Litšupiso Tsa Bukana ea Seboka sa Bophelo le Tšebeletso ea Rona
LA 1-LA 7 APRIL
MATLOTLO A TSOANG BIBELENG | 1 BAKORINTHE 7-9
“Bosoha ke Mpho”
(1 Bakorinthe 7:32) Ka sebele, ke batla hore le se ke la ba le matšoenyeho. Monna ea sa nyalang o tšoenyeha ka lintho tsa Morena, kamoo a ka fumanang kamohelo ea Morena.
Sebelisa Nako ea Bosoha ka Tsela e Molemo
Hangata motho oa lesoha o na le nako e ngata le bolokolohi bo bongata ho feta motho ea lenyalong. (1 Bakor. 7:32-35) Ena ke melemo e ikhethang e ka mo lumellang hore a eketse nako eo a e qetang tšebeletsong ea hae, a atolose lerato leo a ratang batho ba bang ka lona a be a be le kamano e haufi haholo le Jehova. Ka lebaka leo, Bakreste ba bangata ba ananela melemo ea bosoha, kahoo ba entse qeto ea hore ba bo “etsetse sebaka,” mohlomong ka nako e itseng. Ho ka etsahala hore ebe ba bang ba ne ba sa ikemisetsa ho ba masoha, empa ha maemo a bona a fetoha ba ile ba rapella boemo ba bona ’me ba hlokomela hore ka thuso ea Jehova le bona ba ne ba ka tsitsa lipelong tsa bona. Kahoo, ba ile ba amohela maemo a bona a macha eaba ba etsetsa bosoha sebaka.—1 Bakor. 7:37,38.
(1 Bakorinthe 7:33, 34) Empa monna ea nyetseng o tšoenyeha ka lintho tsa lefatše, kamoo a ka fumanang kamohelo ea mosali oa hae, 34 ’me o arohane. Ho ekelletsa moo, mosali ea sa nyaloang, le moroetsana, o tšoenyeha ka lintho tsa Morena, e le hore e ka ba ea halalelang ’meleng oa hae le moeeng oa hae. Leha ho le joalo, mosali ea nyetsoeng o tšoenyeha ka lintho tsa lefatše, kamoo a ka fumanang kamohelo ea monna oa hae.
Lintlha-kholo Tsa Mangolo a Eang ho Bakorinthe
7:33, 34—Ho boleloa’ng ka “lintho tsa lefatše” tseo monna kapa mosali ea lenyalong a tšoenyehang ka tsona? Pauluse o bua ka lintho tse tloaelehileng tsa bophelo tseo Bakreste ba leng lenyalong ba lokelang ho ameha ka tsona. Li akarelletsa lijo, liaparo le bolulo, empa ha li akarelletse lintho tse mpe tsa lefatše lena, tseo Bakreste ba lokelang ho li phema.—1 Joh. 2:15-17.
(1 Bakorinthe 7:37, 38) Empa haeba leha e le mang a tsitsitse pelong ea hae, a sa qobelloe ke letho, empa a e-na le matla thatong ea hae ’me a entse qeto ena ka pelong ea hae, hore a boloke bosoha ba hae, o tla etsa hantle. 38 Ka lebaka leo le ea fanang ka bosoha ba hae lenyalong o etsa hantle, empa ea sa faneng ka bona lenyalong o tla etsa hamolemo haholo.
Bosoha—Monyako o Lebisang Tšebetsong e se Nang Litšitiso
Mokreste oa lesoha ea sebelisang boemo ba hae ba bosoha ho phehella lipakane tsa boithati ha a etse “hamolemonyana” ho feta Bakreste ba leng lenyalong. O lula e le lesoha, e seng “ka lebaka la ’muso,” empa ka mabaka a botho. (Matheu 19:12) Monna kapa mosali oa lesoha o lokela ho “tšoenyeha ka lintho tsa Morena,” a tšoenyehe ka ho ‘fumana kamohelo ea Morena,’ ’me a ‘sebeletse Morena kamehla ntle ho tšitiso.’ Sena se bolela ho lebisa tlhokomelo e feletseng ho sebeletseng Jehova le Kreste Jesu. Ke ka ho etsa joalo feela banna le basali ba Bakreste ba masoha ba etsang “hamolemonyana” ho feta Bakreste ba leng lenyalong.
Batlisisa Matlotlo a Patiloeng
(1 Bakorinthe 7:11) empa haeba ka sebele a ka tloha, a lule a sa nyaloa kapa ho seng joalo a boelane le monna oa hae; ’me monna ha aa lokela ho tlohela mosali oa hae.
lv 219-221
Sehlomathiso
Bakreste ba bang ba entse qeto ea ho arohana kapa ho hlalana le molekane oa lenyalo le hoja molekane eo a sa etsa bohlola. (1 Bakorinthe 7:11) Maemo ana a latelang, Bakreste ba bang ba a nkile e le lebaka la ho arohana.
• Ho se hlokomele lelapa ka boomo: Monna o hana hlokomela lelapa ka lintho tseo ba li hlokang ho isa boholeng ba hore lelapa le sala le se na chelete le lijo.—1 Timothea 5:8.
• Tlhekefetso e feteletseng: Molekane ea hlekefetsoang o hlokomela hore o tla lemala ebile bophelo ba hae bo kotsing.—Bagalata 5:19-21.
• Ho sitisa motho ka ho feteletseng ho rapela Jehova: Molekane e mong a ka ’na a leka ho thatafalletsa molekane oa hae hore a tsoele pele a sebeletsa Jehova.—Liketso 5:29.
(1 Bakorinthe 7:36) Empa haeba leha e le mang a nahana hore o itšoara ka mokhoa o sa tšoanelang mabapi le bosoha ba hae, haeba a fetile palesa ea bocha, ’me ena e le tsela eo ho lokelang hore ho etsahale ka eona, a ke a etse seo a se batlang; ha a etse sebe. Ba ke ba kene lenyalong.
U ka Lula U Hloekile Lefatšeng la Boitšoaro bo Bobe
Kahoo, bacha ha baa lokela ho potlakela lenyalo ha ba qala ho utloa takatso ea botona kapa botšehali e tsoha. Lenyalo le batla boitlamo, ’me ho phelela boikarabelo bo joalo ho hloka ho hola kelellong. (Genese 2:24) Ho molemo hore motho a eme ho fihlela “a fetile palesa ea bocha”—nako eo ka eona litakatso tsa ho kopanela liphate li leng matla ’me li ka etsisa motho liqeto tse sa nepahalang. (1 Bakorinthe 7:36) Hona ke booatla bo bokaakang le boetsalibe hore motho e moholo ea lakatsang ho kena lenyalong a amehe likamanong tsa boitšoaro bo bobe feela hobane a sa fumane motho eo a ka nyalanang le eena!
