso oa Bomesia oa Jesu] le lefatše le lecha [moloko o mocha oa batho ba lokileng]; tse fetileng ha li sa tla hlola li hopoloa, li ke ke tsa khutlela mehopolong. Empa le tla ba le thabo le nyakallo e sa feleng ka seo ke eang ho se bōpa.”
18, 19. (a) Mantsoe a Davida ho Pesaleme ea 145 a lokela ho re susumeletsa ho etsa eng? (b) Re ka lebella eng ka kholiseho letsohong la Jehova?
18 Mopesaleme Davida o ile a hlalosa Morena oa bosafeleng ka mantsoe ana: “Jehova o moholo ’me o lokeloa ke ho rorisoa haholo, ’me boholo ba hae bo ke ke ba batlisisoa.” (Pesaleme ea 145:3, NW) Boholo ba hae bo ke ke ba batlisisoa joaloka meeli ea sepaka-paka le ea bosafeleng! (Baroma 11:33) Ha re ntse re tsoela pele ho ithuisa tsebo ka ’Mōpi oa rōna le ka tokisetso ea hae ea thekollo ka Mora oa hae, Kreste Jesu, re tla rata ho rorisa Morena oa rōna oa ka ho sa feleng ka ho eketsehileng haholoanyane. Re tla rata ho etsa seo Pesaleme ea 145:11-13 (NW) e se bontšang: “Ba tla bua ka khanya ea borena ba hao‚ ’me ba tla bua ka matla a hao‚ ho tsebisa bara ba batho liketso tsa hae tse matla le khanya ea botle ba borena ba hae. Borena ba hao ke borena ba linako tsohle tse sa tsejoeng, ’me puso ea hao e pholletsa le meloko eohle e latellanang.”
19 Ka kholiseho re ka lebella hore Molimo oa rōna o tla sebetsa tumellanong le polelo ena: “U fuparolla seatla sa hao ’me u khotsofatsa takatso ea ntho e ’ngoe le e ’ngoe e phelang.” Morena oa bosafeleng o tla re tataisa ka bonolo ho fihlela qetellong ea mehla ena ea ho qetela, hobane Davida o ile a re tiisetsa: “Jehova o lebela bohle ba mo ratang, empa bohle ba khopo o tla ba felisa ka ho feletseng.”—Pesaleme ea 145:16, 20, NW.
20. U arabela joang memong ea Morena oa bosafeleng, joalokaha e tlalehiloe lipesalemeng tse hlano tsa ho qetela?
20 E ’ngoe le e ’ngoe ea lipesaleme tse hlano tse qetellang ka Bibeleng li qala le ho qetella ka memo ea “Halleluja.” Ke ka lebaka leo Pesaleme ea 146 (NW) e re memang: “Rorisang Jah! Rorisa Jehova, Soule ea ka. Ke tla rorisa Jehova nakong eohle ea bophelo ba ka. Ke tla etsetsa Molimo oa ka meloli hafeela ke ntse ke le teng.” Na u tla arabela pitsong eo? Ka sebele u lokela ho rata ho mo rorisa! E se eka u ka ba har’a ba hlalosoang ho Pesaleme ea 148:12, 13: “Bahlankana le baroetsana, maqheku hammoho le bana! A ba ke ba rorise lebitso la Jehova, hobane lebitso la hae ke lona le inotši le phahamileng, bokhabane ba hae bo phahamile ho fetisa lefatše le maholimo.” E se eka re ka arabela ka pelo eohle memong ena: “Rorisang Jah!” A re roriseng Morena oa bosafeleng ka tumellano!
U ka Hlalosa Joang?
◻ Baapostola ba Jesu ba lemositse ka eng esale pele?
◻ Ho tloha ka 1914, ho ile ha etsahala liketsahalo life tsa makhaola-khang?
◻ Jehova o haufi le ho phethahatsa likahlolo life?
◻ Ke hobane’ng ha ena e le nako ea bohlokoa ka ho fetisisa ea ho rorisa Morena oa bosafeleng?
[Lebokose le leqepheng la 19]
MEHLA Ena Ea Litlokotsi Ea Pherekano
Taba ea hore mehla ea pherekano e qalile mathoasong a lekholo la bo20 la lilemo e hlokometsoe ke batho ba bangata. Ka mohlala, selelekeleng sa buka Pandaemonium, ea setho sa Senate ea United States, Daniel Patrick Moynihan, e hatisitsoeng ka 1993, tlhaloso e mabapi le “tlokotsi ea 1914” e baleha tjena: “Ntoa e ile ea fihla ’me lefatše la fetoha—ka ho feletseng. Kajeno ho na le lichaba tse robeli feela lefatšeng tse neng li le teng ka 1914 le tseo puso ea tsona e sa kang ea fetoloa ke pefo ho tloha ka nako eo. . . . Haele lichaba tse setseng tse ka bang 170 tsa kajeno, tse ling li thehiloe haufinyane haholo hore li ka be li latsoitse pherekano ea morao tjena.” Ka sebele, mehla ea ho tloha ka 1914 e bile ea litlokotsi tse latellanang!
Buka e ’ngoe eo le eona e hatisitsoeng ka 1993 ke Out of Control—Global Turmoil on the Eve of the Twenty-First Century. Mongoli oa eona ke Zbigniew Brzezinski, eo pele e neng e le hlooho ea National Security Council ea United States. Oa ngola: “Ho thoasa ha lekholo la mashome a mabeli la lilemo ho ile ha thoholetsoa ka litlhaloso tse ngata e le ho qaleha ha sebele ha Mehla ea ho Beha Mabaka. . . . Ho fapana le seo le se tšepisitseng, lekholo la mashome a mabeli la lilemo e bile le tletseng tšollo ea mali le le tletseng lehloeo ka ho fetisisa, lekholo la lilemo la maikutlo a lipolotiki a se nang mabaka le la lipolao tse tšosang. Sehlōhō se ile sa hlophisoa ka tekanyo e e-s’o bonoe le ka mohla, polao e ile ea hlophisoa ka bongata bo boholo. Phapang pakeng tsa matla a saense a ho hlahisa se leng molemo le bokhopo ba lipolotiki bo hlileng ba etsoa ea tšosa. Historing ha ho mohla polao e kileng ea ata hakana lefatšeng lohle, ha ho mohla e kileng ea timetsa bophelo ba batho ba bangata hakana, ha ho mohla pheliso ea batho e kileng ea phehelloa ka boiteko bo joalo bo tsoelang pele bo etsoang feela molemong oa lipakane tse joalo tse sa utloahaleng tsa boikhohomoso.” Seo ke ’nete hakaakang!
[Setšoantšo se leqepheng la 17]
Mikaele o ile a lihela Satane le letšoele la hae le leholo lefatšeng ka mor’a ho hlongoa ha ’Muso ka 1914