Kamoo U ka Hahang Lenyalo le Thabileng
‘Monna o tla khomarela mosali oa hae ’me e tla ba nama e le ’ngoe.’—GENESE 2:24.
MOETSI oa rōna, Jehova Molimo, o thehile lenyalo hore e be kamano e sa feleng pakeng tsa monna le mosali. Genese 2:18, 22-24 e re: “Jehova Molimo a tsoela pele ho re: ‘Ha ho hotle hore motho a ’ne a be mong. Ke tla mo etsetsa mothusi, e be motlatsi oa hae.’ Eaba Jehova Molimo o etsa mosali ka khopo eo a e nkileng ho monna ’me o mo tlisa ho monna. Joale monna a re: ‘Qetellong enoa ke lesapo la masapo a ka le nama ea nama ea ka. Enoa o tla bitsoa Mosali, hobane o nkiloe ho monna.’ Ke ka lebaka leo monna a tla siea ntat’ae le ’m’ae a khomarele mosali oa hae ’me e tla ba nama e le ’ngoe.”
Ke ’nete hore ho haha lelapa le tšoarellang le le thabileng ha ho bonolo, empa ka sebele hoa khoneha. Banyalani ba bangata ba qetile lilemo tse 50, 60 kapa tse fetang tseo ba thabile lenyalong. Ba etsa see joang? Ba lula ba sebeletsa hore lenyalo la bona le atlehe ’me ba etsa seo ka ho hloka boithati e le hore ba ‘fumane kamohelo’ ea balekane ba bona. (1 Bakorinthe 7:33, 34) Seo se hloka boiteko bo matla. Haeba u ikemiselitse ho fana ka nako ea hao le ho etsa boiteko, le uena u ka haha lenyalo le thabileng, le tla tšoarella.
Latela Polane ka Hloko
Sehahi se hloahloa se ke ke sa qala ho haha se sa ka sa sheba polane. Ka ho tšoanang, re ke ke ra atleha ho haha manyalo a thabileng haeba re sa shebe polane ea Molimo bakeng sa lenyalo. E fumanoa Lentsoeng la Molimo. Moapostola Pauluse o ile a ngola: “Lengolo lohle le bululetsoe ke Molimo ’me le molemo . . . bakeng sa ho otlolla lintho.”—2 Timothea 3:16.
Banna le basali ba ka ithuta ho hoholo ka lenyalo ka ho hlahloba tsela eo Jesu a neng a sebelisana le barutuoa ba hae ka eona. Hobane’ng? Ka Bibeleng, kamano eo Jesu a nang le eona le bao a tla busa le bona leholimong e tšoantšoa le eo monna le mosali ba nang le eona. (2 Bakorinthe 11:2) Jesu o ile a lula a tšepahala ho metsoalle ea hae, esita le linakong tse thata ka ho fetisisa. “O ile a ba rata ho isa bofelong.” (Johanne 13:1) E le moeta-pele ea nang le kutloelo-bohloko, kamehla Jesu o ne a nahanela matla le mefokolo ea balateli ba hae. Ha ho mohla a ileng a batla se fetang seo ba neng ba ka khona ho se etsa kapa ho fana ka sona.—Johanne 16:12.
Esita leha a ne a soetsoa ke metsoalle ea hae e haufi-ufi, Jesu o ne a lula a le mosa. Ha aa ka a ba khalema ka bohale, empa, ka boikokobetso ba bomolimo le ka mosa, o ile a leka ho ba khutlisetsa tseleng. (Matheu 11:28-30; Mareka 14:34-38; Johanne 13:5-17) Ka hona, haeba u hlahlobisisa tsela eo Jesu a neng a tšoara balateli ba hae ka mosa ka eona, le tsela eo ba neng ba arabela ka eona ka ho mo bontša lerato, u tla ithuta thuto ea bohlokoa ho etseng lenyalo le thabileng.—1 Petrose 2:21.
