KHAOLO 2

U ka Qoqa le Batho Joang?

2 Bakorinthe 2:17

NTLHA-KHOLO: Bua ka tsela e etsang hore bamameli ba hao ba bone hore na u ikutloa joang ka bona le ka taba eo u buang ka eona.

Rapela Jehova hore a u thuse ha u lokisetsa. Mo kope hore a u thuse hore u se ke oa lula u tšohile empa u tsepamise kelello molaetseng oo u buang ka oona. Khetha lintlha tse ka sehloohong tseo u batlang ho bua ka tsona. Bua ka mantsoe a hao; qoba ho pheta feela se ngotsoeng fatše.

Haeba u rerile ho bala temana ea Bibele kapa buka e itseng ea mokhatlo, itloaetse eona esale pele e le hore u tle u e bale hantle. Haeba ho na le moo ho qotsitsoeng batho ba bua, ipehe maemong a bona. Empa u hlokomele hore u se ke oa etsa eka ke papali.
Ameha ka bamameli ba hao. Nahana hore na ke hobane’ng ha bamameli ba hao ba lokela ho utloa molaetsa oo. Bua ka lintho tse ba amang. Lintho tseo u li etsang le tsela eo u bonahalang ka eona sefahlehong li lokela ho bontša batho hore u amehile ka bona ebile u na le botsoalle.

U se ke oa be u se u phutholoha ho feta tekano. Bontša hore molaetsa oa hao o na le seriti ka ho bua ka tsela e hlakileng le ka ho bitsa mantsoe hantle.
Sheba bamameli ba hao. Lula u shebile bamameli ha u ntse u bua. Ha u ruta, iphe nako ea ho sheba momameli a le mong ka nako ho e-na le ho ba habanya feela ka mahlo.