’Malo oa Bibele
(1 Bakorinthe 8:1-13) Joale malebana le lijo tse nyeheloang ho litšoantšo tse rapeloang: rea tseba hore bohle re na le tsebo. Tsebo e baka boikhohomoso, empa lerato lea haha. 2 Haeba leha e le mang a nahana hore o fumane tsebo ea ho hong, ha a e-s’o ho tsebe feela joalokaha a tšoanela ho ho tseba. 3 Empa haeba leha e le mang a rata Molimo, enoa o tsejoa ke eena. 4 Joale malebana le ho ja lijo tse nyeheloang ho litšoantšo tse rapeloang, rea tseba hore setšoantšo se rapeloang hase letho lefatšeng, le hore ha ho na Molimo haese a le mong. 5 Etsoe esita le hoja ho e-na le ba bitsoang “melimo,” ebang ke leholimong kapa lefatšeng, feela joalokaha ho e-na le “melimo” e mengata le “marena” a mangata, 6 ka sebele ho rona ho na le Molimo a le mong Ntate, eo lintho tsohle li tsoang ho eena, ’me rona re ba hae; ho na le Morena a le mong, Jesu Kreste, eo ka eena lintho tsohle li leng teng, le rona re leng teng ka eena. 7 Leha ho le joalo, tsebo ena ha e ho batho bohle; empa ba bang, kaha ho tla fihlela joale ba tloaetse setšoantšo se rapeloang, ba ja lijo e le ho hong ho hlabetsoeng setšoantšo se rapeloang, ’me matsoalo a bona, kaha a fokola, aa silafala. 8 Empa lijo li ke ke tsa re buella ho Molimo; haeba re sa je, ha re haelloe, ’me, haeba re ja, ha ho seo re se ekeletsoang. 9 Empa le lule le lebetse hore matla ana a lona, ka tsela e itseng a se ke a fetoha khopiso ho ba fokolang. 10 Etsoe haeba leha e le mang a ka u bona, uena ea nang le tsebo, u otlile ka lehlakore lijong ka tempeleng ea setšoantšo se rapeloang, na letsoalo la eo ea fokolang le ke ke la hahoa ho fihlela moo a jang lijo tse nyeheloang ho litšoantšo tse rapeloang? 11 Ka sebele, ka tsebo ea hao, motho ea fokolang o ntse a senngoa, mor’eno eo ka lebaka la hae Kreste a ileng a shoa. 12 Empa ha le siteloa barab’abo lona ka tsela ena ’me le ntša matsoalo a bona a fokolang maqeba, le siteloa Kreste. 13 Ka hona, haeba lijo li etsa hore mor’eso a khoptjoe, le ka mohla nke ke ka boela ka ja nama ho hang, e le hore ke se ke ka etsa hore mor’eso a khoptjoe.
LA 8-LA 14 APRIL
MATLOTLO A TSOANG BIBELENG | 1 BAKORINTHE 10-13
“Jehova oa Tšepahala”
(1 Bakorinthe 10:13) Ha ho moleko o le hlahetseng haese se tloaelehileng ho batho. Empa Molimo oa tšepahala, ’me a ke ke a le tlohela hore le lekoe ho feta seo le ka se jarang, empa hammoho le moleko o tla boela a le bulele tsela ea ho tsoa e le hore le khone ho o mamella.
Lipotso Tse Tsoang Ho Babali
Moapostola Pauluse o ile a ngola hore Jehova “a ke ke a le tlohela hore le lekoe ho feta seo le ka se jarang.” (1 Bakor. 10:13) Na see se bolela hore Jehova o hlahloba esale pele liteko tseo re ka khonang ho li mamella ebe o re khethela tse ka re hlahelang?
▪ Ho nahana ka tsela eo ho ka tlisa mathata afe? Mor’abo rona e mong eo mora oa hae a ileng a ipolaea o ile a botsa a re: ‘Na Jehova o bone esale pele hore ’na le mosali oa ka re tla khona ho mamella teko eo ’me kahoo a etsa hore e re hlahele?’ Na ke ’nete hore Jehova ke eena ea re khethelang liteko tseo re kopanang le tsona bophelong?
Mantsoe a Pauluse a ngotsoeng ho 1 Bakorinthe 10:13 a re thusa ho etsa qeto ea hore ha ho na moo Bibele e fanang ka lebaka la ho lumela hore Jehova o hlahloba liteko tseo re ka khonang ho li mamella ebe ka mor’a moo o re khethela tse tla re hlahela. A re hlahlobeng mabaka a mane a hore na ke hobane’ng ha re ka etsa qeto eo.
La pele, Jehova o file batho mpho ea bolokolohi ba ho ikhethela. O batla hore re ikhethele tsela eo re batlang ho phela ka eona. (De 30:19, 20; Jos 24:15) Haeba re khetha tsela e nepahetseng, Jehova o tla re thusa. (Lipr 16:9) Empa haeba re khetha tsela e fosahetseng, re ka lebella litla-morao tse bohloko. (Gal 6:7) Haeba Jehova o re khethela liteko tse re hlahelang na kannete o tla be a re file bolokolohi bo feletseng ba hore re ikhethele?
La bobeli, Jehova ha a thibele hore re se ke ra hlaheloa ke “nako le ketsahalo e sa lebelloang.” (Moe 9:11) Re ka hlaheloa ke litsietsi tse bohloko haholo hobane feela re le sebakeng se fosahetseng ka nako e fosahetseng. Jesu o ile a bua ka tsietsi e ileng ea hlahela batho ba 18 ba ileng ba oeloa ke tora ’me ba shoa. O ile a hlalosa hore e ne e se thato ea Molimo hore ba hlaheloe ke tsietsi eo. (Luka 13:1-5) Ke ho sa utloahaleng ho lumela hore Molimo o hlahloba esale pele hore na ke mang ea tla phela kapa ke mang ea tla shoa litsietsing tse re hlahelang.
La boraro, e mong le e mong oa rona oa ameha qosong e mabapi le ho tšepahala. Hopola hore Satane o ile a leka botšepehi ba bahlanka bohle ba Jehova ’me a re ba ke ke ba lula ba mo tšepahalla ha ba hlaheloa ke liteko. (Job 1:9-11; 2:4; Tše 12:10) Haeba Jehova a ne a ka thibela hore re hlaheloe ke liteko hobane a hlokometse hore re ke ke ra khona ho li mamella, na ketso eo e ne e sa tl’o tšehetsa qoso ea Satane ea hore re sebeletsa Molimo hobane re shebile menyetla?
