¿Churigá ejperégame nile ralómeli alué jardín Ereni anilichi?

Onorúgame nejile Arani ʼlige Eba weʼká tábiri aʼlala (Génesis 1:28)

Jeobá newale Eba, alué bajchá mukí, ʼlige ʼyale alué Arani apirigá boʼné upila nímala (Marcos 10:6, 7).

Onorúgame newale Arani ʼlige Eba ʼwe aʼlá ralómeli ʼla sébali olame nílige. Aʼboi naʼtálila ʼlige aʼboi saʼpala tabilé inígame nile tábiri chátiri.

Aʼboi ejperele alé jardín Ereni anilichi: bilena ʼwe semátiri napu bilé bakochi nerule, weʼká rojá ʼlige weʼká ajágame. Bilé paraíso nile.

Jeobá raʼíchame nílige alué ralómeli ʼyuga ʼlige benírame nílige weʼká tábiri. Nabí ejperélinalisaká alé paraíso, gepúmili nílige Onorúgame ʼlige eʼwámili nílige.

Onorúgame nulele api tabilé goʼpoa pe biʼlepi rojá rakala (Génesis 2:16, 17)

Onorúgame anele alué Arani ʼlige Eba api tabilé goʼpoa pe biʼlepi rojá rakala jardín ilile. Aʼboi goʼásaká alué rojá rakala ʼliko ʼma suwimea nile.

Bilé ánjeli ʼma tabilé najkile eʼwawa Onorúgame. Alué ánjeli chátiri Satanasi, alué Riablo ju.

Satanasi tabilé najkile apirigá eʼwawa Jeobá. Unele bilé sinowí apirigá raʼichama Eba ʼyuga ʼlige anele goʼasa alué rojá rakala tabilé mukumela. Anele api napurigá Onorúgame nímala. ¡ʼWe ʼyega raʼíchale! (Génesis 3:1-5).