Iphe Nako ea Lintho Tsa Bohlokoa

“Nako e setseng e fokotsehile.”—1 Bakorinthe 7:29.

BUKENG ea hae e bitsoang Working Smart, Michael LeBoeuf o re: “Ho qhoma-qhoma ka metsing le ho a qaphatsa ha ho bolele hore ua sesa.”

Ka mantsoe a mang, ho na le phapang pakeng tsa ha motho a phathahane ka ntho e itseng le ha a hlile a finyella ntho e itseng ea bohlokoa. Ak’u nahane ka beke e fetileng. U ile ua ipha nako ea ho etsa’ng? U ne u phathahane ka eng? Na u bona ho hlokahala hore u iphe nako e eketsehileng ea ho etsa lintho tsa bohlokoa?

Nahana ka seo Jesu a ileng a se bolela esale pele ka mehla ea rōna e potlakileng. O ile a re ha tsamaiso ena e ntse e atamela bofelong ba eona ’me lefatše le lecha la Molimo la ho loka le ntse le atamela, barutuoa ba hae ba ne ba tla ba maphathephathe. Ba etsa’ng? Ba bolella batho “litaba tsena tse molemo tsa ’muso [oa Molimo].” Jesu o ile a boela a re batho ba bangata ba tla phathahana hoo ba ke keng ba mamela. Ba ne ba tla be ba phathahane ka lintho tse tloaelehileng tsa bophelo. O ile a phaella ka ho re ba phathahaneng hoo ba sitoang ho mamela molaetsa oa ’Muso ba tla timetsoa.—Matheu 24:14, 37-39; Luka 17:28-30.

Kajeno, Lipaki Tsa Jehova li bolela litaba tse molemo tsa ’Muso oa Molimo linaheng tse fetang 230. Tumellanong le seo Jesu a se boletseng esale pele, ba bangata ha ba batle ho mamela, ba re “ba phathahane.” Empa re u mema hore le hoja u phathahane bophelong, u iphe nako ea ho hlahloba seo Bibele e se rutang ka ’Muso oa Molimo. Re tšepa hore ha u ntse u ithuta ka litlhohonolotsa tseo Molimo a li boloketseng moloko oa batho, u tla lumela hore ho utloa molaetsa oa Bibele le ho o sekehela tsebe ke ntho ea bohlokoa, eo u lokelang ho ipha nako ea eona.a

[Mongolo o botlaaseng ba leqephe]