Haha Motheong o Tiileng
Ha ho potang hore liteko tse kang lifefo li tla puputla motheo oa lenyalo la hao. Sena se tla nonya kamano ea hao le molekane oa hao hore na e tiile hakae. Leha ho le joalo, boitlamo bo tšepahalang bo thehiloeng leratong ke motheo o tiileng ka ho fetisisa oa ho haha lenyalo le thabileng. Jesu o ile a totobatsa bohlokoa ba boitlamo boo ha a re: “Ho se be le ea mong ea arolang banyalani ba kopantsoeng hammoho ke Molimo.” (Matheu 19:6, Contemporary English Version) Poleloana e reng “ho se be le ea mong,” e ne e tla akarelletsa le eena monna le mosali oa hae, ba nkileng kano ea hore ba tla lula ba tšepahallana.
Ba bang ba ka ’na ba nka boitlamo e le moroalo, le hona o batlang lintho tse ngata haholo. Kajeno, batho ba khetha boiketlo ho e-na le hore ba itelle bao ba itlammeng ka bona.
Ke eng e ka bolokang tlamo ea lenyalo? Moapostola Pauluse o ngotse: “Banna ba tšoanela ho rata basali ba bona joaloka ’mele ea bona.” (Baefese 5:28, 29) Har’a tse ling, ‘ho kopanngoa hammoho’ ho bolela hore u ameha ka boiketlo ba molekane oa hao ka tsela e tšoanang le eo u amehileng ka eona ka ba hao. Batho ba lenyalong ba lokela ho tlohela ho nahana ka “ea ka” le “’na” ’me ba nahane ka “tsa rōna” le “rōna.”
Ho loantša ka katleho lifefo tse hlaselang lenyalo la lōna ho tla le etsa ba bohlale. Ho ba le bohlale bo joalo ho tla le tlisetsa thabo. Liproverbia 3:13 e re: “Ho thaba motho ea fumaneng bohlale.”
Hahang ka Thepa e sa Cheng
Hore ntlo e be e tšoarellang le e sireletsehileng, e lokela ho hahoa hantle. Ka hona, ikemisetseng ho haha lenyalo le tšoarellang. Sebelisang thepa e tšoarellang, e tla tšoarella tlas’a liteko tse matla tsa botšepehi ba lōna. Litšobotsi tsa bohlokoa tse kang bohlale bo tsoang ho Molimo, ho fana ka seatla se bulehileng, temoho, ho tšaba Molimo, ho ba mofuthu, ho ananela ka lerato melao ea Molimo le tumelo ea sebele, le li nke e le tsa bohlokoahali.
Ho thaba le ho khotsofala lenyalong ha ho tlisoe ke lintho tse bonahalang kapa ke ho atleha lefatšeng. Ho itšetlehile ka pelo le kelello ’me litšobotsi tsena li matlafatsoa ke ’nete ea Lentsoe la Molimo. Khothatso e reng “E mong le e mong a ke a lule a lebetse hore na o haha joang,” ea sebetsa le lenyalong.—1 Bakorinthe 3:10.
Ha Mathata a Hlaha
E le hore mohaho o qete nako e telele, ho hlokahala hore o lule o hlokomeloa hantle. Ha monna le mosali ba lula ba tšehetsana lipakaneng tsa bona ’me ba hlomphana, lenyalo le lula le le matla. Boithati ha bo be teng ’me bohale boa laoloa.
Ho lula motho a le makoebeta a bile a tsielehile ho ka bolaea boikutlo ba lerato le mofuthu lenyalong. Moapostola Pauluse o ile a eletsa banna: “Lōna banna, le ’ne le rate basali ba lōna ’me le se ke la ba halefela ka matla.” (Bakolose 3:19) Molao-motheo ona oa sebetsa le ho basali. Ha balekane ba leka ho nahanelana, ba le mosa ’me ba utloisisana, e ba ba thabileng le ba khotsofetseng. Ho qoba ho halefa ka pele le ho pheha khang ha mathata a hlaha ho ka thusa hore ho se be le likhohlano. Pauluse o ile a fana ka keletso ena: “Le bontšane mosa, le be le qenehelo e bonolo, le tšoarelane ka bolokolohi.”—Baefese 4:32.
