Na ho Tletleba Ho Hong le ho Hong ho Fosahetse?
Ke matšoenyeho afe a utloisang bohloko ho feta ao re sitoang ho tletleba ka ’ona?—Marquis De Custine, 1790-1857.
KA LILEMO tse peli, mosali e mong o ne a ile a mamella ho hleka-hlekoa ka morero oa ho tsosetsoa takatso ea likamano tsa botona le botšehali ke mosebetsi-’moho le eena. Ho hana ha hae ho ile ha fella ka hore a khahlapetsoe ka mantsoe le ho hlokomolohuoa. Ho bipetsa khatello ea hae ea kelello ho ne ho ama bophelo ba hae, empa o ne a tla etsa’ng? Ka ho tšoanang, seithuti se neng se le bohlale ho feta tsohle tlelaseng ea sona se ile sa lelekoa hobane letsoalo la sona le ne le sa se lumelle ho kenella koetlisong ea ho loana ntle le libetsa e neng e hlokoa ke sekolo. Batho bana ka bobeli ba ne ba ikutloa hore ba sitetsoe, empa na ba ne ba ka tletleba? Hona haeba ba ne ba tletleba, na ba ne ba tla ba le tšepo ea ho imoloha kapa ho ne ho mpa ho tla mpefatsa boemo?
Litletlebo tse kang tsena le tse ling li tloaelehile kajeno, joalokaha re phela har’a batho ba sa phethahalang lefatšeng le se nang thuso. Ho tletleba ho mefuta-futa, ho ka qala ka ho hlalosa bohloko bo bipelitsoeng, mesarelo, ho hlomoha kapa ho hlonamela maemo a itseng, ho isa ho qoseng motho e mong. Batho ba bangata ba khetha ho se tletlebe le ho qoba khohlano; leha ho le joalo, na motho o lokela ho thōla ka linako tsohle? Pono ea Bibele ke efe?
Liphello Tse sa Thabiseng ho Motho ka Boeena le ho ba Bang
Ha ho pelaelo hore tšekamelo ea ho tletlebela ruri e kotsi, ’me Bibele ea e nyatsa. Motletlebi o itematsa maikutlong le moeeng ’me o tena bao a lulang a tletleba ho bona. Maele a Bibele ha a bua ka mosali ea tletlebang a re: “Metsi a rothang lintšing tsa marulelo a ntlo, a sa khaotse mohl’a sekhohola, le mosali ea likomang, ke ntho e le ’ngoe.” (Liproverbia 27:15) Ka ho khetheha, ho tletleba khahlanong le Jehova kapa e ’ngoe ea litokisetso tsa hae ho fosahetse. Ha sechaba sa Iseraele se ne se tletleba ka manna a mohlolo ao se neng se a fuoa nakong ea leeto la sona la lilemo tse 40 lefeelleng, se a bitsa ‘bohobe bo sa tsebisahaleng,’ Jehova o ile a romela linoha tse mahloko e le ho otla batletlebi bao ba sa hlompheng, ’me ho ile ha shoa ba bangata.—Numere 21:5, 6.
Ho feta moo, Jesu o ile a lemosa balateli ba hae hore ba se ke ba tletleba ka “lehlokoa” la liphoso tseo re li bonang ho batho ba bang empa, hore re be hlokolosi haholoanyane ka “kapa” e khōlōhali ea mefokolo eo ka borōna re nang le eona. (Matheu 7:1-5) Ka ho tšoanang, Pauluse o ile a nyatsa ho ahlola ba bang (mokhoa o mong oa ho tletleba) e le “[ho hlokang] boikemelo . . . kaha uena ea ahlolang u tloaetse ho etsa lintho tse tšoanang.” Litemoso tsena tse khahlanong le ho tletleba li lokela ho re susumelletsa ho qoba ho nyatsa-nyatsa ho sa hlokahaleng le ho hlaolela tšekamelo ea ho tletleba.—Baroma 2:1.
Na ho Nyatsuoa ho Tletleba ho Hong le ho Hong?
Na joale re lokela ho etsa qeto ea hore ho lokela ho nyatsuoe mefuta eohle ea tletlebo? Che, ha rea lokela ho etsa joalo. Bibele e bontša hore ho na le leeme le lengata le hlokang ho lokisoa lefatšeng lena le likoli-koli leo re phelang ho lona. Papisong, Jesu o ile a bua ka moahloli eo ka lekhonono a ileng a ahlolela mohlolohali ka toka e le hore a se ke ‘a ’na a ea ’me a mo teteka ka ho feletseng.’ (Luka 18:1-8) Ho ka ’na ha hlokahala hore litabeng tse ling le rōna re phehelle ho tletleba ho fihlela liphoso li lokisoa.
