Moshe o ile a lula Midiane ka lilemo tse 40. Ha a le moo, a nyala ’me a ba le bana. Ka letsatsi le leng ha a ntse a hlokometse linku tsa hae pel’a Thaba ea Sinai, o ile a bona ntho e makatsang. Sehlahla se meutloa se ne se tuka empa se sa che. Ha Moshe a atamela ho bona hore na ho etsahala’ng, a utloa lentsoe le tsoa sehlahleng ’me le re: ‘Moshe! U se ke oa atamela ho feta moo. Rola lieta tsa hao hobane sebaka seo u emeng ho sona sea halalela.’ Ke Jehova ea neng a bua a sebelisa lengeloi.

Moshe o ile a tšoha, eaba o ipata sefahleho. Lentsoe leo la re: ‘Ke bone tsela eo Baiseraele ba sotlehileng ka eona. Ke tla ba ntša Egepeta ke ba ise naheng e ntle. Ke uena ea tla ba etella pele.’ E tlameha e be seo se ile sa makatsa Moshe.

Moshe a botsa a re: ‘Ke tla re’ng ha batho ba mpotsa hore na ke ronngoe ke mang?’ Molimo a re: ‘U tla re Jehova, Molimo oa Abrahama, Molimo oa Isaka le Molimo oa Jakobo ke eena ea u rommeng.’ Joale Moshe a re: ‘Ke tla etsa’ng haeba ba sa ’mamele?’ Jehova a mo fa bopaki ba hore o tla mo thusa. A re Moshe a lahlele molamu oa hae fatše. Eaba molamu oo o fetoha noha. Ha Moshe a tšoara noha eo ka mohatla, ea boela ea fetoha molamu. Jehova a re: ‘Pontšo ena e tla ba bopaki ba hore ke ’na ea u rommeng.’

Moshe a re: ‘Ha ke tsebe ho bua hantle.’ Eaba Jehova o re ho eena: ‘Ke tla u bolella seo u lokelang ho se bua ’me ke tla romela abuti oa hao Arone hore a tl’o u thusa.’ Moshe o ne a tseba hore Jehova o na le eena. Kahoo, a nka mosali oa hae le bara ba hae ’me ba khutlela Egepeta.

Baiseraele ba ne ba qobelloa ho sebetsa ka thata e le makhoba. Jehova o ile a roma Moshe le Arone ho Faro, a re ba re ho eena: ‘Tlohela sechaba sa ka hore se tsamaee se e’o ntšebeletsa lefeelleng.’ Faro a araba ka boikhohomoso a re: ‘Ha ke na taba hore na Jehova o re’ng. Nke ke ka lokolla Baiseraele.’ Eaba Faro o ba sebelisa ka thata le ho feta. Jehova o ne a tla fa Faro kotlo. Na oa tseba hore o ile a etsa’ng? O ile a tlisetsa Baegepeta Likotlo Tse Leshome. Kahoo, Jehova a re ho Moshe: ‘Faro ha a ’mamele. Hoseng o tl’o ea Nokeng ea Nile. E-ea u mo bolelle hore kaha ha a batle ho lokolla batho ba ka, metsi a Noka ea Nile a tla fetoha mali.’ Eaba Moshe oea ho Faro. Arone a otla metsi a Noka ea Nile ka molamu, eaba a fetoha mali Faro a ntse a shebile. Metsi a Noka ea Nile a qala ho nkha ’me litlhapi tsa shoa le batho ba hloka metsi ao ba a noang. Empa Faro a ’na a hana ho lokolla Baiseraele.

Ka mor’a matsatsi a supileng, Jehova a romela Moshe hape ho Faro hore a re ho eena: ‘Haeba u sa tlohelle batho ba ka hore ba tsamaee, naha eohle ea Egepeta e tla tlala linqanqane.’ Eaba Arone o phahamisa molamu oa hae ’me linqanqane tsa tlala hohle. Tsa kena ka matlung, libetheng le ka lijaneng. E le tsona feela hohle mona! Faro a re Moshe a kope Jehova hore a tlose linqanqane tseo. A tšepisa hore o tla lokolla Baiseraele. Kahoo, Jehova a felisa kotlo eo ’me Baegepeta ba bokella linqanqane tse shoeleng, ba li etsa liqubu tse ngata. Naha ea qala ho nkha. Empa Faro a boela a hana ho lokolla Baiseraele.

Jehova a re ho Moshe: ‘E-re Arone a otle fatše ka molamu oa hae ’me mobu o tla fetoha menoang e lomang habohloko.’ Hang-hang menoang ea tlala hohle. Eaba Baegepeta ba bang ba re ho Faro: ‘Kotlo ena e tsoa ho Molimo.’ Empa Faro ha aa ka a lumella Baiseraele hore ba tsamaee.