Pono ea Bibele
Na ho Phoso ho Labalabela Bophahamo?
“HANTLE-NTLE ke eng e phoso ka ho ba le botumo, ho atleha le ho ba le matla?” Potso ena e hlahile tlalehong ea mokhatlo oa bolumeli tlas’a sehlooho se re’ng “Qaka ka se Amohelehang.” Tlaleho eo e ne e bua ka mantsoe a Molimo ho Abrahama: “Ke tla u etsa sechaba se seholo ’me ke tla u hlohonolofatsa ke hōlise lebitso la hao.”—Genese 12:2.
Le hoja e itse “ho labalabela bophahamo ha hoa lokela ho phehelloa ka ho ntša ba bang kotsi,” tlaleho eo e ile ea qotsa rabi oa lekholong la pele la lilemo ea tummeng, ea itseng: “Haeba ke sa iphahamise, ke mang ea tla mphahamisa?” eaba o qetella ka hore: “Haeba re sa elelloe bokhoni ba rōna, ha ho ea tla etsa joalo.” Na ho labalabela bophahamo ke qaka ho ba lakatsang ho sebeletsa Molimo? Ho ameha eng ho hlokomela bokhoni ba rōna? Na ho phoso ho labalabela bophahamo? Pono ea Bibele ke efe?
Na Abrahama o ne a Labalabela Bophahamo?
Abrahama ho buuoa ka eena ka Bibeleng e le motho ea ikhethang oa tumelo. (Baheberu 11:8, 17) Molimo o ne a sa khothaletse Abrahama hore a labalabele bophahamo ka ho mo tšepisa hore O tla mo etsa sechaba se seholo le hore a hōlise lebitso la hae. Molimo o ne a bolela morero oa hae oa ho hlohonolofatsa moloko oa batho ka Abrahama, morero o neng o feta hōle litabatabelo tsa batho.—Bagalata 3:14.
Ka ho phehella boinehelo ba hae ho Molimo, Abrahama o ile a tloha Ure moo ho bonahalang a ne a phela bophelo bo mabothobotho le ba boiketlo. (Genese 11:31) Hamorao, molemong oa khotso, ka ho rata Abrahama o ile a khetha ho se sebelise matla le bolaoli ba hae ha a ne a fa Lota, ngoan’a ngoana’bo, sebaka sa naha se setle ka ho fetisisa seo a ka lulang ho sona. (Genese 13:8, 9) Ha ho letho tlalehong ea Bibele le bontšang hore Abrahama e ne e le motho ea labalabelang bophahamo. Ho e-na le hoo, tumelo ea hae, ho mamela ha hae le boikokobetso ba hae ke tsona lintho tse ileng tsa etsa hore e be ea ratehang ho Molimo joaloka “motsoalle” oa sebele.—Esaia 41:8.
Pono e Fapaneng ka Boemo, Botumo le Matla
Ho labalabela bophahamo ho hlalosoa e le “takatso e matla ea bophahamo, botumo kapa matla.” Mehleng ea boholo-holo Morena Solomone o ne a e-na le bophahamo, botumo le matla, hammoho le leruo le leholo. (Moeklesia 2:3-9) Leha ho le joalo, ho thahasellisang ke hore ha aa ka a tloha a e-na le takatso e matla ea lintho tseo. Ha Solomone a ne a e-ja borena lefa, Molimo o ile a re a kōpe ntho leha e le efe eo a e lakatsang. Ka boikokobetso Solomone o ile a ikōpela ho ba le pelo e mamelang le temoho e hlokahalang ho busa batho ba Molimo ba khethiloeng. (1 Marena 3:5-9) Hamorao, ka mor’a ho hlalosa leruo le matla a hae ka botlalo, Solomone o ile a re “ntho e ’ngoe le e ’ngoe e ne e le lefeela le ho lelekisa moea.”—Moeklesia 2:11.
Na Solomone o ile a bua letho ka batho ba finyellang seo ba se khonang? Ka tsela e itseng o ile a ho etsa. Ka mor’a ho hlahloba liphihlelo tsa hae tse ngata bophelong, o ile a fihlela qeto ena: “Tšaba Molimo oa ’nete ’me u boloke litaelo tsa hae. Etsoe sena ke sohle seo motho a tlamehang ho se etsa.” (Moeklesia 12:13) Batho ba finyella bokhoni ba bona ka ho phetha thato ea Molimo, eseng ka ho finyella bophahamo, leruo, botumo, kapa matla.
