LECCIONI 49
Churigá mué inímala rejimala raʼsálagá (1 chojkena)
Napu aʼlige aʼboi newílachi, alué napu aʼboi chu nílime mayeme ju nabí rawé, alarigá nímala ʼwe raʼsáláme. Aʼlá gainárime ju netea. Ye ʼwe aʼlá machime ju alué kristiano napu newíkame ju weʼká bamí ʼlige ʼwe nocha mochí napu aní alué Biblia.
1. ¿Tachiri rejcholi ʼya alué Biblia napu ju alué gunala?
Jeobá ajchale alué gunala apirigá nulame nímala apirigá oʼtomela boʼné bejtélachi (leériwa Efesios 5:23). Jeobá najkí apirigá naʼtámala napu nímala aʼlá apirigá guʼírimala boʼné rejimala. Alué Biblia ʼya rejcholi napu ju alué gunala: «ʼWe ʼla galewa ʼemi alué mukí boʼné ʼyula» (Efesios 5:25). ¿Tachiri aniárime ju ye? Bilé gunala ʼwe naʼtemame ʼwe ʼla niraga eteme ju boʼné upila, napu galílachi mochígachi ʼlige ujché jaré ralámuli ʼyuga. Boʼné ʼwe ʼla repume ju ʼlige neteme ju ʼwe aʼlá apirigá ʼwe raʼsálagá asimela ʼlige ʼyame ju napu boʼné resí ʼla ajtígachi (1 Timoteo 5:8). Abé najtékame boʼné ʼla guʼírame ju apirigá abé aʼbeka asimela Jeobá si (Mateo 4:4). Neteme ju oracioni ʼlige leériame ju alué Biblia boʼné upila si. Bilé gunala ʼwe aʼlá repusa boʼné upila, ju amígola Jeobá (leériwa 1 Pedro 3:7).
2. ¿Tachiri rejcholi ʼya alué Biblia napu ju alué upila?
Alué Onorúgame Raʼíchala aniárime ju alué upila «ʼwe ʼla nirámili júkuru boʼné ʼyula» (Efesios 5:33). ¿Churigá netémala ju ye? ʼNátiga napu ʼwe aʼlá neteme ju boʼné gunala ʼlige ʼwe ʼla nóchame ju apirigá repúmala boʼné upila ʼlige boʼné ʼkúchila. Abiena ʼwe niraga etega guʼíriga apirigá ʼwe aʼlá netémala ʼlige nejega ʼwe aʼlá boʼné si, ʼlige raʼíchiga ʼwe aʼlá napu ju boʼné rekó tabilé najátame nisa Jeobá.
3. ¿Churigá abé aʼwágame gainámala alué newíkame napu ju upila ʼlige gunala?
Alué Biblia aní napu ju alué newíkame: «Okaka ʼla biʼlepi ʼnátili naʼtámili ko» (Mateo 19:5). Ye aniárime ju, okánika ʼwe nochámala ju apirigá tabilé rojanámala aʼboi. Ye netériame ju abé napuíka mochiga ʼlige raʼíchiga napu aʼboi ʼnátame ju ʼlige aʼboi chu níliga mochí. Tabilé nerú uchechi bilé abé najtékame pe Jeobá ʼlige aʼboi gunala. Okánika ʼwe aʼlá repume ju apirigá tabilé ʼwe aʼbeka mochímala uchechi bilé si.
ABÉ BENIBOA
Eʼnewa tachiri bijchiá raʼíchali uchúkame alé Bíbliachi guʼíriame ju apirigá aʼwágame gainámala alué newíliame.
4. Napu ju gunala, galegá mochiwa ʼlige repuka mué upila
Alué Biblia aní «bilé rió ʼwe galeme ju boʼné, alarigá galémili júkuruchigó alué boʼné upila» (Efesios 5:28, 29). ¿Tachiri aniárime ju ye? Eʼnewa alué VIDEO ʼlige raʼichawa ye:
¿Churigá eʼnériame ju alué gunala napu galeme ju ʼlige repume ju boʼné upila?
Leériwa Colosenses 3:12 ʼlige raʼichawa ye:
¿Churigá etérime nímala ju bilé gunala napu najátiga ye rejcholi?