La bone, ha ho letho le tlamang Jehova hore a tsebe ntho e ’ngoe le e ’ngoe e re etsahallang. Taba ea hore Molimo o re khethela liteko esale pele e bolela hore o tlameha ho tseba ntho e ’ngoe le e ’ngoe e tla re etsahalla bophelong. Empa Bibele ha e rute taba eo. Ke ’nete hore Molimo a ka khona ho tseba lintho tse tla re etsahalla. (Esa 46:10) Bibele e bontša hore Molimo ha a khethe ho tseba lintho tse tla re etsahalla kaofela ha tsona. (Gen 18:20, 21; 22:12) Ha a sebelise matla a hae a ho tseba lintho esale pele ka tsela e tla etsa hore a se ke a hlompha bolokolohi ba rona ba ho ikhethela. Na seo ha se sona seo re ka se lebellang ho Molimo eo ka linako tsohle a nkang bolokolohi ba rona ba ho ikhethela e le ba bohlokoa ebile a sebelisa makhabane a hae ka tekatekano?—De 32:4; 2 Ko 3:17
Joale re lokela ho utloisisa mantsoe a Pauluse joang ha a re: “Molimo . . . a ke ke a le tlohela hore le lekoe ho feta seo le ka se jarang”? Mona Pauluse o hlalosa seo Jehova a se etsang nakong eo re leng tekong, eseng pele e re hlahela. Mantsoe a moapostola Pauluse a re kholisa hore ho sa tsotellehe liteko tseo re ka tobanang le tsona bophelong, Jehova o tla re thusa hafeela re mo tšepile. (Pes 55:22) Mantsoe a Pauluse a tšelisang a thehiloe lithutong tse peli tsa motheo.
Ea pele, liteko tse re hlahelang ke tse “tloaelehileng ho batho”. Liteko tsa rona ke tseo batho ba tloaetseng ho kopana le tsona. Liteko tse joalo ha se tseo re ka hlolehang ho li mamella haeba feela re itšetlehile ka Molimo. (1 Pe 5:8, 9) Lengolong la 1 Bakorinthe 10:13 Pauluse o ne a bua ka teko eo Baiseraele ba ileng ba kopana le eona lefeelleng. (1 Ko 10:6-11) Ha ho na teko leha e le efe eo Baiseraele ba tšepahalang ba neng ba ka hloleha ho e mamella hobane e ne e le liteko tse tloaelehileng. Ka makhetlo a mane Pauluse o ile a re “ba bang ba bona” ba ne ba sa mamele. Ka masoabi Baiseraele ba bang ba ile ba etsa lintho tse fosahetseng ka lebaka la hore ba ne ba sa itšetleha ka Molimo.
Ea bobeli, “Molimo oa tšepahala.” Tlaleho ea Bibele ea tsela eo Molimo a ileng a sebelisana le batho ba hae ka eona e bontša hore o fana ka mosa o lerato ho “ba mo ratang le ba bolokang litaelo tsa hae.” (De 7:9) Tlaleho eo e bontša hore Molimo oa tšepahala. (Jos 23:14) Ha re sheba kamoo a ileng a sebelisana le batho ba tšepahalang kateng nakong e fetileng rea hlokomela hore batho ba mo ratang le ba mo mamelang ba ka ba le tšepo ea hore Molimo o tla phetha litšepiso tsena tse peli haeba ba hlaheloa ke liteko. Ea pele: A ke ke a lumella teko leha e le efe hore e fihle boemong boo re ke keng ra khona ho e mamella. Ea bobeli: ‘O tla boela a re bulele tsela ea ho tsoa.
Jehova o thusa batho ba mo tšepang joang ha ba hlaheloa ke liteko? Ha e le hantle, haeba e ne e le thato ea hae, o ne a ka etsa hore teko eo e se ke ea re hlahela. Empa hopola mantsoe a Pauluse a reng: ‘[Jehova] o tla boela a le bulele tsela ea ho tsoa e le hore le khone ho e mamella.’ Kahoo maemong a mangata o re ‘bulela tsela ea ho tsoa’ ka ho re fa thuso ka nako e nepahetseng e le hore re khone ho mamella liteko ka katleho. Nahana ka litsela tse latelang tseo ka tsona Jehova a ka re thusang ho hlola liteko:
▪ O re ‘tšelisa matšoenyehong ’ohle a rona.’ (2 Ko 1:3, 4) Jehova a ka sebelisa Bibele, moea o halalelang le lingoloa tseo lekhoba le tšepahalang le re fang tsona ho re tšelisa le ho re khatholla kelellong.—Mat 24:45; Joh 14:16; Bar 15:4.
▪ A ka re tataisa ka moea o halalelang. (Joh 14:26) Nakong eo liteko li re hlahelang, moea o halalelang o ka re thusa ho hopola melao-motheo le seo re ithutileng sona ka Bibeleng e le hore re ka khona ho etsa liqeto ka bohlale.
▪ A ka sebelisa mangeloi ho re thusa.—Heb 1:14.
▪ A ka sebelisa barapeli-’moho le rona hore ba re matlafatse ka lipuo le liketso tsa bona.—Kol 4:11.
Joale, re ka etsa qeto efe ka se boleloang ke mantsoe a Pauluse a ngotsoeng lengolong la 1 Bakorinthe 10:13? Ha se Jehova ea khethang liteko tse re hlahelang. Leha ho le joalo, ha liteko li re hlahela bophelong, re ka kholiseha hore haeba re tšepile Jehova ka ho feletseng, a ke ke a lumella hore re lekoe ho feta kamoo re ka khonang ho mamella. O tla tsoela pele a re bulela tsela ea ho tsoa e le hore re khone ho li mamella. Na aa ha se mantsoe a tšelisang?
(1 Bakorinthe 10:13) Ha ho moleko o le hlahetseng haese se tloaelehileng ho batho. Empa Molimo oa tšepahala, ’me a ke ke a le tlohela hore le lekoe ho feta seo le ka se jarang, empa hammoho le moleko o tla boela a le bulele tsela ea ho tsoa e le hore le khone ho o mamella.