Boikokobetso bo Lebisa Bophahamong
Ke ’nete hore ha ho letho le phoso ka ho ithata ka tsela e itekanetseng. Bibele e re laela hore re rate baahelani ba rōna joalokaha re ithata. (Matheu 22:39) Ke tlhaho ho lakatsa mabothobotho le thabo. Empa Mangolo a boetse a khothalletsa ho sebetsa ka thata, boikokobetso le boinyenyefatso. (Liproverbia 15:33; Moeklesia 3:13; Mikea 6:8) Batho ba tšepahalang le bao ho ka itšetlehoang ka bona, le ba sebetsang ka thata, hangata baa hlokomeleha, ba fumana mosebetsi o motle ’me baa hlomphuoa. Ka sebele ho latela tsela ena ho molemo ho feta ho nka monyetla ka batho ba bang molemong oa ho ithuisa kapa ho hlōlisana le ba bang bakeng sa boemo.
Jesu o ile a lemosa bamameli ba hae hore ba se ke ba ikhethela libaka tse phahameng moketeng oa lenyalo. O ile a ba eletsa hore ba ee sebakeng se tlaase-tlaase ’me ba siee taba matsohong a mong’a mokete hore na o tla ba beha hokae. Ha a bolela molao-motheo o amehang ka ho hlaka, Jesu o ile a re: “E mong le e mong ea iphahamisang o tla kokobetsoa ’me ea ikokobetsang o tla phahamisoa.”—Luka 14:7-11.
Bakreste ba ’Nete ba Qoba ho Labalabela Bophahamo
Bibele e bontša hore ho labalabela bophahamo ha boikhohomoso ho amahanngoa le ho se phethahale ha motho. (Jakobo 4:5, 6) Moapostola Johanne ka nako e ’ngoe o kile a labalabela bophahamo. Ho lakatsa maemo ha hae ho ne ho le matla hoo, eena le ngoana’bo, ka sebete a ileng a kōpa Jesu hore a ba fe sebaka se phahameng haholo ’Musong. (Mareka 10:37) Hamorao, Johanne o ile a fetola maikutlo a hae. Ha e le hantle, epistoleng ea hae ea boraro, o ile a nyatsa Diotrefe ka mantsoe a matla, eo, a ileng a re ke “ea ratang ho ba le sebaka sa pele.” (3 Johanne 9, 10) Kajeno Bakreste ba nka mantsoe ao a Jesu ka ho teba ’me baa ikokobetsa, ha ka nako e tšoanang ba latela mohlala oa moapostola Johanne ea tsofetseng, ea ileng a ithuta ho qoba mekhoa e tloaetsoeng ea ho labalabela bophahamo.
Leha ho le joalo, ka ho utloahalang ho tlameha ho boleloe hore talenta ea motho, bokhoni ba hae le liketso tsa hae tse ntle, le ho sebetsa ka thata ka botsona ha li tiisetse motho hore o tla eloa hloko. Ka linako tse ling li putsoa ke batho ba bang, ’me ka linako tse ling ha ho be joalo. (Liproverbia 22:29; Moeklesia 10:7) Ka linako tse ling, batho ba sa tšoaneleheng hakaalo ba ka ’na ba behoa maemong a bolaoli, ha batho ba tšoanelehang haholoanyane ba sa eloe hloko. Lefatšeng lena le sa phethahalang, ba fumanang maemo le matla e ka ’na eaba ha se ba tšoanelehang hakaalo.
Ho Bakreste ba ’nete, taba ea ho labalabela bophahamo hase qaka ea se amohelehang le se sa amoheleheng. Matsoalo a bona a koetlisitsoeng ka Bibele a ba thusa ho qoba ho labalabela bophahamo. Ba mpa ba leka ka thata ho etsa sohle tse matleng a bona maemong ’ohle, bakeng sa khanya ea Molimo, ’me lintho ba li siea matsohong a hae. (1 Bakorinthe 10:31) Bakreste ba loanela ho finyella seo ba ka se khonang ka ho tšaba Molimo le ho boloka litaelo tsa hae.
[Setšoantšo se leqepheng la 12]
Na Molimo o ile a khothalletsa Abrahama ho labalabela bophahamo?