¿Churigá guʼírimala ramué alué Biblia nulalila?

1. ¿Chonigá resíʼlá apirigá Onorúgame ramué guʼírimala?

Jeobá, ramué Oʼnola ʼlige napu newale ramué, abé machime ju meʼtigá ramué. Abéchigó, Onorúgame ʼwe galé ʼlige ʼla repú ramué. Onorúgame newale ramué apirigá tabilé mejká ejperewa alué ʼyuga (Jeremías 10:23). Alué uʼkuchítiri resíʼlá napurigá aʼboi oʼnola guʼírimala, aʼchigóriga ramué resíʼlá napurigá Onorúgame guʼírimala (Isaías 48:17, 18). Alué rejcholi Bíbliachi uchúkame guʼírimala ramué ʼlige ju napuyeri kónali api Onorúgame nejí. Leériwa 2 Timoteo 3:16.

Alué rejcholi ʼlige Jeobá nulalila beniri ramué churigá ganíliga ejperélima ʼlige churigá ʼla narémala weʼká aʼlá tábiri pe aʼminana. Napugiti Onorúgame newale ramué, alué najkí apirigá ramué chaʼpiboa ʼwe ganíliga boʼné guʼiri. Leériwa Salmo 19:7, 11 ʼlige Apocalipsis (Revelación) 4:11.

2. ¿Churigá alué Onorúgame nila raʼíchali guʼiri ramué?

ʼLa nerú ʼla bijchiá raʼíchali Bíbliachi uchúkame, beniri napu Onorúgame najkí ramué nokiboa napuʼlige iʼkirúgame tábiri ikiá ramué. Nobi, nerú ujché jaré nulalí apirigá pe jaré tábiri (Deuteronomio 22:8). Ramué ʼwe ʼla ʼnatámili ju apirigá námipua napu alué ʼla bijchiá raʼíchali Bíbliachi uchúkame aní chonokiboli ju ramué (Proverbios 2:10-12). Alué Biblia beniri napu ralómeli ajagá mochí ju napugiti Onorúgame ajalí ʼyame ju. Ye ʼla bijchiá raʼíchali Bíbliachi chujkúgame, guʼírimala napu ʼwe aʼlá ejperéliwa. Leériwa Hechos 17:28.

3. ¿Chieri oká nulalí abé najtékame ju?

Esusi oká nulalí benírile ʼwe najtékame. Alué bajchá nulalí ruwí chonigá ramué jena gawichí mochirú: machiyá Onorúgame, apirigá galebo ʼlige nabí eʼwawa. Suwábaga napu ramué nokiá ʼla eʼwámili júkuru ye nulalí (Proverbios 3:6). Alué ralómeli ʼla eʼwásaká ye bajchá nulalí, Onorúgame amígola nímala ʼlige nabí ʼwe ganíliga ejperélima. Leériwa Mateo 22:36-38, TNM.

Ujché bilé nulalí guʼiri apirigá ramué ʼwe aʼlá sébali olawa ujché jaré ralómeli ʼyuga (1 Corintios 13:4-7). ʼLa ramué ye nulalí eʼwásaká, aʼchigóriga nokiá napurigá ʼsime ju Onorúgame alué ralómeli ʼyuga. Leériwa Mateo 7:12 ʼlige 22:39, 40, TNM.

4. ¿Churigá ʼla guʼiri ramué alué Onorúgame nulalila?

Alué Onorúgame nulalila beniri alué rejimala napuíka mochímala aʼbopi ʼwe aʼlá galegá (Colosenses 3:12-14, TNM). Onorúgame nila raʼíchali abéchigó tebú rejimala napugiti beniri napu alué newíkame nabí napuíka mochímili ju. Leériwa Génesis 2:24.

Napuʼlige ramué eʼwawa alué Onorúgame nila rejcholi abéchigó ʼla guʼiri ramué, churigá ʼla unewa alué enomí ʼlige churigá aʼlá ʼnata ganíliga mochiwa. Jaré batroni rejosia ralómeli apirigá nochámala napu eʼwásaká alué Onorúgame nulalila, ralómeli tabilé chigórame ju ʼlige ʼwe nóchame ju (Proverbios 10:4, 26; Hebreos 13:18). Abéchigó, alué Onorúgame nila raʼíchali beniri ʼla nígame níriká alué tábiri apirigá ejperé ʼla ganíliga mochiwa, napugiti Onorúgame amígola níriká abé najtékame ju, alué tábiri api resíʼlá taʼmé najtékame ju. Leériwa Mateo 6:24, 25, 33 ʼlige 1 Timoteo 6:8-10.

Alué Onorúgame nulalila, abéchigó ʼla guʼiri repumia ramué saʼpala; alué Onorúgame nulalila aní tabilé aʼlá ju ʼwe bajime níriga alué rekútame, ʼla eʼwásaká ramué ye nulalí, guʼírimala apirigá tabilé nayupua ʼlige tebúmala ramué ajalí (Proverbios 14:30; 22:24, 25; 23:20). Jeobá pe lisensia ʼya ramué apirigá ʼla umeba bajía nobi pe uʼtá neraga (Salmo 104:15; 1 Corintios 6:10, TNM). Alué Onorúgame nulalila ʼla guʼiri ramué napugiti beniri repumia napu noká ʼlige napu ʼnata (Salmo 119:97-100). Alué bijchiá Esusi oyérame eʼwawa alué Onorúgame nulalila napugiti ʼla guʼiri, nobi abé najtékame ju, ramué ʼla eʼwawa alué Onorúgame nulalila napugiti ramué ʼla nirawa Oʼnola ʼpa rewagachi ajtígame, Jeobá. Leériwa Mateo 5:14-16.