Ho Etela Indonesia

INDONESIA e na le lihlekehleke tse ka bang 17 000. Batho ba teng ba tsejoa ka ho ba botsoalle haholo, ho ba le mamello, mekhoa e metle le ho rata baeti.

Hangata lijo tsa Indonesia li akarelletsa raese, lijo tse ling tse atisang ho nōkoa haholo, hammoho le litholoana. Libakeng tse ling, ba malapa ba ja raese le lijo tse ling ka matsoho ba lutse ’meteng. Maindonesia a mangata a bolela hore lijo tse jeoang ka tsela eo li latsoeha hamonate le ho feta.

Maindonesia a rata botaki, tantši le ’mino. Anklong ke seletsa sa ’mino se tloaelehileng sa Maindonesia; liphaepe tsa eona li entsoe ka sefate sa bamboo ’me li faselelitsoe ka tatellano foreiming ea lehong. Liphaepe tsena li entsoe ka tsela e tla etsa hore li ntše molumo o itseng ha li sisinngoa. E le hore ho bapaloe pina e itseng, batho ba ’maloa ba bapalang ’mino ba lokela ho sebelisana-’moho ka hore ba sisinye li-anklong tsa bona ka nako e le ’ngoe.

Ho fihlela lekholong la bo15 la lilemo C.E., Indonesia e ne e susumelitsoe haholo ke tumelo ea Bohindu ’me ka mor’a moo ha latela Bobuddha. Lekholong la bo16 la lilemo, tumelo ea Boislamo e ne e susumelitse setso sa batho ba Indonesia haholo. Maeurope a neng a batla linōko, a ile a fihla naheng eo lekholong la bo16 la lilemo ’me a tla le litumelo tsa ’ona tsa Bokreste-’mōtoana.

Lipaki Tsa Jehova tse tsejoang lefatšeng lohle ka mosebetsi oa tsona oa ho ruta batho Bibele, li ’nile tsa sebetsa Indonesia ho tloha ka 1931. Hona joale ho na le Lipaki Tsa Jehova tse fetang 22 000 Indonesia ’me li leka ho finyella batho ba sa utloeng litsebeng ba sebakeng seo. Morao tjena, batho ba fetang 500, ba ile ba ea sebokeng se khethehileng sa puo ea matsoho sa Lipaki Tsa Jehova ho ikhopotsa lefu la Jesu Kreste.