TSA MONA LE MANE
Ho Hlahloba Linaha Tsa Amerika
Litaba tsa Karolong e ka Bophirimela ea Lefatše li bontša hore Bibele e ntse e le ea bohlokoa le mehleng ena kaha e fana ka bohlale.
Ho se Bale Li-e-mail khafetsa—Ho Fokotsa Khatello ea Maikutlo
Liphuputso tse ileng tsa etsoa Vancouver, Canada li bontša hore batho ba shebang li-e-mail tsa bona bonyane hararo ka letsatsi ba na le khatello e tlaase ea maikutlo ha ba bapisoa le batho ba lulang ba li sheba. Kostadin Kushlev, e leng moeta-pele oa liphuputso tsena o re: “Batho ba thatafalloa ho iphapanyetsa ho sheba li-e-mail, e leng eona ntho e neng e ka ba thusa ho fokotsa khatello ea maikutlo.”
SEO U KA NAHANANG KA SONA: Re phela ‘linakong tse mahlonoko tseo ho leng thata ho sebetsana le tsona.’ Kahoo, na hase bohlale ho batla litsela tsa ho fokotsa khatello ea maikutlo?—2 Timothea 3:1.
Ho Sireletsa Litlhapi Tse Kotsing ea ho Fela Leoatleng
Tlaleho e entsoeng ke Mokhatlo oa Paballo ea Liphoofolo le Limela e bontša hore palo ea li-conch, li-lobster le litlhapi tse ling e ile ea eketseha Belize le likarolong tse ling tsa Caribbean moo ’muso o thibetseng hore batho ba se ke ba cheha litlhapi le ho nka letho ho tsona. Tlaleho eo e boetse e re: “Ho ka nka selemo ho isa ho tse tšeletseng hore lintho tse seng li le kotsing ea ho fela li boele li eketsehe libakeng tse sirelelitsoeng, empa ha e le hore li boele li be ngata joaloka qalong, ho ka nka lilemo tse mashome.” Tlaleho e entsoeng ke Janet Gibson, e leng mookameli oa Mokhatlo oa Paballo ea Liphoofolo le Limela o Belize o re: “Ho hlakile hore libaka tse sirelelitsoeng li ka thusa hore palo ea litlhapi le limela tse phelang leoatleng e eketsehe.”
SEO U KA NAHANANG KA SONA: Na taba ea hore lintho tse phelang li khona ho phela le tlas’a maemo a thata le ho boela li ikatisa ha e bontše hore ho na le ’Mōpi ea bohlale?—Pesaleme ea 104:24, 25.
Liketso Tse Mabifi Brazil
Mokhatlo o mong oa litaba o re liketso tse mabifi li ntse li eketseha naheng ea Brazil. Ka 2012, palo ea batho ba bolailoeng e ne e le ka holimo ho 56 000, e leng e phahameng ka ho fetisisa eo Lefapha la Bophelo la Brazil le kileng la e tlaleha. Luís Sapori e leng setsebi sa litaba tsa tšireletseho, o lumela hore lipalo-palo tsena li nyoloha ka lebaka la boitšoaro bo ntseng bo hlepha. O re ha batho ba sa hlomphe melao, “ba qetella ba le mabifi ’me ba qobella batho ba bang hore ba etse seo ba se batlang.”
RE U LOME TSEBE? Bibele e ile ea bolela esale pele hore ho tla ba le nako eo lerato la ba bangata le “tla fola” ’me tlōlo ea molao e eketsehe.—Matheu 24:3, 12.