Mana trini Mungu a ruhusuo upeu na zi taãɓu ?

1. Upeu u ja jeje ?

Upeu u ja shivandreju mwa tsi, makati Shetwani a rongoa zi trambo za handra. Mwandroni, makati Mungu a umba zi malaika, kavwa ka ata malaika ya peu. Piyazo zi ka ndzikamilifu, tsena zako mu tuĩ Mungu. Ɓe vwa malaika moja, ya ja ya hima kinyume na Mungu. Iyo i ja i hiriwa Shetwani mana waye « kaɗung[a] ukweli » (Yuhani 8:44). Shetwani ako tsaha amba watru wa mu ambudu ɗe waye, ɓe tsi ɗe Mungu. A mu ambia trambo Hawa, u mutru mushe wa handra. Tsena, a mu sariɓia a mu tuĩ ɗe waye Shetwani, raha na u mu tuĩ Mungu. Adam a fanya mauri ɗe Hawa : a mu ãswi Mungu. I ãzima ya Adam i vingi zi taãɓu na i hufa. — Soma Mwandro 3:1-6, 19.

Ha u mu sariɓia Hawa a ãswi, Shetwani ɗe wa handra a endra kinyume na Mungu, ha uharaya utawalifu wa Mungu (yaani, ha urongoa amba Mungu ka stahiki a tawalie zumbe zahe). Alafu, zumbe zangina zi mu ɗungu. U wengi wa wanadamu wasu mu ɗunga Shetwani : mauri ɗe waye, kawasu vendza amba Mungu a ke ɗe u Shefu wao. Ɗe ha i namna iyo, ɗe Shetwani a rendreha u « mutawalizi [au shefu] wa li duniya ». — Soma Yuhani 14:30 ; Mivenuliyo 12:9.

2. Eɓa harimwa li ɓimbiyo la Mungu vwa shitru kayaka ya kiri ?

Ɓaãdhwi za watru wasu fikiri amba, Mwezi Mungu a umbu, rangu mwandroni, i ndjema na i mbovu. Tsena wasu fikiri amba, Mungu a angiha, au a djaãlia, kula trongo shumbe yahe (malaika au mwanadamu) itso i fanyao harimwa maesha yayo. Ɓe i Labiblu isu somedza amba, piya zitru Mungu a zi umba, zizo zi ka ndzikamilifu. Mwezi Mungu a umbu zumbe zendza ãkili zahe (zi malaika na u wanadamu), ha u zi va ushindzi wa u mu tuĩ ha namna ya kamiliha (Maeledzo ya Tawreta 32:4, 5). Mungu a ri va unafasi wa utsahua ri fanye i ndjema au ri fanye i mbovu. Unafasi unu, usu ri va i furswa ya wasi u mu onesa Mungu ya mahaɓa yatru. Ɓasi ha zizo, Mwezi Mungu ka angiha, rangu mwandroni, trongo ritso zi fanyao harimwa maesha yatru. — Soma Yakoɓu 1:13-15 ; 1 Yuhani 5:3.

3. Mana trini Mungu a ruhusuo zi taãɓu ata avasa ?

Jehovah asu ruhusu zumbe zahe, zi hime kinyume na i yezi yahe ata leo. Mana trini ? Mana Shetwani a sukuma wanadamu wa amini amba, watso jua wa hetsi au wa ãzimie, wawo wenyewe, iyo i lio ndjema au mbovu, wala tsi shartwi wa mu vulikie Mungu. Ɓasi, Mungu a wa lishia i nafasi wa dji endrese wawo wenyewe (Mungulidza 7:29 ; 8:9). Ina maha alifu sita (6 000) rangu u wanadamu wa dji endresao, ɓe risu ona amba upeu tu ɗe u lio : makizi mbeli kawa shindra wa toa zi kondro, ukatili, udhuluma na mawaɗe. — Soma Yeremiya 10:23 ; Ulawa 9:16.

Kinyume na zi sirikali za wanadamu, i sirikali ya Mungu isu vingia tanafu watru wa i kuɓalio (Isaya 48:17, 18). Tsi hale, Jehovah atso angamidza piya zi sirikali za u wanadamu. Ɓasi watru wa tsahuao wa tawaliwe na Jehovah, wawo tu ɗe watso eshio shivandreju mwa tsi (Isaya 11:9). — Soma Danieli 2:44.

Ngalia i video Mana trini Mungu a ruhusuo zi taãɓu ?

4. I suɓira ya Mungu isu ri va nafasi ri fanye trini ?

I suɓira ya Mungu, isu ri va, i nafasi ri onese amba risu vendza ri tawaliwe na Mungu, au na u wanadamu. Risu onesa mutsahulio watru ha i namna yatru ri eshio. Shetwani a rongoa amba, kavu ata mutru atso mu rumishiao Jehovah ha mahaɓa ya kweli. I Labiblu isu lagua ju la mutrume ako hiriwa Ayuɓa, aka a kadzwa trambo zizo, ɓe a shindri a onesa amba, ako mu vendza Jehovah ha kweli. Ɓasi wawe ? Eɓa watso vendza u onese amba, zizo Shetwani a rongoa zizo trambo ? Utso shindra ! — Soma Ayuɓa 1:8-12 ; 27:5 ; Nyasiya 27:11.

5. Namna jeje ɗe ritso juao ri mu tsahue Mungu a ke Shefu watru ?

Namna jeje ɗe ritso mu tsahuao Mungu a ke Shefu watru ? Ha uzunguha i imbada ya kweli, i lio harimwa Urongozi wahe i Labiblu, tsena ri i trie ndziani harimwa maesha yatru (Yuhani 4:23). Ritso mu ɓauha Shetwani ile asu ke shefu watru, ha u dji ɓausa na i siasa na i kondro, mauri ɗe mutrume Insa. — Soma Yuhani 17:14.

Shetwani u rumia ushindzi wahe, ha usukuma watru wa fanye taɓia za peu, mauri zina na zangina. Neka risu latsa taɓia za peu zizo, mukini wandzani watru na udjama watru watso ri tseshea, au watso ka kinyume na wasi (1 Monye 4:3, 4). I lazimu ri tsahue : Eɓa ritso zunguha ri ke wandzani na watru wa ri tsesheao, au ri ke wandzani na watru wa mu vendzao Mungu ? Eɓa ritso ɗunga zi sharia zendza hikima na mahaɓa za Mungu ? Neka risu zi ɗunga, ritso onesa amba Shetwani a rongoa trambo makati a rongoa amba, wanadamu kawatso mu tuĩ Mungu neka wa harimwa taãɓu. — Soma 1 Makorintiyo 6:9, 10 ; 15:33.

Mungu u vendza wanadamu, na mahaɓa yahe yasu ri va yakini amba upeu na zi taãɓu zitso zia. Watru wa liona imani na Mungu, tsena wa kuɓalio sirikali yahe, watso eshi daharituka shivandreju mwa tsi. — Soma Yuhani 3:16.