Ho Tsuba ha Hoa Ntokela!

SEHLOOHO seo se ile sa fuoa liithuti tse makholo tse ileng tsa kopanela tlhōlisanong ea ho ngola ea profinse eohle e neng e tšehelitsoe ke Missouri State Medical Association (MSMA), United States. Liithuti tse ka bang 675 tsa likolo tse 42 li ile tsa kopanela tlhōlisanong eo. Moputso o ile oa fuoa Breanna ea lilemo li 12, ’me thothokiso eo a hapileng moputso ka eona e ile ea hatisoa koranteng ea MSMA, Missouri Medicine. Breanna o bile a ba le monyetla oa ho balla baeti ba tlileng kopanong ea selemo le selemo ea MSMA thothokiso ea hae. Pele a e bala, Breanna o ile a bolella bamameli ba hae sena:

“Ke e mong oa Lipaki Tsa Jehova, ’me lintlha tsohle tse thothokisong ena li tsoa makasineng ea Tsoha! Ha e le hantle, khopolo ea o mong oa mela eo ke e ratang haholo thothokisong ena o tsoa sehloohong se ka holimo sa tokollo ena. Se bontša lehata le momme sakerete ’me se re: ‘Ho Rekisoa Lefu.’ Ka lilemo, makasine ea Tsoha! e ’nile ea hatisa lihlooho tse ngata ka likotsi tsa ho tsuba.”

Lipaki Tsa Jehova li qoba ho tsuba koae. Li lumela hore ho sebelisa sehlahisoa leha e le sefe ka boomo se silafatsang ’mele ho bontša ho se hlomphe mpho ea bophelo, hammoho le ho se hlomphe ’Mōpi. (Liketso 17:24, 25) Kahoo, li latela keletso ea Mangolo: “A re itlhatsoeng litšila tsohle tsa nama le tsa moea.”—2 Bakorinthe 7:1.

Joaloka bacha ba bang ba Lipaki, Breanna o loanela ho phela ka litekanyetso tsa Bibele. Ka sebele bacha bohle ba joalo ba thabisa pelo ea ’Mōpi oa bona.—Liproverbia 27:11.

[Setšoantšo se leqepheng la 10]

Breanna (hona joale o lilemo li 14) a tšoere thothokiso ea hae