5. Napu ju upila, galegá mochiwa ʼlige niraga mué gunala
Alué Biblia oilárime ju alué upila apirigá niraga etémala boʼné gunala, rekó boʼné tabilé najátame ju Jeobá. Leériwa 1 Pedro 3:1, 2 ʼlige raʼichawa ye:
Mué gunégame nisa tabilé najátame ju Onorúgame, ʼwe najkí napu najátamala Jeobá ¿bijchiá? ¿Churigá guʼírimala mué? ¿Predikáriga nabí rawé o abé nímala ʼwe aʼlá mukí, ʼwe aʼlá raʼíchame ʼlige ʼwe nirame? ¿Chonigá alarigá ʼnata?
Alué gunala ʼlige upila napuíka ʼwe aʼlá ʼnátame ju. Rekó iʼsínimi alué upila tabilé naʼtámala alarigá ʼliko animela ju ʼwe kilí ʼlige ʼwe niraga napu boʼné ʼnátame ju. Boʼné machimela ju napu Jeobá najkí napu alué gunala naʼtámala ju ʼwe aʼlá napu tachiri najkí boʼné bejtélachi. ʼLiko alué upila guʼíramala ju napu boʼné gunala ʼnátale, arigá alué rejimala ʼwe raʼsálagá mochímala. Leériwa 1 Pedro 3:3-5 ʼlige raʼichawa ye:
¿Chu níliame ju Jeobá napu bilé upila ʼwe ʼla niraga eteme ju boʼné gunala?
6. Aʼlá simírimala alué naʼáutiame mué newíkame
Suwábaga newíkame naʼaume ju. Alekeri, alué gunala ʼlige upila ʼwe aʼlá nochámala ju apirigá simírimala alué naʼáutiame. Eʼnewa alué VIDEO ʼlige raʼichawa ye:
Alé vidéochi, ¿tachiri etérime nile alué gunala ʼlige upila taʼmé ʼwe napuíka mochime nile?
¿Tachiri netele apirigá aʼwágame gainámala uché siné aʼboi newíliame?
Leériwa 1 Corintios 10:24 ʼlige Colosenses 3:13. Napu ʼma leérisa aʼpili bersíkulo, raʼichawa ye:
¿Churigá guʼírame ju alué newíliame napu eʼwasa ye rejcholi?
Alué Biblia aní ʼwe niraga etewa aʼnagúpika. Ye aniárime ju napu raʼicha bilé ralámuli si ʼwe niraga eté ʼlige ʼwe aʼlá raʼichawa aʼboi si. Leériwa Romanos 12:10, TNM, ʼlige raʼichawa ye:
¿Alué gunala o upila aʼlá buwémala ju apirigá chieri bajchá nirámala aʼnagupi? ¿Chonigá alarigá ʼnáta mué?
JARÉ RALÁMULI ANÍ: «Ramué ʼma tabilé taʼmé aʼlá napuíka mochiru apirigá ʼya».
¿Churigá raʼichámala mué alué Biblia ʼwe ʼla guʼírimala aʼboi?
ABÉ NAJTÉKAME
Alué gunala ʼlige upila ʼwe raʼsálagá bejtégame aʼboi ʼla galegá nisa, ʼla niraga aʼnagupi ʼlige bajchá iligá napu anime ju alué Biblia.
Api mué ʼma benile
¿Chu ʼsímala alué gunala apirigá alué newíkame ʼwe raʼsálagá nímala?
¿Chu ʼsímala alué upila apirigá alué newíkame ʼwe raʼsálagá nímala?
Mué newíkame nisa, ¿tachiri Biblia rejcholi guʼírimala api abé aʼwágame nímala mué newíliame?
UCHÉ RAJPÉ ʼYÁAWA
Beníriwa jaré rejcholi mué apirigá guʼírimala nígame nímala bilé rejimala ʼwe raʼsálagá.
Eʼnewa bilé video wikarárime napu raʼíchame ju tábiri ʼwe aʼlá nareme nímala alué newíkame eʼwasa Onorúgame rejcholi.
Beníriwa tachiri aniárime ju niraga napu alué gunala nulame ju apirigá oʼtomela boʼné bejtélachi.
«Chonigá alué mukí ʼwe niraga etémala ju alué nulalí alué gunala» (La Atalaya, 15 de Mayo de 2010)
¿Churigá ʼla umébale gatea bilé newíkame alué cha ikile ʼlige alué rojanálime?
Chechigó siné newika mochiru cheliérabá Jeobá nejkúrile gite (5:14)