(1 Bakorinthe 10:13) Ha ho moleko o le hlahetseng haese se tloaelehileng ho batho. Empa Molimo oa tšepahala, ’me a ke ke a le tlohela hore le lekoe ho feta seo le ka se jarang, empa hammoho le moleko o tla boela a le bulele tsela ea ho tsoa e le hore le khone ho o mamella.
Batlisisa Matlotlo a Patiloeng
(1 Bakorinthe 10:8) Hape re se ke ra tloaela ho etsa bohlola, joalokaha ba bang ba bona ba ile ba etsa bohlola, hore feela ba oe, ba likete tse mashome a mabeli a metso e meraro ba bona ka letsatsi le le leng.
Lipotso Tse Tsoang ho Babali
Ke hobane’ng ha 1 Bakorinthe 10:8 e re Baiseraele ba 23 000 ba ile ba oa ka letsatsi le le leng ka lebaka la ho etsa bohlola, empa Numere 25:9 e re palo ea bona ke 24 000?
Ho na le mabaka a ’maloa a amehang a ka ’nang a etsa hore lipalo tse fanoeng litemaneng tseo tse peli li fapane. Le bonolo e ka ’na eaba la hore palo e tobileng e kae-kae pakeng tsa 23 000 le 24 000, e leng ho etsang hore palo eo e akaretsoe ka palo e holimo kapa e tlaase.
Nahana ka lebaka le leng leo e ka ’nang eaba ke lona. Moapostola Pauluse o ne a qotsa tlaleho ea Baiseraele ha ba le Shitime e le mohlala oa temoso ho Bakreste ba Korinthe ea boholo-holo, e leng motse o neng o tumme hampe ka ho phela bophelo ba boitšoaro bo hlephileng. O ile a ngola: “Hape re se ke ra tloaela ho etsa bohlola, joalokaha ba bang ba bona ba ile ba etsa bohlola, hore feela ba oe, ba likete tse mashome a mabeli a metso e meraro ba bona ka letsatsi le le leng.” Pauluse o ile a qolla ba bolailoeng ke Jehova ka lebaka la ho etsa bohlola, a re palo ea bona ke 23 000.—1 Bakorinthe 10:8.
Leha ho le joalo, Numere khaolo ea 25 e re bolella hore “Iseraele [e ile] ea ikamahanya le Baale oa Peore; ’me bohale ba Jehova ba qala ho tukela Iseraele.” Kahoo, Jehova o ile a laela Moshe hore a bolaee “bohle ba ka sehloohong sechabeng.” Moshe a ntan’o laela baahloli hore ba phethahatse taelo eo. Qetellong, ha Finease a nka khato ka potlako a bolaea Moiseraele ea neng a tlisitse mosali oa Momidiane kampong, “lefu la seoa la emisoa.” Tlaleho eo e qetella ka mantsoe a reng: “Ba bolailoeng ke lefu la seoa ea e-ba likete tse mashome a mabeli a metso e mene.”—Numere 25:1-9.
Ho hlakile hore palo e fanoeng ho Numere e akarelletsa “ba ka sehloohong sechabeng” ba bolailoeng ke baahloli le ba bolailoeng ke Jehova ka ho toba. E ka ’na eaba ho bile le ba sekete ba ka sehloohong ba bolailoeng ke baahloli, e leng ho etsang hore palo eo e be 24 000. Ebang bana ba ka sehloohong, kapa baeta-pele, ba ne ba entse bohlola kapa che, ba kopanetse meketeng, kapa ba fane ka tumello ho ba etsang liketso tseo, ba ne ba le molato oa ho “ikamahanya le Baale oa Peore.”
Mabapi le lentsoe “ikamahanya,” buka e ’ngoe ea litšupiso tsa Bibele e hlalosa hore le ka bolela “ho itlama ka motho e mong.” Baiseraele e ne e le sechaba se inehetseng ho Jehova, empa ha ba “ikamahanya le Baale oa Peore,” ba ile ba senya kamano ea bona ea ho inehela ho Molimo. Lilemo tse ka bang 700 hamorao, a sebelisa moprofeta Hosea, Jehova o ile a re ka Baiseraele: “Ba ile ho Baale oa Peore, ’me ba qalile ho inehela nthong e hlabisang lihlong, ’me ba ile ba nyonyeha joaloka ntho eo ba e ratang.” (Hosea 9:10) Bohle ba ileng ba etsa seo ba ne ba lokeloa ke kotlo ea bomolimo. Kahoo, Moshe o ile a hopotsa bara ba Iseraele a re: “Mahlo a lona a bone seo Jehova a se entseng tabeng ea Baale oa Peore, hore motho e mong le e mong ea neng a latela Baale oa Peore ke eena eo Jehova Molimo oa lona a ileng a mo felisa har’a lona.”—Deuteronoma 4:3.
(1 Bakorinthe 11:5, 6) empa mosali e mong le e mong ea rapelang kapa ea profetang hlooho ea hae e sa koaheloa o tlotlolla hlooho ea hae, kaha ho tšoana le ha e le mosali ea hlooho e beotsoeng. 6 Etsoe haeba mosali a sa ikoahele, ka ho tšoanang a ke a kute; empa haeba ke tlotlollo bakeng sa mosali hore a kute kapa a beole, a ke a ikoahele.
(1 Bakorinthe 11:10) Ke ka lebaka leo mosali a tšoanelang ho ba le pontšo ea ho laeloa hloohong ea hae ka lebaka la mangeloi.
w15 2/15 30 Molula-Qhooa oa Sekhooa
Lipotso Tse Tsoang ho Babali
Na morali’abo rona o lokela ho roala ha a khanna thuto ea Bibele a e-na le mor’abo rona?
▪ Ho Lipotso Tse Tsoang ho Babali Molula-Qhooeng oa July 15, 2002, ho ile ha bontšoa hore morali’abo rona o lokela ho roala hloohong ha a khanna thuto ea Bibele ha mohoeletsi e motona a le teng, ho sa tsotellehe hore na o kolobelitsoe kapa che. Ha taba ena e hlahlobisisoa haholoanyane, ho ile ha hlokomeleha hore tataiso ena e tlameha ho lokisoa.
Haeba mohoeletsi e motona ea kolobelitsoeng a ba teng ha morali’abo rona a khanna thuto ea Bibele, morali’abo rona o lokela ho roala. Ka tsela ena, o tla be a bontša hore o hlompha tokisetso ea Jehova ea bohlooho ka lapeng le ka phuthehong, hobane boikarabello bona bo filoe monna oa hae kapa mor’abo rona ea kolobelitsoeng. (1 Ko. 11:5, 6, 10) Ho seng joalo, a ka kopa mor’abo hore ebe eena ea khannang thuto haeba a tšoaneleha ebile a khona ho etsa joalo.
