MUSOMO WA 6

Tama trini ɗe i lio ju la u watru wa fa ?

1. Haɓari ndjema trini ɗe i lio ya patana na u wafu ?

Lazaro a ɓaãthiwa a lahikiwa na wananyahe Marta na Mariama

Insa a kana mwandzani wahe ako hiriwa Lazaro, ako eshi harimwa li ɗago la Ɓaitihaniya, kariɓu na li ɗago la Urusalemu, au Baitil-Makadas. Mwandzani wahe a ja a fu. Ɓe Insa a waswili Ɓaitihaniya ɗe suku ya nne. A ɗungamana na Marta na Mariama, wananyahe wa Lazaro, wa endre kaɓurini hahe. Sa ile, vu ngulidzana watru wengi. Insa a mu ɓaãthi Lazaro. Fikiria i raha na i furaha Marta na Mariama wa kanayo ! — Soma Yuhani 11:21-23, 38-44.

Marta ako jua fetre i Labiblu. Ako jua amba, ulawana na i shio ya mutrume Ayuɓa, vwa haɓari ndjema amba, Jehovah atso ɓaãthi u wafu wa je wa eshi shivandreju mwa tsi. — Soma Ayuɓa 14:14, 15.

2. Trini ɗe i ri parao ra hi fa ?

Muumbiyo wa Adam ; ufa ya Adam — Mungu a mu ambia Adam : « Wawe trotro, tsena utso regea trotro » (MWANDRO 3:19).

U wanadamu wa umbwa ha trotro (Mwandro 2:7 ; 3:19). Wasi, wanadamu, ri fanyiwa na nyama ya mwili, miɓa, na damu i zingao mwilini hatru. Ra hi fa, kavu ata shitru moni hatru, amba iyo kai fu, tsena i lawao i endre ya eshi vahanu vwangina. Mutru a hi fa, u wongo wahe uwo u fa wajau, na zi fikira zahe, na zizo zi lio rohoni hahe, zizo piya u fa wajau. U wafu kawasu eshi vahanu vutso kao votsi. Iyo ɗe i mana ata i Labiblu kaisu rongoa ata trongo, amba Lazaro a i rongoa, makati a ɓaãthiwa, amba i mu djiria makati a ka kaɓurini. — Soma Mungulidza 9:5, 6, 10.

Eɓa Mungu u tria watru moroni wa hi fa ? I Labiblu isu onesa amba, u watru wa fa kawasu eshi tsena. Ha zizo, u wafu kawasu ondwa, wala kawasu kia utungu utso kao wotsi. U musomo u rongoao amba u wafu wasu trilwa moroni, uwo unafiki ju la Mwezi Mungu, tsena uwo musomo wa trambo u mu lihidzao Mungu. Ata i fikira wiyo wiyo tu, ya uonda watru harimwa moro, u mu tukia swafi Mungu. — Soma Maeledzo ya Tawreta 12:31.

Ngalia i video Trini ɗe i ri parao ra hi fa ?

3. Eɓa u wafu watso jua wa lague na wasi ?

I Labiblu isu ri ambia amba u wafu kawasu eshi. Wawo kawasu lagua, wala kawasu kia (Zaɓur 115:17). Ha izo, neka vwa mutru a rongoao amba a ono mutru a fa, uwo ka ona swafi ɗe mutru ule a fa, wala shivuli yahe, ɓe iyo malaika ya peu ɗe a i ona. Vwa ɓaãdhwi za malaika za peu zi rengao zi sura za watru wa fa, tsena zizo u lagua na u watru (Yuda 6). Jehovah a ri ɓalidza udjereɓu uhadisi na wafu, au ri kena muparano utso kao wotsi na u wafu. — Soma Maeledzo ya Tawreta 18:10, 11.

4. Mbani ɗe atso ɓaãthiwao ?

Mutru ɓaɓa a ɓaãthiwa pevoni asu soma a mu jue Mungu, alafu asu somedza wajau watru wa ɓaãthiwa

Miliyoni za wanadamu wa fa watso ɓaãthiwa shivandreju mwa tsi. Ata ɓaãdhwi za watru amba kawako mu jua Mungu, tsena wako fanya trongo mbovu, watso ɓaãthiwa. — Soma Mavingizi Risala 24:15.

U watru watso ɓaãthiwao watso para i ɓahati wa some i kweli ju la Mungu, tsena wa onese amba wana imani ha Insa, ha u mu tuĩ (Mivenuliyo 20:11-13). Wawo watso fanyao trongo ndjema, watso para ya maesha ya dahari shivandreju mwa tsi. — Soma Yuhani 5:28, 29.

5. U muɓaãthiyo usu ri somedza trini ju la Jehovah ?

U muɓaãthiyo usu ri somedza amba Jehovah u ri vendza, tsena waye mwema na wasi, laukana kara stahiki uwema wahe. Jehovah a mu veleha u mwana wahe Insa, ile a dji toe fidia ha wasi. Ha siɓaɓu ya fidia ini, ritso jua ri pare ya maesha ya dahari pevoni shivandreju mwa tsi vanu, tsena shivandreju mwa tsi vanu ɗe vu vahanu wafu watso ɓaãthiwao. Mbani swafi ɗe watso vendza u mu one harimwa watru watso ɓaãthiwao ? — Soma Yuhani 3:16 ; Maromu 6:23.

Ile u jue zaidi, ngalia i shio Que nous enseigne la Bible ?, sura ya 6, ya 7 na ya 10, au shio titi i hiriwao Zi shivuli za u wafu, shikandre ya 28 ata ya 31.