Ho thoe’ng haeba u tšoentsoe ke hore u ikutloa u se na thuso, u khopisitsoe, kapa u ikutloa u sa ananeloe? Ka moea o fatše, bolella molekane oa hao ka ho hlaka mabaka a etsang hore u tšoenyehe. Leha ho le joalo, linthong tse sa reng letho ho molemo ho tlohella lerato hore le li koahele.—1 Petrose 4:8.
Monna e mong, ea bileng le mathata a mangata lenyalong la hae la lilemo tse 35, o re ho sa tsotellehe hore na u halefetse molekane oa hao hakae, ha ua lokela “ho khaotsa ho bua le ka mohla.” Ka bohlale oa phaella: “Le ka mohla u se ke ua khaotsa ho mo rata.”
Le ka Haha Lenyalo le Thabileng!
Ke ’nete hore ha ho bonolo ho haha lenyalo le thabileng. Leha ho le joalo, ha banyalani ba ikemiselitse ho sebetsa ka thata ho kenya Molimo kamanong ea bona, ba tla thaba le ho ikutloa ba sireletsehile. Ka hona, elang hloko ka ho khetheha bomoea ba lelapa la lōna; le itlame ka ho feletseng lenyalong. Hopolang hape hore ho ea ka mantsoe a Jesu, tlotla ha e ee ho monna kapa ho mosali feela bakeng sa lenyalo le thabileng. Ho e-na le hoo, tlotla ka ho khetheha e leba ho Moqapi oa lenyalo, Jehova Molimo. “Seo Molimo a se kopantseng hammoho jokong ho se ke ha e-ba le motho ea se arolang.”—Matheu 19:6.
SE SENG SE KA BALOANG
Buka e reng Lekunutu la Thabo ea Lelapa, e hatisitsoeng ke Lipaki Tsa Jehova, e fana ka litlhahiso tse sebetsang tsa kamoo u ka hahang lenyalo le thabileng le le atlehileng. Banyalani ba likete tse makholo lefatšeng ka bophara ba fumane hore likeletso tse sebetsang tsa eona tse thehiloeng Bibeleng li ba thusitse hore ba ntlafatse kamano ea bona.—Bona leqephe la 32 la makasine ena.
[Lebokose le leqepheng la 9]
Ke Eng e ka U Thusang ho Haha Lenyalo le Thabileng?
◼ Ithute Lentsoe la Molimo le molekane oa hao kamehla, ’me le rapele Molimo hore a le thuse le ho le tataisa ho rarolla mathata.—Liproverbia 3:5, 6; Bafilipi 4:6, 7; 2 Timothea 3:16, 17.
◼ Kopanela liphate le molekane oa hao feela.—Liproverbia 5:15-21; Baheberu 13:4.
◼ Buisanang ka bolokolohi, ka botšepehi le ka lerato ka mathata a lōna le ka lintho tseo le sa li boneng ka tsela e tšoanang.—Liproverbia 15:22; 20:5; 25:11.
◼ Bua le molekane oa hao ka tsela e mosa, e nahanelang; qoba ho tleroha ka bohale, ho omanela ruri le ho bua mantsoe a hlabang.—Liproverbia 15:1; 20:3; 21:9; 31:26, 28; Baefese 4:31, 32.
◼ Ka boikokobetso sebelisa keletso ea Bibele esita leha u bona eka molekane oa hao ha a etse sohle seo a lokelang ho se etsa.—Baroma 14:12; 1 Petrose 3:1, 2.
◼ Sebetsa ka thata ho hlaolela litšoaneleho tsa moea tse boletsoeng Bibeleng.—Bagalata 5:22, 23; Bakolose 3:12-14; 1 Petrose 3:3-6.
[Setšoantšo se leqepheng la 7]
Latelang polane eo Molimo a faneng ka eona ka Bibeleng bakeng sa lenyalo
[Setšoantšo se leqepheng la 7]
Etsang hore lerato le se nang boithati le botšepehi e be tsona motheo o tiileng oa lenyalo la lōna
[Litšoantšo tse leqepheng la 8]
Hlaolelang ho ba le litšoaneleho tsa moea tse tla le thusa ho ema le tiile litekong tse matla
[Litšoantšo tse leqepheng la 8]
Lenyalo le tlameha ho hlokomeloa hore e be le thabileng