Ka lehlakoreng le leng, haeba morali’abo rona a khanna thuto ea Bibele a e-na le motho e motona ea sa kolobetsoang ebile e se monna oa hae, ho ea ka Mangolo ha a tlameha ho roala hloohong. Leha ho le joalo, baralib’abo rona ba bang ba ka susumetsoa ke matsoalo a bona hore ba roale.
’Malo oa Bibele
(1 Bakorinthe 10:1-17) Joale, ha ke batle hore le hloke tsebo, barab’eso, hore baholo-holo ba rona kaofela ba ile ba ba ka tlas’a leru ’me kaofela ba feta har’a leoatle 2 ’me kaofela ba ile ba kolobetsoa ho kena ho Moshe ka leru le ka leoatle; 3 kaofela ba ile ba ja lijo tse tšoanang tsa moea 4 ’me kaofela ba ile ba noa seno se tšoanang sa moea. Etsoe ba ne ba noa lefikeng la moea le neng le ba latela, ’me lefika leo le ne le bolela Kreste. 5 Leha ho le joalo, boholo ba bona Molimo ha aa ka a ba bontša kamohelo ea hae, kaha ba ile ba rapalatsoa lefeelleng. 6 Joale lintho tsena e bile mehlala ea rona, hore re se ke ra ba batho ba lakatsang lintho tse mpe, esita le joalokaha ba ile ba li lakatsa. 7 Hape le se ke la ba barapeli ba litšoantšo, joalokaha ba bang ba bona e ile ea e-ba barapeli ba litšoantšo; feela joalokaha ho ngoliloe: “Sechaba sa lula fatše ho ja le ho noa, ’me sa ema hore se ithabise.” 8 Hape re se ke ra tloaela ho etsa bohlola, joalokaha ba bang ba bona ba ile ba etsa bohlola, hore feela ba oe, ba likete tse mashome a mabeli a metso e meraro ba bona ka letsatsi le le leng. 9 Hape re se ke ra leka Jehova, joalokaha ba bang ba bona ba ile ba mo leka, hore feela ba timetsoe ke linoha. 10 Hape le se ke la ba bakorotli, feela joalokaha ba bang ba bona ba ile ba korotla, hore feela ba timetsoe ke motimetsi. 11 Joale lintho tsena li ile tsa tsoela pele ho ba hlahela e le mehlala, ’me li ile tsa ngoloa hore e be temoso ho rona bao bofelo ba litsamaiso tsa lintho bo ba fihletseng. 12 Ka lebaka leo ea nahanang hore o eme a ke a hlokomele hore a se ke a oa. 13 Ha ho moleko o le hlahetseng haese se tloaelehileng ho batho. Empa Molimo oa tšepahala, ’me a ke ke a le tlohela hore le lekoe ho feta seo le ka se jarang, empa hammoho le moleko o tla boela a le bulele tsela ea ho tsoa e le hore le khone ho o mamella. 14 Ka hona, baratuoa ba ka, le balehele borapeli ba litšoantšo. 15 Ke bua joalokaha ho buuoa le batho ba nang le temoho; ikahloleleng seo ke se buang. 16 Senoelo sa tlhohonolofatso seo re se hlohonolofatsang, na hase ho ba le karolo maling a Kreste? Bohobe boo re bo qhetsolang, na hase ho ba le karolo ’meleng oa Kreste? 17 Kahobane ho na le bohobe bo le bong, rona, le hoja re le bangata, re ’mele o le mong, kaha kaofela re ja bohobe boo bo le bong.
LA 22-LA 28 APRIL
MATLOTLO A TSOANG BIBELENG | 1 BAKORINTHE 14-16
“Molimo e Tla ba ‘Lintho Tsohle ho e Mong le e Mong’”
(1 Bakorinthe 15:24, 25) Ka mor’a moo, e be bofelo, ha a nehelana ka ’muso ho Molimo le Ntat’ae, ha a entse puso eohle le bolaoli bohle le matla lefeela. 25 Kaha o tla busa e le morena ho fihlela Molimo a behile lira tsohle tlas’a maoto a hae.
“Lefu le Tla Etsoa Lefeela”
“Bofelo” ke qetello ea Puso ea Lilemo tse Sekete ea Kreste, ha ka boikokobetso le ka botšepehi Jesu a nehelana ka ’Muso ho Molimo le Ntate oa hae. (Tšenolo 20:4) Morero oa Molimo oa “ho bokella lintho tsohle hammoho hape ho Kreste” o tla be o phethahetse. (Baefese 1:9, 10) Leha ho le joalo, pele Kreste o tla be a timelitse “puso eohle le tokelo eohle ea ho laela le matla” tse khahlanong le Bobusi ba Molimo. Sena se akarelletsa ho fetang timetso e feletseng ka Armagedone. (Tšenolo 16:16; 19:11-21) Pauluse o re: “[Kreste] o lokela ho busa e le morena ho fihlela Molimo a behile lira tsohle tlas’a maoto a hae. E le sera sa ho qetela, lefu le tla etsoa lefeela.” (1 Bakorinthe 15:25, 26) E, mesaletsa eohle ea sebe sa Adama le lefu e tla be e tlositsoe. Joale, ha ho pelaelo hore Molimo o tla be a khokhothile ‘mabitla a khopotso’ ka ho khutlisetsa bafu bophelong.—Johanne 5:28.
(1 Bakorinthe 15:26) E le sera sa ho qetela, lefu le tla etsoa lefeela.
’Muso o Etsa Thato ea Molimo Lefatšeng
Empa ho tla etsahala’ng ka phello e ke keng ea qojoa ea ho kula e leng lefu? Ke “sera sa [rona sa] ho qetela” ’me ha re na matla a ho se hlola. (1 Ko 15:26) Empa na Jehova o tšosoa ke lefu? Hlokomela seo Esaia a ileng a se bolela esale pele: “O tla metsa lefu ka ho sa feleng, ’me ka sebele ’Musi Morena Jehova o tla hlakola meokho lifahlehong tsohle.” (Esa. 25:8) Ak’u nahane u phela nakong eo! Ho se ho se na mapato, mabitla le meokho! Ho e-na le hoo—ho tla ba le meokho ea thabo ha Jehova a phethahatsa tšepiso ea ho tsosa bafu! (Bala Esaia 26:19.) Qetellong maqeba ’ohle a bakiloeng ke lefu a tla fola.
