Tsa Mona le Mane

◼ “Hoo e ka bang ngoanana a le mong ho ba bararo ba United States e ba moimana le pele a qeta lilemo tse 20.”—CENTERS FOR DISEASE CONTROL AND PREVENTION, U.S.A.

◼ Phuputso e entsoeng United States ho banna ba 420 “ba hlekefetsoang malapeng” e bontšitse hore “hoo e ka bang ba bararo ho ba leshome ba kile ba otloa kapa ba hlekefetsoa ka tsela e itseng.”—AMERICAN JOURNAL OF PREVENTIVE MEDICINE.

Na ba ka Ithuta Lipuo Tse Ngata?

Batsoali ba bangata ba tšaba hore ha bana ba ka rutoa puo e ’ngoe ba sa le banyenyane, seo se tla ba thatafalletsa ho bua puo ea habo bona. Empa bafuputsi ba neng ba eteletsoe pele ke setsebi litabeng tsa tšebetso ea methapo-kutlo, e leng Laura-Ann Petitto, oa Toronto, Canada, ba re ha ho joalo. Petitto o re: “Lisele tsa tsamaiso ea methapo ea kutlo tseo u tsoaloang u e-na le tsona . . . li loketse ho ithuta puo ’me li ka khona ho ithuta lipuo tse ngata.” Hangata bana ba tsebang lipuo tse peli ba sebetsa hantle sekolong ho feta ba buang puo e le ’ngoe feela. Leha ho le joalo, koranta ea Toronto Star e re: “Batsoali ba lokela ho ba ka pele ho ruteng bana puo e ’ngoe haeba ba batla hore bana ba bona ba fumane melemo eohle e tlisoang ke ho tseba ho bua lipuo tse peli.”

Litšoantšo Tse Litšila li Ferekanya Bana

Bana ba bona livideo tsa Inthanete tse hlahisang litšoantšo tse litšila tse tsosang takatso le liketso tse mabifi, ba sa le banyenyane haholo. Heinz-Peter Meidinger, eo e leng molula-setulo oa Mokhatlo oa Jeremane oa Litsebi Tsa Mantsoe, o re bashanyana ba lilemo li 12 ho ea holimo hangata ba tseba tsela ea ho fumana mecha ea Inthanete e bontšang liketso tse mabifi haholo kapa litšoantšo tse litšila le hore na e fumaneha hokae. Le hoja bana bao ba ka ’na ba bonahala eka ba sebete ebile seo ha se ba etse letho, ba bangata ba tšosoa ke seo ba se bonang ’me se ea ba ferekanya. Meidinger o khothalletsa batsoali hore ba thahaselle ho tseba hore na ke eng seo bana ba bona ba se nahanang le hore na lik’homphieutha tsa bona li na le eng.

Ba Rera Tlhalo Esale Pele

Koranta ea Sydney e bitsoang Sunday Telegraph, e tlaleha hore batho ba ntseng ba eketseha ba Australia, ba saena litumellano pele ba nyalana tse bolelang tsela eo ka ho khetheha ho hlokahalang hore molekane ka mong a itšoare ka eona. Tumellano ena e hlalosa hore na banyalani ba tla arola thepa ea bona joang ha ba hlalana. Hona joale litumellano tse ngata li totobatsa hore na molekane ka mong o lokela ho phela ka tsela efe e le hore lenyalo le atlehe. Litumellano tse ling li thathamisa hore na ke mang ea phehang, ea hlatsoang, kapa ea khannang, hammoho le hore na ba tla rua liphoofolo tsa lapeng, molekane ka mong o lokela ho ba boimeng bofe ba ’mele, ke mang ea tla thapolla ntja maoto le hore na ke mang ea tla qhala lithōle. ’Muelli oa molao ea bitsoang Christine Jeffress o re batho “ha ba tšepe hore manyalo a bona a tla tšoarella ka ho sa feleng.”

Batsoali ba Thatafalloa ho Bontša Kameho e Mofuthu

Makasine ea Poland e bitsoang Newsweek Polska e re: “Batsoali ba ntseng ba eketseha ba hloka buka e ba fang litaelo tsa hore na ba tšoare bana ba banyenyane joang, kaha ho bonahala ba hlōleha ho ba bontša lerato la tlhaho.” Batsoali ba lokela ho rutoa lintho tsa motheo tse kang ho sika ngoana, ho bapala le eena le ho mo binela. Lintho tsena li ea hlokahala e le hore bana ba hōle hantle. Leha ho le joalo, liphuputso li bontša hore “malapeng a mangata a batho ba Poland, ho shebella TV le ho ea mabenkeleng ke tsona lintho tse ka sehloohong tseo batsoali ba atisang ho li etsa le bana ba bona.” Ho bapala le bona ho hlaha boemong ba botšelela.