LECCIONI 35
¿Tachiri netewa apirigá ʼwe aʼlá naʼtawa?
Suwábaga naʼtáriame ju napu chu ʼsiwa. Napu ramué neteme ju nejkúrime ju apirigá ʼwe aʼlá bejtewa ʼlige apirigá niwa amígola Jeobá. Kerékó, naʼtárime nímala koche bejtewa, tachiri nochawa, aʼlá newímala o tabilé. Ramué ʼwe aʼlá naʼtasa, ʼwe raʼsálagá bejtewa aminami abiena raʼsálagá asimela Jeobá.
1. ¿Churigá guʼiri mué alué Biblia apirigá ʼwe aʼlá naʼtawa?
Taʼchó ʼnátiga chu ʼsímala mué, tániwa guʼiri Jeobá. ʼLige ʼyáawa tachiri aní alué Biblia churigá ʼnata Jeobá (leériwa Proverbios 2:3-6). Iʼsínimi mué ʼla rewimela napu Jeobá ʼla nulame ju. Alarigá nisa, mué ʼla eʼwámala ju.
Nobi, napu tabilé rewisá alé Biblia bilé nulalí, ¿chu ’símala mué? Abiena Jeobá oʼtomela «alé bowechi» napu mué eʼyénamala (Isaías 48:17). ¿Churigá? Unegá ʼla bijchiá raʼíchali napu uchúkame alé Bíbliachi, arigá guʼírimala apirigá machimela chu ʼsímala mué. Ye ʼla bijchiá raʼíchali beníriame ju tachiri ʼnata Jeobá aminami tachiri chu nili. Ye beníriame ju napu ramué leérisa alé Bíbliachi churigá simírale ʼya. Napu ramué ʼwe ʼla namsa tachiri ʼnata Jeobá, alarigá nejkúrime ju ramué apirigá netewa napu boʼné galeme ju.
2. ¿Tachiri naʼtámala mué taʼchó ʼnátiga chu ʼsímala?
Alué Biblia aní napu «alué rió ʼwe ʼla rejchirúgame ka, alueka napusí ʼma ʼla etesa, aʼlige kulí bijchígame ju alarigá ko bilé raʼíchali» (Proverbios 14:15). Ye aniame ju taʼchó ʼnátiga chu ʼsímala, bajchá naʼtawa jaré tábiri. Napuʼlige mué ʼnátachi, rukériwa: «¿Tachiri ʼla bijchiá raʼíchali napu uchúkame ju alé Bíbliachi nejkuri neʼchí? ¿Tachiri netémala ne apirigá ʼwe aʼlá asimela? ¿Tachiri naʼtámala ujché jaré ralámuli? ʼLige, abé najtékame, ¿aʼlá raʼsálagá asimela Jeobá?» (Deuteronomio 32:29).
Pe Onorúgame umébame ju anigá tachiri ju ʼwe aʼlá ʼlige tachiri tabilé aʼlá ju. Napu ramué ʼwe aʼlá machisá napu boʼné nulame aminabi alué ʼla bijchiá raʼíchali, ʼlige eʼwánali, aʼliko ramué aʼlá naʼtámala napurigá Jeobá ʼnátame ju, ye ju iniá aʼlá konsiensia. Alué «konsiensia» anilime yolí raʼíchaga, ju napu ramué anériame ju tachiri ʼwe aʼlá ju ʼlige tabilé aʼlá ju. (Romanos 2:14, 15). Nobi, napu ʼma naʼtasa napurigá Jeobá ʼnátame ju, ʼliko aʼlá nejkúrimala apirigá ʼwe aʼlá naʼtawa ʼlige aʼlá netewa.
ABÉ BENIBOA
Eʼnewa chonigá ju ʼwe najtékame alue ʼla bijchiá raʼíchali ʼlige alué konsiensia apirigá aʼlá naʼtawa ʼlige ʼwe aʼlá netewa.
3. Eʼwawa napu aní alué Biblia
¿Churigá guʼiri ramué alué ʼla bijchiá raʼíchali apirigá ʼwe aʼlá naʼtawa? Eʼnewa alué VIDEO ʼlige raʼichawa ye:
¿Tachiri ju libre albedrío?
¿Chonigá Jeobá aʼré aʼpílipi apirigá netémala napu ramué najkí?
¿Tachiri nejí Onorúgame apirigá ramué ʼwe aʼlá naʼtawa napu neténali?
Eʼnewa bilé ʼla bijchiá raʼíchali chujkúgame alé Bíbliachi, leériwa Efesios 5:15, 16, TNM. ʼLige raʼichawa churigá «ʼwe aʼlá unewa alué peʼwera» apirigá...
... leéria alué Biblia nabí rawé.
... niwa ʼwe aʼlá gunala ʼlige oʼnola ʼlige ʼkuchi.
... simawa alué napuíkachi alé kongregación.