(1 Bakorinthe 15:27, 28) Etsoe Molimo “o ile a beha lintho tsohle ka tlas’a maoto a hae.” Empa ha a re ‘lintho tsohle li behiloe tlaase,’ ho totobetse hore ke kantle ho ea ileng a beha lintho tsohle tlas’a hae. 28 Empa ha lintho tsohle li tla be li behiloe tlas’a hae, joale Mora le eena o tla ipeha tlas’a Ea ileng a beha lintho tsohle tlas’a hae, e le hore Molimo e ka ba lintho tsohle ho e mong le e mong.
Ho Tla ba le Khotso Nakong ea Lilemo Tse Sekete—Le ka Mor’a Tsona!
Ha ho na mantsoe a ka hlalosang hore na bophelo bo tla ba joang qetellong ea lilemo tse sekete ho feta mantsoe a na a reng, “e le hore Molimo e ka ba lintho tsohle ho e mong le e mong.” Seo se bolela’ng? Nahana ka nako eo Adama le Eva e neng e le karolo ea lelapa la Jehova le phelang ka khotso serapeng sa Edene. Jehova, e leng ’Musi oa Bokahohle, o ne a busa libopuoa tsohle tsa hae tsa mangeloi le batho ka ho toba. Li ne li khona ho bua le eena ka ho toba li bile li mo rapela ’me eena o ne a li hlohonolofatsa. E ne e le “lintho tsohle ho e mong le e mong.”
Batlisisa Matlotlo a Patiloeng
(1 Bakorinthe 14:34, 35) basali ba ke ba khutse ka liphuthehong, kaha ha hoa lumelloa hore ba bue, empa ba ke ba ipehe tlaase, esita le joalokaha Molao o bolela. 35 Joale, haeba ba batla ho ithuta ho hong, ba ke ba botse banna ba bona lapeng, kaha ke tlotlollo hore mosali a bue ka phuthehong.
w12 9/1 9, lebokose
Na Moapostola Pauluse o ile a Hanela Basali ho Bua?
Moapostola Pauluse o ile a ngola a re: “Basali ba ke ba khutse ka liphuthehong.” (1 Bakorinthe 14:34) O ne a bolela’ng? Na o ne a nka basali ba sa tsebe letho? Che. Ho e-na le hoo, o ne a atisa ho bua ka lintho tse molemo tseo basali ba neng ba li ruta. (2 Timothea 1:5; Tite 2:3-5) Lengolong la hae le eang ho Bakorinthe, Pauluse o ne a sa eletse basali feela empa o ne a eletsa le batho ba bang ba neng ba e-na le mpho ea maleme le ea ho profeta hore ba “khutse” ha molumeli e mong a bua. (1 Bakorinthe 14:26-30, 33) Ho bonahala eka basali ba bang ba Bakreste ba ne ba chesehela tumelo ea bona e ncha hoo ba neng ba kena sebui hanong ka ho se botsa lipotso, joalokaha ho ne ho tloaelehile libakeng tseo. E le hore ho se ke ha e-ba le ho hloka taolo ho joalo, Pauluse o ile a ba khothalletsa hore “ba botse banna ba bona lapeng.”—1 Bakorinthe 14:35.
(1 Bakorinthe 15:53) Etsoe sena se ka bolang se tla apara ho se bole, ’me sena se shoang se tla apara ho se shoe.
it-1-E 1197-1198
Ho se Bole
Babusi ’moho le Jesu ba tsosetsoa ho ea phela leholimong ba e-na le ho se shoe le ho se bole. Le hoja ba phetse le ho sebeletsa Molimo ka ’mele e sa phethahalang ea batho, Pauluse ho 1 Bakorinthe 15:42-54 o bontša hore lekhetlong lena ba fuoa ’mele ea moea e sa boleng. Kahoo, ho se shoe ho bolela mofuta oa bophelo oo ba tla ba le oona, eleng ho phela ka ho sa feleng, ho se letho le ka khutsufatsang bophelo ba bona. Ho se bole ho bolela hore Molimo o tla ba fa ’mele e ke keng ea senyeha kapa ea tsofala le hona ho shoa. Sena se bolela hore Molimo o tla ba fa matla a hore ba tsoele pele ba phela empa ba sa itšetleha ka hore ba fumane matla a bophelo ho mang kapa mang kapa ho eng kapa eng. Ba tla fapana le libopuoa tse ling tsa hae tse kang tsa nama le mangeloi, kaha tsona li itšetlehile ka eena e le hore li tsoele pele li phela. Bona ke bopaki bo hlollang bo bontšang kamoo Molimo a ba tšepang kateng. Le hoja ba tla be ba e-na le mofuta ona o ikhethang oa bophelo, ba tla be ba ntse ba tlameha ho ikokobelletsa Molimo le ho mamela litaelo tsa hae, joalokaha Kreste Jesu Hlooho ea bona a etsa.—1Ko 15:23-28; sheba ho se shoe; moea soul.
