LECCIONI 46

¿Chonigá mué najátimala Onorúgame ʼlige rewarámala?

Edición impresa

Napuʼlige bilé ralámuli ʼma ʼnátiga Jeobá najátome, raʼíchame ju Onorúgame si anegá pe biʼlepi nerámala boʼné ʼlige abé aʼlá najtékame ju newá napu Onorúgame najkí. (Salmo 40:8). Napu bilé ralámuli ʼma rewarasa, ʼliko ʼma etériame ju ʼma oyérnali Onorúgame. Napu ramué ʼma najátisa Jeobá, ju ʼwe najtékame. Jipe bejtériame nímala ʼwe seʼwinátiri. ¿Chiri guʼírimala mué apirigá arigá netémala?

1. ¿Chonigá ramué najátimala Jeobá?

Ramué galeme ju Jeobá alekeri najátaliame ju (1 Juan 4:10, 19). Alué Biblia aní ramué: «ʼWe galewa Onorúgame suwábaga sulálate, suwábaga alawálate ʼlige suwábaga naʼtálite ʼlige suwábaga aʼwalite» (Marcos 12:30, TNM). Etériame ju ramué ʼwe galeme Jeobá napu ramué raʼíchame ju ʼlige napu ramué neteme ju. Abalieri napu ju oká ralámuli tabilé newíkame ʼwe galeme, ʼliko ʼnátame ju newímala, arigá ju napuʼlige ramué ʼwe galesa Jeobá, ʼliko naʼtámala najátimala boʼné ʼlige rewarámala.

2. ¿Tachiri tábiri ʼwe aʼlá nejime ju Jeobá alué Testigo ʼma rewarágame?

Napu mué ʼma rewarasa, ʼliko mué ʼma nímala Jeobá rejimala, alué rejimala ʼwe raʼsálagá. ʼLiko mué nílimala alué galériame napu Onorúgame nejí, nímala ʼwe seʼwinátiri nílime ʼlige mué abé aʼbeka asimela Onorúgame si (leériwa Malaquías 3:16-18). ʼLiko nígame nisa Jeobá apirigá bilé Oʼnó ʼlige abiena mué nígame niwa bilé rejimala napu nerú bochígame gawichí, galeme ju Onorúgame ʼlige abiena mué (leériwa Marcos 10:29, 30). Nobi, taʼchó rewaraga, bajchá ujché jaré tábiri mué ʼsímala ju. Bajchá machimela ju Jeobá ʼlige galémala ju, ʼlige etériame nímala mué aʼlá bijchígame ju boʼné Ranala. ʼLige ʼma nujubá, anémala mué Jeobá ʼma najkí najátamala nabí rawé. Mué suwábaga ye netésaká, ʼliko mué ʼma rewarámala, ʼliko mué ʼma umebámala nabí ʼwe raʼsálagá bejtémala. Alué Onorúgame Raʼíchala aní: «Alué rewarálime [...] jipe guʼíriga ajtí ʼeme apirigá tabilé mukuboa» (1 Pedro 3:21, TNM).

ABÉ BENIBOA

Eʼnewa chonigá ju ʼwe najtékame napu mué najátimala Jeobá ʼlige rewarámala.

3. Suwábaga naʼtámala chieri najátowa

ʼWe ʼya alé Israeli anilichi, alué ralámuli ʼnátame nile aʼboi umébame nile najátame alué Jeobá ʼlige abiena alue riosi tabilé ʼla bijchiá, Baali rewégame. Tabilé ʼwe aʼlá ʼnátiga mochile. ʼLige Jeobá júlale alue Elíasi apirigá rejcholi ruyémala apirigá aʼboi ku ʼla naʼtámala. Leériwa 1 Reyes 18:21 ʼlige raʼichawa ye:

ʼLiko, ¿tachiri ʼnátale alué ralámuli Israeli ejperégame?

