Ho Laola Khatello ea Kelello

Bibele e bolela hore “matsatsing a ho qetela ho tla ba le linako tse mahlonoko tseo ho leng thata ho sebetsana le tsona.” Mohlomong le uena ua lumela hore hona joale re phela linakong tse mahlonoko.—2 Timothea 3:1.

JOALOKAHA u tseba, ho batla ho le bonolo ho tima mollo o monyenyane ho feta ho tima khanare ea mollo. Ka ho tšoanang, ho batla ho le bonolo ho laola mathata a sa tebang a bakang khatello ea kelello ho fapana le a tebileng a bileng a qetileng nako e telele. Ngaka e ’ngoe e re: “Ke habohlokoa hore letsatsi le letsatsi re itloaetse ho ipha nako ea ho pholisa hlooho le hoja re phela re le maphathaphathe.”a

Sepheo sa ho itloaetsa ho ipha nako ea ho pholisa hlooho se habeli. Ntlheng pele, ho re thusa ho fokotsa lintho tse re bakelang khatello ea kelello tse ka fokotsehang. Ea bobeli, ho re thusa ho laola tsela eo re itšoarang ka eona ha re le maemong a re bakelang khatello ea kelello ao re ke keng ra a qoba.

Na Bibele e fana ka tataiso e ka re thusang ho sebetsana le khatello ea kelello?

Linnete Tsa Bibele ke Tsa Bohlokoa

Ha re ithuta linnete tse ka Bibeleng, re fumana likhopolo tse khathollang le tse matlafatsang tsa ’Mōpi oa rōna. Lentsoe la Molimo ke mohloli oa tataiso ea bohlokoa. Ha e le hantle, ke mohloli o moholo oa linnete tsa moea tse re imollang khatellong ea kelello! Le ka re thusa ho qoba ‘ho haroha letsoalo kapa ho tšoha’ le ho sebetsana ka katleho le maemo a letsatsi le letsatsi a re bakelang khatello ea kelello.—Joshua 1:7-9.

Bibele e re thusa ho fokotsa khatello ea kelello ka tsela e babatsehang, ka ho re tiisetsa hore Ntate oa rōna oa leholimo, e leng Jehova, “o na le lerato le mofuthu haholo ’me o mohau.” (Jakobo 5:11) Patricia eo e neng e le moprofesa univesithing e ’ngoe e California, o re: “Ntho e ’ngoe e neng e nthusa haholo ke ho nahana ka thato ea Molimo le ka lintho tse babatsehang tseo a li etsang.”

Nahana kamoo tsela e mosa eo Jesu Kreste a neng a bua a bile a etsa lintho ka eona e ileng ea khatholla bamameli ba hae kateng, ba neng ba hateletsoe ba bile ba imetsoe kelellong. O ile a re: “Tloong ho ’na, lōna bohle ba sehlang le ba imetsoeng, ’me ke tla le khatholla.”—Matheu 11:28-30.

Tumellanong le mantsoe a hae, Jesu o ne a sa khahlapetse batho. Ho e-na le hoo, o ne a bontša ho nahanela maikutlo a barutuoa ba hae le seo ba neng ba se hloka ’meleng, a lokisetsa hore ba phomole mosebetsing oa bona o maphathaphathe oa boboleli. (Mareka 6:30-32) Re ka kholiseha hore Jesu, eo hona joale e leng Morena leholimong, ka mosa o re utloela bohloko ha re felloa ke matla ka lebaka la ho ba tlas’a khatello ea kelello. Ka mosa o fana ka “thuso ka nako e nepahetseng.”—Baheberu 2:17, 18; 4:16.

Kamoo Puisano e Ntle e ka re Thusang Kateng

Puisano e ntle ke e ’ngoe ea lintho tsa bohlokoa ka ho fetisisa tabeng ea ho sebetsana le khatello ea kelello. Bibele e re: “Merero ea senyeha moo ho se nang [puisano ea] lekunutu, empa ha baeletsi ba le bangata ho na le se finyelloang.” (Liproverbia 15:22) Kahoo, ba bangata ba fumana hore ho buisana le balekane ba bona ba lenyalo, metsoalle kapa basebetsi-’moho ho ba thusa ho fokotsa khatello ea kelello.

Ho rapela Molimo ke tsela ea bohlokoa ka ho fetisisa eo re ka khonang ho ba le “[puisano ea] lekunutu” ka eona. Ho sebelisa tokisetso ena kamehla ho ka u thusa hore u se ke ua “tšoenyeha ka letho.” Ba bangata ba fumane hore ho itšetleha ka thapelo ho ba thusitse hore ba be le “khotso ea Molimo e fetang monahano oohle.” Tumellanong le tšepiso ea Bibele, ‘lipelo tsa bona le matla a bona a kelello’ a sirelelitsoe.—Bafilipi 4:6, 7; Liproverbia 14:30.