4. Beniboa apirigá naʼtawa napurigá ʼnátame ju Jeobá alarigá ʼwe aʼlá naʼtawa
Napu nerusa bilé nulalí chujkúgame alé Bíbliachi, tabilé nóchame ju machiá napu ramué netémala. Nobi, ¿napu tabilé nerusa? Eʼnewa alué VIDEO ʼlige raʼichawa ye:
Napurigá eteru alé vidéochi, ¿tachiri netele alué ermana apirigá ʼwe aʼlá naʼtámala apirigá netémala napu Jeobá galeme ju?
¿Chonigá tániwa bilé rejcholi bilé ralámuli nobi tabilé aʼregá napu naʼtámala napu ramué netémala? Leériwa Hebreos 5:14 ʼlige raʼichawa ye:
Rekó tabilé nóchali ju rukea ujché jaré napu ramué netémala ju, ¿chonigá ʼwe aʼlá ju aʼpílipi náume chieri ʼwe aʼlá ka?
¿Tachiri nejkúrime nígame niru apirigá beniboa ʼnátiga napurigá ʼnátame ju Jeobá apirigá ʼwe aʼlá naʼtawa?
Alué konsiensia ju apirigá bilé mapa napu anime ju koche simawa ju.
5. Niraga etewa napu uché jaré ʼnátame ju
Napugiti suwábaga seʼwinátiri niru, alekeri naʼtáriame ju seʼwinátiri. ¿Churigá ramué ʼla niraga etériame ju napu ujché jaré ʼnátame ju? Eʼnewa oká ejemplo.
Ejemplo 1: Bilé ermana galeme ju ujchegá alué makiyaje simime ju ujché bilena kongregación koche weʼká ermana tabilé galeme ju makiyaje apirigá ujché jaré unémala.
Leériwa Romanos 15:1 ʼlige 1 Corintios 10:23, 24, ʼlige raʼichawa ye:
Napurigá ʼma leeru ye bersíkulo, ¿tachiri chu ʼsímala alué ermana? Muégó, ¿chu ʼsímala mué bilé ralámuli tabilé aʼlá etésaká napu mué ʼwe aʼlá eté?
Ejemplo 2: Bilé ermano ʼwe aʼlá machí napu alué Biblia tabilé sulí apirigá bajiwa peʼtá wariente, nobi boʼné tabilé ʼwesi bajínali. Bilé rawé bayérame ju bilena piesta ujché jaré ermano ʼyuga ʼlige alé eteme ju ujché jaré ermano bajiga.
Leériwa Eclesiastés 7:16 ʼlige Romanos 14:1, 10, ʼlige raʼichawa ye:
Napurigá ʼma leeru ye bersíkulo, ¿tachiri chu ʼsímala alué ermano? Muégó, ¿chu ʼsímala mué bilé ralámuli tabilé aʼlá etésaká napu mué ʼwe aʼlá eté?
¿Chu ʼsímala apirigá ʼwe aʼlá naʼtámala?
1. Tániwa Jeobá apirigá guʼiri chu ʼsímala mué (Santiago 1:5).
2. ʼYáawa raʼíchali alé Bíbliachi ʼlige ujché jaré oselí bíbliko apirigá rewimela alué ʼla bijchiá raʼíchali api raʼichámala ju napu mué machinale. Abiena rukewa ujché jaré ermano abé machime ju.
3. Naʼtawa chu nílimala mué ʼlige ujché jaré napu mué netesa bilé tábiri.
JARÉ RALÁMULI ANÍ: «Mué netewa napu mué neténali. ¡Rekó alué ralámuli weʼká ʼnátame ju, tabilé niraga etewa!».
¿Chonigá ramué ʼwe najtékame etémili ju napu ʼnátame ju Onorúgame ʼlige ujché jaré ralámuli?
ABÉ NAJTÉKAME
Ramué ʼla ʼyáasaká apirigá machináliga tachiri ’nátame ju Jeobá ʼlige bajchá naʼtásaká taʼchó netégachi bilé tábiri ʼla guʼírimala ujché jaré o najsibúmala, ʼliko ʼwe aʼlá netériame nímala.
Api mué ʼma benile
¿Tachiri guʼírimala mué apirigá netémala napu Onorúgame galeme ju?
¿Churigá benimela mué apirigá naʼtámala napurigá ʼnátame ju Jeobá?
¿Churigá etériame nímala napu mué ʼla niraga eteme ju napu ujché jaré ʼnátame ju?
UCHÉ RAJPÉ ʼYÁAWA
¿Tachiri mué aʼlá naʼtámala ʼlige aʼlá netémala apirigá aʼbeka mochiwa Jeobá si?
«Aʼlá naʼtawa ʼlige aʼlá netewa apirigá ʼla nirawa Onorúgame» (La Atalaya, 15 de abril de 2011)
Abé beníriwa churigá Jeobá nejí ramé alué rejcholi.
Eʼnewa tachiri guʼírale bilé rió apirigá ʼsímala bilé ʼwe nóchali nile.
Eʼnewa churigá raʼsáláwa Jeobá napu tabilé nerusa bilé nulalí raʼíchame ju napu ramué machinale.