Insa ɗe mbani ?

1. Insa a umbwa jeje ?

Insa ɗe i shumbe ya handra Mungu a i umba. Insa waye tsi sawa na wanadamu wasalia : ako eshi mbinguni shi malaika, kabla udzalwa yahe shivandreju mwa tsi (Yuhani 8:23). Mbinguni oho a ka, waye ka dzalwa na mutru mama, ɓe Mungu waye waye ɗe a mu umba. Iyo ɗe i mana ata a hiriwao u « Mwana » wa Mungu. Waye u hiriwa tsena « i Kalima », mana waye a ka Muvingizi makalima ya Mungu (Yuhani 1:14, Tafaswiri ya dunia mpia). Insa a renge fuvu harimwa u umbizi wa i zitru piya. — Soma Nyasiya 8:22, 23, 30 ; Makolosiya 1:15, 16.

2. Mana trini Insa a ja shivandreju mwa tsi ?

Mungu a veleha Mwana wahe shivandreju mwa tsi : a tria maesha yahe moni mwa i mimba ya Mariama, mutru mushe muyahudi a kana ɓikira yahe. Ha zizo, Insa ka sina ɓaɓa mwanadamu (Lukasi 1:30-35). Waye a ja shivandreju mwa tsi 1) ile a somedze i kweli ju la Mungu, 2) ile a ri onese, ha mufano wahe, namna ya ufanya i uvendza ya Mungu, laukana rina taãɓu, tsena 3) ile a toe fidia maesha ya kamiliha yahe ile a ri komboe. — Soma Matiyo 20:28.

3. Mana trini ra lazimu ri kombolwe ?

Shitru mutru a i livao, ile a komboe mutru a jo ulawao, u rongolwa ushuru (Ulawa 21:29, 30). Leo, risu ɗuha tsena risu fa. Ɓe zizo kaza ka harimwa u mupango wa Mungu mwandroni. Risu jua jeje ? Mungu a mu ambia mwanadamu wa handra, Adam, amba neka a ãswi (yaani, neka a fanya dhambi), atso fa. Ɓasi, djeli Adam kaka a ãswi, katso fa (Mwandro 2:16, 17 ; 5:5). I Labiblu isu ri somedza amba, ha siɓaɓu ya Adam ɗe i hufa « [ya] ngiya » u wanadamu. A aritisha wana wahe piya, li dhambi na i shifungo ya li dhambi : i hufa. Iyo ɗe i mana ya lazimu vu livwe ushuru, ile ri kombolwe na i hufa ra i ariti ha Adam. — Soma Maromu 5:12 ; 6:23.

Mbani ɗe atso shindrao a live ushuru unu, tsena a ri komboe na i hufa ? Ha ivo i lio amba kari si wakamilifu, ra hi fa wasi u liva ɗe madhambi yatru tu. Ɓasi kavu ata mutru atso shindrao a liviye munyahe madhambi yahe. — Soma Zaɓur 49:7-9.

4. Mana trini Insa a fa ?

Ha ivo i lio amba mutrume Insa a dzalwa ha midjuza, waye ka ariti li dhambi la Adam mauri ɗe wasi. Waye a ka mukamilifu, tsena ka fanya ata dhambi. Ha zizo, waye ka fa ha siɓaɓu ya madhambi yahe, ɓe a fu ha siɓaɓu ya madhambi yatru. Vwa watru wa fikirio amba, Mungu katso lisha, ata hata, u murumwa mutuĩvu wa kweli wahe a fe. Ɓe, kai si amba Mungu kako shindra a mu hifadhwi Insa ata asu fe mihononi ha maãdui yahe, ɓadi a fu ile i uvendza ya Mungu i fanyishihe. Ha u mu veleha u Mwana wahe shivandreju mwa tsi a fe ha wasi, Mungu a onesedza mahaɓa kayana mufano ha wanadamu. Insa wajau, a ri onesedza mahaɓa makati a mu tuĩ Ɓaɓahe, ha u dji toa fidia ha wasi. — Soma Yuhani 3:16 ; Maromu 5:18, 19.

Ngalia i video Mana trini Insa a fa ?

5. Insa asu fanya trini leo, tsena atso fanya trini tsi hale ?

Makati a ka shivandreju mwa tsi, Insa a vonesa wawaɗe, a ɓaãthi wafu, tsena a saidia watru wako taãɓiha. Ha zizo, a onesa iyo atso i fanyao meso oho, ha piya watru wa mu tuĩo Mungu (Matiyo 15:30, 31 ; Yuhani 5:28). Ɓaãda Insa a fa, Mungu a mu ɓaãthi shi malaika yendza nguvu (Maefeso 1:20). Makati a ɓaãthiwa, Insa a regea mbinguni. Alafu, a lindri ata mpaka Mungu a mu mba i yezi ya Ufalume, ile a tawalie i shivandre ya tsi piya (Mavingizi Risala 2:34, 35). Leo, waye a Mufalume mbinguni. Maswahaɓa yahe wasu tekeleza i haɓari ndjema ya Ufalume unu duniani piya. — Soma Danieli 7:13, 14 ; Matiyo 24:14.

Tsi hale, Insa atso rumia i yezi ya Ufalume wahe, ile a toe piya zi taãɓu na watru wa zi tsongesao. Piya watru wa triao imani yao ha Insa, tsena wa mu tuĩo, watso eshi pevoni shivandreju mwa tsi. — Soma Zaɓur 37:9-11.