Trini ɗe itso djiriao zi dini ?

1. Eɓa piya zi dini zizo za kweli ?

Harimwa zi dini piya, vwa watru wa tsahao wa mu ambudu Mungu ha kweli. Mwezi Mungu asu wa ona, tsena asu shahiliha na wawo. Iyo haɓari ndjema ! Ɓe vwa trongo za peu nyengi u fanyiwa na watru wa dini, au ha urumia zi dini (2 Makorintiyo 4:3, 4 ; 11:13-15). Vwa magazeti, mapitsha au mafoto, ata filimu zi onesao amba, ɓaãdhwi za dini zisu renga fuvu harimwa ukatili, u muangamidziyo wa zi kaɓila, na zi kondro. Ɓaãdhwi za mazehi ya dini wasu dhulumu, tsena vwa wasalia wasu endrelea wanatsa ha u wa fanyia taɓia za peu. U watru wa tsahao wa mu ambudu Mungu ha kweli, wawo u sikitiha swafi ha siɓaɓu ya trongo zizo ! — Soma Matiyo 24:3-5, 11, 12.

I dini ya kweli, iyo u mu tukuza Mungu, ɓe zi dini za trambo u fanya trongo zi mu tukiao Mungu. Zi dini za trambo, zisu somedza fikira kazi si harimwa i Labiblu. Mufano, zisu somedza trambo ju la Mungu, tsena ju la u wafu. Ɓe Jehovah asu tsaha amba u wanadamu wa jue zi kweli ju lahe. — Soma Ezekieli 18:4 ; 1 Timuthausu 2:3-5.

2. Trini ɗe itso djiriao zi dini ?

Vwa dini zi rongoao amba zisu mu vendza Mungu, ɓe ha kweli, zisu vendza ɗe li dunia la Shetwani. Risu jiviwa ivo ri juao amba zi dini zizo kazi shindri mu laɓa Mungu (Yakoɓu 4:4). Harimwa i Labiblu, piya zi dini za trambo zi hiriwa « Ɓaɓiluna Ɓole ». Mana trini ? Mana i dini ya trambo i andrisa ɓaãda vwa vira i daruba ya vua, wakati wa mutrume Nuhu, harimwa ɗago li hiriwao Ɓaɓiluna. Tsi hale, Mungu atso angamidza zi dini zi laɓao watru, tsena zi sikao watru nguvu wa ɗunge zi mila za trambo zazo. — Soma Mivenuliyo 17:1, 2, 5, 16, 17 ; 18:8.

Jehovah ka ɗela u watru wa tsahao wa mu ambudu ha kweli, wa lio harimwa zi dini za trambo, harimwa li dunia piya. Ha u wa somedza i kweli, asu wa ngulidza harimwa i dini ya kweli. — Soma Mika 4:2, 5.

3. U watru wa tsahao wa mu ambudu Mungu ha kweli wa lazimu wa fanye trini ?

Jehovah asu shahiliha na watru wa tsahao wa jue i kweli, tsena wa tsahao wa fanye i ndjema. Asu wa ambia wa lawe ha upesi harimwa zi dini za trambo. Mutru a mu vendzao Mungu, waye u ka tayari ulisha piya zi anmali mbovu na imani ya zi dini za trambo, ile a mu jividze. — Soma Isaya 52:11.

Harimwa i karne ya handra, makati ya maswahaɓa ya Insa wako tekeleza Urongozi wa Mungu, watru wako tsaha wa mu ambudu Mungu ha kweli, wa kuɓali Urongozi wahe ha furaha. Wa somo ha Jehovah namna yangina ya ueshi. Iyo yako wa vingia furaha, yako wa onesa i muhimu ya ya maesha, tsena yako wa va i tama ya maesha ya meso. Watru wanu wa ri va mufano mwema, mana makati wa kia ya mahaɓari mema yanu, wa mu kidza mbeli Jehovah harimwa maesha yao. — Soma 1 Matesalonika 1:8, 9 ; 2:13.

Jehovah u lahiki harimwa umati wahe u mu ambuduo ha kweli, watru wa lishao zi dini za trambo. Neka u kuɓali mulahikio mwema wahe, utso ka mwandzani wahe, utso ngia harimwa udjama wendza mahaɓa wa warumwa wahe, tsena utso para ya maesha ya dahari. — Soma Markusi 10:29, 30 ; 2 Makorintiyo 6:17, 18.

4. Namna jeje ɗe Mungu atso fanyao ile piya u watru wa eshio shivandreju mwa tsi wa ke furahani ?

Tsi hale, Mungu atso angamidza zi dini za trambo. U muangamidziyo unu, utso toa u wanadamu harimwa usongefu. Zi dini za trambo kazitso poteza tsena u watru, wala kazitso wa manisa tsena. Ɓasi, piya zumbe zendza ãkili zitso eshio mbinguni, na zizo zitso eshio shivandreju mwa tsi, zitso mu ambudu u Mungu moja wa kweli vwamoja. Iyo haɓari ndjema swafi ! — Soma Mivenuliyo 18:20, 21 ; 21:3, 4.