’Malo oa Bibele
(1 Bakorinthe 14:20-40) Barab’eso, le se ke la ba bana matleng a kutloisiso, empa le be bana mabapi le bobe; leha ho le joalo le be ba hlileng ka ho feletseng matleng a kutloisiso. 21 Molaong ho ngoliloe: “‘Ke tla bua le batho bana ka maleme a melata le ka melomo ea basele, ’me leha ho le joalo leha e le ka nako eo ba ke ke ba nkela hloko,’ ho bolela Jehova.” 22 Ka lebaka leo maleme a teng bakeng sa pontšo, eseng ho balumeli, empa ho ba sa lumelang, athe ho profeta ho teng, eseng bakeng sa ba sa lumelang, empa bakeng sa balumeli. 23 Ka hona, haeba phutheho eohle e phuthehela sebakeng se le seng ’me bohle ba bua maleme, empa batho ba tloaelehileng kapa ba sa lumelang ba kena, na ba ke ke ba re lea hlanya? 24 Empa haeba kaofela le profeta ’me leha e le ofe ea sa lumelang kapa motho ea tloaelehileng a kena, o khalemeloa ke bona kaofela, o hlahlojoa ka hloko ke bona kaofela; 25 liphiri tsa pelo ea hae lia bonahala, hoo a tla oa ka sefahleho ’me a rapele Molimo, a bolela: “Ka sebele Molimo o har’a lona.” 26 Joale ho lokela ho etsoa joang, barab’eso? Ha le phutheha, e mong o na le pesaleme, e mong o na le thuto, e mong o na le tšenolo, e mong o na le leleme lesele, e mong o na le phetolelo le tlhaloso. Lintho tsohle li ke li etsahale bakeng sa ho haha. 27 Haeba e mong a bua leleme, ho ke ho lekanyetsoe ho ba babeli kapa ba bararo, eseng ho feta, ’me ba sielane sebaka; e mong a ke a fetolele. 28 Empa haeba ho se na mofetoleli, a ke a khutse ka phuthehong ’me a bue a le mong hape le Molimo. 29 Ho ekelletsa moo, baprofeta ba babeli kapa ba bararo ba ke ba bue, ’me ba bang ba ke ba lemohe se boleloang. 30 Empa haeba ho e-na le tšenolo ho e mong ha a ntse a lutse moo, oa pele a ke a khutse. 31 Kaha bohle le ka profeta ka bomong, e le hore bohle ba ka ithuta ’me bohle ba khothatsoa. 32 Limpho tsa moea tsa baprofeta li lokela ho laoloa ke baprofeta. 33 Etsoe Molimo hase Molimo oa ho hloka taolo, empa ke oa khotso. Joaloka liphuthehong tsohle tsa bahalaleli, 34 basali ba ke ba khutse ka liphuthehong, kaha ha hoa lumelloa hore ba bue, empa ba ke ba ipehe tlaase, esita le joalokaha Molao o bolela. 35 Joale, haeba ba batla ho ithuta ho hong, ba ke ba botse banna ba bona lapeng, kaha ke tlotlollo hore mosali a bue ka phuthehong. 36 Eng? Na ke ho lona moo lentsoe la Molimo le ileng la tsoa, kapa na ke feela ho fihlela ho lona moo le ileng la fihla? 37 Haeba leha e le mang a nahana hore ke moprofeta kapa hore o na le mpho ea moea, a ke a bolele hore o ela hloko lintho tseo ke le ngollang tsona, hobane ke taelo ea Morena. 38 Empa haeba leha e le mang a hloka tsebo, o tsoela pele a hloka tsebo. 39 Ka lebaka leo, barab’eso, le ’ne le batle ka cheseho ho profeta, ’me leha ho le joalo le se ke la hanela ho bua maleme. 40 Empa lintho tsohle li ke li etsahale ka mokhoa o hlomphehang le ka tlhophiso.
LA 29 APRIL-LA 5 MAY
MATLOTLO A TSOANG BIBELENG | 2 BAKORINTHE 1-3
“Jehova ‘Molimo oa Matšeliso ’Ohle’”
(2 Bakorinthe 1:3) Ho bokoe Molimo le Ntate oa Morena oa rona Jesu Kreste, Ntate oa mehauhelo e bonolo le Molimo oa matšeliso ’ohle,
“Llang le Batho ba Llang”
Jehova Ntate oa rona ea re ratang le eena o ile a hlokahalloa ke batho bao a ba ratang, ba akhang Abrahama, Isaka, Jakobo, Moshe le Morena Davida. (Num. 12:6-8; Mat. 22:31, 32; Lik. 13:22) Lentsoe la hae le re o labalabela ho ba tsosa kaofela. (Jobo 14:14, 15) Ba tla lula ba thabile ba bile ba phetse hantle. Hopola hore Mora oa Jehova “eo a neng a mo rata ka ho khethehileng” o ile a shoa lefu le bohloko. (Lipr. 8:22, 30) Bohloko boo Jehova a ileng a bo utloa ha bo hlalosehe.—Joh. 5:20; 10:17.
(2 Bakorinthe 1:4) ea re tšelisang matšoenyehong ’ohle a rona, e le hore re ka khona ho tšelisa ba matšoenyehong a mofuta leha e le ofe ka matšeliso ao re ntseng re tšelisoa ka ’ona ke Molimo.
“Llang le Batho ba Llang”
Kahoo, re ka thatafalloa ho tseba hore na re re’ng ho motho ea hlokahalletsoeng. Leha ho le joalo, Bibele e re “maleme a ba bohlale ke pholiso.” (Lipr. 12:18) Batho ba bangata ba buisana le batho ba hlokahalletsoeng ka bukana ea Ha Eo U Mo Ratang A E-shoa. Empa hangata ntho e ka tšelisang le ho feta ke ho ‘lla le batho ba llang.’ (Bar. 12:15) ’Mè Gaby ea hlokahalletsoeng ke molekane o re: “Hangata ha ke utloile bohloko kea lla. Kahoo kea tšeliseha ha batho ba lla le ’na. Kea hlokomela hore ha ke motoai-toai.”
Batlisisa Matlotlo a Patiloeng
(2 Bakorinthe 1:22) O boetse o behile tiiso ea hae holim’a rona ’me o re file pontšo ea se tlang ho tla, ke hore, moea, ka lipelong tsa rona.
w16.04 32 Molula-Qhooa oa Sekhooa
Lipotso Tse Tsoang ho Babali
“Pontšo” le “tiiso” tseo Mokreste e mong le e mong ea tlotsitsoeng a li amohelang ho Molimo ke eng?—2 Ko 1:21, 22
▪ Pontšo: Ho ea ka buka e ’ngoe e hlalosang mantsoe, lentsoe la Segerike le fetoletsoeng e le “pontšo” ho 2 Bakorinthe 1:22, le ne le sebelisoa litabeng tsa molao le khoebo. Le sebelisoa ho bontša hore ho se ho lefiloe karolo e itseng ea se tlamehang ho lefshoa, kapa ho beha ntho paneng. Tabeng ea batlotsuoa, ba tla fuoa ’mele ea moea e ke keng ea bola leholimong e le moputso joalokaha o hlalositsoe ho 2 Bakorinthe 5:1-5. Moputso oa bona o akarelletsa mpho ea ho se shoe.—1 Ko 15:48-54.
Ho ea ka Bagerike mehleng ena, ho sebelisoa lentsoe le tšoanang ha ho buuoa ka reng e bontšang hore batho ba tšepisane ho nyalana. Ena ke papiso e loketseng ho bao e tla ba karolo ea mosali oa Kreste oa tšoantšetso.—2 Ko 11:2; Tše 21:2, 9.
▪ Tiiso: Mehleng ea khale, tiiso e ne e le bopaki bo bontšang hore ntho kapa thepa ke ea motho ea itseng ka molao, taba e itseng ke ’nete kapa ho entsoe tumellano. Tabeng ea batlotsuoa, ba ‘tiisitsoe’ kapa ba tšoailoe ka tsela ea tšoantšetso ka moea o halalelang, hore ke letlotlo la Molimo. (Ef 1:13, 14) Tiiso ena e tla ba ea moshoelella nakoana pele motlotsuoa a ka shoa a ntse a tšepahala kapa neng neng pele matšoenyeho a maholo a qala.—Ef 4:30; Tše 7:2-4.
