FUVU LA 4

Mungu ɗe mbani ?

U WANADAMU u ambudu miungu mengi. Ɓe, i Miangishio mitwaharifu u somedza amba vwa Mungu u moja tu ɗe wa kweli. Waye u moja tu, waye muɓole raha na zi zumbe piya, tsena waye kana mwandro wala mwiso. Waye ɗe a umba piya zizo zi lio mbinguni na shivandreju mwa tsi. A ri va ya maesha. Ɓasi waye tu ɗe a stahiki imbada yatru.

Mutrume Musa a siki ya maɓao ya ɓwe ya liona zi sharia kumi — I sharia ya volwa mutrume Musa i hiriwa « urongozi wa rongolwa na malaika ».

Mwezi Mungu ana dzina. Dzina lahe, JEHOVAH. A mu eledza fetre mutrume Musa : « Ini ɗe utso ambiao Mabani Israila : “Jehovah u Mungu wa wadzaɗe wanyu, u Mungu wa Iɓrahima, u Mungu wa Isihaka, na u Mungu wa Yaankuɓu ɗe a ni veleha hanyuju.” Lilo ɗe li dzina langu daiman abada, tsena ɗe ha li dzina lilo ɗe ya lazimu mu ni nahane wanyu mu lio leo, na wawo watso dzalwao meso » (Ulawa 3:15). Li dzina la Jehovah lisu parihana kadiri ya mara alifu saɓa (7 000) harimwa i Miangishio mitwaharifu. Harimwa Zaɓur 83:18, ri su soma wajau ju la Mungu amba : « Piya nawa jue amba wawe, u lio amba li dzina laho ɗe Jehovah, wawe weke waho tu, ɗe u lio Monyewe Uju raha na Uju harimwa i shivandre ya tsi piya ! »

« Rouleau de la mer Morte » ya parihana i liona li dzina la Mungu — Zio za hale za Miangishio za angihwa ha mihono zi liona li dzina la Mungu (« Rouleau de la Mer Morte »)

Kavu ata mutru a paro mu ona Mungu. Mwezi Mungu a mu eledza mutrume Musa : « Kutso jua wa ona sura yangu, mana kavwa si ata mwanadamu atso ni onao ne a ɓaki hayi » (Ulawa 33:20). Mungu u eshi mbinguni, kavu ata mwanadamu atso shindrao a mu one. Mutru ufanya na urumia sanamwe, pitsha au foto, au mufano wa shitru yangina itso kao yotsi ile a mu ambudu Mungu, iyo trongo mbovu swafi. Jehovah Mungu a mu mba mutrume Musa amuri ini : « Kwa lazimu wa fanya sanamwe wala wa fanya shitru itso kao yotsi i fanao na shitru i lio uju mbinguni, au i lio utsini shivandreju mwa tsi, au i lio uzimu majini. Kwa lazimu wa sudjudia zitru mauri ɗe zizo, wala wa dji lisha u vingwe ile u zi rumishie, mana wami, Jehovah Mungu waho, wami Mungu ni farudhwishiao mutru a dji fungatse ɗe na wami tu » (Ulawa 20:2-5). Mungu a mu ambia tsena mutrume Isaya : « Wami ɗe Jehovah. Lilo ɗe li dzina langu ; tsitso va utukufu wangu mutru atso kao wotsi, wala swifa zangu masanamwe » (Isaya 42:8).

Ɓaãdhwi ya watru u amini Mungu, ɓe u fikiri amba mutru katso shindra a mu jua Mungu, wala a ka kariɓu na waye ; haoju, mutru a lazimu a mu rie Mungu, raha na u mu vendza. Usu fikiri jeje ? Eɓa Mungu u shahiliha na wawe ? Eɓa utso shindra u mu jue swafi, tsena u ke kariɓu na waye ? Nari ngalie iyo i Miangishio i venuao ju la zi swifa za Mungu.

I ruhul’kudusi na zi malaika za Mungu

Namna jeje ɗe Mungu a fanyao uvendza yahe ? Vwa wakati, Waye u veleha ruhul’kudusi yahe. I ruhul’kudusi, iyo tsi mutru wala tsi malaika, ɓe ɗe nguvu yahe kai onehana, ushindzi wahe kauna mupaka, Mungu a u rumiao ile a fanye uvendza yahe. Mungu a rumia nguvu ini na ushindzi unu, ile a umbe zi mbingu na i shivandre ya tsi. « Ha urongozi wa Jehovah, zi mbingu zi fanyishiha, na ha zi pumu za hanyoni hahe piya zizo zi lio mbinguni » (Zaɓur 33:6). Ha ulawana na Mwandro 1:2, makati i lio amba shivandre ya tsi ika i vihidziwa raha na maji, tsena Mungu ako i panga ile u wanadamu wa eshi, « nguvu yendza zitrendrwa ya Mungu yako endra uju mwa ya maji ». Alafu Mwezi Mungu a rumia ruhul’kudusi yahe a umbu piya zitru zi eshio shivandreju mwa tsi.

Ɓe vwa wakati Mungu u rumia zi malaika, ile zi fanye uvendza yahe. A zi umbu zi eshi mbinguni vwamoja na waye. Zi malaika zina ushindzi swafi. Zizo u veleha zi haɓari za Mungu tsena u fanya hazi zangina muhimu. Ha mufano, i sharia ya volwa mutrume Musa, i hiriwa harimwa i Miangishio « marongozi yajudziwa na zi malayika ». Tsena, zi malaika u saidia u warumwa wa Mungu shivandreju mwa tsi. I Miangishio u lagua zi malaika za Mungu amba zizo « zumbe kazi onehana zi fanyao hazi ndzitukufu, za velehwa ile zi rumishie wawo watso kombolwao » (Mahebraniya 1:14, Tafaswiri ya dunia mpia ; 2:2).