Iyo Almasi u Muongozi a ri somedzao

MUNGU aka a judza amba, atso mu hetsi u Almasi a ke Muongozi wa watru piya. Ivo a juao amba mukizi mbeli uvi ɗe ri liona swafi hadja na waye, Mungu a tsahua ɗe u mwema swafi a stahiki. U Almasi a ka muongozi au mukizi mbeli jeje ? A ka muɓole wa madjeshi a kana ushindzi ? A ka mutru wa siasa ako jua a hadisi fetre ? A ka mutru muɓole wa falsafa ? Ha ulawana na i Miangishio mitwaharifu, u Almasi, a hiriwao Insa Kiristi, a ka mutrume tafauti na i mitrume piya ya ɓaki (Matiyo 23:10).

Mungu a fanya amba Insa a dzalwe mukamilifu, mutwaharifu. Tsena, Insa a kilimbia piya zi djitihadi Shetwani ako zi fanya ile a mu poteze. Mauri ɗe Mwezi Mungu, Insa a rumia ushindzi wahe, ha marongozi na ha zitrendrwa, ɓila watru u mu sika na halati. Tsena a tiɓi ha namna ya ukamilifu i haki, i hikima na ya mahaɓa ya Mungu. Nari one iyo u mufano wa Insa utso ri somedzao.

Ha ushindzi Mungu aka a mu mbawo, Insa ako saidia u watru. Ako shahiliha swafi na watru, tsena ako rumia ushindzi wahe ile a tsimidze zi hadja zao. Suku a rongoa : ‘Nisuvoreha watru wanu, mana kawasina ata shitru ya uɗya’ (Markusi 8:2). Alafu, ha midjuza, a lisi piya wawo waka wa ja wako vulikia musomo wahe.

Insa ako ngia na ulawa, ha usomedza na « [uvonesa] kula uwaɗe na ya maradhi ya kula namuna watru waka nawo » (Matiyo 4:23). Risu elewa mana trini watru wengi wako mu ɗunga. « Kula mutru akozunguha ndziya ya umupara tu amuɓambe, mana ushindzi wakolawa hahe na uwazihira piyawo » (Lukasi 6:19). Ha kweli, Insa ka ja « ha ujo rumishiwa, ɓe aja ha urumishiya na udzitowa fidiyaa afe ha ukombowa wengi wa wanadamu » (Matiyo 20:28.) Wakizi-mbeli wangavi ɗe watso kao tayari wa u dji toa fidia ha tanafu za umati wao ?

Insa ako tiɓa i haki ya Mungu. Ako tuĩ i sharia ya Mungu, tsena ako kuɓali zi mana i sharia iyo yaka ya tolwa. Mauri ɗe heli i Miangishio yaka ya rongoa, Insa a rongoa : « Ufanya uvendza yaho, wawe Mungu wangu, iyo furaha hangu, na sharia yaho ya moni hangu » (Zaɓur 40:8). Ya matadjiri na zi masikini, watru ɓaɓa na watru mama, wanatsa na watru waɓole, Insa ako wa renga piya mauri ɗe heli Mungu a wa rengao, yaani ha usheo na mastaha, ɓila ufanya tafauti. Vwa suku, maswahaɓa yahe, wa lagulia ha udziro wadzaɗe waka wa mu vingia Insa wana wao. A wa ambia : « Namulishe wanatsa wao wanijiliye, wala musuwaɓaliliye ; mana u Utawalizi wa Mungu, uwo wa watru mauri ɗe wao » (Markusi 10:14).

Insa ako tiɓa i hikima ya Mungu. Ako jua fetre i heli ya u ɓinadamu. « Akojuwa izo ziliyo rohoni ha wanadamu » (Yuhani 2:25). Ata wawo waka wa velehwa na maãdui yahe wa je wa mu zie, ne wa rongoa : « Kav̄waparo rongowa mutru mauri ɗe unu. » Hikima ini, Insa a i para ɗe havi ? A eledza : « Yi misomo niyisomedzao, yiyo tsi yangu, ɓadi ya Uwo aniv̄eleha » (Yuhani 7:16, 46).

Insa ako tiɓa mahaɓa ya Mungu. A kana poreho na wanyawe : ako sikitiha ha siɓaɓu ya zi taãɓu zao, tsena ako tsaha a wa trulidze. Vwa suku, vwa mutru a kana uwaɗe wa uenefu a mu mia : « Mutukufu, neka ukuɓali, wawe ushindro nitwaharisha. » A remwa na poreho, Insa « av̄eleha u muhono, amusiki amoesa amuambiya : “Tsikuɓali, twaharishiha !” Sa na i sa ile uwaɗe ule [wa uenefu] umuɓauha mutru ule, atwaharishiwa » (Lukasi 5:12, 13 ; Markusi 1:41, 42). Insa ako tsaha ha kweli a trulidze mutru unu.

Eɓa Insa u shahiliha wajau na wawe ? Asu djiɓu waye waye : « Namunijiliye piyanyu muliyo amba mulemewa utriha midzo miziro, na wami nitsomuv̄ani uv̄umuzi. Namutrihe mulandza wangu, muje nimufundriseni, mana roho yangu ndzitrulivu, wala wami tsi mutru nidziv̄ao daradja ; v̄av̄o mutsopara uv̄umuzi wa zi [nafusi] zanyu » (Matiyo 11:28, 29).

Insa waye ɗe u Muongozi mwema wa kweli a stahiki. Ha i daradja iyo a lionayo, asu ri lahiki ha mahaɓa na utsatsarufu : « [Namu je] nimufundriseni. » Eɓa wawe utso kuɓali mulahikio unu ? Neka ewa, uwo utso hu vinga harimwa i furaha.