Napurigá alué israelita, arigá ramué naʼtawa chieri najátomala nímala. Leériwa Lucas 16:13 ʼlige raʼichawa ye:

¿Chonigá tabilé ʼwe aʼlá ju nirámala Jeobá ʼlige abaʼlige ujché jaré tábiri?
¿Churigá etériwa ramué alué Jeobá ramué najátimala nímala pe boʼné?

4. Naʼtawa chiena galé Jeobá mué

Jaré retrato napu ju bilé rió ʼnátiga suwábaga tábiri napu Jeobá nejime ju: 1. Napu ju alué galériame napu nejí alué Onorúgame ju apirigá napu bilé eʼyela napu nejí alué galériame boʼné ranala. 2. Alué goʼame ʼwe raʼígame napu churigá ju goʼame weʼká eʼkarúgame. 3. Alué Biblia. 4. Napu Esusi mukule ramué gite.

Jeobá nejí ramué weʼká kónali ʼwe najtékame. ¿ʼLiko tachiri ʼyawa ramué Jeobá? Eʼnewa alué VIDEO.

VIDEO: Napu tachiri ramué kóniwa alué Onorúgame (3:04)

¿Churigá etériame ju napu Jeobá galeme ju ramué? Leériwa Salmo 104:14, 15 ʼlige 1 Juan 4:9, 10, ʼlige raʼichawa ye:

Suwábaga kónali napu Jeobá nejí ramué, ¿chieri abé niraga eté mué?
Napuʼlige mué naʼtasa ye kónali, ¿chu níliame ju mué Jeobá gite?

Napu bilé ralámuli nejisa bilé kónali ʼwe galériame nisa, ramué najkiaru apirigá alué ralámuli machimela ramué ʼwe galegá narele alué kónali. Leériwa Deuteronomio 16:17 ʼlige raʼichawa ye:

Napu mué naʼtasa suwábaga napu Jeobá nejime ju, ¿mué nejínale tábiri alué? ¿Tachiri ʼyánale mué?

5. Napu mué ʼma najátasa Onorúgame, boʼné nejímala weʼká tábiri ʼwe aʼlá

Weʼká ralámuli ʼnátame ju napu ʼwe machirúgame nisa, napu ʼma simisá alé eskuela unibersidad o ʼwe enomígame nisa, ʼnátame ju ʼwe raʼsálagá bejtémala. ¿ʼLa bijchiá ju alué? Eʼnewa alué VIDEO ʼlige raʼichawa ye:

VIDEO: ʼWe galeme nile napu ju alué reʼí fútbol (5:45)

Jaré retrato buyame ju alé bidéochi «ʼWe galeme nile napu ju alué reʼí fútbol: 1. Andrey uché siné beniri alué Biblia. 2. Andrey predicáriga eʼyena boʼné malala si.

Rekó alué rió reʼeme maʼchíname alé vidéochi ʼwe galeme nile alué reʼí fútbol, ¿chonigá aʼrele alué reʼí?
Boʼné najátanale Jeobá tabilé alué reʼí fútbol. ¿Mué mayé boʼné ʼwe aʼlá ʼnátale? ¿Chonigá?

Napu ʼya taʼchó kristiano nile, alué apóstoli Páulo bilé nóchali ʼwe najtékame inígame nile. Boʼné benile alué nulalí juría bilé benírame ʼyuga ʼwe machíariame nile bochígame. Nobi, suwábaga aʼrele boʼné apirigá kristiano gainámala. ¿Weʼká ʼnátale boʼné napu boʼné netele? Leériwa Filipenses 3:8 ʼlige raʼichawa ye:

¿Chonigá anile alué Páulo suwábaga napu boʼné netele napu ʼya taʼchó kristiano nile «pe napurigá repuga nile mi mejkami pasime»?
¿Tachiri mele napu boʼné aʼrele?
¿Mué mayé napu mué boʼné ʼwe aʼlá bejtégame nímala mué nirasa Jeobá? ¿Chonigá arigá ʼnáta mué?