Ka ho re khothalletsa hore re rapelle ’Muso oa Molimo hore o tle, na Jesu o ne a sa re phehelle hore re hlokomele ho hlōleha ha lefatše lee la joale le hore re ‘llele’ Molimo hore a rarolle mathata? (Matheu 6:10) Ha “sello se tletlebang” mabapi le bokhopo ba Sodoma le Gomora se fihla litsebeng tsa hae, Jehova o ile a romela manģosa a hae hore a ee ho “bona haeba ba fela ba [entse] ka hohle kamoo sello se leng kateng” e le hore a ka rarolla mathata. (Genese 18:20, 21, NW) E le ho imolla ba neng ba tletlebile ho eena, ka mor’a moo Jehova o ile a lokisa boemo ka ho timetsa metse eo e ’meli le baahi ba eona ba hlephileng boitšoarong.
Phutheho ea Bokreste
Na e lokela e be ho fapaneng har’a barab’abo rōna ka phuthehong ea Bokreste? Le hoja Bakreste e le banna le basali ba sa phethahalang, ba ikemiselitse ka tieo ho sebeletsa Molimo ka khotso le bonngoe. Leha ho le joalo, ba tla thulana le maemo ka har’a bona a tla ba tlama hore ka tsela e itseng ba tletlebe ’me e le a hlokang ho rarolloa. Lekholong la pele la lilemo, ho ile ha hlaha bothata phuthehong ea batlotsuoa nakoana ka mor’a Pentekonta. Bakreste ba bangata ba neng ba sa tsoa sokoloha ba ile ba sala Jerusalema bakeng sa thuto e eketsehileng le khothatso. Ho ne ho arolelanoa lijo tse teng. Leha ho le joalo, ho ile “ha tsoha ho korotla ka lehlakoreng la Bajuda ba buang Segerike khahlanong le Bajuda ba buang Seheberu, hobane bahlolohali ba bona ba ne ba hlokomolohuoa kabong ea letsatsi le leng le le leng.” Ho e-na le hore baapostola ba nyatse batletlebi bana e le ba fehlang morusu, ba ile ba nka khato ’me ba lokisa boemo. E, litletlebo tse utloahalang tse etsoang ka tlhompho le ka moea o motle li tla mameloa ka boikokobetso le ho sebetsoa ke balebeli ka phuthehong.—Liketso 6:1-6; 1 Petrose 5:3.
Ho ba Loketseng ba Boholong
Na u hlokometse mehlaleng e ka holimo hore litletlebo li lokela ho etsoa ka maikutlo a matle ’me e le ho ba loketseng ba boholong? Ka mohlala, e ne e tla ba ha lefeela ho tletleba sepoleseng ka lebaka la lekhetho le boima kapa ho tletleba ho moahloli ha motho a kula. Ka ho tšoanang, e ne e tla ba ho fosahetseng ho tletleba ka boemo bo itseng ho motho ea se nang matla kapa bokhoni ba ho thusa, ebang ke ka phuthehong kapa ka ntle ho phutheho.
Linaheng tse ngata kajeno, ho na le makhotla le balaoli ba bang ba tšoanelehang moo ho ka ipiletsoang teng ka tšepo ea hore ho tla fumanoa khatholoho e itseng. Ha seithuti se boletsoeng qalong ea sehlooho sena se isa tletlebo ea sona lekhotleng, baahloli ba ile ba se ahlolela ka toka ’me sekolo se ile sa kōpa tšoarelo ha se se amohela hape. Ka tsela e tšoanang, mosebetsi oa mosali ea neng a hleka-hlekoa ka morero oa ho tsosetsoa takatso ea likamano tsa botona le botšehali o ile a imolloa ke mokhatlo oa basebetsi oa basali. Boto ea sekolo e ile ea kōpa tšoarelo ho eena. Bahiri ba hae ba ile ba nka mehato ea ho thibela ho hleka-hlekoa ka morero oa ho tsosa takatso ea likamano tsa botona kapa botšehali.
Leha ho le joalo, ha hoa lokela hore ho lebelloe hore litletlebo tsohle li tla ba le liphello tse tšoanang. Ka sebele, Morena Solomone ea bohlale o ile a hlokomela: “Ho khopameng ho ke ke ha khopamolloa.” (Moeklesia 1:15, BPN) Re etsa hantle ha re hlokomela hore mathata a mang a se a tla emela feela hore a lokisoe ke Molimo ka nako ea hae e loketseng.
[Setšoantšo se leqepheng la 31]
Baholo baa mamela ’me ba sebetsa litletlebo tse utloahalang