Buka e buang ka khatello ea kelello e re “batho ba nang le metsoalle e ba tšehetsang ba atisa ho sebetsana le khatello ea kelello ka katleho ebile ba phela hantle kelellong ho feta ba lekang ho iketsetsa lintho ba le bang.” Ha ho na batho ba bang ba tšehetsanang ho feta barapeli ba Molimo oa ’nete, Jehova. Ba latela keletso ea Bibele ’me ba kopana kamehla le ho khothatsana. (Baheberu 10:24, 25) Motho e mong a eang libokeng tseo, o re: “Ka linako tse ling ke sebetsa lihora tse ngata ’me ke ba tlas’a khatello e matla ea kelello. Empa ha ke ile sebokeng, ke fumana hore ha ho etsoa thapelo e qetellang, ke ikutloa ke imolohile ebile ke khatholohile.”

Ntho e ’ngoe e ka re thusang ho sebetsana le khatello ea kelello ke ho etsa mesoaso. Moeklesia 3:4 e re ho na le “nako ea ho lla le nako ea ho tšeha.” Joalokaha ngaka e ’ngoe e hlalosa, ho tšeha hoa khatholla ebile ho molemo, kaha “’mele o hlahisa lero le tsoang bokong le kokobetsang mahlaba ’me o khina ho etsoa ha adrenaline ha re tšeha.” Mosali e mong o re: “Monna oa ka o bua ntho e ’ngoe e re tšehisang ha re le maemong a sithabetsang ’me seo sea re thusa.”

Litšobotsi Tse Fokotsang Khatello ea Kelello

Bibele e re khothalletsa hore re be le litšobotsi tse fokotsang khatello ea kelello. Li akarelletsa “lerato, thabo, khotso, tiisetso, mosa, molemo, tumelo, bonolo [le] boitšoaro,” ’me li bitsoa ‘tholoana ea moea oa Molimo.’ Ho feta moo, Bibele e re phehella hore re qobe “lehloeo le nang le lonya le bohale le khalefo le ho tleroha le puo e nyefolang.” E phaella ka ho re: “Le bontšane mosa, le be le qenehelo e bonolo, le tšoarelane ka bolokolohi.”—Bagalata 5:22, 23; Baefese 4:31, 32.

Ngaka e ’ngoe e hlalosa bohlokoa ba ho latela lithuto tsena tsa Bibele, haholo-holo lefatšeng la kajeno. E re: “Ho sebelisana le batho ba bang ka tlhompho ho thusa haholo tabeng ea ho imolla motho khatellong ea kelello.” Bibele e boetse e re thusa ho hlaolela boikokobetso, e leng se bolelang ho ba le pono e leka-lekaneng ka bokhoni ba rōna.—Mikea 6:8.

Molimo o lebeletse hore ka boikokobetso re lumele hore rea fokola ’meleng, kelellong le maikutlong le hore re ke ke ra khona ho etsa ntho e ’ngoe le e ’ngoe eo re batlang ho e etsa. Le hoja ho ka ’na ha e-ba thata ho etsa seo, re ka ’na ra tlameha ho ithuta hore na ke neng re lokelang ho hana ho etsa lintho tse phahametseng matla a rōna le hore na re ka li hana joang.

Sena ha se bolele hore haeba u latela likeletso tsohle tse fanoeng ka holimo tse thehiloeng Bibeleng, u ke ke ua ba tlas’a khatello ea kelello. ’Nete ke hore Satane Diabolose o leka ka matla ho pakahatsa hore barapeli ba Molimo ba tla furalla borapeli ba ’nete ha ba le tlas’a khatello ea kelello. (Tšenolo 12:17) Empa joalokaha re se re bone, ho na le litsela tse ngata tseo Molimo a fanang ka tataiso e nakong ka tsona, e le ho re thusa ho fokotsa khatello ea kelello le ho sebetsana le eona.b

[Mongolo o botlaaseng ba leqephe]

[Lebokose le leqepheng la 9]

LITSELA TSE LING TSA HO FOKOTSA KHATELLO EA KELELLO

● U se ke ua lebella phetheho ho uena kapa ho ba bang.—Moeklesia 7:16.

● Ipehele lipakane tse loketseng.—Bafilipi 1:10, 11.

● Ikoetlise kamehla.—1 Timothea 4:8.

● Thabela pōpo ea Jehova.—Pesaleme ea 92:4, 5.

● Iphe nako ea ho khutsa khafetsa.—Matheu 14:23.

● Iphe nako ea ho phomola ’me u robale ka ho lekaneng.—Moeklesia 4:6.

[Setšoantšo se leqepheng la 7]

Ho ipha nako ea ho buisana le ba bang ke habohlokoa tabeng ea ho fokotsa khatello ea kelello

[Setšoantšo se leqepheng la 7]

Ho hlaolela litšobotsi tsa bomolimo ho re thusa ho fokotsa khatello ea kelello