(2 Bakorinthe 2:14-16) Empa ho ke ho lebohuoe Molimo eo kamehla a re etellang pele mokolokong oa tlholo hammoho le Kreste le ea etsang hore monko oa tsebo ea hae o utloahale ka rona sebakeng se seng le se seng! 15 Etsoe ho Molimo re monko o monate oa Kreste har’a ba ntseng ba pholosoa le har’a ba timelang; 16 ho ba timelang re monko o tsoang lefung o e-ea lefung, ho ba ntseng ba pholosoa re monko o tsoang bophelong o e-ea bophelong. Ke mang ea tšoanelehang ka ho lekaneng bakeng sa lintho tsee?
Re U Lome Tsebe?
Moapostola Pauluse o ne a nahanne ka eng ha a ne a bua ka ‘mokoloko oa tlholo’?
▪ Pauluse o ile a ngola a re: ‘Molimo . . . o re etella pele mokolokong oa tlholo hammoho le Kreste ’me o etsa hore monko oa tsebo ea hae o utloahale ka rona sebakeng se seng le se seng! Etsoe ho Molimo re monko o monate oa Kreste har’a ba ntseng ba pholosoa le har’a ba timelang; ho ba timelang re monko o tsoang lefung o e-ea lefung, ho ba ntseng ba pholosoa re monko o tsoang bophelong o e-ea bophelong.’—2 Bakorinthe 2:14-16.
Moapostola o ne a bua ka mokete oa mokoloko oo Baroma ba neng ba tloaetse ho o etsa e le ho tlotla molaoli oa mabotho ha a ile a hlola lira tsa ’Muso. Liketsahalong tse joalo, lintho tse hapiloeng ntoeng hammoho le batšoaruoa ba ne ba behoa pontšeng ebe ho nehelanoa ka lipoho tse tla etsoa sehlabelo ha molaoli ea hlotseng le lebotho la hae ba ntse ba thoholetsoa phatlalatsa. Qetellong ea mokoloko oo, ho ne ho etsoa mahlabelo ka lipoho ’me mohlomong ho ne ho bolaoa batšoaruoa ba bangata.
Buka ea The International Standard Bible Encyclopedia, e re polelo ea tšoantšetso ea “monko o monate oa Kreste” oo ho ba bang o bolelang bophelo ’me ho ba bang o bolelang lefu, “e ka ’na eaba e bile teng ka lebaka la tloaelo ea Baroma ea ho chesa libano ha ba ntse ba le mokolokong oa tlholo. Monko o monate o neng o bolela tlholo ho bahloli o ne o hopotsa batlamuoa ba ntoa hore e ka ’na eaba ba tl’o bolaoa.”
’Malo oa Bibele
(2 Bakorinthe 3:1-18) Na re boetse re qala ho ipuella? Kapa na, mohlomong, joaloka batho ba bang, re hloka mangolo a puello a eang ho lona kapa a tsoang ho lona? 2 Ke lona lengolo la rona, le ngotsoeng lipelong tsa rona le le tsejoang le le ntseng le baloa ke moloko oa batho kaofela. 3 Etsoe le bonahatsoa le le lengolo la Kreste le ngotsoeng ke rona re le basebeletsi, le sa ngoloang ka enke empa le ngotsoeng ka moea oa Molimo ea phelang, eseng matlapeng a lejoe, empa matlapeng a nama, lipelong. 4 Joale ka Kreste re na le kholiseho ea mofuta ona ho Molimo. 5 Eseng hore re tšoaneleha ka ho lekaneng ho lekanya hore ntho leha e le efe e tsoa ho rona, empa ho tšoaneleha ha rona ka ho lekaneng ho tsoa ho Molimo, 6 eo ka sebele a re entseng hore re tšoanelehe ka ho lekaneng ho ba basebeletsi ba selekane se secha, eseng ba molao o ngotsoeng, empa ba moea; etsoe molao o ngotsoeng o ahlolela lefu, empa moea oa phelisa. 7 Ho feta moo, haeba molao o fanang ka lefu le o neng o ngotsoe ka ho fata litlhaku majoeng o ile oa ba teng ka khanya, hoo bara ba Iseraele ba neng ba ke ke ba talimisisa ka hloko sefahleho sa Moshe ka lebaka la khanya ea sefahleho sa hae, khanya e neng e tla felisoa, 8 ke hobane’ng ha ho fanoa ha moea ho ke ke ha e-ba ka khanya haholo ka ho eketsehileng? 9 Etsoe haeba molao o fanang ka kahlolo o ne o khanya, ho fanoa ha ho loka ho atetsoe ke khanya haholo ka ho eketsehileng. 10 Ha e le hantle, esita le hoo ho kileng ha etsoa ho khanyang ho hlobolisitsoe khanya tabeng ena, ka lebaka la khanya e ho fetang. 11 Etsoe haeba ho neng ho tla felisoa ho ile ha tlisoa ka khanya, ho salang ho ne ho tla ba ka khanya haholo ka ho eketsehileng. 12 Ka hona, kaha re na le tšepo e joalo, re bua ka bolokolohi bo boholo, 13 hape ha re etse joalokaha Moshe a ne a ikhurumetsa sefahleho ka lesira, e le hore bara ba Iseraele ba se ke ba talimisisa ka hloko bofelong ba se neng se tla felisoa. 14 Empa matla a bona a kelello a ile a thotofala. Etsoe ho fihlela letsatsing lena la kajeno lesira le tšoanang le sala le sa koaholloa ha ho baloa selekane sa khale, hobane le felisoa ka Kreste. 15 Ha e le hantle, ho fihlela kajeno neng kapa neng ha Moshe a baloa, lesira le lipelong tsa bona. 16 Empa ha ho retelehela ho Jehova ho le teng, lesira lea tlosoa. 17 Joale Jehova ke Moea; moo moea oa Jehova o leng teng, ho na le tokoloho. 18 Rona kaofela, ha ka lifahleho tse koaholotsoeng lesira re ntse re bonahatsa khanya ea Jehova joaloka liipone, re fetoleloa setšoantšong se tšoanang ho tloha khanyeng ho ea khanyeng, hantle feela joalokaha ho etsa Jehova Moea.